Ceci Eteke Lia Yehova Li Ka Situlula
“Eteke lia Yehova liya ndocimunu, . . . kuenda ongongo lovopange ao vi situluiwa.”—2 PET. 3:10. NW
1, 2. (a) Esulilo lioluali lulo lu ka pita ndati? (b) Apulilo api tu konomuisa vocipama cilo?
OLUALI lulo lua kolela kuhembi wokuti, omanu ka va sukila ekuatiso lia Yehova oco va viale ilu lieve. (Osa. 2:2, 3) Anga hẽ oku kolela kuhembi waco ku kuatisa oluali oku amamako? Lalimue eteke! Puãi, etu ka tu kevelila okuti oluali lua Satana lu linyola oluo muẽle. Suku eye o ka nyola oluali lulo votembo ya sokiyiwa laye. Onjila Suku a ka kuama poku nyola oluali lulo, yi ka lekisa esunga kuenda ocisola caye.—Osa. 92:7; Olosap. 2:21, 22.
2 Upostolo Petulu wa soneha hati: “Eteke lia Yehova liya ndocimunu, eci liya, ovailu a takata lokukelõha kua lua. Ovina viosi vi yenguluka londalu, kuenda ongongo lovopange ao vi situluiwa.” (2 Pet. 3:10, NW) Olondaka “ovailu” kuenda “ongongo” vi lomboloka nye? “Ovina” vipi vi ka yenguluka? Olondaka via Petulu viokuti, “ongongo lovopange ao vi situluiwa,” vi lomboloka nye? Oku kũlĩha atambululo apulilo a-a, ci ka tu kuatisa oku lipongiyila ovina vi komohisa vi laika oku iya.
Ovailu Longongo ka vi ka Kalako Vali
3. “Ovailu” api a tukuiwa kelivulu lia 2 Petulu 3:10, kuenda a ka takata ndati?
3 Vembimbiliya, ondaka “ovailu” vupopi wocindekaise, yi lomboloka ovoviali, momo a velapo omanu va kasi oku vialiwa lawo. (Isa. 14:13, 14; Esit. 21:1, 2) Ondaka “ovailu a [ka] takata,” yi lomboloka olombiali vi kasi oku viala oluali lulo. Oku takata kuavio “lokukelõha kua lua”—ale “lonjuela yalua,” ndeci Embimbiliya limue li popia—ci lomboloka okuti ovoviali aco a ka nyoliwa lonjanga yalua.
4. Ondaka “oluali” yi lomboloka nye, kuenda lu ka nyoliwa ndati?
4 Ondaka “oluali,” yi lomboloka omanu va litepa la Suku. Oluali luaco lua kalako ale koloneke via Noha, kuenda Suku wa lu kundula Letande. “Puãi londaka yaco haiyo, ilu li kasi ndeti longongo ya angiliyiwila ondalu, yi tãilili eteke liekanga hailio liokunyõleha kuomanu va tomba Suku.” (2 Pet. 3:7) Osimbu okuti Etande lia nyola omanu va tomba Suku vonjanja yimosi, enyoleho li laika oku iya, li ka lingiwa volonepa via litepa vokuenda ‘kuohali ya piãla.’ (Esit. 7:14) Vonepa yatete yohali ya piãla, Suku o ka vetiya olombiali violuali oku kundula o ‘Bavulono Yinene,’ ci lekisa okuti ovio vi ka suvuka ocipuepue caco. (Esit. 17:5, 16; 18:8) Kuenje, vuyaki wo Harmagedo, okuti onepa ya sulako yohali ya piãla, Yehova o ka kundula oluali luosi lua Satana.—Esit. 16:14, 16; 19:19-21.
“Ovina Viosi vi Yenguluka”
5. Vondaka ovina, mua kongela nye?
5 “Ovina” vipi vi ka “yenguluka”? Ondisionaliu yimue Yembimbiliya, yi lekisa okuti ondaka “ovina” yi lomboloka “olonumbi viatete,” pamue “ovihandeleko.” Ondaka yaco ya enda oku tiamisiwila kololetala vio ambesendaliu, kuna kua kunamẽla upopi. Kuenje, ondaka “ovina” Petulu a tukula ndeti, yi lomboloka ovisimĩlo vi vetiya oluali kovina vĩvi, kovituwa ka via sungulukile, olonjongole kuenda ovimãho viayo. Vondaka “ovina,” mua kongelavo “espiritu lioluali,” lina li “linga upange waye vovitima via vakuesino.” (1 Va Kor. 2:12; tanga Va Efeso 2:1-3.) “Espiritu” liaco, ale ofela, li kasi voluali luosi lua Satana. Olio, li vetiya omanu oku sokolola , oku kuata ovimãho, oku vangula kuenda oku kuama ovituwa via Satana “soma yolondele,” ndeci, epela, kuenda ungangala.
6. Espiritu lioluali li limbukiwa ndati?
6 Ci kale nda omanu va ci limbuka ale sio, vana va songuiwa lespiritu lioluali, va ecelela okuti ovisimĩlo lutima wavo vi vetiyiwa la Satana kuenda ovituwa viaye. Omo liaco, ovo va linga eci va yongola, okuti ocipango ca Suku hacoko. Ovo va lekisa epela ale ocipululu, ka va pokola kolombiali, kuenda omuenyo wavo u vialiwa ‘loñeyi yetimba, loñeyi yovaso.’—Tanga 1 Yoano 2:15-17.a
7. Momo lie tu sukilila oku “lava utima” wetu?
7 Koloneke vilo, tu sukila oku “lava utima” wetu poku nõla akamba vawa, alivulu tu tanga, ovitalukilo, kuenda ovipama tu tala vo Internet! (Olosap. 4:23) Upostolo Paulu wa soneha hati: “Lunguki sanga umue o nyõla etavo liene lovilongua viesanda liaño. Va sole oku tõlisa ño ovisila viomanu lovihõlo violuali, vina ka via tundile ku Kristu.” (Va Kol. 2:8)Tu sukila oku ci linga lonjanga yalua, momo eteke lia Yehova li li ocipepi, kuenda onyeño yaye, yi ka yengulula “ovina” viosi violuali lua Satana. Eci ci tu ivaluisa olondaka vielivulu lia Malakiya 4:1, viokuti: “Kuiya eteke li taima ndofolono, kuenje vosi vakuakulipanda lava va linga lãvi va linga ndasĩla otiliku. Eteke liaco li kasi oku iya li va yoka.”
“Ongongo Lovopange ao vi Situluiwa”
8. Ongongo lovopange ao vi ka “situluiwa” ndati?
8 Olondaka via Petulu viokuti, “ongongo lovopange ao vi situluiwa,” vi lomboloka nye? Ondaka oku “situluiwa” ya lisoka londaka “oku molehisa” ale “oku tukulula.” Olondaka evi via Petulu, vi lekisa okuti vokuenda kuohali ya piãla, Yehova o ka tukulula ovilinga violuali lua Satana, luna lua sinila Suku Lusoma Waye, kuenje oluali luaco lu ka kunduiwa. Elivulu lia Isaya 26:21, poku tukula otembo yaco, li popia hati: “Yehova o tunda kocitumãlo caye oku yambuila ava va tunga kilu lieve evĩho liavo; ongongo yi situlula osonde ya yi pesekela, kuenje ka yi sitika vali vayo va pondiwa.”
9. (a) Tu sukila oku yuvula nye, kuenda momo lie? (b) Ovituwa vipi tu vetiyiwa oku kuata, kuenda momo lie?
9 Vokuenda kueteke lia Yehova, vosi va li setahãisa loluali lulo lespiritu liayo, va ka li situlula ovo muẽle, poku linga ovina vĩvi ndeci ungangala. Ivaluka okuti, ovitalukilo omanu va siata oku tala koloneke vilo, ovio vi ka vetiya oluali oku “likuata kuata omunu lukuavo, omunu lukuavo.” (Sak. 14:13) Omo liaco, tu sukila oku yuvula olofilme, alivulu, olovideo geime, kuenda ovina vikuavo vi tu vetiyila kovituwa Suku a nyale ndeci epela kuenda ungangala! (2 Sam. 22:28; Osa. 11:5) Kuenje, tu kuati ovituwa viepako liespiritu lia Suku, momo ovio vi ka tu kuatisa oku kuata omuenyo eci eteke lia Yehova liya.—Va Gal. 5:22, 23.
“Ilu Liokaliye Loluali Luokaliye”
10, 11. “Ilu liokaliye loluali luokaliye” vi lomboloka nye?
10 Tanga 2 Petulu 3:13. “Ilu liokaliye” li lomboloka Usoma wa Suku wa tumbikiwa kilu kunyamo wo 1914, eci “oloneke via vakualofeka” via sulila. (Luka 21:24) Kristu Yesu kumue lo 144.000 kolombuavekua okuti onepa yimue yi kasi ale kilu, ovo va ka viala vusoma waco. Velivulu Liesituluilo, omanu vaco va nõliwa, va tukuiwa hati “imbo li kola, hailio Yerusalãi yokaliye, li kasi loku tunda kilu ku Suku, lia posoka ndondombua ya liposuisila veyaye.” (Esit. 21:1, 2, 22-24) O Yerusalãi Yokaliye Losandombua yayo, yi ka viala oluali luokaliye ndeci o Yerusalãi yoposi ya kala olupale yolombiali vio Isareli. Olupale luaco, lu ka viala ongongo yosi oku upisa kilu.
11 ‘Oluali Luokaliye’ lu lomboloka omanu va ka tunga voluali luokaliye, okuti va lekisa epokolo liocili Kusoma wa Suku. Ekalo liwa liafendeli va Suku konepa yespiritu, li ka amamako toke ‘voluali lu laika oku iya.’ (Va Hev. 2:5) Oco hẽ, nye tu sukila oku linga oco tu kale voluali luaco luokaliye?
Lipongiyila Eteke Linene Lia Yehova
12. Momo lie eteke lia Yehova li ka kuatela oluali ocipikipiki?
12 Paulu la Petulu, kavali kavo va lekisa okuti eteke lia Yehova liya ‘ndocimunu’ okuti lomue o ci lavoka. (Tanga 1 Va Tesalonike 5:1, 2.) Ndaño muẽle Akristão vocili vana va kasi oku lavulula cilo, va ka kuatiwavo ocipikipiki. (Mat. 24:44) Vakualuali puãi, ca piãla vali enene. Paulu wa soneha hati: “Eci omanu va kasi loku linga vati, Tua kolapo, tu kasi lombembua, oco okunyõleha ocipikipiki kuiya kokuavo, ndeci olongembia viya ku o misi. Oku puluka ka ku kala.”—1 Va Tes. 5:3.
13. Tu yuvula ndati oku kembiwa lolondaka viokuti “tua kolapo, tu kasi lombembua”?
13 Olondaka viokuti “tua kolapo, tu kasi lombembua,” vi ka kala uhembi ukuavo wolondele, pole, afendeli va Yehova ka va ka tava kuhembi waco. Paulu wamisako hati: “Ka vu kasi vowelema ndokuti eteke liaco li vu sanga ndocimunu. Momo ene vosi vumãla vocinyi, haene vumãla vutanya.” (1 Va Tes. 5:4, 5) Omo liaco, tu kali voncinyi, loku yuvula owelema woluali lua Satana. Petulu wa soneha hati: “A vakuacisola, omo wa ci kũlĩhi ale osimbu ka ceyile handi, lunguki [lalongisi vesanda va kasi vekongelo Liakristão] sanga wambatiwi lokulueya kua vakuakandu, kuenje vu lipumbisa epandi liene.”—2 Pet. 3:17.
14, 15. (a) Yehova o tu kuatisa ndati? (b) Alungulo api tu sukila oku kapako?
14 Kũlĩha okuti, Yehova ka tu sapuila lika hati “lunguki,” okuti ka tu lingila vali cimue. Pole, o tu kuatisa oku ‘kũlĩha ovina osimbu ka vieyile handi,’ poku tu sapuila ovina vi laika oku iya.
15 Omanu vamue, cilo va sinila olonumbi vi tu vetiya oku lavulula. Vamue vati, ‘Ondaka eyi tu yi yeva yeva ale vokuenda kuanyamo alua.’ Pole, omanu vaco va sukila oku ivaluka okuti, poku ci linga, ka va kasi oku pembula ukuenje wa kolelua, puãi, va pembula Yehova kuenda Omõlaye. Yehova wa popia hati: “Ci talamela.” (Hav. 2:3) Yesu wa ecavo elungulo liaco hati: “Lavululi, momo ka wa kũlĩhili eteke Ñala yene eya.” (Mat. 24:42) Petulu wamisako hati: “Co sesameli okuti, kovimuenyo viene vu kola kuenje vu sumbila Suku. Vu kala ndomo osimbu vu lavoka loku yayuisa etukuluko lieteke lia [Yehova].” (2 Pet. 3:11, 12) Ukuenje wa kolelua Losungu Yolombangi Via Yehova lalimue eteke va ka pembula olonumbi viaco!
16. Ocituwa cipi tu sukila oku yuvula, kuenda momo lie?
16 ‘Ukuenje ka sungulukile,’ o sima okuti Cime caye keya ndopo. (Mat. 24:48) Ukuenje waco, wa tiamẽla kocimunga ca vana va tukuiwa kelivulu lia 2 Petulu 3:3, 4. Petulu wa soneha hati: “Koloneke via sulako, kuiya vakuetombo” vana okuti omo lioloñeyi “viavo vietimba,” va tomba omanu va kapako eteke lia Yehova. Omanu vaco vakuetombo, utima wavo ka va u tiamisilile kovina Viusoma, puãi, va u tiamisila kolonjongole viavo muẽle. Tu yuvuli oku kuata ovisimĩlo lovituwa viaco vĩvi! Omo liaco, tu “sokololi okuti epandi lia Ñala yetu olio eyovo,” poku kunda olondaka viwa Viusoma loku linga olondonge, okuti oku sakalala lovina Yehova Suku a sokiya locipango caye hacoko.—2 Pet. 3:15; tanga Ovilinga 1:6, 7.
Kolela ku Suku Yeyovo
17. Akristão vakuekolelo va kapako ndati elungulo lia Yesu lioku tila vo Yerusalãi, kuenda va ci lingila hẽ nye?
17 Eci olohoka via va Roma via iñila vo Yudea kunyamo wo 66 K.K., Akristão vakuekolelo va pokola kelungulo lia Yesu lioku tila volupale luo Yerusalãi vepuluvi liatete. (Luka 21:20-23) Momo lie va ci lingila lonjanga yalua? Ocili okuti, ovo va kapeleko elungulo lia Yesu kutima wavo. Ovo, va lavokaile oku tala ohali omo lioku kuama onumbi yaco ndeci Yesu a ci popele. Pole, vokuenda kuotembo yaco va limbuka okuti Yehova ka ivalako vakuesunga.—Osa. 55:22.
18. Olondaka via Yesu vi sangiwa kelivulu lia Luka 21:25-28, vi ku vetiya oku tenda ndati ohali ya piãla yi laika oku iya?
18 Etu tu sukilavo oku kolela ku Yehova, momo eye lika o ka tu yovola eci ohali ya piãla yi ka fetika voluali lulo. Eci ohali ya piãla yi ka fetika, votembo yina Yehova ka fetikile handi oku kundula oluali luaco, omanu va ka yokoka ‘lovina vi laika oku iya kilu lieve.’ Pole, osimbu anyali va Suku va ka luluma lusumba, afendeli vocili va Yehova va ka kolapo. Ovo, va ka petula ovitue viavo momo eyovo liavo li kasi ocipepi.—Tanga Luka 21:25-28.
19. Nye tu ka konomuisa vocipama ci kuãimo?
19 Ocili okuti, vana ka va pangi onepa koluali lulo ‘lovina’ vialio, va lavoka omuenyo umue wesanju! Ndomo ocipama ci kuãimo ci ka lekisa, oku yuvula ovina vĩvi hacoko lika ci sukiliwa komanu va yongola oku puluka. Va sukilavo oku kuata ovituwa vi sanjuisa Yehova loku linga ovina vi litava locipango caye.—2 Pet. 3:11.
[Atosi pombuelo yamẽla]
a Oco o kũlĩhe ovina viosi via kongeliwa vespiritu lioluali, tanga elivulu Raciocínios à Base das Escrituras, kemẽla 147-150.
O Tẽla Oku Lombolola?
• Nye ci lomboloka . . .
‘ilu longongo’ violoneke vilo?
“ovina viosi”?
‘ilu longongo yokaliye’?
• Momo lie tu kolelela Suku?
[Elitalatu kemẽla 5]
O ‘lava ndati utima’ wove loku yuvula oku lisetahaisa loluali?
[Elitalatu kemẽla 6]
Tu lekisa ndati okuti tu kasi oku ‘sokolola epandi lia Ñala yetu ndeyovo’?