Olondaka Via Yesu Vi Kokela Valua Ocilondokua

Vosunangonga yo Kafarinau, Yesu o longisa okuti, eye ombolo yocili ya tunda kilu. Citava okuti o kasi oku amamako lolondaka a sapuila omanu vana a tekula lolombolo lolõsi okuti, va tunda kutundilo Wokalunga ko Galilea.

Yesu amisako loku popia hati: “Vakukululu yene va lia omana vekalasoko lopo va fa.” Kuenje o popia olondaka vioku sokisa hati: “Ame ndimbolo yi kasi lomuenyo ya tunda kilu. Nda umue o lia kombolo eyi, o kala lomuenyo otembo ka yi pui; momo ombolo ngeca, etimba liange, oco omanu va kuate omuenyo.”—Yoano 6:48-51.

Kotembo yonjovo yunyamo 30 K.K., Yesu wa sapuila Nikodemo okuti Suku wa sola calua oluali, kuenje wa eca Omõlaye okuti o kala Onjovoli. Pole, cilo Yesu o lombolola esilivilo lioku lia ketimba liaye, poku lekisa ekolelo kocilumba a laika oku eca. Poku ci linga omunu o pondola oku kuata omuenyo ko pui.

Omanu ka va tava kolondaka via Yesu. Kuenje va pula vati: “Omunu u o tẽla ndati oku eca etimba liaye oco tu li lie?” (Yoano 6:52) Yesu o yongola okuti, ovo va kuata elomboloko liokuti o kasi oku popia etimba liocindekaise, pole, hetimbako li letiwe. Olondaka a popia noke, vieca uvangi waco.

Yesu o popia hati: “Ocili ndu sapuili siti, ka vu moli omuenyo nda ka wa lili etimba lia Mõlomunu loku nyua osonde yaye. Wosi o lia etimba liange loku nyua osonde yange o kuata omuenyo ko pui, . . . momo etimba liange okulia kuocili, losonde yange okunyua kuocili. Wosi o lia etimba liange loku nyua osonde yange o kala vokuange, kuenje ame ñala vokuaye.”—Yoano 6:53-56.

Sokolola ovisimĩlo va Yudea va kuata eci va yeva olondaka viaco! Pamue va kala oku sima okuti, Yesu o kasi oku popia eci catiamẽla koku lia ositu yomunu ale oku va vetiya oku sinĩla Ocihandeleko ca Suku catiamẽla koku lia osonde. (Efetikilo 9:4; Ovisila 17:10, 11) Yesu ka kasi oku tukula oku lia etimba ale oku nyua osonde yi letiwe. Pole, o kasi oku lekisa okuti vosi va yongola oku kuata omuenyo ko pui, va sukila oku lekisa ekolelo kocilumba a laika oku linga, poku eca etimba liaye lia lipua kuenda osonde yaye. Valua pokati kolondonge via Yesu, ka va kuata elomboloko liovina a kasi oku longisa. Vamue va popia vati: “Ondaka eyi ya kãla; helie o tẽla oku yi yevelela?”—Yoano 6:60.

Yesu o limbuka okuti vimue pokati kolondonge viaye vi kasi oku ñuñuna omo liolondaka a popia kuenje o vi pula hati: “Ondaka eyi yu kokeli ocilondokua? Nda wa kali ndati nda wa muili Mõlomunu oku londa oku a tundile? . . . Ovina ndo sapuili ovio espiritu havio omuenyo. Pole, vamue pokati kene ka wa koleleli.” Omo liaco, olondonge vialua vi tiukila kuenje vi liwekapo oku kuama Yesu.—Yoano 6:61-64.

Yesu o pula kovapostolo vaye 12 hati: “Lene wendivo?” Petulu o tambulula hati: “A Ñala, kulie tu enda? Ove, ove o kasi lolondaka viomuenyo ko pui. Etu tua kolela kuenda tua limbuka okuti ove Una o Kola wa Suku.” (Yoano 6:67-69) Olondaka evi viekolelo vi komõhisa! Ndaño okuti Petulu kuenda ovapostolo vakuavo ka va kuatele elomboloko liwa lieci Yesu a kasi oku longisa, lopo va lekisa ekolelo.

Ndaño okuti Yesu wa sanjukila etambululo lia Petulu, pole, o pula hati: “Siti ndo nõli ekũi la vavali? Umue pokati kene o kasi ndomakuli.” (Yoano 6:70) Omunu waco Yesu a kasi oku tukula, Yuda Isikariote. Citava okuti, Yesu wa limbuka ale okuti Yuda o kasi oku kuata ovisimĩlo ka via sungulukile.

Ndaño ndoco, Yesu o sanjuka calua poku mola okuti Petulu kuenda ovapostolo vakuavo, ka va liwekelepo oku u kuama loku lingila kumosi upange woku popela ovimuenyo viomanu.