“Eca Onima Kuava vo Sanda”

Anga hẽ Yehova wa kapako alikolisilo afendeli vaye oku u sanjuisa? Omanu vamue va popia okuti sio, Suku ka tu kapeleko. Pole, ovisimĩlo viaco vi vetiya oku sima okuti Suku ka kuete ocikembe. Embimbiliya okuti Ondaka yaye, li lombolola ovolandu ocili. Olio li lekisa okuti Yehova o sanjukila alikolisilo afendeli vaye vakuekolelo. Kũlĩhisa olondaka viupostolo Paulu vi sangiwa kelivulu lia Va Heveru 11:6.

Nye ci sanjuisa Yehova? Paulu wa soneha ndoco: “Oku sunguluka ku Suku ka ku tẽliwa te lekolelo.” Kũlĩhisa okuti Paulu ka popele hati, ka ca lelukile oku sanjuisa Suku nda omunu ka kuete ekolelo. Pole, upostolo wa popia okuti ka ci tẽliwa oku ci linga. Eci ci lekisa okuti, ekolelo ocina cimue ci sukiliwa koku sanjuisa Suku.

Ekolelo lipi li sanjuisa Yehova? Vekolelo lietu ku Suku mua kongela ovina vivali. Catete, tu “sukila oku kolela okuti kuli Suku.” Ambimbiliya akuavo a lombolola okuti ci sukila “oku kolela okuti eye o kasiko muẽle.” Nda ka tu tava okuti kuli Suku, tu u sanjuisa ndati? Vekolelo liocili mua kongela ovina vialua, momo olondele vi tavavo okuti kuli Yehova. (Tiago 2:19) Ekolelo lietu lioku tava okuti kuli Suku, li tu vetiya oku ambata omuenyo umue u sanjuisa.—Tiago 2:20, 26.

Cavali, tu sukila “oku kolela okuti” Suku, “eca onima.” Omunu ukuekolelo liocili wa kolela okuti alikolisilo aye oku ambata omuenyo umue u sanjuisa Suku havolivovako. (1 Va Korindo 15:58) Nda tu tatãla epondolo lia Yehova lonjongole yaye yoku tu ĩha onima tu u sanjuisa ndati? (Tiago 1:17; 1 Petulu 5:7) Omunu wosi o sima okuti Suku ka kuete ocikembe, kuenda ka eci olopandu, haeye ka kuete ohenda, ka kũlĩhile Suku una wa situluiwa Vembimbiliya.

Helie Yehova a sumũlũisa? Paulu wa popia hati, ‘vana vo sanda.’ Elivulu limue liomanu vakuakupongolola Embimbiliya kalimi akuavo, lia lombolola okuti, ondaka yo Helasi yoku popia hati, ‘vana vo sanda’ ka yi lomboloka lika oku “kũlĩha Suku” pole, yi lomboloka oku “u fendela.” Elivulu likuavo li lombolola okuti ondaka yaco yo Helasi yeca ocisimĩlo coku likolisilako. Yehova o sumũlũisa vana okuti ekolelo liavo li va vetiya oku u fendela lutima weyuka ocisola kuenda ombili.—Mateo 22:37.

Yehova o sumũlũisa ndati afendeli vaye vakuekolelo? Eye wa likuminya oku eca onima yomuenyo ko pui Voluali Luokaliye luna lu situlula ocisola kuenda ohenda yaye. (Esituluilo 21:3, 4) Ndaño muẽle cilo, vana vo sanda lutima wosi va siata oku mola ale asumũlũho a tunda ku Yehova. Lekuatiso liespiritu sandu kuenda olondunge vi sangiwa Vondaka yaye, ovo va kuete esanju komuenyo.—Osamo 144:15; Mateo 5:3.

Ocili okuti Yehova, o Suku yimue yi sanjukila upange wafendeli vaye vakuekolelo, una vo lingila lutima wosi. Anga hẽ ukũlĩhĩso waco u ku vetiya oku kuata ukamba laye? Nda oco, momo lie ku lilongisila loku lekisa ekolelo lina Yehova a sumũlũisa?