Kuata Ukamba la Suku

“Ukuakulembeleka Pokati Kovina Viosi” 2 Va Korindo 1:​3, 4

OVINA vialua komuenyo ndeci, ohali, asakalalo loku kala ulika, vi koka esumuo kuenda ekambo lielavoko. Pamue ove o li pula ndoco: ‘Pi ndi pondola oku sanga elembeleko?’ Olondaka vi sangiwa kukanda wavali, upostolo Paulu a sonehela va Korindo, kocipama 1:​3, 4, vi lekisa ono yelembeleko liaco okuti, Yehova Suku.

Kocinimbu 3, Suku o tukuiwa hati, “Isia yohenda.” Eci hẽ ci lomboloka nye? Kelimi Liohelasi ondaka “ohenda,” yi lomboloka oku kuatela ocikembe ava va tala ohali.a Embimbiliya limue, li tukula ondaka yaco okuti, “ocisusu” ale “oku tata lokahekemba.” Suku, ‘ohenda’ yaye, yu vetiya oku kuatisa ava va tala ohali. Anga hẽ oku kũlĩha ocituwa eci ca Suku, ka ci tu vetiya oku kuata ukamba laye?

Paulu o tukulavo Yehova okuti “Suku ukuakulembeleka pokati kovina viosi.” Pocinimbu eci, Paulu eca “ocisimĩlo coku lembeleka omunu umue o kasi lovitangi ale oku kuatisa umue o tala ohali.” Embimbiliya limue li tukuiwa hati, The Interpreter’s Bible, li popia ndoco: “Tu lembeleka ava va tala ohali poku va kuatisa oku pandikisa levalo liavo.”

Ove pamue o li pula ndoco: ‘Ndamupi Suku a pondola oku tu lembeleka loku tu ĩha utõi woku pandikisa levalo?’ Eye wa siata oku tu lembeleka Londaka yaye, Embimbiliya, kuenda eci tu linga olohutililo. Paulu wa lekisa okuti, Suku yocisola wa tu ĩha Ondaka Yaye okuti tu kuata “epandi kuenda okukolisiwa lovisonehua ku tu kokela elavoko.”​—⁠Va Roma 15:4; Va Filipoi 4:⁠7.

Nye vali Yehova a siata oku lembeleka laco afendeli vaye? Paulu wa popiavo hati, Suku “o tu lembeleka kohali yetu yosi.” (2 Va Korindo 1:⁠4) Ndaño okuti tua siata oku pita lovitangi, esumuo, kuenda ohali, lopo Suku o tu ĩha utõi kuenda ongusu yoku pandikisa. Anga hẽ eci ka cu ku sanjuisa?

Elembeleko tua siata oku tambula ku Suku, ka li kuete esulilo. Paulu wamisako hati, Suku o tu lembeleka okuti, “tu tẽlavo oku lembeleka ava va tala ohali lelembeleko Suku a tu lembeleka lalio.” Omo okuti tua siata oku lembelekiwa kohali yetu yosi, ci tu vetiya oku kuatela ohenda vana va tala ohali loku eca ekuatiso kokuavo.

Ndaño “Suku ukuakulembeleka pokati kovina viosi,” puãi eci ka ci lekisa okuti Yehova o malako esumuo. Tua kolela okuti, nda tu imba ovaso kelembeleko li tunda kokuaye, eye o tu kuatisa oku pandikisa lesumuo, ale asakalalo tu pondola oku pita lao komuenyo. Omo Yehova eye Suku yohenda, o sesamẽla efendelo lietu kuenda esivayo.

[Atosi pombuelo yamẽla]