‘Amamiko Loku Ima Apako’

‘Amamiko loku ima apako kuenje vu li lekisa okuti vulondonge viange.’—YOANO 15:8.

1. (a) Onumbi yipi Yesu a tukula okuti oyo ava va yongola oku linga olondonge viaye va sukila oku tẽlisa? (b) Apulilo api tu sukila oku lipulisa etu muẽle?

KOÑOLOSI yeteke lina Yesu a kala oku lavoka olofa viaye, eye wa pita otembo yalua loku kolisa ovapostolo vaye lutima waye wosi. Ci tava okuti, Yesu wa vangula lavo toke oku pitahãla vokati kuteke. Kuenje omo liocisola a kuatela olondonge viaye, wamamako lombangulo yaye. Eye wa ivaluisa olondonge viaye poku va lomboluila onumbi yimue yikuavo ovo va sukilile oku kuama oco va linge olondonge viaye. Eye wa va sapuila hati: ‘Kokuima kuene apako a lua, oko Tate a muisilua ulamba, kuenje vu li lekisa okuti vulondonge viange.’ (Yoano 15:⁠8) Anga hẽ koloneke vilo, tu kasi oku pokola konumbi yaco yatiamẽla koku linga ondonge ya Yesu? ‘Oku ima apako’ ku lomboloka nye? Oco tu sange etambululo, tu konomuisi ombangulo Yesu a kuata lolondonge viaye koñolosi yaco.

2. Olusapo lupi luatiamẽla koku ima apako Yesu a lomboluila olondonge viaye koñolosi yina a kala oku lavoka olofa viaye?

² Elungulo lioku ima apako, liatiamẽla kolusapo lumue Yesu a lomboluila kolondonge viaye. Eye wa vi sapuila hati: “Ame nduyuva wocili, Tate eye ongunja yaco. Ocanja cosi cange ka cimi epako, [eye] o ci sonjako, kuenje cosi cima epako, o ci sonjela oco cime epako lia lua. Puãi ene wa sonjelui ale londaka nda popia lene. Kali vokuange, kuenje ame ñalavo vokuene. Ndeci ocanja ka ci tẽla oku ima lika liaco, te ci tokeka kuyuva, haico ene nda ko kala vokuange. Ame nduyuva, ene vuvianja viaco. . . . Kokuima kuene epako lia lua, oko Tate a muisilua ulamba, kuenje vu li lekisa okuti vulondonge viange. Ndeci Isia a sole ame, haico ame ndo solivo. Kali vocisola cange. Nda vu pokola kovihandeleko viange, vu kala vocisola cange, ndeci ame nda pokola kovihandeleko via Tate, kuenje ñasi vocisola caye.”—Yoano 15:1-10.

3. Nye olondonge via Yesu via sukilile oku linga oco vime apako?

³ Volusapo olu, Yehova eye Ongunja, Yesu, uyuva kuenda olondonge vina Yesu a lomboluila olondaka viaco, ovo ovianja. Osimbu ovapostolo vamamako oku ‘kuata ukamba la’ Yesu, ci tava okuti ovo va ima apako. Noke, Yesu wa lekisa ndomo ovapostolo va pondola oku amamako lukamba waco poku va sapuila hati: ‘Nda vu pokola kovihandeleko viange, vuka kala vocisola cange.’ Noke, upostolo Yoano wa sonehela akamba vaye Akristão olondaka vimuamue poku popia hati: ‘Omunu wosi o pokola kovihandeleko via Kristu o kuata ukamba laye.’a (1 Yoano 2:24; 3:24) Omo liaco, eci olondonge via Kristu vi pokola kolonumbi viaye, ci va kuatisa oku amamako lukamba wocili laye kuenje ukamba waco u va kuatisavo oku ima apako. Apako api tu sukila oku ima?

Epuluvi Lioku Amamako

4. Nye tu pondola oku lilongisila kesunga lieci Yehova ‘a sonjela’ ocanja cosi ka cimi epako?

⁴ Volusapo luatiamẽla kuyuva, Yesu wa popia hati, ocanja cosi ka cimi epako, Yehova “o ci sonjako.” Olusapo olu lu lomboloka nye kokuetu? Eci ka ci lombolola okuti, olondonge viosi vi sukila oku ima epako. Pole, ci lombolola okuti, cikale omanu vana okuti ekalo liavo li kasi ciwa ale vana va sangiwa lovitangi, vosi yavo va pondola oku ima epako. Pole, Yehova ka sanjukila okupa ocikele ondonge ya Kristu omo okuti ka ya tẽlisile upange umue a tambula.​—⁠Osamo 103:14; Va Kolosai 3:23; 1 Yoano 5:⁠3.

5. (a) Ndamupi olusapo lua Yesu lu lekisa okuti tu pondola oku amamako loku ima apako? (b) Olonepa vipi vivali viatiamẽla kapako tuka lilongisa?

⁵ Olusapo lua Yesu luatiamẽla kuyuva, u tu lekisavo okuti, cikale okuti, ekalo lietu liecelela ale sio, tu sukila oku sandiliya epuluvi lioku amamako kupange wetu tulondonge. Konomuisa ndomo Yesu a lombolola ondaka yaco. Eye wa popia hati: ‘Ocanja cosi cange ka cimi epako, eye o ci sonjako, kuenje cosi cima epako, o ci sonjela oco cime apako alua.’ (Yoano 15:⁠2) Yesu kesulilo liolusapo luaye, wa vetiya olondonge viaye oco vime ‘apako alua.’ (Ocinimbu 8) Eci hẽ ci lomboloka nye? Eci ci lomboloka okuti, etu tulondonge via Yesu, tu sukila oku yuvula ocituwa coku li sanjuisa lika etu muẽle kuenda coku lipolapo. (Esituluilo 3:14, 15, 19) Pole, tu sukila oku sandiliya apuluvi oku amamako oku ima apako. Apako api tu sukila oku ima? Apako aco a tepisiwa volonepa vivali ndeci: (1) ‘Apako espiritu’ kuenda (2) apako Usoma.—Va Galatia 5:22, 23; Mateo 24:14.

Apako a Tunda Koku Kuata Ovituwa Viwa Viukristão

6. Ndamupi Yesu Kristu a vetiya esilivilo liepako liespiritu eye a tukula tete?

⁶ Ocisola oco ci kasi pomangu yatete pokati ‘kapako espiritu.’ Espiritu sandu lia Suku liecelela Akristão oku kuata ocituwa caco poku pokola kocihandeleko cina Yesu a ecele kolondonge viaye osimbu handi ka lomboluile olusapo luatiamẽla kapako uyuva. Eye wa sapuila olondonge viaye hati: “Ndu wihi ocihandeleko cokaliye cokuti, lisoli pokati.” (Yoano 13:34) Yesu ombangulo a kuata lovapostolo vaye kuteke una wa sulako komuenyo waye palo posi, eye wa pitolola loku va ivaluisa esilivilo lioku lekisa ocisola.—Yoano 14:15, 21, 23, 24; 15:12, 13, 17.

7. Ndamupi upostolo Petulu a lekisa okuti oku ima apako ku limbukiwila koku lekisa ovituwa ndevi via Kristu?

⁷ Omo okuti upostolo Petulu wa kalavo la Yesu kuteke waco, eye wa kuata elomboloko liokuti, olondonge viocili via Kristu vi sukila oku lekisa ocisola ndeci ca Kristu kuenda wa lombololavo ovituwa vikuavo via kongeliwamo. Noke, eci pa pita anyamo amue, upostolo Petulu wa vetiya Akristão oco va lekise ovituwa ndeci: Esuluviko, oku kuata ocikembe la vamanji kuenda ocisola. Eye wa popiavo hati, nda tua kuama onjila yaco, tuka tẽla oku yuvula ‘oku kuata owesi woku ima apako.’ (2 Petulu 1:​5-8) Ndaño okuti tu pita lasakalalo añi añi, pole tu pondola oku lekisa apako espiritu. Tu pondolavo oku likolisilako oku lekisa ocisola, umbombe, unu kuenda ovituwa vikuavo ndevi via Kristu, momo “ka kuli ocihandeleko [cikuavo] ci pitahãla ovina evi.” (Va Galatia 5:22, 23) Omo liaco, tu amamiko oku ima ‘apako alua.’

Oku Ima Apako Usoma

8. (a) Elitokeko lipi li sangiwa pokati kapako espiritu kuenda apako Usoma? (b) Apulilo api tu sukila oku konomuisa lutate?

⁸ Apako ana a fina okuti apia ciwa a posuisa uti waco. Pole, apako aco ci tava okuti a kuata esilivilo lialua okuti oku fina kuti waco ku sule. Apako a kuete esilivilo liocili momo ombuto yaco yi pondola oku ecelela okuti uti waco u kũlĩhĩwa vali ciwa. Cimuamue haico ci pita lapako espiritu momo a velapo okuti eposo liovituwa vietu Tuakristão li sule. Ovituwa ndeci, ocisola kuenda ekolelo, vi tu vetiya oku sandeka ombuto yesapulo Liusoma yi sangiwa Vondaka ya Suku. Konomuisa ndomo upostolo Paulu a lekisa elomboloko liondaka eyi yi kuete ndeti esilivilo liocili. Eye wa popia hati: “Letuvo tu kolela kuenje tu popia.” (2 Va Korindo 4:13) Kueci catiamẽla kondaka eyi, upostolo Paulu wa lombolola hati, “tu lumbi lumbi ku Suku ocilumba cesivayo haico epako liovimela [vietu].” Eli olio epako liavali tu sukila oku lekisa. (Va Heveru 13:15) Tu kuete hẽ epuluvi komuenyo wetu lioku lekisa ‘apako alua’ poku sandeka esapulo Liusoma wa Suku?

9. Oku ima apako ku sokisiwa hẽ loku longisa omanu oco va linge olondonge? Ci lombolola.

⁹ Oco tu ece etambululo lia sunguluka, tu sukila oku kuata elomboloko lieci catiamẽla kapako Usoma. Ca sunguluka hẽ oku sima okuti, oku ima apako aco ci lomboloka oku longisa omanu oco va linge olondonge? (Mateo 28:19) Anga hẽ oku ima kuaco apako ku lomboloka omanu vana tu kuatisa okuti va papatisiwa oco va linge afendeli va Yehova? Sio, hacoko. Nda oco ca lombolokele, nda ca sumuisa Olombangi via Yehova vina vi kasi ale otembo yalua kupange woku kundila esapulo Liusoma vovikanjo vina okuti omanu vaco ka va lekisa onjongole. Ocili okuti, nda apako Usoma ana etu tu ima atiamẽle lika koku longisa omanu oco va linge olondonge, upange wa tĩla u kasi oku lingiwa Lolombangi via Yehova, nda u sokisiwa lovianja vina ka vimi apako via tukuiwa volusapo lua Yesu! Omo liaco, eli halioko elomboloko liapako aco. Oco hẽ apako api Usoma a kuete esilivilo liocili kupange wetu woku kunda?

Asumũlũho a Tunda Koku Sandeka Ombuto Yusoma

10. Ndomo ca lekisiwa volusapo lua Yesu luatiamẽla kuwayi wombuto kuenda kolosi via litepa, apako Usoma a lomboloka nye? Pole ka a lomboloka nye?

¹⁰ Olusapo lua Yesu luatiamẽla kongunja ya waya ombuto volosi via litepa, lu eca etambululo ku vamanji va kasi oku kundila vovikanjo vina okuti omanu vaco ka va lekisa onjongole kesapulo Liusoma. Yesu wa popia hati, ombuto yi lomboloka esapulo Liusoma li sangiwa Vondaka ya Suku kuenda olosi via litepa vi lomboloka ovitima viomanu. Ombuto yimue, “ya lokila posi yiwa, ya yova kuenje ya licita.” (Luka 8:8) Apako aco hẽ a kasi ndamupi? Ocili okuti, ombuto yotiliku ya kũlĩwa, poku tunda ka yimi vali ombuto yimuamue ndayina ya kũlĩwile, pole oyo yima ombuto yimue yokaliye. Cimuamue haico ci pita Lukristão okuti, apako eye a sukila oku ima ka a lomboloka oku kuata olondonge viokaliye, pole a lomboloka ombuto yokaliye Yusoma.

11. Epako Liusoma li lomboloka nye?

¹¹ Kueci catiamẽla kondaka eyi, apako ka a lomboloka olondonge viokaliye ale ovituwa viwa Viukristão. Omo okuti ombuto ya kũlĩwa yi lomboloka ondaka Yusoma, apako aco a lomboloka oku livokiya kuondaka yaco Yusoma. Omo liaco, oku ima apako ci lomboloka oku lombolola eci catiamẽla kesapulo Liusoma. (Mateo 24:14) Anga hẽ tu kasi oku ima apako aco Usoma poku kunda olondaka viwa Viusoma ndaño lovitangi tu liyaka lavio? Oco muẽle! Volusapo luaco, Yesu wa lombololavo esunga liatiamẽla kondaka yaco.

Tu Lingi Upange Uwa Weca Esivayo ku Suku

12. Anga hẽ ci tava okuti Akristão vosi va pondola oku ima apako Usoma? Ci lombolola.

¹² Yesu wa popia hati: “U wa kũliwa vongongo yiwa . . . omunu waco ima epako, umue ocita, umue akui epandu, umue akui atatu.” (Mateo 13:23) Ombuto ya kũlĩwa vepia, ci tava okuti oku ima kuayo ku litepa loku ima kuombuto yikuavo. Cimuamue haico ci pita letu okuti poku sandeka olondaka viwa ci tava okuti pa kala etepiso liatiamẽla kekalo lietu leli lia vakuetu, momo Yesu wa lekisa okuti eye wa kũlĩhĩle ciwa onepa eyi. Kuli omanu vana okuti va kuete apuluvi alua oku linga upange waco. Handi vali, kulivo vakuavo okuti va kuete uhayele uwa kuenda ongusu. Ocili okuti, upange wetu tu linga ci tava okuti ulua ale utito oku u sokisa lowu wa vakuetu. Pole, nda tu amamako loku likolisilako kupange waco, poku linga cosi tu tẽla ci sanjuisa Yehova. (Va Galatia 6:4) Cikale okuti tua kuka, ale tuvela, poku litumbika kuetu kupange woku kunda, Yehova Isietu ukuacisola o tu tenda ndomanu vana va kasi ‘oku ima apako alua.’ Momo lie? Momo etu tu eca ku Yehova ovina viosi ‘tu kuete’ poku litumbika kokuaye lutima wetu wosi.b—Marko 12:43, 44; Luka 10:27.

13. (a) Momo lie tu sukilila ‘oku enda’ oco tu ime epako Liusoma? (b) Nye cika tu kuatisa oku ima apako ndaño okuti vocikanjo cetu omanu ka va lekisa onjongole? (Tanga okakasia ka sangiwa kemẽla 21.)

¹³ Nda tua likolisilako kovina viosi tu linga kupange woku ima apako Usoma, tuka vetiyiwa ‘oku enda oco tu imi apako,’ eci tu ivaluka esunga lieci tu lingila upange waco. (Yoano 15:16) Yesu wa lombolola esunga liupange waco poku popia hati: “Kokuima kuene epako lia lua oko Tate a muisilua ulamba, kuenje vu lekisa okuti vulondonge viange.” (Yoano 15:8) Ocili okuti, upange wetu woku kunda u sivaya onduko ya Suku yetu Yehova pokati komanu vosi. (Osamo 109:30) Manji umue o tukuiwa hati Honor, o kuete ci soka 70 kanyamo, wa lombolola hati: “Ndaño okuti, ndi kasi oku kundila vocikanjo cina okuti, omanu vaco ka va lekisa onjongole, nda sanjuka calua omo lioku ambata onduko ya Suku Ukuonenewosi.” Manji umue o tukuiwa hati, Claudio okuti Ombangi ya Yehova tunde kunyamo wo 1974, eci a pulisiwa esunga lieci a tuihinyila oku kunda ndaño okuti vocikanjo caye omanu ka va luile va lekisa onjongole, eye wa eca etambululo lolondaka vielivulu lia Yoano 4:34, oku tu tanga olondaka via Yesu wa popia hati: “Okulia kuange oku linga ocipango cu wa numa, kuenda oku suisapo upange waye.” Manji Claudio, wa vokiyako olondaka viaye hati: “Ndeci Yesu a linga, ame si yongola lika oku fetika upange, pole ndi yongolavo oku malusula upange wange woku kunda Usoma.” (Yoano 17:4) Olombangi via Yehova vi sangiwa voluali luosi, vi kuetevo ocisimĩlo cimuamue.—Tanga okakasia losapi ya linga hati: ‘Ndomo tu Pondola Oku Ima Apako Lepandi,’ kemẽla 21.

Oku Kunda Kuenda Oku Longisa

14. (a) Ovina vipi vivali via kongeliwile vupange wa Yoano Upapatisi kuenda vupange una Yesu a linga? (b) Ndamupi o lombolola eci ca kongela vupange Wakristão koloneke vilo?

¹⁴ Yoano Upapatisi, eye ukundi watete Wusoma wa tukuiwa Vevanjeliu. (Mateo 3:1, 2; Luka 3:18) Ocimãho caye catete ca kala coku ‘imbila uvangi’ kuenda eye wa ci linga lutima waye wosi lelavoko liokuti, ‘omanu vo kolofeka viosi va tava kondaka yocili.’ (Yoano 1:6, 7) Omo liaco, omanu vamue Yoano a kundila, veya oku linga olondonge via Kristu. (Yoano 1:35-37) Yoano wa kala ukundi umue wa longisa omanu oco va linge olondonge. Yesu wa kalavo ukundi kuenda ulongisi. (Mateo 4:23; 11:1) Ka ci komohĩsa eci Yesu a tuma olondonge viaye oco vi kunde esapulo Liusoma kuenda oku kuatisa omanu vana va tava kesapulo liaco oco va linge olondonge viaye. (Mateo 28:19, 20) Koloneke vilo, vupange wetu mua kongelavo oku kundila omanu kuenda oku va longisa.

15. Ocituwa cipi vamanji va liyaka laco catiamẽla kupange woku kunda wa lingiwa kocita catete K.K. okuti ci kasi oku pitavo koloneke vilo?

¹⁵ Omanu vana va kala kocita catete K.K., okuti va yeva esapulo upostolo Paulu a kunda kuenda oku longisa kuaye, pokati kavo pa kala “vamue va tava kovina via popiwa, [pole] vamue ka va tavele.” (Ovilinga 28:24) Ocituwa caco, haico ci kasi oku pita koloneke vilo. Ci sumuisa calua ceci okuti, ombuto yimue ya siata oku wila vosi yĩvi. Pole, ombuto yikuavo ya siata oku wila vosi yiwa okuti, olombombo viayo viñila ciwa posi kuenda yi kula ndomo Yesu a popele. Omo liaco, vokuenda kuosemana losemana, cimue ci soka 5.000 komanu voluali luosi va siata oku linga olondonge viocili via Kristu. Ndaño okuti, onepa yalua yomanu ka va tava kesapulo Liusoma, kuli valua okuti va kasi oku ‘tava kovina via popiwa.’ Nye ca kuatisa omanu vaco oku tava kesapulo Liusoma? Olonjanja vialua, Olombangi via Yehova via siata oku lekisa onjongole komanu vaco omo lioku tapela ombuto yaco ya kũliwa ndopo kuenje eci ca siata oku kuatisa. (1 Va Korindo 3:6) Pokati kovolandu alua, tu konomuisipo avali.

Oku Lekisa Onjongole Komanu ci Kuete Esilivilo Liocili

16, 17. Momo lie ci kuetele esilivilo liocili oku lekisa onjongole komanu vana tu sanga kupange wetu woku kunda?

¹⁶ Manji umue umalẽhe o tukuiwa hati Karolien, wo kofeka yo Belgika, wa vangula lukãi umue ukulu okuti tete ka lekisile onjongole kesapulo Liusoma. Omo okuti ovaka ukãi waco a kutiwile lotulonanga tuoku kuta pepute, manji Karolien kumue lukuavo a kala oku enda laye, va yonguile oku u kuatisa, pole eye ka tavele. Noke yoloneke vivali, ovo va tiukila vali konjo yukãi waco, kuenje vo pulisa ndomo ekalo liaye li kasi. Manji Karolien wa popia hati: “Onjongole tua lekisa kokuaye yo kuatisa calua. Kuenje ukãi waco wa komõha calua eci a limbuka okuti etu tu u kuete onjongole yocili. Omo liaco, eye wa pinga oco tu iñile vonjo yaye, kuenje tua fetika laye Elilongiso Liembimbiliya.”

¹⁷ Manji umue ukãi o tukuiwa hati Sandi, wo kofeka yo Estados Unidos, wa lekisavo onjongole komanu vana eye a kundila esapulo liusoma. Eye wa tanga asapulo atiamẽla kucitiwo a sandekiwa vukanda wasapulo o pocitumãlo kuenje eci aka pasuisile olonjali vina via cita oñaña vocikanjo caye, wambatele elivulu losapi ya linga hati, Meu Livro de Histórias Bíblicas.c Omo okuti onjali yosi yi kuete oñaña ya siata oku kala konjo, oco yi tambule akombe vana veya oku yolela oñaña yaye, olonjanja vimue ci tava oku kuata laye ombangulo. Manji Sandi wa popia hati: “Nda vangula lolonjali viaco eci catiamẽla kukamba u pondola oku kala pokati kavo loloñaña omo lioku u tangelako. Noke nda lombolola ocitangi catiamẽla koku tekula omãla voluali lulo.” Omo liepasu manji Sandi a linga kolonjali viaco, cilo umue pokati kolonjali viaco kuenda omãla vaye epandu, va fetika oku vumba Yehova. Omo liaco, oku lekisa onjongole komanu vana tu sanga kupange wetu woku kunda, ci nena esanju liocili.

18. (a) Momo lie tu sukilila oku tẽlisa onumbi yatiamẽla koku ‘ima apako’ lepondolo liosi tu kuete? (b) Olonumbi vipi vitatu ove o pondola oku tẽlisa viatiamẽla koku kala olondonge ndomo via lomboluiwa Vevanjeliu lia Yoano?

¹⁸ Hesanjukuolio tu kuata poku kũlĩha okuti, tu kuete epondolo lioku ‘ima apako’! Cikale okuti tuamalẽhe ale tuakulu, nda tu kuete uhayele ale tu vela, ale pamue tu kundila vocikanjo cimue okuti omanu vaco ka va lekisa onjongole, vosi yetu tu pondola oku ima apako. Ndamupi? Tu pondola oku ci linga poku lekisa apako espiritu komanu kolonepa viosi kuenda poku kundila vakuetu esapulo Liusoma wa Suku luloño wetu wosi. Handi vali, tuka likolisilako oku ‘kakatela kondaka ya Yesu’ kuenda ‘oku li kuatela ocisola pokati.’ Omo liaco, nda tua pokola kolonumbi evi vitatu viatiamẽla koku kala olondonge ndomo via lomboluiwa Vevanjeliu lia Yoano, tuka lekisa okuti, ‘tulondonge viocili via Kristu.’—Yoano 8:31; 13:35.

[Etosi pombuelo yemela]

Apulilo Oku Pitulula

• Apako api tu sukila oku ima?

• Momo lie tu kuetele ocimãho coku ‘ima apako alua’ lovina viosi tu pondola oku linga?

• Olonumbi vipi vitatu tu sukila oku kũlĩhĩsa via lomboluiwa Vevanjeliu lia Yoano viatiamẽla koku kala olondonge?

[Okakasia lelitalatu kemela 29]

NDOMO TU PONDOLA ‘OKU IMA APAKO LEPANDI’

Nye ci pondola oku ku kuatisa oco amameko lekolelo kupange woku kundila espulo Liusoma vocikanjo cina okuti omanu vaco ka va lekisa onjongole? Palo pali atambululo amue atiamela konepa eyi okuti a pondola oku ku kuatisa.

Harry, o kuete ci soka 72 kanyamo okuti wa papatisiwa kunyamo wo 1946, wa popia hati: “Omo lioku kuliha okuti tu kuete ekuatiso liosi li tunda ku Yesu, ci ndi kuatisa oku pandikisa katambululo osi eciwa lomanu vana va sangiwa vocikanjo cetu ndano okuti ka va lekisa onjongole.”

Claudio, o kuete ci soka 43 kanyamo okuti wa papatisiwa kunyamo wo 1974, wa popia hati: “Elivulu lia 2 Va Korindo 2:17, lia siata oku ndi kuatisa calua. Olio li popia okuti, eci tu kasi kupange wetu woku kunda, ‘tu popia lesunguluko ndomanu va Suku lekuatiso lia Kristu kovaso a Suku.’ Eci ndenda kupange woku kunda, ndi sanjuka calua omo lioku talavayela kumosi lakamba vange ndi sole calua.”

Gerard, o kuete ci soka 79 kanyamo, okuti wa papatisiwa kunyamo wo 1995, wa popia hati: “Upange woku kunda kokuange, ocikele cimue ca tila okuti ndi kasi oku liyaka laco. Pole, nda siata oku kuatisiwa lolondaka vi sangiwa kelivulu Liosamo 18:29, yi popia hati; ’Nda nasi la Suku yange nela oku somboka ocimbaka.’”

Eleanor, o kuete ci soka 26 kanyamo, okuti wa papatisiwa kunyamo wo 1989, wa popia hati: “Kupange woku kunda eci ndi sanga epuluvi lioku tangela omunu umue ocisonehua Cembimbiliya, nda sanjuka calua kuenda ndi sima okuti, utima waye wa konomuisiwa Lembimbiliya.”

Paul, o kuete ci soka 79 kanyamo, okuti wa papatisiwa kunyamo wo 1940, wa popia hati: “Ndi seteka oku kuama olonjila vini vini viatiamela koku fetika oku vangula lomanu. Kuli afetikilo alua oku vangula lomanu okuti, sika tela oku a kuama osi vokuenda kuomuenyo wange.”

Daniel, o kuete ci soka 75 kanyuamo, okuti wa papatisiwa kunyamo wo 1946, wa popia hati: Kupange woku kunda eci ndi sanga omanu vana okuti ka va ndi tambulula, ciwa, si kuata esumuo. Ndi seteka oku lekisa ukamba wocili poku vangula lavo kuenda oku yevelela lutate ovisimilo viavo.”

Joan, o kuete ci soka 66 kanyamo, okuti wa papatisiwa kunyamo wo 1954, wa popia hati: “Nda sanga omanu vana va papatisiwa ndopo, va ndi sapuila hati, upange wange woku kunda wa va kuatisa calua oku linga Olombangi via Yehova. Ndano okuti omanu vaco sia va kulihile, pole veya oku lilongisa Embimbiliya la manji ukuavo kuenje, eye wa va kuatisa oku amamako kespiritu. Omo liaco, eci ci ndi sanjuisa calua poku kuliha okuti, upange wetu woku kunda u lingiwa lekuatiso lia vakuetu.”

Nye cu ku kuatisa oku ‘ima apako lepandi’?—Luka 8:15.

[Elitalatu kemela 28]

Poku lekisa apako espiritu kuenda oku sandeka esapulo Liusoma, tu pondola oku ima apako alua

[Elitalatu kemela 31]

Olondaka via Yesu vina a sapuila ovapostolo vaye hati: ‘Amamiko loku ima apako’ vi lomboloka nye?