Yehova O Kuatisa Ava Vo Kolela

“[A Yehova,] ocisola cove ka ci pui, locili cove, vi silamele oloneke viosi.” ​—⁠OSAMO 40:⁠11.

1. Soma Daviti wa pingile nye ku Yehova? Yehova oka tẽlisa ndati epingililo liaye?

DAVITI una wa kala osoma ya va Isareli, wa ‘kolelele ku Yehova.’ Kuenje, wa vetiyiwa oku popia okuti, Yehova wa ‘vonguila etũi kokuaye, kuenda wa yeva ohutililo yaye yoku pinga ekuatiso.’ (Osamo 40:⁠1) Daviti wa muile ndomo Yehova a enda oku kuatisa omanu vana vo sole. Omo liaco, wa pinga kokuaye oco o kuatise. (Osamo 40:​11) Eye o kasi pokati komanu vakuekolelo vana va lavoka epinduko lia velapo. Kuenje oka tambula onima Yehova a likuminya komanu vaye. (Va Heveru 11:​32-​35) Eye o kuete elavoko liwa. Kuenda Onduko yaye ya sonehiwa ‘velivulu lia Yehova.’​—⁠Malakiya 3:⁠16.

2. Oku solekela omuenyo wetu ku Yehova ci lomboloka nye?

² Omanu vana vakuekolelo va tukuiwa kelivulu lia Va Heveru kocipama 11, va kala mulo voluali osimbu handi Yesu keyile. Pole, va tẽlisa olondaka Yesu eya oku popia hati: “U o sole omuenyo waye u pesela, kuenje u o suvuka omuenyo waye voluali lulo u solekela komuenyo ko pui.” (Yoano 12:​25) Oku solekela omuenyo wetu ku Yehova, ka ci lomboloka oku popeliwa kovitangi kuenda kelambalalo. Pole, ci lomboloka oku tu teyuila konepa yespiritu oco tu amameko oku kala vocisoko caye.

3. Uvangi we u lekisa okuti Yesu wa kuatisiwa la Yehova? Onima ye a tambula noke?

³ Yesu ovanyali vaye vo suvukile calua, kuenje noke vo pakula kolofa. Pole, esuvu liaco ka lia pongoluile ocipango ca Yehova coku teyuila Mesiya. (Isaya 42:​1-6) Epinduko lia Yesu keteke liatatu, lia lekisa okuti, Yehova wa yeva ondaka yaye yoku pinga ekuatiso ndeci a kuatisile Daviti. Omo liaco, Yehova wa eca unene ku Yesu woku pandikisa kohali. (Mateo 26:​39) Yesu omo lioku solekela omuenyo waye ku Yehova, wa tambula omuenyo ko pui kilu. Kuenje omanu vana va kolela kocilumba caye cocisembi, vaka kuatavo omuenyo ko pui.

4. Nye Yehova a likuminya Kakristão olombuavekua kuenda ‘kolomeme vikuavo’?

⁴ Koloneke vilo, tu sukilavo oku kuata ekolelo liokuti, Yehova o popela omanu vaye ndeci a popelele Daviti la Yesu. (Tiago 1:​17) Olombuavekua via Yesu vi kasi handi palo posi, vi pondola oku kolela kohuminyo ya Yehova wa popia hati: “Ocipiñalo ka ci taki, haico ca pua atondelo, . . . co solekiwili kilu. Omo vu kasi lekolelo, oco unene wa Suku u vu lava toke vu piñala epopelo li tãilili ale oku situluiwa koloneke via sulako.” (1 Petulu 1:​4, 5) “Olomeme vikuavo” vi kuete elavoko lioku kala palo posi, via kolelavo ku Yehova. Vonduko yukualosamo Yehova wa likuminya hati: “Soli Yehova, vosi ene alosandu viaye. Yehova o lava [vakuacili].”​—⁠Yoano 10:16; Osamo 31:⁠23.

Yehova wa va Teyuila Konepa Yespiritu

5, 6. (a) Koloneke vilo, Yehova wa siata oku lava ndati omanu vaye? (b) Olombuavekua vi kuete ukamba we la Yehova? Onepa yalua yomanu vaka kala palo posi, va lavoka oku tambula nye?

⁵ Koloneke vilo, Yehova wa siata oku linga eliangiliyo lioku lava omanu vaye konepa yespiritu. Ndaño okuti Yehova ka teyuila omanu vaye kelambalalo kuenda kovitangi vikuavo, pole o va ĩha ongusu yoku pandikisa. Kuenda o va kuatisa loku va vetiya oco vamameko oku kuata ukamba laye. Pole, ukamba waco u tunda koku kolela kuavo kocilumba cocisembi ca Yesu. Vamue pokati Kakristão vaco, va nõliwa lespiritu lia Yehova oco va viale la Yesu kilu. Ovo va tendiwa okuti vakuesunga kuenje va linga omãla va Suku. Kokuavo ku tẽlisiwa olondaka Viembimbiliya vi popia hati: “Wa tu popela kuviali wowelema. Wa tu sondoluila kuviali womõlaye wa soliwa. Vomõlaye omo tu kuetele eyovo [okuti], olio ongecelo yakandu.”​—⁠Va Kolosai 1:​13, 14.

⁶ Onepa yalua yomanu, va pondolavo oku kuata ekolelo lioku kuatisiwa locilumba ca Yesu. Embimbiliya li popia hati: “Mõlomanu layevo keyilile oku vumbiwa, te oku vumba kuenda oku eca omuenyo waye ndocilumba coku yovola va lua.” (Marko 10:​45) Akristão vaco va lavoka oku tambula onima ‘yeyovo liulamba womãla va Suku.’ (Va Roma 8:​21) Omo liaco, va likolisilako oku lava loku pamisa ukamba wavo la Yehova.

7. Koloneke vilo, Yehova wa siata oku lava ndati ekalo liomanu vaye konepa yespiritu?

⁷ Yehova wa siata oku lava ekalo liomanu vaye poku linga esokiyo lioku va longisa ovina viespiritu. Elongiso liaco li va kuatisa oku kũlĩha ocili condaka yaye. Yehova wa siatavo oku eca olonumbi kokuavo lekuatiso Liondaka yaye, locisoko caye kuenda lespiritu sandu liaye. Omo lioku kuama olonumbi ‘viukuenje wa lunguka,’ omanu va Suku va kasi ndepata limuamue voluali luosi. Ukuenje wa lunguka ka siatele lika oku eca okulia kuespiritu. Pole wa siatavo oku eca ekuatiso lio ketimba komanu vosi va kasi vocisoko ca Yehova.​—⁠Mateo 24:⁠45.

8. Ekolelo lie Yehova a kuetele omanu vaye? Nye a va likuminya?

⁸ Yesu eci a talisiwa ohali lovanyali vaye, Yehova koteyuilile kohali yaco. Cimuamue haco a pondola oku linga Lakristão koloneke vilo. Pole, eci ka ci lekisa okuti Yehova ka kapeleko omanu vaye. Eye wa kolela okuti epandi liavo li lekisa okuti va nolapo oku teyuila uviali waye. (Yovi 1:​8-12; Olosapo 27:​11) Yehova lalimue eteke aka ivala omanu vana vo kolela. “Momo [eye] o sole esunga kuenda ka yanduluka olosandu viaye. Vakuesunga va tatiwa oloneke viosi.”​—⁠Osamo 37:⁠28.

Oku Laviwa Lohenda ya Yehova Kuenda Locili Caye

9, 10. (a) Yehova o lava ndati omanu vaye locili caye? (b) Embimbiliya li lekisa ndati okuti Yehova o lava omanu vaye lohenda yaye?

⁹ Daviti vohutililo a linga Vosamo 40, wa pinga ku Yehova oco o kuatise lohenda kuenda locili caye. Yehova omo liocili caye loku sola kuaye esunga, wa siata oku situlula ciwa olonumbi viaye. Omanu vana va pokola kolonumbi viaco, va siata oku li teyuila kasakalalo, kusumba kuenda kovitangi vikuavo violuali lulo. Etu tua siata oku liteyuila kovitangi vi tunda koku sipa eliamba, kuholua, kukahonga kuenda kungangala. Kuli omanu vamue okuti olonjanja vimue va siata oku yapuka vonjila ya Yehova ndeci ca pitile la Daviti. Omanu vaco va sukila oku kolela okuti, Yehova eye ‘ociwundilo comanu vana va pokola kokuaye.’ Ovo va pondola oku sanjukila olondaka Viembimbiliya vi popia hati: “Ove vuciwundilo cange, haive o [ndi popela] kohali.” (Osamo 32:⁠7) Olondaka evi vi lekisa ocisola ca Yehova.

¹⁰ Yehova wa siatavo oku lekisa ocisola poku lungula omanu vaye oco va litepe la vakuavituwa violuali lulo lua vĩha. Momo eye ndopo muẽle oka lu kundula. Embimbiliya li popia hati: “Ko ka soli oluali pamue ovina vi kasi voluali. Nda omunu o sole oluali, ocisola ca Isia ka ci kasi vutima waye. Momo ovina viosi vi kasi voluali, okuti oñeyi yetimba, loñeyi yovaso, kuenda oku litunila ovina viomuenyo waluo, ka via tundile ku Isia, te koluali.” Poku pokola kelungulo liaco, tu pondola oku lava omuenyo wetu voluali lulo oco tuka kale otembo ka yi pui. Embimbiliya liamisako hati: “Oluali lu takata loñeyi yaluo, puãi u o lingainga ocipango ca Suku o kala oloneke ka vi pui.”​—⁠1 Yoano 2:​15-17.

Oku Laviwa Lukũlĩhĩso Kuenda Lolondunge

11, 12. Lombolola ndomo ukũlĩhĩso lolondunge via Suku vi pondola oku tu lava.

¹¹ Salomone lekuatiso liespiritu lia Suku wa sapuila omanu va yongola oku kuata ukamba la Yehova hati: “Utate uku [kuatisa]. Olondunge vi ku lava.” Noke wamisako hati: “Kuata olondunge. . . . Ku ka vi yanduluke oco vi ku [kuatise]. Vi sola oco vi ku tate.”​—⁠Olosapo 2:11; 4:​5, 6.

¹² Nda tua kapako ovina tu lilongisa vondaka ya Yehova, tu kuata olondunge viaye. Oku sokolola ondaka ya Yehova, ku tu kuatisa oku limbuka ovina tu sukila oku pitisa kovaso komuenyo wetu. Nda tua cilinga, tu kuatisiwa calua. Momo tua kũlĩha okuti omanu vamue va siata oku liyaka lovitangi omo lioku nõla onjila yimue ka ya sungulukile. Oluali lua Satana lua siata oku vetiya omanu oco va pitise kovaso ovokuasi kuenda ekemãlo. Pole, Yehova wa siata oku vetiya omanu vaye oco va pitise kovaso ovina viespiritu. Oku pitisa kovaso ovina violuali ndeci: Ovokuasi, kuenda ekemãlo kua siata oku nena ovitangi vioku litepa kuapata, akamba, kuenda oku pumba ovikele vekongelo. Noke omunu o lombola eci a kũlĩle ndomo Yesu a ci popia hati: “Ci kuatisa ndati omunu, nda o nganyala oluali luosi kuenje o takisa omuenyo waye?” (Marko 8:​36) Omo liaco, tu sukila oku lunguka kuenda oku kapako elungulo lia Yesu wa popia hati: “Tete vanjiliyi usoma [wa Suku] kuenda esunga liaye, kuenje ovina evi viosi viu vokiyiwi.”​—⁠Mateo 6:⁠33.

Ovitangi vi Tunda Koku Tẽlisa Lika Olonjongole Vietu

13, 14. Oku pitisa kovaso olonjongole vietu ci lomboloka nye? Momo lie tu sukilila oku yuvula ocituwa caco?

¹³ Omanu va lulikiwa lonjongole yoku tẽlisa ovina va yongola komuenyo wavo. Pole nda olonjongole viaco vi pitisiwa enene kovaso, omunu o kuata ovitangi. Oco tu lave ukamba wetu la Yehova, tu sukila oku yuvula ocipululu. Ondaka ocipululu, ‘yi lomboloka oku sakalala lika lolonjongole vietu.’ Koloneke vilo, ocituwa caco ca siata calua pokati komanu. Embimbiliya lia popele okuti, ‘koloneke via sulako, omanu vaka linga vakuakulisola ovo muẽle, haivo vakuakulipandiya, ale vakuacipululu.’​—⁠2 Timoteo 3:​1, 2.

¹⁴ Akristão, va kũlĩha esilivilo liovihandeleko Viembimbiliya viatiamẽla koku velisapo vakuetu kuenda oku lisola pokati. (Luka 10:27; Va Filipoi 2:⁠4) Onepa yalua yomanu, ka va kapeleko ovituwa evi. Pole, ovituwa viaco vi kuete esilivilo, momo viecelela oku kuata olohuela viwa, esanju vepata, kuenda ukamba lavakuetu. Omunu wa Yehova o sukila oku yuvula ocituwa coku lisola eye muẽle oco a pitise kovaso ovina via velapo ku Yehova. Vovina viaco mua kongela upange wosi watiamẽla kefendelo lia Yehvoa.

15, 16. (a) Ocituwa coku lisola lika etu muẽle cinena nye? Lombolola ulandu umue. (b) Nda omunu o kuete ocituwa coku pisa lika vakuavo ovisimĩlo viaye o kasi oku vi tiamisila pi?

¹⁵ Ocituwa coku lisola ci vetiya omunu oku litenda eye muẽle ndukuesunga kuenda oku kuata epela. Embimbiliya li popia hati, ove “amunu o vela ukuene, ku kuete ondaka. Momo, eci o vela ukuene o lipisa ove muẽle, momo ove vukuakuvela evi o lingaingavo ove muẽle.” (Va Roma 2:1; 14:​4, 10) Koloneke via Yesu, ovitunda viatavo, via simile okuti via kuatele esunga. Handi vali, via similevo okuti via kuata ukũlĩhĩso woku pisa ovilinga via Yesu kuenda violondonge viaye. Omo liaco, va litendele ndolonganji. Pole, omo liekambo liukũlĩhĩso wondaka ya Suku, va linenela episo.

¹⁶ Yuda una weya oku pakula Yesu, wa kala locituwa cokupisa vakuavo. Eteke limue eci va kala ko Betania, Maria wa wavekele ulela umue welemba liwa kolomahi via Yesu. Pole, Yuda ka ci solele, kuenje wa popia hati: “Onguendu eyi, nye ka ya landisililue ovita vitatu violosingu ha vi eciwa kolosuke?” Ulandu waco wamisako hati: “[Yuda] ka ci popelele omo a kuetele olosuke ohenda, puãi [wa ci popela] omo ocimunu, lomo a kuete ombango, kuenje upopa evi via imbiwamo.” (Yoano 12:​1-6) Omo liaco, tu sukila oku yuvula ocituwa ca Yuda, leci casongui vakuetavo liesanda vana va enda oku pisa vakuavo loku li nenela eyambulo.

17. Lombolola ulandu umue wocitangi ci tunda koku lipanda.

¹⁷ Akristão vamue kocita catete, ka va kuatele ovituwa ndevi via Yuda. Pole, va kuatele ocituwa coku lipanda kuenda epela. Tiago wa popia hati: “Vu lipanda ño loku lituna. Okulipanda kuaco . . . kũvi.” (Tiago 4:​16) Oku lipanda omo liovina tua siata oku linga kuenda esumũhũho liupange tu kuete vocisoko ca Yehova, ci lekisa okuti tu kuete epela. (Olosapo 14:​16) Tu sukila oku ivaluka eci ca pita lupostolo Petulu eci a kuatele ocituwa coku lipanda. Eye wa popele ku Yesu hati: “Ndaño vosi va ku yanduluka ame lalimue eteke hu yanduluka. . . . Ndaño [ndi] fila kumue love haimo si ku likali.” Etu ka tukuete esunga lioku lipanda lovina tu linga. Ovina viosi tu kuete, via tunda kohenda ya Yehova. Omo liaco, tu sukila oku yuvula ocituwa coku lipanga.​—⁠Mateo 26:​33-35, 69-75.

18. Yehova o tenda ndati vakuepela?

¹⁸ Embimbiliya li tu lungula hati: “Kovaso yepela kuiya oku nyoleha. Kovaso yutima unene kuiya oku kupuka.” Momo lie? Yehova o tambulula hati: “Epela lemande, . . . viosi ndi vi suvuka.” (Olosapo 8:13; 16:​18) Eli olio esunga lieci Yehova ‘a yambuilile soma yo Asuria omo lioku lituna kuenda epela.’ (Isaya 10:​12) Ndopo muẽle Yehova oka yambula oluali lulo lua Satana lolombiali viaco vina vi kuete epela. Omo liaco, tu yuvuli ovituwa viaco oco tu puluke keyambulo Yehova aka nena komanu vaco.

19. Momo lie Akristão va sanjukilila oku kala afendeli va Yehova? Momo lie va lekisila umbombe?

¹⁹ Akristão va kuete esunga lioku sanjukila ekalo liavo omo lioku kala afendeli va Yehova. (Yeremiya 9:​24) Ovo va kuete esunga lioku amamako lumbombe. Momo lie? Momo, omanu ‘vosi va linga vakuakandu kuenda ka va kuata ulamba wa Suku.’ (Va Roma 3:​23) Oco tuamameko loku lava ekalo lietu lioku vumba Yehova, tu sukila oku lekisa ocituwa ndeci ca Paulu wa popia hati: “Ondaka yokuti Kristu Yesu weyilila kilu lieve oku popela vakuakandu, ondaka yocili, haiyo ya sungulukila oku taviwa kuoha. Pokati ka vakuakandu vaco ame fu.”​—⁠1 Timoteo 1:⁠15.

20. Koloneke vilo Yehova wa siata oku lava ndati omanu vaye? Eye oka va lava ndati eci ohali yapiãla yika fetika?

²⁰ Etu tumanu va Yehova omo lioku yuvula oku pitisa kovaso olonjongole vietu, Yehova okamamako oku tu lava konepa yespiritu. Tua kolelavo okuti, eci ohali yapiãla yika fetika, Yehova oka tu lava kespiritu kuenda ketimba. Kuenje, eci tuka iñila voluali luokaliye, tuka popia hati: “Tala, u eye Suku yetu, eye tua felevela okuti o tu popela. U, Yehova, eye tua imba ondunge. Tu sanjuki loku yolela oku popela kuaye.”​—⁠Isaya 25:⁠9.

Ivaluka Eci Tua Lilongisa?

• Yehova wa lava ndati Soma Daviti la Yesu Kristu?

• Koloneke vilo Yehova wa siata oku lava ndati omanu vaye?

• Momo lie tu sukilila oku yuvula oku livelisapo?

• Momo lie tu sukilila oku sanjukila ekalo lietu lioku vumba Yehova loku lekisa umbombe?

[Elitalatu kemẽla 19]

Yehova wa teyuila ndati Daviti la Yesu?

[Elitalatu kemẽla 21]

Koloneke vilo, Yehova wa siata oku lava ndati omanu vaye konepa yespiritu?

[Elitalatu kemẽla 22]

Osimbu tu sanjukila ekalo lietu lioku vumba Yehova, tu sukila oku lekisa umbombe