Anga hẽ wa Siata Oku Kakatela Lika Kolonjongole Viutima Wove?

ETEKE limue, eci omãla vavali va kala oku papala, umue pokati kavo wa tambula ocikuata cukuavo coku papala cina a sole calua, kuenje wa kaluka hati, “Cange!” Ulandu owu u lekisa okuti, tunde vutila, omanu va siata oku lekisa ocipululu omo liekambo lioku lipua. (Efet. 8:21; Va Rom. 3:23) Oluali lua siata oku vetiya oku kuata ocipululu. Omo liaco, tu sukila oku lavulula, oco tu yuvule ocituwa caco. Nda ka tua ci lingile, tu kokela ocilondokua vakuetu, kuenda tu nyõla ukamba wetu la Yehova.—Va Rom. 7:21-23.

Upostolo Paulu o tu vetiya oku limbuka ndomo ovina tu linga vi kuatisa vakuetu, ale oku va yapuisa, poku soneha hati: “Ci tava oku linga ovina viosi, haviosiko ... vi kuatisa. Ci tava oku linga ovina viosi, haviosiko ... vi kolisa.” Paulu wamisako hati: “Ko ka lingi cimue ci ... konyuisa” vakuene. (1 Va Kor. 10:23, 32) Catiamẽla kolonjongole vietu, tu sukila oku li pula ndoco: ‘Nda siata hẽ oku yuvula oku linga ovina ndi yongola eci ndi limbuka okuti, ombembua vekongelo yi kasi kohele? Nda siata hẽ oku pokola kolonumbi Viembimbiliya ndaño olonjanja vimue ka calelukile oku ci linga?’

Poku Nõla Upange

Omanu valua, va siata oku sima okuti, upange va nõlapo, ka u kokela ocilondokua vakuavo. Tu konomuisi ulandu wulume umue ukualomĩlu volupale lumue Kombuelo yo Amerika. Eye wa kuata ocituwa coku linga olomapalo vioku nganyale olombongo, kuenda wa kala oholua. Omo lioku lilongisa Embimbiliya Lolombangi Via Yehova, wa fetika oku kapako ovina a lilongisa, kuenda wa linga apongoloko komuenyo waye. (2 Va Kor. 7:1) Eci a lekisa onjongole yoku fetika oku kunda olondaka viwa, akulu vekongelo va sapela laye catiamẽla kupange waye. Momo, wa enda oku landisa ovina viokunyua via pangiwa lomuenge. Pole, kofeka yavo va enda oku vi tenga lovina vikuavo oco omanu va kolue.

Noke, wa ivaluka okuti, nda wa linga ukundi pole amamako oku landisa ovina viaco, ka eci ongangu yiwa vekongelo, kuenda ci nyõla ukamba waye la Suku. Ndaño wa kuata ocikele coku tata epata linene, pole wa liwekapo oku landisa ovina viaco. Cilo, o kasi oku landisa ovina via pangiwa lopapelo, oco a kuatise epata liaye. Eye lukãi waye, va papatisiwa. Pokati komãla vaye vatãlo pa papatisiwavo vavali kuenje vosi yavo, va kasi oku kunda olondaka viwa lutõi.

Poku Nõla Akamba

Anga hẽ ca sunguluka oku kuata ukamba la vana okuti Halombangiko Via Yehova, ale tu sukila oku pokola kolonumbi Viembimbiliya? Manji umue ufeko, wa yonguile oku enda kocipito lukuenje umue ka lilongisa Embimbiliya. Ndaño vo sapuila ovitangi viyililako, pole wa nõla oku enda. Eci a pitila kocipito caco, vo wĩha ovinyu ya tengiwa lovihemba vimue vi nena lonjanga otulo, kuenje wa pekela. Noke yoku pasuka, wa limbuka okuti wa putuiwa lekamba liaco.—Sokisa lelivulu Liefetikilo 34:2.

Oku kuata ukamba la vana ka va Lilongisa Embimbiliya, ci nena ovitangi, ndomo Ovisonehua vi lungula hati: “U endaenda la vakualondunge o lingavo ukualondunge, u puãi endaenda laveke o yambuiwa.” (Olosap. 13:20) Oku kuata akamba vãvi, ci nena ovitangi! Elivulu Liolosapo 22:3, li popia hati: “Omunu wa lunguka o mõla ũvi kuenje o lisalamisa; omunu wa kamba olondunge enda ño kuenje o [yambuiwa].” Akamba tu nõla, va pondola oku tu nenela ovitangi, kuenda oku nyõla ukamba wetu la Suku.—1 Va Kor. 15:33; Tia. 4:4.

Poku Nõla Uwalo

Ocituwa coku wala, ci pongoloka vokuenda kuotembo. Pole, olonumbi Viembimbiliya viatiamẽla koku wala, ka vi pongoloka. Paulu wa vetiya vamanji akãi oco ‘va liposuise luwalo wa sunguluka, loku liuvika, kuenda oku omboka.’ Onumbi yaco, yi tiamisiwilavo kalume. (1 Tim. 2:9) Paulu ka vetiyile vamanji oco va wale uwalo ka u kuete esilivilo, kuenda ka popele hati, Akristão vosi va sukila oku kuata uwalo umuamue. Nye ci popiwa catiamẽla kesunguluko? Elivulu limue li lekisa okuti, ondaka esunguluko, yi lomboloka “oku yuvula oku livelisapo ... koku wala, ale koku vangula.”

Tu sukila oku lipula ndoco: ‘Citava hẽ oku popia hati, nda siata oku lekisa esunguluko osimbu okuti, ndi yongola lika oku wala uwalo u komohĩsa vakuetu? Anga hẽ uwalo wange u vetiya vakuetu oku sima okuti, si kuete ovituwa viwa?’ Catiamẽla kuwalo wetu, tu sukila oku yuvula oku ‘kapela vakuetu ocilondokua,’ poku pokola konumbi Yembimbiliya yi popia hati: “Lomue ka ka sokolole ovina viaye lika, puãi omunu omunu a sokolole ovina via vakuavo.”—2 Va Kor. 6:3; Va Fil. 2:4.

Poku Linga Olomĩlu

Eci vekongelo lio Korindo mua kala ocitangi coku li kemba pokati, Paulu wa popia hati: “Ka ca velelepo hẽ oku lingiwa lãvi? Ka ca velelepo hẽ oku liwa?” (1 Va Kor. 6:1-7) Manji umue kofeka yo Estados Unidos, wa kapeleko elungulo eli. Eye wa kuatele ocitangi la manji umue wa kala cime caye cupange okuti ko fetele olombongo viaye. Olonumbi Viembimbiliya via va kuatisa oku sapela olonjanja vialua catiamẽla kocitangi caco, pole, ka va tẽlele oku ci tetulula. Omo liaco, va tuala ocitangi caco kakulu ‘vekongelo.’—Mat. 18:15-17.

Pole, akulu vekongelo, ka va tẽlele oku tetulula ocitangi caco. Noke yoku likutilila olonjanja vialua, manji wa liwekapo oku pinga olombongo vo levala. Momo lie? Eye wa popia hati: “Ocitangi caco ca kala oku tepulula esanju liange, kuenda nda nyõla otembo yalua nda sukilile oku pesila kovina viespiritu.” Noke yoku nõlapo onjila yaco, wa fetika oku kuata esanju kuenda wa limbuka asumũlũho a tunda kupange wa Yehova.

Kovina Vitito

Oku yuvula oku kakatela kueci tu yongola, ci nena asumũlũho ndaño kovina vitito. Manji umue lukãi waye okuti akundi votembo yosi, keteke liatete liohongele yofeka va endele, va pitila selo, kuenda va tumãla polomangu va yonguile. Noke lioku fetika ohongele, kua moleha epata limue lieya lomãla valua. Omo okuti vamue pokati kavo ka va sangele apa va tumala, manji lukãi waye va katuka polomangu viavo. Kuenje, epata liosi lia tumala pamosi. Noke lioloneke vimue, epata lina va ĩhile olomangu, lia tuma kokuavo ukanda wolopandu. Ukanda waco wa lombolola okuti, va sumuile calua omo lioku cilua kohongele. Pole, noke veya oku sanjuka omo liohenda manji lukãi waye va lekisa kokuavo.

Olonjanja vimue, tu sukila oku yuvula oku pitisa kovaso olonjongole vietu oco tu kuatise vakuetu. Nda tua lekisa ocisola cina “ka ci lisandela ovina viaco muẽle,” ci tu kuatisa oku kuata ombembua la vamanji vekongelo, kuenda la vakuetu. (1 Va Kor. 13:5) Nda tua ci linga tu pamisa ukamba wetu la Yehova.

[Elitalatu kemẽla 20]

Anga hẽ wa siata oku kakatela lika kolonjongole viove poku nõla uwalo?

[Elitalatu kemẽla 21]

Anga hẽ wa pitisa kovaso olonjongole via vamanji okuti viove ci sule?