Yehova Eye Ombiali Yetu!

“Nda nola Yehova Suku ha lingi ocikolo cange.”—OSA. 73:28.

1. Ndomo ca lekisiwa kelivulu lia 1 Va Korindo 7:31, Paulu wa sokisa oluali la nye?

UPOSTOLO Paulu wa popia hati: “Oluali ndomo lu kasi cilo, lu kasi loku imuha.” (1 Va Kor. 7:31) Eye wa sokisa oluali lo vocila muna omanu va lingila olomapalo, ci kale evi viwa, ale vievi vĩvi, okuti eci omapalo yimue yi pua, kuiya omapalo yikuavo.

2, 3. (a) Usuanji u kasi oku lingiwila uviali wa Yehova u sokisiwa la nye? (b) Apulilo api tu ka konomuisa?

² Koloneke vilo, voluali luosi mu kasi oku pita ocitangi ci sokisiwa lomapalo yimue okuti ove wa kongeliwamovo! Ocitangi caco catiamẽla komoko Yehova Suku a kuete yoku viala. Oyo, yi sokisiwa lovitangi vi pita vofeka yimue. Vofeka yaco mũli uviali wa tumbika ovihandeleko. Pole, mulivo ocisoko covingumba, cina ci vetiya umunu, ungangala, kuenda umondi. Ocisoko caco ci lingila usuanji uviali wa tumbikiwa vofeka, kuenda ci tateka epokolo liomanu va kasi vemehi liuviali waco.

³ Ocitangi eci, ci sokisiwa lovina vi kasi oku pita voluali luosi. Cilo uviali wesunga wa tumbikiwa ale la ‘Ñala Yehova Ombiali ya Velapo.’ (Osa. 71:5) Pole, handi omanu valua va kasi oku vialiwa locisoko cimue covingumba okuti “eliapu,” olio usongui wocisoko caco. (1 Yoa. 5:19) Ocisoko caco ci lingila usuanji uviali wa Suku kuenda ci seteka epokolo liomanu vosi va kasi vemehi liuviali waye. Oco hẽ, nye ca koka ocitangi caco? Momo lie Suku a ecelela ocitangi caco? Kuenda nye omunu lomunu a sukila oku linga?

Ovina Via Kongela Vomapalo

4. Vocitangi ci kasi oku pita voluali mua kongela ovina vipi vivali?

⁴ Vocitangi ci kasi oku pita voluali mua kongela uviali wa Yehova kuenda epokolo liomanu vosi. Vovisonehua, Yehova o tukuiwa olonjanja vialua okuti, ‘Ñala Soma.’ Ukualosamo, lekolelo lialua wa imba ocisungo hati: “Nda nola [Soma] Yehova Suku ha lingi ocikolo cange.” (Osa. 73:28) Ondaka ‘Soma,’ yi tiamisiwila komunu o kuete omoko yoku viala. Osoma oyo yi kuete omoko ya velapo. Omo liaco, tu kuete esunga lioku tenda Yehova Suku okuti eye Soma wa Velapo.—Dan. 7:22.

5. Momo lie tu vetiyiwila oku kakatela kuviali wa Yehova?

⁵ Yehova Suku omo okuti eye Ululiki wovina viosi, o sesamẽla oku tendiwa Ndosoma yoluali luosi. (Tanga Esituluilo 4:11.) Yehova, Onganji yinene, Ukuakueca ovihandeleko, haeye Osoma yetu, momo vunene waye mua kongela ovosoma osi, kuenda eye ono yovihandeleko voluali luosi. (Isa. 33:22) Omo okuti Suku eye wa tu lulika haeye o tata ovimuenyo vietu, tu kuete ekisika lioku u tenda nda Soma yetu. Tu ka kuata lika onjongole yoku tiamẽla kuviali waye nda tua limbuka okuti “Yehova wa tumbika ocalo caye kilu. Usoma waye u viala kovina viosi.”—Osa. 103:19; Ovil. 4:24.

6. Esunga li lomboloka nye?

⁶ Oco tu tiamẽle kuviali wa Yehova, te tu lekisa esunga lietu kokuaye. “Esunga” li lomboloka oku liyelisa kovituwa pamue oku lipua. Omunu ukuesunga yuna ka kuete atime haeye ondingaiwa. Umue pokati komanu wa lekisa ocituwa caco, Yovi.—Yovi 1:1.

Ndomo Ocitangi Caco ca Fetika

7, 8. Satana wa lingila ndati usuanji uviali wa Yehova?

⁷ Tunde eci ociluvo cimue cespiritu ca lingila usuanji uviali wa Yehova, pa pita ale ci pitahãla 6.000 kanyamo. Onjongole yoku fendeliwa oyo ya vetiya ociluvo caco oku sinila Suku, kovilinga kuenda kolondaka. Ungelo waco wa yonja Adama la Heva ha va tinduka kuviali wokilu kuenda wa seteka oku vĩhisa onduko ya Yehova lalundi. (Tanga Efetikilo 3:1-5.) Ocisuanji caco ceya oku kala Omakuli, okuti Satana (Unyali), Eliapu (Ukualundi), onyoha (ohembi), kuenda ocinyoha (omondi).—Esit. 12:9.

⁸ Satana wa lilingisa eye muẽle osoma. Nye Ñala Yehova a linga oco a tetulule ocitangi caco? Nda vepuluvi liaco wa kunduile Satana, Adama kuenda Heva, nda wa linga ocina ca sunguluka? Ocili okuti eye nda wa ci linga, momo ukuonene wosi. Pole, nda Yehova wa ci lingile, nda ca lekisa okuti ohembi momo nda wa lueya ocihandeleko caye. Momo lie Suku ka ci lingile?

9. Ocitangi cipi Satana a votola?

⁹ Omo Satana wa kemba Adama la Heva loku va tindula ku Suku, wa kapa vatatahãi omoko ya Yehova yoku pinga komanu epokolo. Poku vetiya olohueli viatete oku sinila Suku, Satana wa kapavo vatatahãi epokolo liomanu vosi. Ndeci ca pita la Yovi, una wa lekisa epokolo kuviali wa Yehova, Satana wa lipanda okuti o tẽla oku tindula omanu vosi ku Suku.—Yovi 2:1-5.

10. Suku poku lipañela oku kundula Satana, nye a kasi oku ecelela?

¹⁰ Yehova wa lipañela oku kundula Satana, pole wa eca kokuaye otembo yoku lekisa nda alundi aye ocili nda ndati. Suku o kasi oku ecavo komanu epuluvi lioku lekisa epokolo kuviali waye. Nye ca pita vokuenda kuanyamo? Satana wa tumbika ocisoko cimue covingumba. Ocili okuti Yehova o ka kundula ocisoko caco kuenda Eliapu, kuenje o ka lekisa okuti eye o kuete unene woku viala. Yehova Suku wa kũlĩhĩle okuti ocitumasuku a popele noke yusuanji wa pita vocumbo Cedene, ca laikele oku tẽlisiwa.—Efet. 3:15.

11. Catiamẽla kuviali wa Yehova, nye omanu valua va siata oku linga?

¹¹ Omanu valua va siata oku lekisa ekolelo loku pokola kuviali wa Yehova kuenda oku kemainya onduko yaye. Vamue pokati komanu vaco, Havele, Enoke, Noha, Avirahama, Sara, Mose, Ruti, Daviti, Yesu lolondonge viaye vio kocita catete, kuenda omanu vakuavo vakuepandi vo koloneke vilo. Omo va kakatela kuviali wa Suku, va lekisa okuti Satana ohembi kuenda va yelisa onduko ya Yehova kalundi Eliapu lina lia siata oku litunula okuti li tẽla oku yapuisa omanu vosi koku vumba Suku.—Olosap. 27:11.

Ndomo Omapalo Yaco yi ka Imũha

12. Tua kolela ndati okuti Yehova ka ka ecelela vali evĩho oku amamako otembo yalua?

¹² Tua kolela okuti Yehova o ka teyuila uviali waye. Eye ka ka ecelela okuti evĩho li amamako vali otembo yalua, kuenda tua kũlĩha okuti tu kasi ale koloneke via sulako. Kosiahũlu, Yehova wa malako evĩho poku nena Etande. Wa kundula o Sodoma la Gomora kuenda Fareo lolohoka viaye. Handi vali, eci Sisera lolohoka viaye la Senakeriva kumue lasualali vo ko Asuria va yaka la Suku Tõlo, ka va kuatele onima yiwa. (Efet. 7:1, 23; 19:24, 25; Etu. 14:30, 31; Olong. 4:15, 16; 2 Olos. 19:35, 36) Tu ci okuti, Yehova Suku, ka ka ecelela okuti onduko yaye yi sepuiwa, kuenda ka tava okuti Olombangi viaye vi tatiwa lãvi otembo ka yi pui. Etu tu lete ondimbukiso yetukuluko lia Yesu kuenda esulilo lioluali lulo lua vĩha.—Mat. 24:3.

13. Tu yuvula ndati oku nyoliwila kumue lovanyali va Yehova?

¹³ Oco ka tu ka nyõliwile kumue lovanyali va Suku, tu sukila oku pokola kuviali wa Yehova. Tu ci linga hẽ ndati? Poku litepa luviali wungangala wa Satana kuenda oku yuvula oku kuatela usumba va kapinji vaye. (Isa. 52:11; Yoa. 17:16; Ovil. 5:29) Tu ka popeliwa lika nda tua kakatela kuviali wa Isietu wo kilu, loku lavoka otembo onduko ya Yehova yi ka yelisiwa kuenda oku lekisa okuti eye Ombiali ya Velapo Voluali.

14. Embimbiliya li lombolola ovina vipi?

¹⁴ Vembimbiliya mu sangiwa ovolandu omanu valua va teyuila uviali wa Yehova. Ovipama vitatu vielivulu liatete Liembimbiliya, vi lombolola oku lulikiwa kuovina vialua, leci omanu vatete va linga ekandu, kuenda ovipama vitatu via sulako vielivulu lia sulako Liembimbiliya, vi lombolola ndomo ekalo liomanu li ka tumbuluiwa. Ovipama vikuavo Viembimbiliya vi lombololavo ndomo Ombiali ya Velapo, Ñala Yehova a ka tẽlisila ocipango caye omanu, ilu lieve kuenda oluali luosi. Elivulu Liefetikilo li lekisa ndomo Satana a fetika levĩho voluali, pole ovipama via sulako vielivulu Liesituluilo vi lombolola ndomo Eliapu li ka kunduiwa kumue levĩho kuenje ocipango ca Suku palo posi ci ka lingiwa ndeci ci lingiwa kilu. Embimbiliya li lekisa eci ca koka ekandu lokufa kuenda li lekisa ndomo ovina viaco vi ka puako kilu lieve, kuenje vakuepokolo va ka kuata esanju lomuenyo ko pui.

15. Oco omunu lomunu a kuatisiwe eci ocitangi cuviali ci ka sulila, nye tu sukila oku linga?

¹⁵ Oluali lulo lu ka pita vepongoloko linene. Ocitangi cuviali ca votuiwa kosimbu, ci ka pitĩla kesulilo. Eci Satana a ka tundisiwa kuviali waye, loku kunduiwa, ocipango ca Suku ci ka lingiwa otembo yenda ño hũ. Pole, oco tu tambule asumũlũho aco, tu sukila oku pokola kuviali wa Yehova cilo muẽle. Ka tu ka kali latatahãi. Momo oco tu tẽle oku popia tuti: “Yehova o kasi konele” yange, tu sukila oku amamako oku kala konele yaye.—Osa. 118:6, 7.

Tu Pondola Oku Kakatela Kesunga!

16. Ekolelo lipi tu kuete liokuti omanu va tẽla oku amamako loku pokola ku Suku?

¹⁶ Tu pondola oku kakatela kuviali wa Yehova loku amamako lepokolo, momo upostolo Paulu wa soneha hati: “Lalimue eyonjo lio sangi, te eli lia siata pokati komanu. Suku wa kolelua, kuenje ka tava okuti wu yonjiwa te leli wu tela, puãi kumuamue leyonjo u muisavo evelo lioku puluka okuti vu soka lalio.” (1 Va Kor. 10:13) Eyonjo lia tukuiwa la Paulu li tunda pi, kuenda Suku o tu muisa ndati evelo lioku puluka kokualio?

17-19. (a) Eci va Isareli va kala vekalasoko va kupukila veyonjo lie? (b) Momo lie tu popela tuti tu tẽla oku amamako oku pokola Yehova?

¹⁷ Ndomo ca lekisiwa vulandu wa va Isareli vekalasoko, “eyonjo” li pondola oku tu lueyisa ocihandeleko ca Suku. (Tanga 1 Va Korindo 10:6-10.) Va Isareli va kuatele epondolo lioku tamalãla layonjo, pole eci Yehova a eca kokuavo akalanga vokuenda kuosãi, va fetika oku ‘livela ovina via vĩha.’ Ndaño okuti omanu ka va kuatele okulia, Suku wa va tekula lo mana. Ovo va kupukila veyonjo eci va lekisa ocipulu poku kuata akalanga alua.—Ate. 11:19, 20, 31-35.

¹⁸ Osimbu Mose a enda Komunda Sinai oku tambula Ocihandeleko, va Isareli va tunga ociñumañuma congombe kuenje va fetika oku ci fendela loku litumbika kayele. Omo okuti usongui wavo ka kailepo, va kupukila veyonjo. (Etu. 32:1, 6) Eci handi ka va iñilile Vofeka Yohuminyo, ci soka ohulukãi komanu ya va Isareli va yonjiwa lakãi va Moavi, kuenje va linga lavo ukahonga. Vepuluvi liaco, ohulukãi ya va Isareli ya fa omo liekandu liaco. (Ate. 25:1, 9) Olonjanja vimue, va Isareli omo lioku liyeya va kupukila veyonjo, kuenje va lisiõsiũla Mose kuenda Suku! (Ate. 21:5) Noke lioku nyõliwa kua Kora, Datana, la Avirama kuenda omanu va va kuamele, va Isareli va lisiõsiõla loku sima okuti ovisuanji viaco ka via sesamẽlele oku fa. Kuenje elinga liavo, lia koka ekangiso lia Suku okuti kua fa eci ci soka 14.700 komanu vakuepata lia va Isareli.—Ate. 16:41, 49.

¹⁹ Pokati kayonjo a tukuiwa, va Isareli va kuatele epondolo lioku tamalãla lao. Omanu va kupikila veyonjo mekonda liekambo liekolelo, kuenje va ivalako Yehova, ocisola caye, kuenda olonjila viaye viesunga. Ndeci ca pita la va Isareli, ayonjo tu liyaka lao, a siata pokati komanu. Nda tua likolisilako oku tamalãla layonjo aco loku kolela okuti Suku o tu kuatisa, tu ka amamako oku lekisa epokolo. Momo “Suku wa kolelua” kuenda ka tava okuti ‘tu yonjiwa leci ka tu tẽla oku tamalãla laco.’ Yehova lalimue eteke a tu yanduluka pamue oku ecelela okuti ka tu tẽla oku linga ocipango caye.—Osa. 94:14.

20, 21. Eci tu yonjiwa, Suku o tu muisa ndati “evelo lioku puluka”?

²⁰ Yehova o tu muisa “evelo lioku puluka” poku tu ĩha ongusu yoku tamalãla layonjo. Pamue omanu va tu tipula locimãho coku konyuisa ekolelo lietu. Elinga liaco olonjanja vimue li tu kokela oku sima oku puluka koku tipuiwa pamue oku yuvula ekangiso ale olofa. Ndomo ca lekisiwa volondaka via Paulu kelivulu lia 1 va Korindo 10:13, tua kũlĩha okuti eyonjo liosi li tu veta li pita ombamba. Yehova ka tava okuti tu yonjiwa toke eci ka tu lekisa vali ekolelo kokuaye. Suku o tẽla oku pamisa ekolelo lietu loku tu ĩha unene wespiritu liaye li tu kuatisa oku kakatela lepandi kesunga.

²¹ Yehova o tu kolisa lekuatiso liespiritu sandu. Espiritu liaco li tu ivaluisa Ovisonehua vi tu kuatisa oku tamalãla layonjo. (Yoa. 14:26) Kuenje tu ka yuvula oku kuama onjila ka ya sungulukile. Etu tu kuete elomboloko liusuanji wa lingiwila uviali wa Yehova kuenda ndomo epokolo liomanu lia kapiwa vatatahãi. Ukũlĩhĩso waco wa siata oku kuatisa valua oku kolela Suku toke kolofa. Pole olofa havioko vi puluisa omanu kayonjo; Yehova eye wa va kuatisa oku pandikisa oco ka va ka kupukile veyonjo. Eye o tẽlavo oku tu kuatisa. Ocili okuti, eye o tu kuatisa lovangelo vaye ndolondingupange via “tumiwila oku vumba ava va piñala eyovo.” (Va Hev. 1:14) Ndomo ci ka lekisiwa vocipama ci kuaĩmo, vakuepokolo va ka kuata esumũlũho lioku teyuila uviali wa Suku otembo ka yi pui. Etu tu ka kala pokati kavo nda tua kakatela ku Yehova Ombiali yetu.

O Tambulula Ndati?

• Momo lie tu sukilila oku tenda Yehova nda Soma yetu?

• Nye ci lomboloka oku kakatela kesunga lia Suku?

• Tua kũlĩha ndati okuti Yehova ndopo o ka teyuila uviali waye?

• Ndomo ca lekisiwa kelivulu lia 1 va Korindo 10:13, momo lie tu popela tuti tu tẽla oku kakatela kesunga?

[Elitalatu kemẽla 24]

Satana wa vetiya Adama la Heva oku sinila Yehova

[Elitalatu kemẽla 26]

Kala ukuakuteyuila uviali wa Yehova