Ndomo Yehova Amẽla Kokuetu

1. Nye omanu va sukila, kuenda helie o pondola oku tẽlisa onjongole yaco?

OMUNU lomunu pokati ketu, o kuete onjongole yoku kuata ukamba lomanu vakuavo. Tu popia lika tuti, omanu va li kuetele ukamba la vakuavo, nda va li sole pokati, kuenda va li kũlĩha ciwa.” Tu pondola oku kakatela kukamba tu kuete vepata lietu, akamba va tu sole okuti, va kuete elomboloko liekalo lietu. Pole, tu sukila oku kuata ukamba wa velapo la Yehova, Ululiki wetu.—Uku. 12:1.

2. Nye Yehova a tu likuminya? Pole, momo lie omanu vamue ka va tavela kohuminyo yaco?

² Yehova lekuatiso Liondaka yaye, o tu vetiya oku ‘amẽla’ kokuaye, kuenda wa tu likuminya okuti, nda tua ci linga eye ‘amẽla’ kokuetu. (Tia. 4:8) Oku kũlĩha ondaka yaco, ci tu nenela esanju! Pole, omanu valua va siata oku sima okuti, ka va pondola oku kuata ukamba la Suku. Ovo, va sima okuti, ka va sesamẽla ukamba waco laye, momo, Yehova o kasi ocipãla lavo. Anga hẽ, tu pondola oku kuata ukamba la Yehova?

3. Nye tu pondola oku limbuka catiamẽla ku Yehova?

³ Omo okuti Yehova “ka kasi ocipãla” lomanu va yongola oku u sanga, tu pondola oku u kũlĩha. (Tanga Ovilinga 17:26, 27; Osamo 145:18.) Onjongole ya Yehova Suku yeyi yokuti, omanu ka va lipuile va kuata ukamba laye, kuenda o tava okuti, va linga akamba vaye vocili. (Isa. 41:8; 55:6) Omo okuti ukualosamo wa kuatele elomboloko liaco, wa soneha eci catiamẽla ku Yehova ndoco: “Ove, okuakuyeva ohutililo, kokuove ku kokela omanu vosi. Omunu ove o nõla [u] pitisa ocipepi.” (Osa. 65:2, 4) Ulandu Wembimbiliya watiamẽla ku Soma Asa wo ko Yuda, u lekisa ndomo amẽla ku Yehova Suku, kuenda ndomo Yehova amẽla kokuaye.a

LILONGISILA KOVOLANDO O KOSIMBU

4. Ongangu yipi soma Asa a lekisa komanu vo ko Yuda?

⁴ Soma Asa wa lekisa ombili yalua kefendelo liocili. Eci a vialekiwa komangu yusoma kotembo yaco, vofeka mua kala omanu vamue va enda oku lingila upuepue vonembele, loku fendela oviteka. Pole, eye wa pokuile ku Yehova poku nyõla ovina viaco via vĩha. (1 Olos. 15:9-13) Omo okuti Soma Asa wa kuatele ukamba la Yehova, kuenda wa pokuile kovihandeleko viaye, wa vetiya omanu oku “sanda Suku yolosekulu viavo loku lava ovihandeleko locikundi caye.” Omo liaco, Yehova wa sumũlũisa lombembua uviali wa soma Asa vokuenda kueci ci soka ekũi lianyamo. Soma Asa wa eca esivayo ku lie, omo liombembua va kuata? Eye, wa sapuila komanu hati: “Ofeka lopo yetu, momo etu tua sanda Yehova Suku, tuo sandiliya kuenje wa tu muisa ombembua kolonele viosi.” (2 Asa. 14:1-7) Konomuisa eci ceya oku pita noke.

5. Nye ca pita la soma Asa ceca uvangi wokuti, wa lekisile ekolelo ku Yehova, kuenda nye ceyililako?

⁵ Likapa pomangu ya soma Asa. Ombiali yimue yi tukuiwa hati Sera wo ko Etiopia, weya vofeka yo Yuda leci ci soka 1.000.000 kalume, kuenda eci ci soka 300 kakãlu wuyaki. (2 Asa. 14:8-10) Nda wa pitile locitangi caco, nye nda wa linga poku mola olohoka vialua vi kasi oku iñila vofeka yove? Citava okuti o kuete lika ci soka 580.000 kasualali! Omo okuti etendelo liasualali vove litito, nda wa pula hẽ esunga lieci Suku a ecelela ocitangi caco? Anga hẽ, nda wa kolela kolondunge viove muẽle oco o tetulule ocitangi caco? Ocituwa soma Asa a lekisa, ceca uvangi wokuti, wa kuatele ukamba wocili la Yehova. Momo, wa likutilila lolukandi hati: “Tu kuatise, a Yehova, Suku yetu, momo tua liyeka kokuove. Vonduko yove, omo tueyilila oku liyaka lowiñi [owu]. A Yehova ove Suku yetu, omunu ka ka ku yule.” Yehova wa tenda ndati ohutililo soma Asa a linga lutima wosi? ‘Yehova wa kundula va Etiopia.’Lomue unyãli wa puluka kuyaki waco!—2 Asa. 14:11-13.

6. Tu pondola oku kuama ndati ongangu ya soma Asa?

⁶ Nye ca kuatisa soma Asa oku kolela okuti Yehova u songuila kuenda u teyuila? Embimbiliya li lekisa okuti, soma “Asa wa lingainga eci ca sunguluka kovaso a Yehova,” kuenje, ‘utima waye wa sungulukila Yehova.’ (1 Olos. 15:11, 14) Tu sukilavo oku vumba Yehova lutima wetu wosi. Omo liaco, tu sukila oku ci linga, nda tu yongola oku kuata ukamba wocili laye cilo, kuenda kovaso yoloneke. Tu eca olopandu omo Yehova a tu laleka oku amẽla kokuaye, oco a tu kuatise oku amamako oku kuata ukamba laye! Tu konomuisi olonjila vivali vi lekisa ndomo Yehova a siata oku ci linga.

YEHOVA WA TU KOKA LEKUATISO LIOCISEMBI

7. (a) Nye Yehova a linga oco a tu kokele kokuaye? (b) Eliangiliyo lipi lia velapo Yehova a linga lioku tu kokela kokuaye?

⁷ Yehova wa lekisa ocisola caye komanu, eci a lulika ongongo ya posoka oco va kalemo. Toke cilo, Yehova wa siata oku lekisa ocisola caye kokuetu, poku tu ĩha ovina viosi tu sukila eteke leteke. (Ovil. 17:28; Esit. 4:11) Wa siatavo oku tu ĩha okulia kuespiritu tu sukila. (Luka 12:42) Eye, wa likuminya oku tu yevelela eci tu likutilila kokuaye. (1 Yoa. 5:14) Pole, Yehova wa linga eliangiliyo lia velapo lioku tu kokela kokuaye, oco tu amẽle kokuaye omo liocisola a lekisa kokuetu lekuatiso liocisembi. (Tanga 1 Yoano 4:9, 10, 19.) Yehova wa tuma “Omõlaye wongunga” palo posi, oco a tu yovole kekandu kuenda kolofa.—Yoa. 3:16.

8, 9. Ocikele cipi Yesu a kuate vocipango ca Yehova?

⁸ Yehova wa linga esokiyo liokuti, omanu vosi oku kongelamo vana va kala komuenyo osimbu Kristu keyile palo posi, va kuatisiwavo locisembi caco. Eci Yehova a tukula ocitumasuku catiamẽla Konjovoli yetu yo kovaso yoloneke, wa kũlĩhĩle okuti, ocisembi caco ca fetiwa ale. Momo, wa kũlĩhĩle okuti, ocipango caye ca laikele oku tẽlisiwa. (Efet. 3:15) Noke liovita vianyamo, upostolo Paulu wa eca olopandu ku Suku, omo ‘liocisembi ca eciwa la Kristu Yesu.’ Paulu wa amisako hati: ‘Suku wa kala oku lekisa epandi loku ecela akandu a lingiwa kosimbu.’ (Va Rom. 3:21-26) Omo liaco, Yesu o kuete ocikele ca velapo coku tu kuatisa oku amẽla ku Yehova!

⁹ Lekuatiso lia Yesu, omanu ambombe va pondola oku kũlĩha Yehova kuenda oku kuata ukamba laye. Embimbiliya li lombolola ndati ondaka yaco? Paulu wa soneha ndoco: “Suku wa tu muisa ocisola caye okuti, osimbu tua kala vakuakandu oco Kristu a tu fila.” (Va Rom. 5:6-8) Ocisembi ca Yesu, ka ca eciwile omo okuti tu sesamẽla oku kuatisiwa laco, pole, ca eciwa kokuetu omo liocisola Yehova la Yesu va tu kuetele. Yesu wa popia hati: “Lomue o tẽla oku iya kokuange, te Isia wa numa u koka.” Onjanja yikuavo, Yesu wa popelevo hati: “Lomue iya ku Isia, te lame.” (Yoa. 6:44; 14:6) Lekuatiso liespiritu sandu, Yehova wa siata oku kokela kokuaye omanu vonduko ya Yesu, kuenda o va kuatisa oku kala vocisola Caye, lelavoko lioku kuata omuenyo ko pui. (Tanga Yuda 20, 21.) Tu konomuisi onjila yikuavo yi lekisa ndomo Yehova a tu kokela kokuaye.

YEHOVA O TU KOKA LEKUATISO LIEMBIMBILIYA

10. Embimbiliya li tu kuatisa ndati oku kuata ukamba la Yehova?

¹⁰ Vocipama cilo, mua tukuiwa 14 kalivulu a litepa Embimbiliya. Nda ka tua kuatele Embimbiliya, nda tua tẽla ndati oku kũlĩha okuti, tu pondola oku kokiwa Lululiki wetu? Nda ka tua kuatele Embimbiliya, nda tua lilongisa ndati ovina viatiamẽla kocisembi, kuenda ndomo Yehova a tu koka lekuatiso lia Yesu? Lekuatiso liespiritu sandu, Yehova wa tuma oku soneha Embimbiliya li tu situluila ekalo liaye, kuenda ocipango caye. Kelivulu Lietundilo 34:6, 7, Yehova wa situluila ku Mose ekalo liaye poku popia hati: “Yehova Suku yohenda, ukuacali, ukuakulivala konyeño, ukuacisola calua haeye ukuacili, ukuakumuisa kolohulukãi viomanu ocisola ka ci pui. Ukuakuecela olongole levĩho kuenda akandu.” Helie ka yongola oku kokiwa lomunu umue o kuete ovituwa viaco? Yehova wa kũlĩha okuti, nda tua lilongisa ovina vialua viatiamẽla kokuaye lekuatiso Liembimbiliya, tu pondola oku u kũlĩha ciwa, kuenda tu kuata ukamba laye.

11. Momo lie tu sukilila oku lilongisa ovina viatiamẽla kovituwa via Yehova? (Tala elitalatu kefetikilo liocipama cilo.)

¹¹ Ulandu u kasi kefetikilo lielivulu Kuata Ukamba la Yehova, u lombolola ndomo tu pondola oku kuata ukamba laye poku popia ndoco: “Ukamba wosi tu fetika lomunu umue, tu u fetikila koku kũlĩha omunu waco, loku komõha kuenda oku sola ovituwa viaye via litepa. Cimuamue haico okuti, ovituwa via Suku lolonjila viaye ndomo via lomboluiwa Vembimbiliya, vi kuete esilivilo liocili oku vi lilongisa.” Tu eca olopandu omo lia Yehova wa linga esokiyo lioku tu ĩha Embimbiliya lia somehiwa lonjila yimue okuti, tu pondola oku kuata elomboloko liaco!

12. Momo lie Yehova a tumila omanu oco va sonehe Embimbiliya?

¹² Citava okuti, Yehova nda wa tuma ovangelo oco va sonehe Embimbiliya. Ovo va kuete onjongole yoku tu kũlĩha, kuenda ovopange tua siata oku linga. (1 Pet. 1:12) Nda ovangelo ovo va sonehele esapulo lia Yehova, nda va ci linga lonjila yimue okuti, ka mu sangiwa olondaka vimue via lueyiwa. Ovangelo nda va tenda hẽ ovina ndeci omanu va vi tenda? Anga hẽ nda va tẽla oku lombolola ovina tu sukila, ahonguo etu, kuenda ovisimĩlo vietu? Sio, momo, Yehova wa kũlĩha okuti, ovangelo va litepa letu. Eli olio esunga lieci Yehova a nõlela omanu oku soneha Embimbiliya, oco li tu kuatise. Omo liaco, tu pondola oku kuata elomboloko liovisimĩlo viomanu va soneha Embimbiliya, kuenda omanu vakuavo va tukuiwa Vembimbiliya liaco. Tu pondola oku lombolola ovina viatiamẽla kesumuo va kuata, katatahãi avo, kusumba, kakulueya avo, esanju va kuata, kuenda onima va tambula. Ndeci ca pita luprofeto Eliya, asonehi vosi Vembimbiliya va kuatele ‘ovituwa ndevi vietu.’—Tia. 5:17.

13. Ohutililo ya Yona yi ku vetiya oku sima nye?

¹³ Ocili okuti, ungelo nda ka tẽlele oku lombolola ndomo uprofeto Yona a kala, eci a tila ocikele Yehova a ecele kokuaye. Eli olio esunga lieci Yehova a nõlela Yona oco a sonehe ulandu waye, oku kongelamo ohutililo a linga lutima wosi, eci a kala kosi yovava vokalunga! Omo liaco, Yona wa popia hati: “Eci utima wa hongua vokati kange oco nda ivaluka Yehova.”—Yona 1:3, 10; 2:1-9.

14. Momo lie o ponduila oku kuata elomboloko liovina Isaya a soneha viatiamẽla kokuaye muẽle?

¹⁴ Tu konomuisivo ovina Yehova a tuma Isaya oku soneha viatiamẽla kokuaye muẽle. Eci uprofeto Isaya a kuata ocinjonde culamba wa Yehova, co vetiya oku popia ovina viatiamẽla kokuaye okuti, ukuakandu. Omo liaco, wa popia hati: “Ngongo yange we, nda nyõlẽha momo ndukuamẽla wevĩho, ame ñasi pokati kavakuavimẽla vievĩho; omo ovaso ange a mõla Soma, Yehova Ukualohoka.” (Isa. 6:5) Ungelo upi nda wa tẽla oku popia olondaka viaco? Pole, Isaya wa tẽla oku tukula olondaka viaco. Omo okuti tua siata oku lueya ndeci ca pita luprofeto Isaya, tu pondolavo oku sokolola ndomo a kala.

15, 16. (a) Momo lie tu ponduila oku kuata elomboloko liovisimĩlo viomanu? Tukula ulandu umue. (b) Nye ci tu kuatisa oku kuata ukamba la Yehova?

¹⁵ Anga hẽ ovangelo nda va litukula vati, ‘ka va sesamẽla’ ndeci Yakoba a litukula, ale, ndeci Petulu a litukulavo hati “ukuakandu”? (Efet. 32:10; Luka 5:8) Ovangelo nda va kuata hẽ ‘usumba’ ndeci ca pita lolondonge via Yesu? Ale ovangelo vakuesunga nda va sukilile oku kuata ‘utõi’ eci va lambalaliwa poku kunda olondaka viwa ndeci ca pita la Paulu kuenda omanu vakuavo? (Yoa. 6:19; 1 Va Tes. 2:2) Sio, momo ovangelo va lipua, kuenda ka va sokisiwa lomanu. Eci omanu va situlula ovisimĩlo viavo, tu pondola oku kuata elomboloko liaco, momo ka tua lipuilevo. Eci tu tanga Ondaka ya Suku, tu ‘yolela lava va yolela, kuenda tu lila lava va lila.’—Va Rom. 12:15.

¹⁶ Poku sokolola ndomo Yehova a tata afendeli vaye vakuekolelo kosimbu, ci tu kuatisa oku limbuka ovina vialua viatiamẽla kokuaye. Momo wa siata oku lekisa epandi, poku kokela komanu ka va lipuile. Nda tua ci linga, tu kuata ukũlĩhĩso watiamẽla kokuaye, loku lekisa ocisola, kuenda tu kuata ukamba laye.—Tanga Osamo 25:14.

KUATA UKAMBA LA SUKU OKUTI KA U TEPIWA

17. (a) Elungulo lipi liwa Asariya a ecele ku soma Asa? (b) Soma Asa wa pembula ndati elungulo lia Asariya, kuenda nye eya oku pita laco?

¹⁷ Eci Soma Asa a yula olohoka vio ko Etiopia, Asariya uprofeto wa Suku, wo sapuila kumue lomanu vaye hati: “Yehova o kala lene osimbu ene vu kalavo laye, kuenje nda vu sandiliyi eye o tava oku sangiwa lene, puãi nda ene vu u yanduluki eye u yandulukivo.” (2 Asa. 15:1, 2) Pole, soma Asa ka pokuile kelungulo liwa a tambuile. Eci ombiali yo konano yo Isareli ya seteka oku li yaka la soma Asa, eye wa sandiliya ekuatiso lio ko Asuria. Eye, ka pingile ekuatiso ku Yehova, pole, wa linga ukamba la va Asuria va enda oku fendela olosuku viesanda. Kuenje Yehova wo sapuila hati: “Wa linga uveke kondaka eyi, momo tunde cilo o ka sanga ovita.” Omo liaco, wa kuata ovitangi viuyaki vokuenda kuanyamo a kuamamo kuviali waye. (2 Asa. 16:1-9) Ulandu owu u tu longisa nye?

18, 19. (a) Nye tu sukila oku linga, nda tua limbuka okuti, ukamba wetu la Yehova wa tepuluka? (b) Tu pondola oku amẽla ndati ku Yehova?

¹⁸ Tu yuvuli oku yanduluka Yehova. Nda tua ecelela okuti cimue ci tepa ukamba u kasi pokati ketu la Yehova, tu sukila oku kapako olondaka vielivulu lia Hosea 12:6, vi popia hati: “Tiukila ku Suku yove. Linga ohenda lesunga. Imba ovaso ku Suku yove olonjanja viosi.” Eci tu sokolola eliangiliyo liocisembi, kuenda oku lilongisa lutate Embimbiliya, ci tu kuatisa oku amẽla ku Yehova.—Tanga Esinumuĩlo 13:4.

¹⁹ Ukualosamo wa soneha ndoco: “Ame puãi, ciwa oku kala ocipepi la Suku.” (Osa. 73:28) Tu amamiko oku lilongisa ovina viokaliye viatiamẽla ku Yehova, oco vi tu kuatise oku limbuka ndomo tu lekisa ocisola kokuaye. Nda tu amẽla ku Yehova, eye amẽlavo kokuetu cilo, kuenda otembo ka yi pui!