OCIPAMA 47
Wa li Pongiya hẽ Oco o Papatisiwe?
Pocakati celilongiso liove Liembimbiliya, wa lilongisa ovina vialua viatiamẽla ku Yehova. Citava okuti, wa linga apongoloko amue komuenyo wove oco o kapeko ovina wa lilongisa. Ocili okuti, kuli asunga alua lieci o liyevela okuti, handi kua lipongiyile oco o litumbike ku Yehova loku papatisiwa. Ocipama cilo, ci ka lekisa vimue pokati kovitangi via siata oku tateka omanu oku papatisiwa kuenda ndomo o pondola oku vi yula.
1. Ukũlĩhĩso upi o sukila oku kuata osimbu kua papatisiwile?
Oco o papatisiwe, o sukila oku kuata “ukũlĩhĩso wa suapo wocili.” (1 Timoteo 2:4) Eci ka ci lomboloka okuti, o kũlĩha atambululo osi apulilo Embimbiliya, osimbu kua papatisiwile. Ndaño muẽle Akristão va papatisiwa osimbu, handi va kasi oku amamako oku lilongisa. (Va Kolosai 1:9, 10) Pole, o sukila oku kuata elomboloko lialongiso atete Embimbiliya. Akulu vekongelo va ka ku kuatisa oku limbuka nda o kuete ukũlĩhĩso walongiso atete Embimbiliya.
2. Api ananga amue o sukila oku eca osimbu kua papatisiwile?
Osimbu kua papatisiwile, o sukila oku ‘likekembela, [kuenda oku] pongoloka.’ (Tanga Ovilinga 3:19.) Eci ci lomboloka okuti, ove wa likekembela lutima wosi akandu osi wa linga kosimbu kuenda o pinga ku Yehova oco a ku ecele. Ove o sukilavo oku yuvula ovina viosi vĩvi kuenda oku nõlapo oku ambata omuenyo umue u sanjuisa Suku. Handi vali, o fetika oku panga onepa kovopange ekongelo poku endaenda kolohongele kuenda oku kala ukundi ka papatisiwile.
3. Momo lie ku sukilila oku ecelela okuti usumba u ku tateka?
Omanu vamue va kuete usumba wokuti, ka va ka tẽlisa eci va likuminya ku Yehova. Ocili okuti, olonjanja vimue o ka lueya ndeci alume kuenda akãi vakuekolelo va tukuiwa Vembimbiliya va linga. Pole, Yehova ka lavoka okuti afendeli vaye va lipua. (Tanga Olosamo 103:13, 14.) Eye o sanjuka eci ove o likolisilako! Eye o ku kuatisa. Yehova o tu likuminya okuti, lacimue “ci ka tẽla oku tu tepa kocisola [caye].”—Tanga Va Roma 8:38, 39.
LILONGISA ONDONGOSI
Tala ndomo o pondola oku yula ovitangi viosi vi ku tateka oku papatisiwa poku kũlĩha ciwa Yehova kuenda oku tava ekuatiso liaye.
4. Kũlĩha ciwa Yehova
O sukila hẽ oku kũlĩha ciwa Yehova osimbu kua papatisiwile? O sukila oku u kũlĩha ciwa, oco o lekise ocisola kokuaye loku u sanjuisa. Tala OVIDEO oco o kũlĩhe ndomo olondonge Viembimbiliya vi sangiwa voluali luosi via siata oku ci linga. Noke konomuisa epulilo li kuãimo.
Ndeci ca lekisiwa vovideo, nye ca kuatisa omanu vamue oku li pongiya oco va papatisiwe?
Tanga Va Roma 12:2, noke konomuisa apulilo a kuãimo:
O kuete hẽ atatahãi atiamẽla kueci Embimbiliya li longisa, ale nda eci Olombangi Via Yehova vi longisa ocili ale sio?
Nda oco, nye o linga catiamẽla kondaka eyi?
5. Yula ovitangi vi pondola oku ku tateka oku papatisiwa
Eci tu nõla oku litumbika ku Yehova loku papatisiwa, vosi yetu tu liyaka lovitangi. Oco o kũlĩhe ulandu umue, tala OVIDEO, noke konomuisa apulilo a kuãimo.
Ndeci ca lekisiwa vovideo, ovitangi vipi Narangerel a sukilile oku yula oco a vumbe Yehova?
Ocisola a kuetele Yehova co kuatisa ndati oku yula ovitangi viaco?
Tanga Olosapo 29:25 kuenda 2 Timoteo 1:7, noke konomuisa epulilo li kuãimo:
Nye ci tu ĩha utõi woku yula ovitangi?
6. Kolela kekuatiso lia Yehova
Yehova o ka ku kuatisa oco u sanjuise. Tala OVIDEO, noke konomuisa apulilo a kuãimo.
Ndeci ca lekisiwa vovideo, nye ca kokela ondonge Yembimbiliya oku lisimãla oku papatisiwa?
Nye ya lilongisa okuti, co kuatisa oku pamisa ekolelo liaye ku Yehova?
Tanga Isaya 41:10, 13, noke konomuisa epulilo li kuãimo:
Momo lie o kolelela okuti, o pondola oku tẽlisa ohuminyo wa linga kelitumbiko liove?
7. Vokiya olopandu viove kocisola Yehova a ku kuetele
Poku sokolola kocisola Yehova a ku kuetele, o ka lekisa olopandu kokuaye kuenda o ka kuata onjongole yoku u vumba otembo ka yi pui. Tanga Olosamo 40:5, noke konomuisa epulilo li kuãimo:
Esumũlũho lipi lia tunda ku Yehova o sole calua?
Uprofeto Yeremiya wa solele Yehova, Ondaka yaye kuenda wa solelevo calua ocikele coku ambata onduko ya Yehova. Eye hati: “Ondaka yove ya linga onjolela kuenda esanju liutima wange, momo ndi tukuiwa londuko yove, A Yehova Suku.” (Yeremiya 15:16) Tambulula apulilo a kuãimo:
Momo lie oku kala Ombangi ya Yehova ocikele cimue cilikasi?
O yongola hẽ oku papatisiwa Ndombangi ya Yehova?
Kuli hẽ cimue ci ku tateka oku ci linga?
Kocisimĩlo cove, nye o sukila oku linga oco o tẽlise ocimãho coku papatisiwa?
OMANU VAMUE VA POPIA VATI: “Ndi kuete usumba wokuti, si ka tẽlisa ovina viosi ndi likuminya oku linga eci ndi papatisiwa.”
O liyevitevo ndoco?
NYE WA LILONGISA?
Lekuatiso lia Yehova, o pondola oku yula ovitangi viosi oco o papatisiwe.
Oku Pitulula
Ukũlĩhĩso upi Wembimbiliya o sukila oku kuata oco o papatisiwe?
Apongoloko api o sukila oku linga osimbu kua papatisiwile?
Momo lie ku sukilila oku ecelela okuti usumba u ku tateka?
OCO O KŨLĨHE OVINA VIKUAVO
Kũlĩhĩsa eci ci ku vetiya oku nõla onjila yoku papatisiwa.
“Ove hẽ wa li Pongiyila Oku Papatisiwa?” (Utala Wondavululi Welombo 2020)
Lilongisa ndomo o yula ovitangi vi pondola oku ku tateka.
“Nye ci Nateka Oku Papatisiwa?” (Utala Wondavululi Welombo 2019)
Tala ndomo ulume umue a yula ovitangi vinene oco a papatisiwe.
Ulume umue o tukuiwa Ataa, kefetikilo wa enda oku lisimãla oco a papatisiwe. Tala eci co vetiya oku eca enanga eli li kuete esilivilo lia velapo.