Lekisa Ombili Kefendelo Liocili
“Okungula kua lua puãi olondingupange viñamiñami.”—MAT. 9:37.
1. Ndamupi o lombolola ondaka onjanga?
SOKOLOLA okuti ove o kuete ocicapa cimue kuenda o yongola okuti toke kesulilo lieteke ci tatiwa. Nye o linga? Te o sonehako okuti “LONJANGA!” Nda ove o yongola oku lisanga lomunu umue, pole wa cilua, nye o linga? O sukila oku “YAYULAKO!” Nda o kuete upange umue u sukila oku lingiwa lonjanga kuenje otembo yi kasi oku pita, ove o sakalala calua. Utima u veta kuenda o likolisilako oku tẽlisa upange waco lombili. Eci oco ci lomboloka ondaka onjanga!
2. Upange upi Akristão vocili koloneke vilo va sukila oku linga lonjanga?
2 Kakristão vocili koloneke vilo, upange wa velapo vali u sukila oku lingiwa lonjanga, oku kunda olondaka viwa Viusoma loku longisa omanu vo kolofeka viosi oco va linge olondonge. (Mat. 24:14; 28:19, 20) Ndonge Marko poku tukula olondaka via Yesu, wa soneha hati, upange waco te u lingiwa ‘tete’ oco esulilo liya noke. (Mar. 13:10) Eli olio esunga lieci upange waco u sukilila oku lingiwa lonjanga. Yesu wa popia hati: “Okungula kua lua puãi olondingupange viñamiñami.” Omo okuti upange woku ungula ka u talamela, ci sukila okuti u lingiwa lombili eci handi otembo yaco ka ya pitilile kesulilo. —Mat. 9:37.
3. Vamue va siata oku tambuluiya ndati kupange woku kunda u sukila oku lingiwa lonjanga?
3 Omo okuti upange woku kunda u kuete elisilivilo, tu sukila oku sokiya ciwa otembo loku linga upange waco longusu yetu yosi. Tu pandiya vana va likolisilako oku ci linga. Valua va leluisa omuenyo wavo oco va linge akundi votembo yosi, vamue va iñila kupange wumisionaliu, vakuavo va talavaya ko lo Betele vi sangiwa kolonepa viosi violuali. Ovo va sakalala loku linga upange waco. Va likandangiya ovina vialua kuenda va siata oku liyaka lovitangi. Ocili okuti, ovo va sumũlũisiwa calua la Yehova. Etu tua va sanjukila. (Tanga Luka 18:28-30.) Vamanji vakuavo ndaño ka va pondola oku linga akundi votembo yosi, pole, va likolisilako oku talavaya calua kupange woku popela omanu, muna mua kongela oku kuatisa omãla vetu.—Esin. 6:6, 7.
4. Momo lie vamue ka va lekisila ocituwa conjanga?
4 Ndomo tua ci konomuisa ale, ocituwa conjanga ci kuete elitokeko lotembo yitito, otembo ya sokiyiwa kuenda otembo yesulilo. Ovisonehua kuenda ovina vi kasi oku pita voluali, vi eca uvangi wokuti tu kasi koloneke via sulako. (Mat. 24:3, 33; 2 Tim. 3:1-5) Pole lomue wa kũlĩha otembo esulilo liya. Yesu poku lombolola ‘ondimbukiso yesulilo lioluali’ wa popia hati: “Eteke liaco lola yaco lomue wa yi kũlĩha, ndaño ovangelo vokilu, ndaño Omõla, te Isia lika.” (Mateo 24:36) Omo liaco, omanu vamue va kuete ocitangi coku lekisa ocituwa conjanga, ca piãla enene nda va kasi ale oku linga upange waco vokuenda kuanyamo alua. (Olosap. 13:12) Ove hẽ olonjanja vimue wa siatavo oku liyeva ndoco? Nye ci tu kuatisa oku tẽlisa upange Yehova Suku kuenda Yesu Kristu va yongola okuti tu u linga lonjanga koloneke vilo?
Tu Sokololi Ongangu ya Yesu
5. Yesu wa lekisa ndati ocituwa conjanga kupange woku kunda?
5 Yesu Kristu eye ongangu ya velapo ya vosi va lekisa ocituwa conjanga kupange wa Suku. Eye wa lekisa ocituwa conjanga omo wa kũlĩhĩle okuti wa kuatele lika anyamo atatu lolosãi epandu oco a tẽlise upange waye. Yesu wa linga upange walua kefendelo liocili okuti omanu vakuavo ci sule. Wa sapula onduko locipango ca Isiaye, wa kunda olondaka viwa Viusoma, wa situlula alongiso uhembi lombambe yalongisi atavo esanda, kuenda wa kakatela kuviali wa Yehova toke kolofa. Wa linga ovongende alua koku longisa omanu, kuenda wa va kuatisa poku va sakula. (Mat. 9:35) Lomue wa linga upange walua votembo yitito okuti Yesu ci sule. Eye wa linga upange waco lonjila yimue ka yi sokisiwa. —Yoa. 18:37.
6. Nye Yesu a velisilepo komuenyo waye?
6 Nye ca vetiya Yesu oku talavaya calua kupange woku kunda? Ndomo ca lomboluiwa vocitumasuku ca Daniele, Yesu wa kũlĩhĩle otembo ya sokiyiwa la Yehova koku tẽlisa upange waye. (Dan. 9:27) Ndomo ca lekisiwile, upange waye wa laikele oku sulila “pokati kosemana,” ale noke yanyamo atatu lolosãi epandu. Eci Yesu a iñila vo Yerusalãi kunyamo wa 33, wa popia hati: “Ekumbi lieya okuti Mõlamanu o muisua ulamba.” (Yoa. 12:23) Ndaño Yesu wa kũlĩhĩle okuti olofa viaye via kala ocipepi, eci hacoko co vetiya oku talavaya calua kupange woku kunda. Eye wa pitisile kovaso oku linga ocipango ca Isiaye kuenda oku lekisa ocisola komanu. Ocisola caco co vetiya oku ongolola olondonge kuenda oku vi pindisa loku vi tuma kupange woku kunda. Yesu wa ci lingila oco olondonge viaye vi amameko lupange eye a fetika okuti va u tẽlisa lonjila yimue ya velapo okuti una a linga ci sule.—Tanga Yoano 14:12.
7, 8. Eci Yesu a yelisa onembele, olondonge viaye via kuata ocisimĩlo cipi, kuenda momo lie Yesu a ci lingila?
7 Onjanja yimue Yesu wa linga ocina cimue okuti ca eca uvangi wombili a kuata. Eci ca pita ko Paskoa kunyamo wa 30 K.K., eci a fetika upange waye woku kunda. Yesu kumue lolondonge viaye eci va endele vonembele ko Yerusalãi va sangamo “omanu va landisa olongombe lolomeme kuenda olopomba. Vakuakutolokaisa olombongo lavovo, haimo va kala.” Nye Yesu a linga, kuenda eci ca vetiya olondonge viaye oku kuata ocisimĩlo cipi?—Tanga Yoano 2:13-17.
8 Ovina Yesu a linga levi a popia, via ivaluisa olondonge viaye ocitumasuku cosamo yimue ya Daviti ya linga hati: “Ombili yokonjo yove ya ndia.” (Osa. 69:9) Momo lie? Eci Yesu a linga ci koka ohele. Momo, asongui vonembele okuti ovitunda, vakuavisonehua kuenda omanu vakuavo, ovo va kala kovaso yolomĩlu viaco. Yesu poku situlula olomĩlu viavo, wa linga unyãli wasongui vonembele vo koloneke viaco. ‘Ombili yonjo ya Suku,’ ale ombili kefendelo liocili yeya oku limbukiwa ndomo olondonge via ci popele. Ombili yi lomboloka nye? Kuenda oyo ya litepa hẽ londaka onjanga?
Ombili yi Sokisiwa Lonjanga
9. Ondaka ombili yi lomboloka nye?
9 Ondisionaliu yimue yi lekisa okuti ondaka “ombili” yi lomboloka “okanyanyu, ale onjongole yoku tẽlisa ocimãho cimue.” Oyo yi lombolokavo oku kuata ocisola, owuya, oku tuihinya kuenda esanju. Yesu poku linga upange waye woku kunda, wa lekisa ovituwa via tukuiwa ndeti. Embimbiliya Today’s English Version, lia pongolola ocinimbu eci ndoco: “Esepa ñuetele onjo yove, A Suku li nimiha ndondalu.” Kolofeka vimue vio Kutundilo, ondaka “ombili” yi kuete alomboloko avali ndeci “utima wa tokota,” ndu okuti u kasi oku pia londalu. Ka kuli atatahãi okuti eci olondonge via mola ovina Yesu a linga vonembele ca va ivaluisa olondaka via Daviti. Nye ca tokotisa utima wa Yesu ndondalu, okuti co vetiya oku kuata ombili?
10. Ndomo ca lekisiwa Vembimbiliya, ondaka ombili yi lomboloka nye?
10 Kelimi lio Heveru ondaka “ombili” yi sangiwa vosamo ya Daviti, volonepa vikuavo Viembimbiliya, ya pongoluiwa okuti ‘esepa,’ ale “ukuesepa.” O Tradução do Novo Mundo olonjanja vimue yi tukula ondaka yaco hati “eye lika o fendeliwa.” (Tanga Etundilo 20:5; 34:14; Yehosua 24:19.) Ondisionaliu yimue Yembimbiliya ya popia hati: “Ondaka esepa yi tiamisiwila vali kolohuela . . . Ndeci esepa liulume ale liukãi li u vetiya oku teyuila omoko yaye yoku soliwa lika eye, cimuamue haico, Suku o kuete omoko yoku kisika vana va tiamẽla kokuaye oku vumba lika Eye.” Vembimbiliya ondaka ombili, yi kuete elomboloko lia velapo okuti owuya ale esanju lina omanu va lekisa eci ocimunga coku tasula ombunje ci yula, li sule. Ombili ya Daviti, ya kala esepa lia sunguluka momo eye wa suvukile ovina vĩvi loku teyuila onduko yiwa, kuenda wa pisa elinga lĩvi.
11. Nye ca vetiya Yesu oku lekisa ombili?
11 Olondonge via Yesu, via kuata esunga poku sokisa olondaka via Daviti leci Yesu a linga vonembele. Yesu ka sakalaile ño loku pangela otembo, pole wa lekisa ombili, ale esepa omo lionduko ya Isiaye kuenda efendelo liocili. Eci a limbuka okuti onduko ya Suku ya kala oku sepuiwa loku popiwa atonãi, eye wa lekisa ombili, ale esepa poku pengulula ekalo liaco. Eci Yesu a mola okuti omanu va kala oku talisiwa ohali lasongui vetavo, ombili yo vetiya oku va kuatisa loku pisa ungangala wasongui vetavo.—Mat. 9:36; 23:2, 4, 27, 28, 33.
Lekisa Ombili Kefendelo Liocili
12, 13. Ovina vipi asongui vetavo Liesanda va lingainga catiamẽla (a) Konduko ya Suku? (b) Kusoma wa Suku?
12 Ovina vi kasi oku pita vatavo koloneke vilo, via kãla okuti kotembo ya Yesu ci sule. Sokolola ocina catete Yesu a longisa kolondonge viaye poku likutilila catiamẽla konduko ya Suku. Eye wa popia hati: “Onduko yove yi sumbiwe.” (Mat. 6:9) Anga hẽ asongui vetavo Liesanda va siata oku longisa omanu oku kũlĩha onduko ya Suku, loku yi sumbila? Ovo va sepula Suku lalongiso esanda ndeci, Suku Umosi Muvatatu, ocilelembia ka ci fi, ifelu viondalu, kuenda alongiso aco a lekisa ndu okuti Suku elumbu, ekalo liaye lia tatama, ongangala haeye o sanjukila ohali yomanu. Ovo va sepulavo Suku lovilinga viavo vĩvi kuenda ombambe. (Tanga Va Roma 2:21-24.) Handi vali, va linga cosi okuti onduko ya Suku ka yi kũlĩhĩwa lomanu kuenda va yu upa Vambimbiliya avo. Va tateka omanu oku amẽla ku Suku oco ka va ka kuate ukamba laye.—Tia. 4:7.
13 Yesu wa longisavo olondonge viaye oku pinga Usoma wa Suku hati: “Usoma wove wiye. Ocipango cove ci lingiwe posi ndeci ci lingiwa kilu.” (Mat. 6:10) Ndaño okuti asongui vetavo Liesanda va pitolola ohutililo yaco, ovo va vetiya omanu oku tiamẽla kovitundo vio pulitika kuenda kovisoko vikuavo violuali. Ovo va pembula vana va kunda esapulo liwa haivo va likolisilako oku eca uvangi Wusoma. Omo liovina viaco, vana va litukula okuti Akristão, ka va velisilepo Usoma wa Suku kuenda ka va u kolelele.
14. Ndamupi Asongui vetavo Liesanda va longisa Ondaka ya Suku?
14 Poku likutilila ku Suku Yesu wa popia hati: “Ondaka yove oyo ocili.” (Yoa. 17:17) Osimbu handi ka tundile palo posi Yesu wa lekisa okuti wa laikele oku nõla “ukuenje wa kolelua haeye wa lunguka,” oco a ece okulia kuespiritu komanu vaye. (Mat. 24:45) Ndaño okuti alongisi vetavo Liesanda va popia okuti va longisa Ondaka ya Suku komanu, alongisi vaco va kasi hẽ oku linga upange una Cime a kundika ku kalei kaye? Sio. Ovo va longisa okuti ovina vi sangiwa Vembimbiliya viuhembi. Osimbu nda va tekula ocunda cavo lokulia kuespiritu, loku eca elembeleko kuenda olonumbi viwa, asongui vetavo va longisa oloñame viavo lovilongua viomanu. Handi vali, alongisi vetavo liesanda va longisa ovina via litepa lolonumbi via Suku oco oloñame viavo vi kolele okuti ovo va kuete ovituwa viwa, ndaño okuti ka va kapiko olonumbi via Suku vomuenyo wavo.—2 Tim. 4:3, 4.
15. Ove o liyeva ndati eci o mola ovina viosi vĩvi asongui vetavo va lingainga vonduko ya Suku?
15 Omo liovina vĩvi vi lingaiwa vonduko ya Suku, omanu valua vakuavitima via sunguluka ka va kolelele vali Suku kuenda Embimbiliya. Ovo va kupukila vonjanjo ya Satana kuenda koluali luaye luevĩho. Eci o tala loku yeva ovina viaco eteke leteke, o liyeva ndati? Omo okuti Wumbangi ya Yehova, eci onduko ya Suku yi pembuiwa loku popiwa atonãi, ku vetiyiwa hẽ oku linga cosi citava oco o yelise onduko yaco? Eci o mola ndomo omanu vakuavitima via sunguluka va kasi oku kembiwa loku talisiwa ohali, ku vetiyiwa hẽ oku eca elembeleko komanu vaco? Eci Yesu a mola omanu “va pekengua kuenda va sakalaisua ndolomeme ka vi kuete ungombo,” ka va kuatelele lika ohenda. Eye “wa fetika oku va longisa ovina via lua.” (Mat. 9:36; Mar. 6:34) Tu kuete esunga lialua lioku kala vakuambili kefendelo liocili, ndeci Yesu a linga.
16, 17. (a) Nye ci tu vetiya oku talavaya calua kupange woku kunda? (b) Nye tu ka lilongisa vocipama ci kuãimo?
16 Nda tua lekisa ombili kupange woku kunda, olondaka viupostolo Paulu vi sangiwa kelivulu lia 1 Timoteo 2:3, 4, vi kuata esivililo lia velapo kokuetu. (Tanga.) Ka tu lekisa lika ombili kupange woku kunda omo tua kũlĩha okuti tu kasi koloneke via sulako, pole tu ci linga momo ocipango ca Suku. Eye o yongola okuti omanu va kuata ukũlĩhĩso wocili, kuenje vo fendela oco va tambule asumũlũho aye. Poku kunda ka tu ci lingila lika omo okuti otembo ya linga yitito, pole tu ci lingila oku kemãlisa tete onduko ya Suku loku kuatisa omanu oku kũlĩha ocipango caye. Etu tuakuambili kefendelo liocili. —1 Tim. 4:16.
17 Omo okuti tuafendeli va Yehova, tu kuete esumũlũho lioku kũlĩha ocili ca Suku kuenda ocipango caye catiamẽla kilu lieve. Tu kuete ovimãleho vioku kuatisa omanu oku kuata esanju lelavoko lio koloneke vi laika oku iya. Tu pondola oku va lekisa ndomo va ka puluka kenyõleho lioluali lulo lua Satana. (2 Va Tes. 1:7-9) Ka tu ka sumui omo eteke lia Yehova li moleha ndu okuti li kasi oku cilua, pole tu sanjukili otembo tu kuete yoku lekisa ombili kefendelo liocili. (Mika 7:7; Hav. 2:3) Tu lekisa ndati ombili yaco? Ocipama ci kuãimo, ci ka lombolola ondaka eyi.
O Tẽla Oku Lombolola?
• Nye ca vetiya Yesu oku talavaya calua kupange woku kunda?
• Vembimbiliya ondaka “ombili” yi lomboloka nye?
• Ovina vipi tua siata oku mola koloneke vilo okuti vi tu vetiya oku lekisa ombili kefendelo liocili?
[Elitalatu kemẽla 8]
Yesu wa pitisile kovaso oku linga ocipango ca Isiaye kuenda wa lekisa ocisola komanu
[Elitalatu kemẽla 10]
Tu kuete esunga lialua lioku kala vakuambili kefendelo liocili