‘Owola Yeya’!
‘Yesu wa kulihile ale okuti owola yaye yoku tunda voluali lulo ha endi ku Isia, yeya.’−YOANO 13:1.
1. Eci o Paskoa yunyamo wa 33 K.K., ya kala ocipepi, vo Yerusalãi mua kala esakalalo lipi, kuenda momo lie?
ECI Yesu a papatisiwa kunyamo wa 29 K.K., noke wa kuama onjila yotuala ‘kowola’ yolofa viaye, kepinduko, kuenda koku vialekiwa kulamba. Ca kala kotembo yonjovo, kunyamo wa 33 K.K. Papita lika olosemana vimue tunde eci va Yudea ovitunda vinene haivo Vakuakusombisa, va tunga ongombo oco va ponde Yesu. Omo okuti Nikodemo wa kala ekamba lia Yesu, kuenda watiamẽlele ku Vakuakusombisa, citava okuti eye wo sapuilako ongombo yaco, kuenje Yesu wa tunda vo Yerusalãi, noke wa enda kovambo va kasi kesinya Liolui Yordão. Omo okuti ocipito co Paskoa ca kala ocipepi, va lua omanu va tunda kovaimbo avo okuenda ko Yerusalãi, kuenje olupale luosi luo Yerusalãi lua yuvalele lonjuvungo yomanu omo va sakalalele loku konomuisa nda Yesu iya nda ndati. Omanu va lipula pula pokati, hati: ‘Wa soki nye? Anga hẽ keya kocipito?’ Ovitunda vinene kumue la va Fariseo va vokiya vali handi esakalalo liomanu eci va handeleka hati, nda umue wa yeva oku Yesu a kasi, a tu ci sapuile.−Yoano 11:47–57.
2. Nye Maria a linga okuti olondonge ka via ci solele, kuenda etambululo lia Yesu lioku u tundilako olunda lia lekisa ndati okuti eye wa kulihile okuti “o[wo]la yaye” ya kala ocipepi?
2 Keteke liecelãla kosãi ya Nisana, okuti kua kambele lika oloneke epandu oco ku lingiwe ocipito co Paskoa, Yesu wa endele ocipepi lo Yerusalãi, ko Bétania, kimbo liakamba vaye a solele calua Marta, la Maria kuenda Lasaru, kuaco oko, kocitumãlo cimue okuti loko Yerusalãi, pali ocinãla cisoka olokilometulu vitatu. Ca kala Votãlo koñolosi, kuenda Yesu oko apita eteke liosi Liesambata. Eteke likuavo koñolosi, eci Maria a poka Yesu onguendu yimue yatila ca lua yi kuete elemba liwa, olondonge ka via ci solele. Yesu wo tundililako olunda hati: “Maria a kale, wa ci lingila ndoneketela liokukendiwa kuange. Momo olosuke vu kasi ño–o hu lavio, ame puãi ko kasi ño–o hu lame.” (Yoano 12:1–8; Mateo 26:6–13) Yesu wa kulihile ale okuti ‘owola yaye yoku tunda voluali lulo, oco aende ku Isia yaye, yeya.’ (Yoano 13:1) Kua kambele lika oloneke vitãlo oco eye ‘aece omuenyo waye ndocilumba coku yovola va lua.’ (Marko 10:45) Omo liaco, ovina viosi Yesu a linga kuenda a longisa viatiamẽlele ko ku vi linga lonjanga. Hangangukuoyo yi komohisa Yesu aeca kokuetu, osimbu tu kevelela lonjongole ya piãla, esulilo lioluali lulo! Konomuisa eci ceya oku pita la Yesu keteke likuavo.
Eteke Lioku Iñila Kua Yesu Lulamba Wa Piãla
3. (a) Yesu wa iñila ndati vo Yerusalãi Calumingu, keteke liecea, kosãi ya Nisana, kuenda onepa yalua yomanu vo yolela ndati? (b) Etambululo lipi Yesu a eca ku va Fariseo va liyeyela owiñi wa kala loku u yolela?
3 Calumingu, keteke liecea, kosãi ya Nisana, Yesu wa iñila vo Yerusalãi lulamba wa piãla. Eci eye a kala loku iñila volupale, wa endela kokacimbulu lia Sakariya 9:9. Kuenje, owiñi wosi wa liongoluila kokuaye, wa yala olonanga viavo volonjila, osimbu okuti vakuavo va teta ovisapa, noke va vi yalavo vonjila, kuenje va kaluka vati: “Soma iyilila vonduko ya Ñala [Yehova] a sivayiwe!” Va Fariseo vamue va kala vowiñi, va yonguile okuti Yesu olungula olondonge viaye oco viuheko. Pole, Yesu wa va kumbulula hati: “Ndu sapuili siti, Ava nda voha, ovawe nda a kaluka”−Luka 19:38–40; Mateo 21:6–9.
4. Momo lie o Yerusalãi ya kalela lesakalalo lia lua, eci Yesu a pitilamo?
4 Papita ño olosemana vimue tunde eci omanu va lua va kala powiñi va mõla eci Yesu a pindula Lasaru. Kuenje vamamako loku sapuilako vakuavo eci catiamẽla kocikomo caco. Omo liaco eci Yesu a iñila vo Yerusalãi, imbo liaco liosi lia tokotelua. Kuenda omanu va kala loku lipula okuti “U, uprofeto Yesu u Nasara ko Galilea.” Eci va Fariseo va mõla eci ca kala loku pita, va liyeya hati: “Oluali luosi lu u kuãi.”−Mateo 21:10, 11; Yoano 12:17–19.
5. Eci Yesu a iñila vonembele, nye ca pitamo?
5 Ndomo ca kala ocituwa caye, eci a nyula o Yerusalãi, Yesu, Ulongisi Wavelapo, waenda vonembele oku ka longisa. Omo vonembele, olomeke lovilema via endele kokuaye kuenje wa vi sakula. Eci ovitunda vinene la vakuavisonehua va mõla ovikomo eye a linga, kuenda eci va yeva okuti omãla va kala vonembele va kaluka hati: “Hosana Kumõla a Daviti,” ovo va tema ca lua. Kuenje va pula Yesu hati: “O yevite eci ava va kasi loku popia?” Yesu wa va tambulula hati: “Ndi ci yevite.” Ene “puãi ka wa la tangi olondaka evi viokuti, Kovimẽla viomãla lotuñaña ove wopako esivayo liocili?” Osimbu Yesu a kala loku amamako loku longisa, wa tulukilile vali enene kueci ca kala loku pita vonembele.−Mateo 21:15, 16; Marko 11:11.
6. Oku limolehisa kua Yesu kua li tepele ndati calua loku limolehisa kuaye vokuenda kuolosãi epandu via pita, kuenda momo lie?
6 Noke, oku lilekisa kua Yesu kua li tepele ca lua loku kuolosãi epandu via pita! Eci a endele ko Yerusalãi Kocipito Colosinge, ‘ka endeleko loku li molehisa, puãi, wa endeleko luyombeki.’ (Yoano 7:10) Yesu, olonjanja viosi eci a limbokaile okuti omuenyo waye u kasi kohele, eye haico a enda loku tila. Eye wa iñila muẽle loku limõlehisa volupale omu vaecele ocihandeleko coku u kuata oco voponde. Yesu, ka kalevo locituwa coku limõlehisa okuti eye Mesiya. (Isaya 42:2; Marko 1:40–44) Eye ka yonguile okuti ci yevala lombuanja yalua ale uvangi wesapulo liatiamẽla kokuaye uyevala komanu lalundi. Otembo yaco, owiñi wa fetikile muẽle oku popia lolukandi hati, eye Osoma kuenda Onjovoli, haeye Mesiya, pole eye ka tavele epingilo liasongui vetavo oco vohẽko! Momo lie a pongolokela? Momo okuti, ‘owola yeya okuti Mõlomanu o muisua ulamba,’ ndomo Yesu a ci popia keteke likuavo.−Yoano 12:23.
Elinga Limue Liutõi Kuenda Alongiso A Yovola Omuenyo
7, 8. Elinga lia Yesu keteke liekui kosãi ya Nisana yunyamo wo 33 K.K., lia li setãhalele ndati leci eye a lingile ale vonembele ko Paskoa yunyamo wa 30 K.K.?
7 Eci Yesu a pitila vonembele Sengunda, eteke liekui, kosãi ya Nisana, eye wa linga cimue catiamẽla kueci amuile vonembele kekumbi lieteke lia pita. Eye wa “fetika oku tundisa vonembele vakuakulandisa la vakuakulanda. Wa leñula olomesa via vakuakutolokala olombongo kuenda olomangu via vakuakulandisa olopomba. Kuenje katavele okuti umue ambata ocikuata o pita vonembele.” Loku pisa olondingaivi viaco, Yesu wa popia hati: “Ka ca sonehiwile citi, Onjo yange yi tukuiwa onjo yolofeka viosi yoku likutilila? Puãi ene wa yi lingisi ocilala covingumba.”−Marko 11:15–17.
8 Elinga eli lia Yesu, lia lisetãhala leli a lingile ale konyima okuti papita ale anyamo atatu, eci eye anyulile onembele pocipito co Paskoa kunyamo wa 30 K.K. Pole, onjanja eyi wa va pisa vali ca piãla. Vakuakulandisila vonembele eye wa va tukula hati, ‘ovingumba.’ (Luka 19:45, 46; Yoano 2:13–16) Ovo va kala muẽle ovingumba, momo va enda loku pinga olondando via tila ca lua kuava va sukilile oku landa ovinyama oco va viece ndovilumba. Ovitunda vinene, la vakuavisinehua, kuenda akulu, va yeva eci Yesu a kala loku linga, kuenje va sandiliya vali onjila yoku ponda Yesu. Pole, ovo ka va kale loku mola onjila yoku ponda Yesu, momo omanu vosi va komoha ca lua oku longisa kuaye, kuenje va fetika oku u kuama kuama oco vo yevelele vali.−Marko 11:18; Luka 19:47, 48.
9. Elongiso lipi Yesu a eca, kuenda elaleko lipi eye a linga kolonjeveleli viaye via kala vonembele?
9 Osimbu Yesu a kala oku amamako loku longisa vonembele, eye wa popia hati: ‘Owola yeya okuti Mõlomanu o muisua ulamba.’ Ocili muẽle, momo kuokambelele lika oloneke vitito komuenyo waye wa palo posi. Eci a mãla oku lombolola olusapo luolumema luotiliko okuti, nda lua lokila posi lu fa, noke luima apako alua, okuti calisoka lolofa viaye, kuenda noke o linga onjila yokueca omuenyo kopui komanu, Yesu wa eca elaleko kolonjeveleli viaye, loku popia hati: “Nda umue o mbumba, a ñuame, kuenje oko ñasi haiko u o mbumba a kala. Nda umue o mbumba Isia u sumbila.”−Yoano 12:23–26.
10. Yesu wa liyeva ndati kueci catiamẽla kolofa eye a kala loku lavoka?
10 Sokolola eci catiamẽla kolofa viaye vievalo, okuti kua kambele ño oloneke vikuãla, Yesu wamisako loku popia hati: “Cilo, utima wange watokotelua. Oco, mopia nye? Mopia hẽ, siti, A Tate, mopele kekumbi lilo?” Sio, momo eci Yesu a kala loku kevelela ka ci tẽliwa oku ci tutuiya. Omo liaco, eye wa popia hati: ‘Oco hacoko, momo owola yilo oyo ndeyilila.’ Ocili okuti, Yesu wa tava muẽle keliangiliyo liosi lia Suku. Eye wa nõlapo muẽle oku ecelela okuti ovilinga viaye vi vialiwa locipango ca Suku toke kolofa viaye. (Yoano 12:27) Hangangukuoyo yiwa eye a eca kokuetu, okuti omunu o lieca muẽle olumue koku pokola kocipango ca Suku!
11. Elongiso lipi Yesu a eca kowiñi wa yeva ondaka yimue ya tunda kilu?
11 Yesu omo okuti wa sakalalele calua leci catiamẽla koluhimo nda olofa viaye via nena konduko ya Isiaye eye wa likutilila hati: “A Tate, muisa onduko yove ulamba.” Omanu va kala vonembele ca va komohisa ca lua, eci va yeva ondaka ya tunda kilu ya popia hati: “Nda yi muisa ale ulamba, kuenje ndi yi muisa vali ulamba.” Kepuluvi liaco eli, Ulongisi Wavelapo wa popia kowiñi esunga lieci ondaka yaco ya yeviwila, leci cikeya noke yolofa viaye, kuenda esunga lieci ovo va sukilila oku kuata ekolelo. (Yoano 12:28–36) Voloneke vivali via sulako, Yesu wa kuatele ca lua coku linga. Pole, eteke liaye lioku tala ohali ya lua lia kala handi kovaso.
Eteke Lioku Tukulula Uhembi
12. Vovali, keteke liekui la mosi kosãi ya Nisana, asongui vetavo va sandiliya ndati onjila yoku kuata Yesu, kuenda va kuata esulilo lipi?
12 Vovali, keteke liekui la mosi kosãi ya Nisana, Yesu wa endele vali vonembele oku ka longisa. Ovanyali vaye haimo va kala. Loku tiamisila kueci Yesu a linga ale keteke liapita, ovitunda vinene kuenda akulu vomanu vo pula hati: “Ovina evi o li loku vi linga lomoko ye? U wa ku iha omoko eyi helie?” Ulongisi Wavelapo, wa va kapa vatatahãi letambululo liaye, kuenda wa va lomboluila alusapo atatu. Avali pokati kalusapo aeco, wumue watiamẽla kocumbo cayuva, olusapo lukuavo luatiamẽla kocipito cuvala. Alusapo aeco, a lekisa okuti ovanyali vaye va kala olongangala viocili. Lonyeño yalua omo lieci va yeva, asongui vetavo va yonguile oku kuata Yesu. Pole, ovo va kala lohele yowiñi momo owo wa tendaile Yesu hati uprofeto. Ovo va kala loku sandiliya onjila yoku kapa Yesu vonjanjo, oco va tale ño nda o popia cimue okuti ci va ecelela oku u kuata. Yesu wa va iha etambululo limue okuti haico vohako.−Mateo 21:23–22:46.
13. Elungulo lipi Yesu a eca kolonjeveleli viaye, kueci catiamẽla ku vakuavisonehua kuenda ku va Fariseo?
13 Ndaño okuti vakuavisonehua la va Fariseo va popaile hati, va kala oku longisa Ocihandeleko ca Suku, Yesu wa lungula olonjeveleli viaye hati: “Cosi vo longisi ci lingi loku ci kuama. Puãi ko ka setukuli ovilinga viavo. Momo va longisa puãi eci va longisa ka va ci lingi ovo muẽle.” (Mateo 23:1–3) Hakutukululakuoko uhembi wavo powiñi! Pole, Yesu ka kaile pokati kavo. Eli olio lia kala eteke liaye lia sulako liokuiya vonembele, kuenje lutõi walua, Yesu wa tukuluka ovohembi añi añi, okuti, a likuama muẽle ndoviliakulo viya ndakimba.
14, 15. Apiso api apiãla Yesu a pisa lavo vakuavisonehua la va Fariseo?
14 Yesu wa popia hati: “Ene a vakuavisonehua, lene a va Fariseo, wakuambambe, ngongo yene!” Olondaka evi, Yesu wa vi pitulula olonjanja epandu. Ovo va kala muẽle vakuambambe ocili, momo ndomo Yesu a ci popia, ovo vaenda loku yikilako omanu Usoma wokilu, kuenda vaendavo loku tateka vana va yongowaile oku iñilamo. Vakuambambe yaco ava, vaenda loku ñuala ñuala kokalunga lokongongo loku linga omongoloke yimuamue, pana okuti ya pongoloka, va yi lingisa ño ndocikuata coku kunduiwa elisi. Osimbu okuti va kala loku “lomboka ovina via velapo viovihandeleko, ndeci esunga vekanga lohenda, kuenda ekolelo,” ovo va velisilepo vali enene oku eca onepa yekui. Ocili okuti, ovo ‘va yelaisa lika koñoño yokopo leyi yelonga puãi vokati kaico mue yukaile ocipululu lundiamololo.’ Ovituwa viavo ka via sungulukile, kuenda uvi wavo va u viaviaya loku lekisa ohenda yimue ño yombambe. Handi vali, ovo vaenda loku lekisa ombili koku tunga ayambo ovaprofeto loku va finisa ciwa, oco va lekise ovilinga viavo viohenda, ndaño okuti ovo muẽle, “va kala omãla vava va ponda ovaprofeto.”−Mateo 23:13–15, 23–31.
15 Loku pisa ekambo liavo liovituwa viespiritu, Yesu wa popisa ovanyali vaye hati: “Ene asongui haene vulomeke, ngongo yene!” Ovo va kala muẽle olomeke kekalo liavo, momo va velisilepo vali ulu wa kala vonembele okuti ka va velisilepo esilivilo liocitumãlo caco cefendelo. Loku amisako, Yesu wa kolisako vali olondaka viaye viepiso, loku popia hati: “Alonyoha, ambuto yolombuta, vu puluka ndati episo lioku enda konjembo?” Ocili okuti, Yesu wa sapuila hati, omo lioku kuama onjila yaco eyi yungangala, ovo va ka kunduiwa muẽle elisi. (Mateo 23:16-22, 33) Etu, tu lekisivo utõi poku kunda ondaka Yusoma, ndaño muẽle ceci okuti mua kongela oku lumbulula ovohembi atavo esanda.
16. Osimbu va kala Komunda yo Oliveira, ocitumasuku cipi Yesu a sapuila olondonge viaye?
16 Yesu noke wa tunda vonembele. Eci ekumbi lia kala loku iñila, eye kumue lovapostolo vaye va lamanela Komunda yo Oliveira. Osimbu va kalako, Yesu wa tukula ocitumasuku coku lunduiwa kuonembele, kuenda ondimbukiso yoku tukuluka kuaye, kumue leci catiamẽla kesulilo lioluali lulo. Elomboloko liocitumasuku eci, lia pitila muẽle toke koloneke vietu vilo. Koñolosi yaco, Yesu wa popiavo lolondonge viaye hati: ‘Vu ci okuti kovaso yoloneke vivali kuli o Paskoa noke Mõlomanu o ka pakuiwa kuenje o ka valeliwa kuti.’−Mateo 24:1–14;26:1,2.
Yesu ‘Ava va Kala vaye, wa va Sola Muẽle Toke Kesulilo’
17. (a) Vokuenda kuocipito co Paskoa, keteke liekui la kuãla kosãi ya Nisana, Yesu wa longisa nye kolondonge viaye ekui la vivali? (b) Onjivaluko yipi Yesu a tumbika noke yoku tundisa Yuda Isikariote?
17 Voloneke vivali via kuamamo, okuti eteke liekui la vali leli liekui la tatu ya Nisana, Yesu wa iñila luyombeki vonembele. Asongui vetavo, va kala loku u sandiliya oco vo ponde, kuenje eye ka yonguile okuti ku kala cimue ci tateka oku lingiwa kuocipito Copaskoa kumue lovapostolo vaye. Poku iñila kuekumbi Vovali, oco kua fetika eteke liekui la kuãla liosãi ya Nisana, okuti olio lia kala eteke lia sulako liomuenyo wa Yesu palo posi. Koñolosi yaco, Yesu kumue lovapostolo vaye, va liongoluila ko Yerusalãi, konjo yimue ya kala loku pongiyila ocipito co Paskoa. Osimbu va kala loku lila kumuamue o Paskoa, Yesu wa eca elongiso limue liwa kolondonge viaye ekui la vavali liatiamẽla kumbombe, poku va sukula kolomãhi viavo. Noke yoku tundisa Yuda Isikariote, una wa tava oku pakula Cime caye lakui atatu kolopalata, okuti oyo ya kala ondando yoku landa upika, ndomo ca sonehiwile Vocihandeleko ca Mose, Yesu wa tumbika Onjivaluko yolofa viaye.−Etundilo 21:32; Mateo 26:14, 15, 26–29; Yoano 13:2–30.
18. Nye vali Yesu alongisa locisola ca lua kolondonge viaye ekui la mosi vina via kala vakuacili, kuenda wa va pongiya ndati kueci catiamẽla koku va siapo kuaye?
18 Noke, pana okuti va mãla ale oku linga ocipito catete Conjivaluko, ovapostolo va fetika vali oku lihoyisa kuatiamẽla koku tala helie wa velapo pokati kavo. Puãi, Yesu ka va kelohãlale, pole, lepandi lialua, wa va longisa eci catiamẽla kesilivilo lioku lingila vakuavo upange. Omo okuti, wa sola ca lua eci olondonge viaye via pandikisa kumuamue laye eci a nyikiwa, eye wa lisila lavo ocisila Cusoma. (Luka 22:24–30) Yesu wa va handelekavo oco va lisole pokati, ndeci eye a va solavo. (Yoano 13:34) Osimbu Yesu a kala handi vonjo yaco, locisola ca lua, wa pongiya ovitima viovapostolo vaye kueci catiamẽla ko ku va siapo kuaye. Eye wa va li kuminya okuti ukamba waye lavo u kamamako, kuenda wa va vetiya oco va kuate ekolelo, kuenda wa va likuminya hati, espiritu sandu li va kuatisa. (Yoano 14:1–17; 15:15) Ocili okuti, Yesu wa pongiya ovitima viovapostolo vaye kueci catiamẽla koku va siapo kuaye, kuenda ‘wa va sola muẽle toke kesulilo.’−Yoano 13:1; 17:1.
19. Momo lie Yesu a sakalalelele eci a kala vocumbo co Gesemane?
19 Eci Yesu kumue lolondonge viaye vakuacili va pitila vocumbo co Gesemane, soketi owola yaco va pitahãlele ale vokati kuteke. Eye wa endalemo ale olonjanja vialua lovapostolo vaye. (Yoano 18:1, 2) Kuakambele ño olowola vimue oco Yesu a fe, ndondingaivi. Esakalalo Yesu a kala lalio, omo liohali a kala loku lavoka, kuenda omo a kulihile okuti nda ka pandikisile ci ka nena elaviso ku Isiaye, liapiãlele enene okuti, osimbu a kala loku likutilila, esalamiho liaye lia kala ndatosi osonde a lokila posi. (Luka 22:41–44) Noke Yesu wa sapuila olondonge viaye hati, “o[wo]la ya pitila. . . . Tali, u o makula o kasi ocipepi.” Osimbu eye a kala handi loku vangula, Yuda Isikariote weya lowiñi wambata ovimihi lolondiyelo kumue lolosipata kuenda olohunya. Ovo veyililile oku kuata Yesu. Pole eye ka tamalalele. Kuenda wa popia hati: “Puãi nda oco, ovisonehua hẽ, vi tẽlisua ndati? Momo via popia viti, ci lingiwa ndoco.”−Marko 14:41–43; Mateo 26:48–54.
Mõlomanu o Kemãlisiwa!
20. (a) Ovina vipi vivi via pita la Yesu pana okuti vo wambata ale kukonde? (b) Eci kua kambele ño okatembo katito kokufa kuaye, momo lie Yesu a kalukila hati, “ca maliwa”?
20 Noke, pana okuti vowambata, Yesu, walundiliwa lolombangi viesanda. Noke omo okuti va tavele muẽle kuvangi waco wesanda, Yesu wa pisiwa la Pondiu Pilatu, kuenje wa yoliwa epembe lovitunda kumue lowiñi, kuenda wa kangisiwa loku tipuiwa lasualali. (Marko 14:53–65; 15:1, 15; Yoano 19:1–3) Votãlo eci ekumbi lia kala vongunji, Yesu wa valeliwa kuti, oku a yevela evalo lialua, momo oku lema kuetimba liaye kua kala loku nalela etimba liaye posi kuenje olopeleko vovalela lavio povaka lo polomãhi via kala loku iñila vali handi enene. (Yoano 19:17, 18) Kowola ya tatu kekumbi, Yesu wa kaluka hati: “Ca maliwa.” Ocili muẽle, eye wa tẽlisa upange waye wosi eyilile oku linga palo posi. Noke yoku kundika espiritu liaye peka lia Suku, wa petamisako utue waye kuenje wa tula omuenyo. (Yoano 19:28, 30; Mateo 27:45, 46; Luka 23:46) Eci papita oloneke vitatu, Yehova wa pindula Omõla waye. (Marko 16:1–6) Eci papita eci cisoka akui akuãla koloneke, tunde eci a pinduiwa, Yesu wa londa kilu oku a kapiwa kulamba.−Yoano 17:5; Ovilinga 1:3, 9–12; Va Filipoi 2:8–11.
21. Tu pondola ndati oku kuama ongangu ya Yesu?
21 Tu pondola ndati oku ‘kuama muẽle volomãhi via Yesu’? (1 Petulu 2:21) Ndeci eye a linga, tu likolisilakovo longusu kupange woku kunda Usoma kuenda woku longisa omanu oco va linge olondonge, okuti tu vangula lutõi ondaka ya Suku. (Mateo 24:14; 28:19, 20; Ovilinga 4:29–31; Va Filipoi 1:14) Lalimue eteke ka tu ka ivaliko kotembo tukasi kuendavo ka tu ka liwekipo oku livetiya pokati locisola kumue lovilinga viwa. (Mateo 13:28–33; Va Heveru 10:24, 25) Tueceleli okuti ovilinga vietu viosi vi vialiwa locipango ca Yehova Suku, loku kuliha okuti tu kasi muẽle “kotembo yesulilo.”−Daniele 12:4.
O Tambulula Ndati?
• Oku kuliha kua Yesu okuti otembo yoku fa kuaye ya kala ocipepi, kua vetiya ndati upange a linga vonembele ko Yerusalãi?
• Nye ci lekisa okuti Yesu ‘ava va kala vaye, wa va sola muẽle toke kesulilo’?
• Ovolandu apita kolowola via sulako komuenyo wa Yesu, a lekisa nye catiamẽla kokuaye?
• Tu pondola ndati oku kuama ongangu ya Yesu Kristu kupange wetu woku kunda?
[Apulilo Elilongiso 15]
Yesu ‘ava va kala vaye, wa va sola muẽle toke kesulilo’