Ondaka ya Yehova yi Kasi Lomuenyo
Atosi Avelapo Vovikanda Via Va Korindo
UPOSTOLO Paulu wa sakalalele lekalo liespiritu liekongelo lio ko Korindo. Eye wa yevele okuti, pokati ka vamanji pa kala oku li tatamisa, kuenda va enda oku ecelela evĩho vekongelo. Ovo va tumavo ukanda ku Paulu, loku pinga olonumbi viatiamẽla kovitangi vimue. Omo liaco, kunyamo wa 55 K.K, eci a endele ko Efeso vungende waye watatu wumisionaliu, wa sonehela va Korindo ukanda waye watete.
Ukanda wavali citava okuti, wa u soneha vokuenda kuolosãi vimue, noke lioku soneha ukanda waye watete. Omo okuti, ekalo lia vamanji vekongelo lio ko Korindo kocita ca tete, li sokisiwa lekalo lietu koloneke vilo, esapulo liukanda Paulu a sonehela va Korindo, li kuete esilivilo kokuetu.—Va Hev. 4:12.
‘LAVULULI, TUAMELI VETAVO, KUENDA KOLISIKO’
(1 Va Kor. 1:1–16:24)
Paulu wa popia hati: “Vosi [u sukila oku] popia popia cimuamue.” (1 Va Kor. 1:10) ‘Ka kuli ociseveto cikuavo ca velapo Yesu Kristu’ okuti oko kua tunda ovituwa Viakristão. (1 Va Kor. 3:11-13) Poku lombolola eci catiamẽla kukahonga, Paulu wa popia hati: “Tundisi pokati kene omunu waco.” (1 Va Kor. 5:13) Eye wamisako hati: “Etimba ka lia sovuiwilue ukahonga, lia sovuilua Ñala.”—1 Va Kor. 6:13.
Paulu poku popia catiamẽla ‘kolondaka va Korindo va sonehele,’ wa eca elungulo ku vana va kuele kuenda vana ka va kuelele. (1 Va Kor. 7:1) Noke lioku lombolola catiamẽla komoko yoku songola pokati Kakristão, kuenda kelavoko liepinduko, wa popia hati: “Lavululi. Tuameli vetavo. Kuati utõi, [kuenda] Kolisiko.”—1 Va Kor. 16:13.
Atambululo Kapulilo Embimbiliya:
1:21—Anga hẽ Yehova o kuama ovina ‘viuveke’ oco a popele vana va tava kondaka yaye? Sio, hacoko. Omo okuti, ‘oluali lolondunge vialuo ka lua kũlĩhĩle Suku,’ ovina Suku a kuama oco a popele omanu, oluali lu vi tenda nduveke.—Yoa. 17:25.
5:5—Nye ci lomboloka ondaka yokuti, “Omunu waco [ondingaĩvi] weci ku Satana okuti etimba liaye li nyõleha, oco espiritu liaye li popeliwa”? Nda umue wa linga ekandu linene okuti ka yongola oku likekembela kuenje o tundisiwa vekongelo, o tiamẽla koluali lua Satana. (1 Yoa. 5:19) Omo liaco, o kala ndu okuti, wa eciwa peka lia Satana. Oku tundisiwa kuomunu vekongelo, ku tuala koku nyõla ale koku tundisa evĩho vekongelo okuti, liamamako oku situlula ovituwa via Suku.—2 Tim. 4:22.
7:33, 34—Nye ci lomboloka ‘ovina violuali’ okuti, vana va kuele ovio va sakalala lavio? Paulu wa tukula ovina violuali viatiamẽla komuenyo okuti Akristão va kuele, ovio va sukila oku sakalala lavio. Vovina viaco, mua kongela okulia, uwalo, kuenda onjo. Pole, ka mua kongelele ovina vĩvi violuali lulo, okuti ovio Akristão va sukila oku yuvula.—1 Yoa. 2:15-17.
11:26—“Olonjanja” viñami tu sukila oku ivaluka olofa via Yesu kuenda “toke” otembo yi pi? Paulu ka popele okuti tu sukila oku ivaluka olofa via Yesu oloneke viosi. Ondaka yo Helasi yokuti “olonjanja viosi,” yi lomboloka “onjanja yosi kepuluvi liaco.” Omo liaco, Paulu wa kala oku popia hati, olonjanja viosi eci Akristão olombuavekua valia kombolo loku nyua kovinyu unyamo lunyamo keteke lia 14 kosãi ya Nisana, va sukila oku “sapula okufa kua Ñala.” Ovo va ci linga ‘toke eci Yesu a tiuka’ ale toke eci a va tambula kilu noke lioku va pindula.—1 Va Tes. 4:14-17.
13:13—Momo lie ocisola ci kuetele esilivilo lia velapo okuti ekolelo lelavoko ci sule? Eci ‘ovina vi lavokaiwa’ vi tẽlisiwa, kuenda ‘ociseveto’ covina viaco ci lingiwa, ekolelo lelavoko vi sulila. Omo liaco, ocisola ca velapo ekolelo lelavoko, momo camamako otembo ka yi pui. (Va Hev. 11:1) Ocisola ci kuete esilivilo lia velapo ekolelo kuenda elavoko, momo ci kala otembo ka yi pui.
15:29—Nye ci lomboloka oku ‘papatisiwila ava va fa’? Paulu ka lekisile okuti ava va kasi lomuenyo va sukila oku papatisiwa oco va kuatise ava va fa. Eye wa popia eci catiamẽla kepapatiso Liakristão olombuavekua lioku kuata omuenyo nda vamamako oku pandikisa toke kolofa oco va pinduiwile omuenyo wo kilu.
Ceci tu Lilongisilako:
1:26-31; 3:3-9; 4:7. Oku eca esivayo ku Yehova okuti ka tu li tiamisila kokuetu, ci nena elitokeko vekongelo.
2:3-5. Omo okuti, omanu va kala volupale luo Korindo va kuata ukũlĩhĩso wovilongua via va Helasi, eci Paulu a va kundila, wa kala oku sokolola ndomo a pondola oku vetiya ovitima viavo. Pole, ka ecelele okuti usumba u tateka oku tẽlisa ocikele a tambuile ku Suku coku kunda olondaka viwa. Omo liaco, ka tuka eceleli okuti ovitangi viomuenyo vi tu tatekavo oku kunda olondaka viwa Viusoma wa Suku. Tu sukila oku kolela kekuatiso lia Yehova ndeci Paulu a linga.
2:16. Oku kuata ‘ovisimĩlo ndevi via Kristu,’ ci lomboloka oku kũlĩha ovisimĩlo viaye, esunga lieci a simĩla ovina viaco, oku kũlĩha ovituwa viaye, kuenda oku kuama ongangu yaye. (1 Pet. 2:21; 4:1) Omo liaco, tu sukila oku lilongisa catiamẽla komuenyo wa Yesu kuenda kupange waye woku kunda!
3:10-15; 4:17. Tu sukila oku konomuisa kuenda oku mioñolola uloño wetu woku longisa omanu oco va linge olondonge. (Mat. 28:19, 20) Nda ka tua longisile ciwa ondonge yetu, citava okuti ka yi tẽla oku pandikisa eci yi pita voseteko yekolelo. Kuenje, tu yeva evalo kuenda epopelo lietu li kala “ndu wa pita vondalu.”
6:18. Oku ‘tila ukahonga,’ ka ci lomboloka lika oku yuvula o por·neiʹa, pole, mua kongelavo oku yuvula oku tala omanu va kasi epolõla, evĩho, ovisimĩlo vioku linga ukahonga, ocitiokoso, kuenda ovina vikuavo vi tuala koku linga ukahonga.—Mat. 5:28; Tia. 3:17.
7:29. Olohueli vi sukila oku lavulula oco ka vika tiamisile lika utima kolonjongole viavo, pole, vi sukila oku pitisa kovaso upange woku kunda Usoma.
10:8-11. Yehova wa sumuile calua eci va Isareli va lisiõsuĩla Mose la Arone. Omo liaco, tu sukila oku yuvula ocituwa coku lisiõsiõla.
16:2. Tu kuata lika ocituwa coku eca olombanjaile vioku kuatisa kupange Wusoma nda tua vi sokiya selo loku ci lingainga olonjanja viosi.
‘AMAMIKO OKU PENGULULA OLONJILA VIENE’
Paulu wa sapuila va Korindo oco va ‘ecele loku lembeleka’ una wa tambuile elungulo okuti kaliye wa likekembela. Ndaño ukanda waye watete wa va sumuisile, pole, cilo va sanjuka momo ‘esumuo liavo lia nena epongoloko.’—2 Va Kor. 2:6, 7; 7:8, 9.
Ndeci va Korindo ‘va kuatele ovina vialua,’ haico Paulu a va vetiya oku lekisa ‘ocituwa coku eca.’ Noke lioku eca etambululo kovanyali vaye, wa lungula vosi hati: “Sanjuki. Penguluisi olonjila viene. Yevi kondaka yange. Kuati utima umosi. Kali lombembua.”—2 Va Kor. 8:7; 13:11.
Atambululo Kapulilo Embimbiliya:
2:15, 16—Tu kala ndati “ndelemba liwa lia Kristu”? Tu ci linga poku pokola kelungulo Liembimbiliya kuenda poku kunda esapulo liaco. “Elemba [liaco] liwa” citava okuti ka li soliwa lolondingaĩvi, pole, liwa ku Yehova kuenda ku vakuavitima viasunguluka.
5:16—Akristão olombuavekua ka va ‘limbuka ndati omunu ukuetimba’ liositu? Ovo va ci linga poku yuvula oku lekisa ocame okuti ka va kuama ovokuasi, ekova, kuenda ofeka omunu a citiwila. Pole, va velisapo ukamba va kuete la vamanji.
11:1, 16; 12:11—Anga hẽ, Paulu ka lekisile esunguluko ku va Korindo? Wa lekisile. Pole, vamue va simĩle okuti wa kala oku lipanda kuenda ka lekisile esunguluko kokuavo omo liovina a kala oku popia poku teyuila esumũlũho liaye lioku kala upostolo.
12:1-4—Helie “wa yenjekiwa toke [vofeka yelau]”? Ocili okuti Embimbiliya ka li tukula omunu wa kuata ocinjonde caco. Pole, ovina Paulu a popia vioku teyuila ondaka a kala oku kunda, vi lekisa okuti wa tukula ulandu waye muẽle. Ocinjonde upostolo a kuata, catiamẽla kekalo liwa kespiritu Akristão va kuete ‘koloneke vilo via sulako.’—Dan. 12:4.
Ceci tu Lilongisilako:
3:5. Ocinimbu eci Cembimbiliya, ci tu sapuila okuti Yehova eca epindiso Kakristão oco va linge upange waye lekuatiso Liondaka yaye, espiritu sandu liaye, kuenda ocisoko caye palo posi. (Yoa. 16:7; 2 Tim. 3:16, 17) Omo liaco, tu sukila oku tanga Embimbiliya, alivulu a lombolola ovina vi sangiwa Vembimbiliya, oku amamako oku likutilila oku pinga espiritu sandu, kuenda oku endaenda kolohongele.—Osa. 1:1-3; Luka 11:10-13; Va Hev. 10:24, 25.
4:16. Ocili okuti Yehova wa siata oku ‘tumbulula utima wetu eteke leteke.’ Omo liaco, tu sukila oku kapako aliangiliyo Aye espiritu kuenda ka tuka eceleli oku pita eteke okuti ka tu kũlĩhĩsa ovina viespiritu.
4:17, 18. Oku ivaluka okuti, ‘ohali yi kala lika okatembo katito,’ ci tu kuatisa oku lekisa ekolelo ku Yehova eci tu liyaka lovitangi.
5:1-5. Paulu wa vetiya Akristão olombuavekua oco vamameko lelavoko liavo lioku kuata omuenyo ko pui kilu!
10:13. Nda ka tua tambuile ocikele coku kuatisa kovikanjo kuna kuli ekambo liakundi vusoma, tu sukila oku talavaya calua vocikanjo cekongelo lietu.
13:5. Oco tu ‘liseteke etu muẽle nda tu kasi vekolelo,’ tu sukila oku kũlĩhĩsa ekalo liomuenyo wetu nda li likuata lovina tua siata oku lilongisa Vembimbiliya. Oco tu limbuke ekalo liaco, tu sukila oku kũlĩhĩsa ndomo tu kasi kespiritu, loku “tepisa pokati keci ciwa leci cĩvi,” kuenda oku limbuka ovilinga viekolelo lietu. (Va Hev. 5:14; Tia. 1:22-25) Nda tua kapako elungulo lia Paulu, tu pondola oku amamako oku endela vonjila yocili.
[Elitalatu kemẽla 26]
Olondaka viokuti, “olonjanja viosi wu lia ombolo yilo loku nyua okopo yaco,” vi lomboloka nye?—1 Va Kor. 11:26