Olohongele Violombangi Via Yehova vi Pondola Oku ku Kuatisa Ndati?

Ove hẽ wa endele ale kohongele yimue Yolombangi Via Yehova? Nda kua la enda, ocisimĩlo coku endako onjanja yatete, pamue ci ku sakalaisa. Citava okuti o lipula ndoco: ‘Nye ci lingiwa kolohongele viaco? Momo lie vi kuetele esilivilo? Momo lie ndi sukilila oku endako?’ Vocipama cilo, o lilongisa ndomo olohongele vi pondola oku pamisa ukamba wove la Suku kuenda oku ku kuatisa komuenyo wove weteke leteke.

1. Cipi ocimãho ca velapo colohongele Violombangi Via Yehova?

Usonehi umue Wembimbiliya wa popia hati: “Ndi ka sivaya Yehova vekongelo linene.” (Olosamo 26:12) Lolondaka evi, eye wa lombolola ocimãho ca velapo colohongele okuti, oku fendela Suku. Voluali luosi, Olombangi Via Yehova olosemana viosi, vi liongolola oco vi sivaye Suku poku imba ovisungo kuenda oku likutilila. Olonjanja vimue vunyamo, ovio vi liongolola vovimunga vinene oco vi fendele Suku.

2. Nye o ka lilongisa kolohongele vietu?

Kolohongele, tu lilongisa Ondaka ya Suku, loku yi “lombolola lutate kuenda oku eca elomboloko liaco.” (Tanga Nehemiya 8:8.) Kolohongele, ove o ka lilongisa eci catiamẽla ku Yehova kuenda ovituwa viaye vi komõhisa. Osimbu o lilongisa catiamẽla kocisola ca Yehova, o ka pamisa ukamba wove laye. O ka lilongisavo ndomo Yehova a pondola oku ku kuatisa oku kuata esanju vepata.—Isaya 48:17, 18.

3. O pondola oku kuatisiwa ndati lukamba womanu vakuavo kolohongele?

Yehova o tu vetiya okuti, “tu likapiko pokati oco tu livetiyi locisola kuenda lovilinga viwa, ka tu ka liwekipo oku liongolola kolohongele vietu.” (Va Heveru 10:24, 25) Kolohongele vietu, o ka sanga omanu va likapako. Ndeci ove, ovo va lekisa onjongole yoku lilongisa ovina vikuavo viatiamẽla ku Suku. Kolohongele viaco, o ka yeva omanu va vangula ovina viwa Viembimbiliya. (Tanga Va Roma 1:11, 12.) Handi vali, o ka kũlĩha omanu valua ci kaile ava va kuele, lava ka va kuelele okuti, va sanjuka ndaño lovitangi va liyaka lavio. Ovina evi ndeti, vimue pokati kasunga lieci Yehova a yonguila okuti, tu endaenda kolohongele olonjanja viosi!

LILONGISA ONDONGOSI

4. Ndomo olohongele Violombangi Via Yehova vi lingiwa

Kocita catete, Akristão va enda oku liongolola oco va fendelele kumosi Yehova. (Va Roma 16:3-5) Tanga Va Kolosai 3:16, noke konomuisa epulilo li kuãimo:

• Kocita catete, Akristão va enda oku fendela ndati Yehova?

OVIDEO: Nye ci Lingiwa Vonjango Yusoma? (2:12)

• Vovideo, ove wa mola eci ci lingiwa Vonjango Yusoma. Ovina vipi wa mola Vonjango Yusoma okuti, vi kuete elitokeko leci wa tanga ku Va Kolosai 3:16?

• Vovideo ale velitalatu, wa mola vali ocina cikuavo wa sola catiamẽla kolohongele?

Tanga 2 Va Korindo 9:7, noke konomuisa epulilo li kuãimo:

• Momo lie Olombangi Via Yehova ka vi pingila olombongo kolohongele viavo?

Ove lomunu o ku longisa Embimbiliya, taleli kumosi esokiyo liohongele yi kuãimo.

• Onepa yipi yohongele o sima okuti, oyo o ka sola vali ale yi ka ku kuatisa?

Wa ci kũlĩha?

Vo jw.org, o pondola oku sanga ocitumãlo kuenda elivala olohongele via siata oku lingiwa koluali luosi.

1. (A) Volohongele vietu mua kongela olohundo, ovindekaise kuenda olovideo. Olohongele vi fetika loku sulila locisungo kuenda ohutililo

2. Vokuenda kuolonepa vimue viohongele, omanu va lalekiwa oku eca atambululo

3. Omanu vosi va lalekiwa ndeci: Olohueli, vana ka va kuelele, akulu kuenda omãla

4. Kolohongele Violombangi Via Yehova, ka ku konguiwa olombongo

5. Ci sukila alikolisilo oku enda kolohongele

Kũlĩhĩsa ulandu wepata lia Yesu. Unyamo lunyamo, ovo va enda oku tunda ko Nasara oku enda ko Yerusalãi kocipito cimue cilikasi. Ungende waco ka wa lelukile, momo va sukilile oku enda 100 kolokilometulu posi yimue yolomunda. Tanga Luka 2:39-42, noke konomuisa apulilo a kuãimo:

• O sima hẽ okuti va sukilile oku likolisilako oku linga ungende waco oco va ende ko Yerusalãi?

• Momo lie pamue o sukilila oku likolisilako oku enda kolohongele?

• O sima hẽ okuti ci kuete esilivilo? Momo lie o simĩla ndoco?

• Momo lie tu sukilila oku endaenda kolohongele?

NYE WA LILONGISA?

Oku endaenda kolohongele, ci ku kuatisa oku lilongisa ovina vialua viatiamẽla ku Yehova, oku pamisa ukamba wove laye kuenda oku u fendela kumue la vakuene.

Oku Pitulula

• Momo lie Yehova a tu vetiyila oku endaenda kolohongele?

• Nye o ka lilongisa kolohongele Violombangi Via Yehova?

• O tẽla hẽ oku sokolola vali konjila yimue olohongele vi ku kuatisa?

OCO O KŨLĨHE OVINA VIKUAVO

Anga hẽ ocisimĩlo coku enda kohongele, ci ku sakalaisa? Eci ca pitavo lulume umue kuenje limbuka eci co kuatisa oku sola olohongele.

Lalimue Eteke tu ka Ivalako Ndomo va tu Tambula (4:16)

Tala ndomo umalẽhe umue a sanjukila olohongele kuenda eci eye a linga oco ka ka pumbe ohongele layimue.

Ndi Sole Calua Olohongele! (4:33)

Kũlĩha eci omanu va sima catiamẽla koku enda kolohongele.

“Momo Lie ca Sungulukila Oku endaenda Kolohongele Vonjango Yusoma?” (Ocipama ci sangiwa lika vo Internet)

Kũlĩha ulume umue wa kala ongangala kuenda wa pangele onepa kocimunga cimue covingumba. Tala ndomo omuenyo waye wa pongoloka noke lioku enda kohongele yimue Yolombangi Via Yehova.

“Kuosi Ngenda Uta Wange ka u Siala” (Utala Wondavululi 1 Yevambi Linene 2014)

5. Oluali lua pongoloka tunde kunyamo 1914

Tala OVIDEO.

OVIDEO: Oluali Lua Pongoloka Tunde Kunyamo 1914 (1:10)

Yesu wa popele ale ovina via laikele oku pita voluali noke lioku tumbikiwa Kusoma. Tanga Luka 21:9-11, noke konomuisa epulilo li kuãimo:

• Pokati kovina via tukuiwa ndeti, vipi wa siata oku mola, ale oku yeva?

Upostolo Paulu wa tukula ovituwa omanu va laikele oku lekisa koloneke via sulako violombiali viomanu. Tanga 2 Timoteo 3:1-5, noke konomuisa epulilo li kuãimo:

• Pokati kovituwa via tukuiwa ndeti, vipi wa siata oku mola komanu koloneke vilo?

6. Uviali Wusoma wa Suku u tu vetiya

Tanga Mateo 24:3, 14, noke konomuisa apulilo a kuãimo:

• Upange upi wa velapo u lekisa okuti, Usoma wa Suku u kasi ale oku viala?

• O pondola oku panga ndati onepa kupange waco?

Usoma wa Suku u kasi ale oku viala kuenda eteke owo u ka viala ongongo yosi, li kasi ocipepi. Tanga Va Heveru 10:24, 25, noke konomuisa epulilo li kuãimo:

• Omunu lomunu pokati ketu, o sukila oku linga nye osimbu tu “lete okuti eteke liaco li kasi ocipepi”?