Ove hẽ wa Kolela Muẽle ku Yehova?
“Tete vanjiliyi usoma.”—MATEO 6:33.
1, 2. Catiamẽla kupange, onjila yipi umalẽhe umue a nõlelepo? Momo lie a nõlela onjila yaco?
UMALẼHE umue ukuenje, wa yonguile oku eca ekuatiso lialua vekongelo liaye. Pole, upange waye woku sanda eteku, wa enda loku u tateka oku enda kolohongele. Ocitangi caco wa ci tetulula ndati? Eye wa leluisa omuenyo waye poku siapo upange waco. Kuenje wa sanga upange ukuavo wecelela oku endaenda kolohongele kuenda oku linga ovopange akuavo ekongelo. Ndaño okuti, cilo eye o tambula olombongo vitito kupange waco, pole, wa siata oku tekula ciwa epata liaye. Kuenda o kuete otembo yoku endisa ovikele viaye vekongelo.
2 Ove hẽ wa kũlĩha esunga lieci umalẽhe waco a kuamẽla onjila eyi? Citava okuti pamue ove o kasi oku liyakavo locitangi caco. Anga hẽ, o pondolavo oku kuama ongangu yaye? Kuli amalẽhe valua va siata oku kuama onjila yaco. Kuenje ovilinga viavo vi lekisa okuti va kolela kohuminyo ya Yesu wa popia hati: “Tete vanjiliyi usoma [wa Suku] kuenda esunga liaye, kuenje ovina [vikuavo] viu vokiyiwi.” (Mateo 6:33) Ovo, va kolela lika ku Yehova okuti upange woluali u sule.—Olosapo 3:23, 26.
3. Momo lie vamue va siatela oku lipula nda ca sunguluka oku pitisa kovaso Usoma wa Suku?
3 Omo liovitangi tua siata oku liyaka lavio koloneke vilo, omanu vamue va pondola oku lipula nda umalẽhe waco wa nõlele onjila ya sunguluka. Momo, koloneke vilo, onepa yalua yomanu va kasi vuhukũi. Pole, vakuavo va kuete ovokuasi alua. Omanu vana va kasi volofeka muli uhukũi, va siata oku sanda onjila yoku sanga upange u va kuatisa oku kala ciwa komuenyo wavo. Handi vali, vana va kasi kolofeka kuli ukuasi, va yongola oku amamako lekalo liavo liwa, ndaño lovitangi viekambo liolombongo. Omo liaco, va siata oku liyaka lovitangi vioku sandiliya ovopange akuavo. Kuenje olonjanja vimue, va siata oku sanga ovopange a kisika otembo yalua. Omo liovitangi viaco, omanu vamue va siata oku li pula nda ca sunguluka oku pitisa kovaso Usoma wa Suku. Omo liaco, tu kũlĩhĩsi ekalo liomanu vana Yesu a vangula lavo.
‘Ko ka Sakalali Lomuenyo’
4, 5. Yesu wa lombolola ndati okuti omanu va Yehova ka va sukila oku sakalala lovina viomuenyo?
4 Eci Yesu a kala ko Galilea, wa kundila omanu valua va tunda kovaimbo a litepa. (Mateo 4:25) Onepa yalua yomanu vaco, va kala olohukũi. Pole, Yesu wa va vetiya oku yuvula oku sakalala lovokuasi oco va pitise kovaso ovina viespiritu. Momo ovio lika vi kuete esilivilo lia velapo. (Mateo 6:19-21, 24) Eye wa va sapuila hati: “Ko ka [sakalali] lomuenyo wene hoti, tu lia nye? Tu nyua nye? Pamue letimba liene hoti, tu wala nye? Omuenyo hẽ, ka wa velelepo okuti okulia ku sule?”—Mateo 6:25.
5 Valua pokati kolonjeveleli via Yesu, ka va solele olondaka viaco. Ovo va kũlĩhĩle okuti, nda ka va talavayele calua, epata liavo li kala onjala. Omo liaco, Yesu wa va ivaluisa ekalo liolonjila. Ndaño okuti, vi sakalala lika lokulia kueteke limosi, Yehova o vi tata ciwa. Yesu wa va lomboluilavo okuti, Yehova wa siata oku walisa olonelẽho. Kuenda eposo liavio lia velapo ulamba una wa Salomone. Nda Yehova o tata olonjila lolonelẽho, oco hẽ ka tu tati ciwa okuti olonjila lolonelẽho ci sule? (Mateo 6:26-30) Ndomo Yesu a ci popia, etimba lietu lia velapo okuti okulia, luwalo, kuenda ovina vikuavo tu sukila vi sule. Nda tua sakalala lika loku sandiliya eci tulia leci tu wala, tuka kuata owesi woku vumba Yehova. Kuenje, ka tu limbuka vali esilivilo liomuenyo.—Ukundi 12:13.
Kuata Ovisimĩlo Via Sunguluka
6. (a) Akristão va kuete ovikele vipi? (b) Helie Akristão va kolela komuenyo wavo?
6 Yesu ka vetiyile omanu oco va liwekepo oku talavaya loku kevelela okuti Suku eca okulia kepata liavo. Momo olonjila via siata oku sandiliya okulia kuavo kuenda kuomãla vavo. Omo liaco, Akristão va sukila oku talavaya oco va kuate okulia. Ovo va kuete ocikele coku tata epata liavo. Akristão vana va kuete vacime cavo, va sukila oku kuata ombili kupange wavo. (2 Va Tesalonike 3:10-12; 1 Timoteo 5:8; 1 Petulu 2:18) Upostolo Paulu, wa enda oku tonga olombalaka oco a kuate eteku. (Ovilinga 18:1-4; 1 Va Tesalonike 2:9) Pole, Akristão va kũlĩha okuti, upange woku sanga eteku, ka u va ĩha ekuatiso lia velapo. Momo, va kolela lika ku Yehova. Omo liaco, va kuete ombembua yovutima yina okuti, omanu vakuavo ka va yi kuete. Ukualosamo wa popia hati: “Ava va kolela Yehova, va linga ndomunda Siono, ka yi sengiwa, puãi yi tumãla ño hũ.”—Osamo 125:1.
7. Omunu una ka kolela Yehova o kuete ovisimĩlo vipi?
7 Omunu wosi ka kolela Yehova, ka kuete ovisimĩlo via sunguluka. Omanu valua voluali, va siata oku sima okuti, ukuasi owo u va ĩha ekuatiso lia velapo. Omo liaco, olonjali vimue via siata oku vetiya omãla vavo oco va lilongisile kolosikola viavelapo. Momo vi yongola okuti, omãla vavo vaka sanga ovopange ana okuti va fetiwa olombongo vialua. Cisumuisa calua omo okuti, olonjali vimue via siata oku mola ovitangi vi tunda koku kuama onjila yaco. Momo omãla vana va tangela kolosila via velapo, utima wavo va u tiamisila lika kovokuasi, kuenje va nyõla ekalo liavo kespiritu.
8. Ovisimĩlo vipi via sunguluka Akristão va kuete?
8 Akristão vana va lunguka, va kũlĩha okuti elungulo lia Yesu, li kuete esilivilo koloneke vilo. Kuenda va likolisilako oku kuata ovisimĩlo via sunguluka lovokuasi. Ndaño va pita otembo yalua kupange woku sanda eteku, ka va ecelela okuti, upange waco u va tateka oku pitisa kovaso ovina viespiritu.—Ukundi 7:12.
‘Ko ka Kuati Ohele’
9. Nye Yesu a likuminya ku vana va kolela ku Yehova?
9 Yesu Vohundo yaye a lingila Komunda, wa sapuila olonjeveleli viaye hati: “Ko ka [kuati ohele] hoti, tu lia nye? Pamue tu nyua nye? Pamue tu wala nye? Momo ovina viaco ovio vakualofeka va sakalala ño lavio oku vi sanda. Ene puãi, Isiene o kasi kilu wa kũlĩha ale okuti vu sesamẽla ovina [viaco].” (Mateo 6:31, 32) Olondaka evi vi kuete esilivilo liocili. Nda tua kolela Yehova, eye oka tu kuatisa. Handi vali, olondaka via Yesu vi tu ivaluisa okuti, nda tua ‘sakalala’ lovokuasi, tu sokisiwa la “vakualofeka” vana ka va fendela Yehova.
10. Eci umalẽhe umue a pinga ekuatiso, ndamupi Yesu a situlula eci a pitisile kovaso?
10 Onjanja yimue, umalẽhe umue ohuasi, wa pula Yesu eci a sukilile oku linga oco a kuate omuenyo ko pui. Yesu wo wivaluisa Ocihandeleko ca Mose okuti, kotembo yaco ca kuata esilivilo. Noke umalẽhe wa tambulula Yesu hati: “Ovina evi viosi ndi vi lingainga ale. Pa ñambela vali nye?” Etambululo lia Yesu lia sumuisile omanu valua. Momo, Yesu wa sapuila ukuenje hati: “Nda o yongola oku lipua, . . . kuende, ka landise cosi o kasi laco, cavela olosuke kuenje o kala lukuasi kilu, oco wiye o ñuame.” (Mateo 19:16-21) Umalẽhe wa tiukila lesumuo lialua. Momo ka yonguile oku pesela ukuasi waye. Ndaño okuti, wa solele Yehova, pole, wa pitisile kovaso ovokuasi.
11, 12. (a) Elungulo lie Yesu a eca liatiamẽla kovokuasi? (b) Ovokuasi a pondola ndati oku tateka omunu oku vumba Yehova?
11 Ocituwa cumalẽhe ohuasi ca vetiya Yesu oku popia hati: “Ohuasi oku iñila vusoma wokilu, ca tĩla. . . . Ongamelo oku pita venyulu lionguya hĩse, [pole, ka ca lelukile] ohuasi oku iñila vusoma wa Suku.” (Mateo 19:23, 24) Anga hẽ olondaka via Yesu vi lomboloka okuti, lomue ohuasi oka iñila Vusoma wa Suku? Sio, hacoko. Momo eye wa popia hati: “[Ku] Suku ovina viosi vi tẽliwa.” (Mateo 19:25, 26) Lekuatiso lia Yehova, omanu vamue va kala olohuasi, va tava oku kuama Yesu. Kuenje va linga olombuavekua. (1 Timoteo 6:17) Yesu wa kuata esunga poku popia olondaka viaco. Momo wa kala ño oku eca elungulo.
12 Nda omunu o pitisa kovaso ovokuasi aye ndeci umalẽhe una ohuasi a linga, ka tẽla oku vumba Yehova lutima wosi. Cimuamue haico ci pondola oku pita la vana “va yongola oku linga olohuasi.” (1 Timoteo 6:9, 10) Oku sakalala lovokuasi, ku tepulula ombili yoku pitisa kovaso ovina viespiritu. (Mateo 5:3) Noke, omunu ka kolela vali kekuatiso lia Yehova. (Esinumuĩlo 6:10-12) Eye o sanda lika oku sumbiwa vekongelo. (Tiago 2:1-4) Handi vali, o pesila lika otembo yaye kovokuasi okuti, kupange wa Yehova ci sule.
Kuata Ovisimĩlo Viwa Lovokuasi
13. Ovisimĩlo vipi vĩvi omanu voko Laodikea va kuatele catiamẽla kovokuasi?
13 Kocita catete, vekongelo lioko Laodikea, mua kala omanu vamue va kuatele ovisimĩlo vĩvi lovokuasi. Yesu wa popia eci catiamẽla kokuavo hati: “O [popia hati], ndihuasi, haime nda salala, kuenje lacimue nda suka, osimbu kua kũlĩhĩle okuti wa sekuka, haive wumumbe, wusuke, wumeke, haive wenda epõlõla.” Omanu voko Laodikea ka va nyolele ekalo liavo kespiritu omo liovokuasi. Ovo, va nyola ekalo liavo omo lioku kolela calua kovokuasi okuti, ku Yehova ci sule. Kuenje, va fetika oku kuata owesi lovina viespiritu. Omo liaco, Yesu wa va ‘siya vomẽla waye.’—Esituluilo 3:14-17.
14. Momo lie Paulu a pandiyila Akristão voko Heveru?
14 Upostolo Paulu wa pandiya ocituwa ciwa Akristão voko Heveru va lekisa eci va liyaka lelambalalo. Eye wa va sapuila hati: “Wa lingi olomandekua ohenda, kuenje wa sanjuki ndaño ovikuata viene via pundiwa, momo wa kũlĩhĩ okuti, vu kuete ovikuata via velapo, haivio ka vi pui.” (Va Heveru 10:34) Ovo ka va sumuile omo lioku pesela ovokuasi vavo. Pole, vamamako lesanju omo lioku tata ciwa ekalo liavo kespiritu okuti olio ‘ovikuata via velapo.’ Ovo va kala ndulume una ukuakufũla wa tukuiwa volusapo lua Yesu okuti, wa landisa ukuasi waye, kuenje wa landa omota yondongo. Momo, va velisilepo elavoko liavo liatiamẽla Kusoma wa Suku okuti, ovina vikuavo vi sule. (Mateo 13:45, 46) Kuenje, va lekisa ovituwa viwa.
15. Manji umue ufeko kofeka yo Liberia wa pitisa ndati kovaso Usoma wa Suku?
15 Koloneke vilo, kuli vamanji valua va siata oku kuama ongangu Yakristão va Heveru. Manji umue ufeko wo kofeka yo Liberia, wa kuatele epuluvi lioku tangela kosikola yavelapo. Vofeka yaco omunu wosi o tangela kosikola yavelapo, eye lika o kala ciwa. Pole, otembo yaco eye wa litumbikile kupange wakundi votembo yosi. Kuenda wa tambuile elaleko lioku talavaya kupange wakundi vavelapo vokuenda kuotembo yimue ya sokamo. Eye, wa nõlapo oku pitisa kovaso Usoma wa Suku kuenda oku amamako lupange waye wakundi votembo yosi. Eci a pitĩla kocikanjo caye, vokuenda kuolosãi vitatu, wa fetika oku lilongisa Embimbiliya leci ci soka akũi avali kololondonge londonge yimosi. Eye kumue lamalẽhe vakuavo voluali luosi, va siata oku pitisa kovaso Usoma wa Suku okuti, ovokuasi ci sule. Oco hẽ, va siata oku ci linga ndati voluali lulo luovokuasi? Ovo va siata oku ci linga poku kuata ovituwa viwa. Tu konomuisi vimue pokati kovituwa viaco.
16, 17. (a) Momo lie esunguluko li kuetele esilivilo nda tu yongola oku kolela ku Yehova? (b) Momo lie tu sukilila oku kolela kolohuminyo via Yehova?
16 Oku lekisa esunguluko. Embimbiliya li popia hati: “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove. Ku ka kolele olondunge viove.” (Olosapo 3:5-7) Olonjanja vimue, eci tu nõla onjila yimue, tu sima okuti ya sunguluka. (Yeremiya 17:9) Pole, Ukristão ukualondunge, o sandiliya tete ekuatiso lia Yehova. (Osamo 48:14) Eye, o sandiliya olonumbi via Yehova kovina viosi a yongola oku linga ndeci: Kovina viekongelo, kelilongiso liokosikola, kupange woku sanda eteku, kovitalukilo, kuenda kovina vikuavo.—Osamo 73:24.
17 Oku kolela kolohuminyo via Yehova. Paulu wa popia hati: “[Omunu] wosi o yongola oku kokela ku Suku, co sesamẽla oku kolela okuti kuli Suku, kuenda okuti Suku eca onima kuava vo sanda.” (Va Heveru 11:6) Nda ka tu kuete ekolelo liokuti, Yehova oka tẽlisa olohuminyo viaye, tuka sakalala lika lovina violuali. (1 Va Korindo 7:31) Pole, nda tu kuete ekolelo lia pama, tuka nõlapo oku pitisa kovaso Usoma wa Yehova. Oco hẽ tu pondola ndati oku kuata ekolelo lia pama? Tu pondola oku ci linga, poku kuata ukamba la Yehova, loku likutilila olonjanja viosi kokuaye. Kuenda oku linga elilongiso lio pokolika. (Osamo 1:1-3; Va Filipoi 4:6, 7; Tiago 4:8) Nda tua ci linga, tuka kuama ongangu ya Soma Daviti eci a likutilila hati: “Ame puãi nda ku kolela a Yehova. Nda linga siti, Ove wu Suku yange. Ohenda yove yalua cimue.”—Osamo 31:14, 19.
18, 19. (a) Oku kuata ombili kovopange etu ku pamisa ndati ekolelo lietu ku Yehova? (b) Momo lie Ukristão a sukilila oku leluisa omuenyo?
18 Oku kuata ombili kupange wa Yehova. Paulu wa lekisa okuti, oku kolela kolohuminyo via Yehova loku lekisa ombili kupange waye, ci kuete esilivilo. Eye wa popia hati: “Tu yongola okuti, ene vosi, omunu lomunu, vu lekisa ombili yoku suisapo elavoko liaco toke kesulilo.” (Va Heveru 6:11) Nda tua lekisa ombili kupange wa Yehova, eye oka tu kuatisa. Nda tu amamako oku limbuka ekuatiso liaco, tuka pamisa ekolelo lietu. Kuenda tuka linga ‘vakuambili’ kupange waye. (1 Va Korindo 15:58) Noke tuka pamisa elavoko lietu kolohuminyo viaye.—Va Efeso 3:16-19.
19 Tu sukila oku likolisilako. Paulu omo lionjongole yoku kala ondonge ya Yesu, wa siapo upange waye wekemãlo. Ndaño okuti ka kaile ohuasi, eye wa nõlele onjila ya sunguluka. (1 Va Korindo 4:11-13) Yehova ka likuminya oku eca ovokuasi komanu vaye. Momo olonjanja vimue Akristão va siata oku liyaka luhukũi. Onjongole yetu yoku leluisa omuenyo, yeca uvangi wokuti, tua nõlapo oku vumba Yehova.—1 Timoteo 6:6-8.
20. Momo lie epandi li kuetele esilivilo ku vana va pitisa kovaso Usoma wa Suku?
20 Oku kuata epandi. Ndonge Tiago wa vetiya Akristão hati: ‘A vamanjange, pandikisi toke eci Ñala Yesu eya.’ (Tiago 5:7) Voluali lulo, ka ca lelukile oku kuata epandi. Omanu va yongola lika okuti ovisimĩlo viavo vi tẽlisiwa lonjanga. Pole, Paulu o tu vetiya oku kuama ongangu ya vana ‘va piñala olohuminyo omo liekolelo kuenda epandi.’ (Va Heveru 6:12) Omo liaco, tu sukila oku kevelela ku Yehova. Nda tu amamako oku kolela kolohuminyo via Yehova, tuka kuata omuenyo ko pui voluali luokaliye.
21. (a) Eci tu pitisa kovaso Usoma wa Suku tu lekisa nye? (b) Nye tuka lilongisa vocipama cikuãimo?
21 Elungulo lia Yesu lioku pitisa kovaso Usoma wa Suku, li kuete esilivilo. Momo nda tua cilinga tuka lekisa okuti, tua kolela Yehova. Handi vali, eyi oyo onjila ya sunguluka Ukristão a sukila oku kuama. Yesu o tu vetiya oku ‘sandiliya esunga lia Yehova.’ Vocipama cikuãimo, tuka lilongisa esunga lieci evetiyo lia Yesu li kuetele esilivilo koloneke vilo.
O Tẽla Oku Lombolola Eci Tua Lilongisa?
• Ovisimĩlo vipi Yesu a tu vetiya oku kuata viatiamẽla kovokuasi?
• Nye tu lilongisa volusapo lua Yesu lua tiamẽla kongamelo oku pita venyulu lionguya?
• Ovituwa vipi vi tu kuatisa oku pitisa kovaso Usoma wa Yehova?
[Elitalatu kemẽla 19]
Valua va yevelela ondaka ya Yesu va kala olohukũi
[Elitalatu kemẽla 21]
Umalẽhe una ohuasi wa solele calua ukuasi waye okuti, Suku ci sule
[Elitalatu kemẽla 21]
Ulume una ukuakufũla wa tukuiwa volusapo lua Yesu, wa landisa ukuasi waye, kuenje wa landa omota yondongo
[Elitalatu kemẽla 22]
Nda tua pitisa kovaso upange wa Yehova, eye oka tu kuatisa