Omanu Valua Va Mola Yesu Osimbu o Pendekoste Ka Ya Piti̇̃lile

Yesu noke liepinduko liaye, o linga esokiyo liokuti 11 kovapostolo va li sanga laye komunda yimue ko Galilea. Ci soka 500 kolondonge haipo va kasivo, pole, vakuavo va kasi latatahãi nda okuti Yesu o kasi lomuenyo. (Mateo 28:17; 1 Va Korindo 15:6) Pole, eci Yesu a popia ci va kuatisa oku tava.

Yesu o lombolola okuti Suku wa eca kokuaye unene wosi wo kilu lowu wo posi. Eye o va vetiya hati: “Kuendi ka longisi omanu vo kolofeka viosi oco va linge olondonge, va papatisili vonduko ya Tate la Mõla kuenda espiritu sandu, va longisi oku linga ovina viosi ndo kundiki.” (Mateo 28:18-20) Yesu o kasi lomuenyo kuenda handi o yongola okuti olondaka viwa vi kundiwa.

Olondonge viosi via Yesu ci kale alume ale akãi kuenda omãla, va tambula ocikundi cimuamue coku longisa omanu oco va linge olondonge. Ndaño ovanyãli va seteka oku tateka upange wavo woku kunda kuenda woku longisa, pole, Yesu o va likuminya hati: “Unene wosi wo kilu lowu wo posi, wa nyĩhiwa.” Eci ci lomboloka nye kolondonge viaye? Eye o va sapuila hati: “Ñasi kumue lene oloneke viosi, toke kesulilo liovina vi kasi voluali.” Yesu ka popele okuti vosi va kunda olondaka viwa va ka linga ovikomo. Pole, va ka tambula ekuatiso liespiritu sandu.

Olonjanja Yesu a molẽha kolondonge viaye noke liepinduko, vocosi ci tẽla 40 koloneke. Eye o ci linga poku pongolola etimba liaye olonjanja vialua kuenda ‘o limolẽhisa kokuavo okuti, o kasi lomuenyo lonjila yimue okuti ka si atatahãi.’ Eye o va longisa eci catiamẽla Kusoma wa Suku.—Ovilinga 1:3; 1 Va Korindo 15:7.

Citava okuti osimbu ovapostolo va kasi handi vo Galilea, Yesu o va handeleka oco va tiukile ko Yerusalãi. Poku li sanga lavo volupale, eye o va sapuila hati: “Ko ka tundi vo Yerusalãi, pole amamiko oku lavoka eci Isia a likuminya catiamẽla kovina vu yeva kokuange; momo Yoano wa papatisa lovava, puãi ene vu papatisiwa lespiritu sandu eci pa pita oloneke vimue noke yovina evi.”—Ovilinga 1:4, 5.

Noke Yesu o li sanga vali lovapostolo vaye. Eye “wa enda lavo toke ko Betania,” yi kasi kutundilo vepato Liomunda Yoliveira. (Luka 24:50) Ndaño lovina viosi Yesu a va sapuila catiamẽla koku enda kuaye, ovo handi ka va tava okuti Usoma wa Suku u keya palo posi.—Luka 22:16, 18, 30; Yoano 14:2, 3.

Ovapostolo va pula Yesu vati: “A Ñala anga o tumbulula usoma wa Isareli cilo?” Eye o va tambulula lika hati: “Haceneko oku kũlĩha olotembo pamue ovovo vina Isia a tumbika lomoko yaye.” Pole, poku va ivaluisa upange va sukila oku linga, o popia hati: “Eci espiritu sandu liya kokuene vu tambula unene, vu linga olombangi viange vo Yerusalãi, vo Yudea yosi kuenda vo Samaria toke kasukiyo o kilu lieve.”—Ovilinga 1:6-8.

Yesu una wa pinduiwa, o kasi lovapostolo Komunda Yoliveira eci eye a fetika oku londa kilu. Elende limue li sitika Yesu kuenje olondonge ka vi tẽla vali oku u mola. Yesu noke liepinduko liaye, wa li pongolola vetimba liositu. Cilo o li pongolola vali okuti o kuata etimba liespiritu oco a londe kilu ndociluvo cespiritu. (1 Va Korindo 15:44, 50; 1 Petulu 3:18) Osimbu ovapostolo va luluvala Yesu, “alume vavali luwalo u yela” va talama ponele yavo. Ovangelo vaco okuti va lipongoluila vetimba liositu, va popia vati: “Ene alume vo ko Galilea, momo lie vu tãilili oku vanja kilu? Yesu una wa ambatiwa kilu, o tiuka kokuene ndeci wo moli oku londa kilu.”—Ovilinga 1:10, 11.

Oku enda kua Yesu kilu ka kua muiwile lomanu valua. Wa muiwa lika lolondonge viaye vakuekolelo. Eye o ka tiuka vali ‘ndeci a londa kilu.’ Ka ka muiwa lomanu valua, pole, olondonge viaye vakuekolelo ovio lika vi ka limbuka oku tukuluka kuaye vunene Wusoma.

Ovapostolo va tiukila ko Yerusalãi. Voloneke via kuamamo, ovo va liongolola lolondonge vikuavo, oku kongelamo “Maria ina ya Yesu kuenda vamanjaye.” (Ovilinga 1:14) Ocimunga caco ci likutilila olonjanja viosi. Ocina ca velapo va kongela volohutililo viavo oku nõliwa kuondonge yimue yi piñainya Yuda Isikariote, oco ovapostolo va kale vali 12. (Mateo 19:28) Ovo va yongola ondonge yimue ya mola ovilinga via Yesu kuenda ya imbila uvangi epinduko liaye. Eyi oyo onjanja ya sulako Embimbiliya li vangula catimẽla koku imba ocela, oco ocipango ca Suku ci kũlĩhĩwe. (Osamo 109:8; Olosapo 16:33) Matiya okuti wa kalavo pokati kolondonge 70, vana Yesu a tumile oku kunda, eye wa nõliwa kuenje “wa tendiwila kumue lovapostolo 11.”—Ovilinga 1:26.

Noke lioloneke ekũi tunde eci Yesu a enda kilu, kua fetika Ocipito ca va Yudea co Pendekoste yunyamo 33 K.K. Ci soka 120 kolondonge, via liongoluila vohondo yimue vo Yerusalãi. Vocipikipiki kilu kua tunda onjuela ndokuõla kuofela yalua kuenje ya yevala vonjo yosi. Kuenje kua tukuluka alimi a setahãla ondalu kuenda a vata kovitue viomunu lomunu pokati kavo. Olondonge via fetika oku vangula alimi aiñi aiñi. Ocikomo caco, espiritu sandu, lina Yesu a likuminyile!—Yoano 14:26.