Akristão va kala ko Korindo va kuatele atatahãi atiamẽla kulandu waco kuenda vakuavo ka va tavele okuti kuli epinduko liomanu va fa. Upostolo Paulu vukanda waye watete a sonehela Akristão va Korindo wa tukula ovina nda vieya oku pita, nda ulandu wepinduko wa kalele wesanda. Eye wa soneha ndoco: ‘Nda ka kuli epinduko liava va fa, Kristu layevo nda ka pinduiwile. Kuenje Kristu nda ka pinduiwile, oku longisa kuetu nda kua linga kuesanda, ekolelo liene nda lia linga liesanda. Nda oco, etu nda tua linga olombangi via Suku viuhembi. Ekolelo liene lia linga liesanda, kuenje vu kasi vakandu ene. Vana va fila vu Kristu va nyõlehavo.’—1 Va Korindo 15:13-18.

Handi vali, nda kueyilila ovitangi vikuavo. Nda Kristu ka pinduiwile ekolelo Liakristão nda ka lia kuatele esilivilo, kuenda nda lia kunamẽla kovina viuhembi. Paulu kumue lolondonge vikuavo, nda ka va vanguile lika uhembi watiamẽla ku Yesu wa pinduiwa. Pole, nda vatiamisilavo uhembi ku Yehova Suku, una wo pindula. Ondaka yokuti Kristu wa “fila akandu etu,” nda ya kala yuhembi, nda ka pinduiwile kolofa, kuenda nda ka popelele omanu vakuavo. (1 Va Korindo 15:3) Ulandu waco nda wa lekisa okuti, Akristão vana va pondiwa omo lioku teyuila ekolelo liavo, elavoko liavo kepinduko liuhembi.