Upostolo Paulu wa sonehela Akristão vo kocita catete, Va Heveru hati: Pa sialela omanu va Suku epuyuko liesambata. Momo wosi iñila vepuyuko lia Suku o puyukavo kovopange aye ndeci Suku a puyuka kovopange aye. Oco, tu likapeli oku iñila vepuyuko liaco.−Va Heveru 4:9–11.

Eci Paulu a tukula epuyuko lia Suku kupange Waye, ci lekaisa okuti eye wa kala loku vangula eci catiamẽla kolondaka vi sangiwa velivulu Liefetikilo 2:2, oku tu tanga ndomo: “Eteke liepanduvali oco Suku a malusula upange waye a linga; yu wa puyuka eteke liepanduvali kupange waye wosi a linga.” Momo lie Yehova ‘a puyukila keteke liepanduvali?’ Hesungako liokuti wa yonguile oku kavuluka “kupange waye wosi a linga.” Ocinimbu ci kuãimo ceca vali uvangi wokuti; “Suku yu wa sumuluisa eteke liepanduvali hã ha li kolisa; momo eteke liaco olio a puyuka kupange waye wosi a linga woku sovola.”−Efetikilo 2;3; Isaya 40:26, 28.

“Eteke liepanduvali” lia kala limue lia litepa lateke osi epandu a liangako mekonda eli lia kala eteke Suku a sumuluisa kuenda a kolisa, okuti eteke limue lia tumbikiwilua ocipango cimue ci likasi. Ocipango caco hẽ ca kala ce? Kefetikilo, Suku wa lekisa ocipango caye catiamẽla komanu kuenda kongongo. Suku wa sapuila ulume watete lukãi waye hati: “Liciti, siati, yukisi oluali, lu yuli, viali kolõsi viovokalunga, lokolonjila viovusenge, lokovinyama viosi vi ñuala ñuala kilu lieve.” (Efetikilo 1:28) Ndaño okuti Suku wa ecele komanu kuenda kongongo efetikilo limue lia lipua, oku viala ongongo yosi kuenda oku yi pongolola ofeka yelau yeyuka epata liomanu va lipua ndeci ca kala ocipango ca suku, ca sukilile otembo. Omo liaco, “eteke liepanduvali” Suku wa puyuka, ale wa lembuka kovopange osi ovilulikilo viongongo oco a ecelele okuti eci eye a lulika ale, camamako loku kula ndomo eye a yongola. Kesulilo ‘lieteke’ liaco cosi Suku a yonguile cika tẽlisiwa muẽle ocili. Eteke lipi kuka kala epuyuko liaco?

Locisimilo celavoko eli li komohisa, Paulu wa lombolola ndomo omunu a pondola oku iñila vepuyuko lia Suku. Eye wa soneha hati: “Wosi iñila vepuyuko lia Suku o puyukavo kovopange aye.” Eci ci tu lekisa okuti ndaño omanu va kala lefetikilo lia lipua, vosi yavo ka va iñilile vepuyuko lia Suku. Ka va iñilile mekonda Adama la Heva ka va ameleko oku kevelela kepuyuko lia Suku ‘veteke liepanduvali’ omo lioku tava kaliangiliyo eye a va lingila. Omo liaco, ovo va lekisa esino kuenda va yonguile oku litepa la Suku. Noke yaco, ovo va kuama ovina viatiamẽla katutu a Satana mekonda ka va tavele kolonumbi viocisola ca Suku. (Efetikilo 2:15–17) Lonima yaco, ovo va pumba elavoko lioku kala lomuenyo ko pui vofeka yelau. Oku pisa opo, omanu vosi va linga apika ekandu kuenda olofa.−Va Roma 5:12, 14.

Pole, esino liomanu ka lia nyõlele ocipango ca Suku. Eteke liaye liepuyuko li kasi oku amamako. Kuenje, Yehova wa linga eliangiliyo liocisola omo liocisembi Comõlaye Yesu Kristu okuti vosi va tava kueci omo liekolelo, va pondola oku talamẽla epopelo lepuyuko kekandu kuenda koku fa. (Va Roma 6:23) Eli olio esunga lieci Paulu a vetiyila Akristão oku ‘puyuka kovopange avo.’ Ovo va sukilile oku tava kaliangiliyo a Suku epopelo kuenda okuti hakulingako ovo muẽle eci catiamẽla kotembo yavo yo kovaso ndomo va yongola ndeci ca linga Adama la Heva. Ovo va sukililevo oku yuvula oku kuama ovopange avo muẽle loku sima okuti oco va sesamẽla.

Oku siapo ocituwa comunu o lisole eye muẽle kuenda oku kuata ovokuasi oluali oco omunu a linge ocipango ca Suku, ocina cimue ci nena esanju kuenda ekavuluko komunu. Yesu wa linga elaleko hati: “Enjui kokuange, vosi wa sovoloki kuenda wa lemiwi kuenje ndu kavuluisi. Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene, momo okanga yange ya sunguluka, locitele cange ca leluka.”−Mateo 11:28–30.

Elomboluilo lia Paulu liepuyuko lia Suku kuenda ndomo omunu a pondola oku iñilamo lia kala ocili ono yevetiyo Kakristão voko Heveru ko Yerusalãi vana va kala loku lambalaliwa kuenda oku yoliwa epembe mekonda liekolelo liavo. (Ovilinga 8:1; 12:1–5) Cimuamue haico, olondaka via Paulu vi pondolavo oku kala ono yevetiyo Kakristão voloneke vilo. Loku limbuka okuti oku tẽlisiwa kuohuminyo ya Suku yoku nena ofeka yelau vemẽhi Liusoma waye wesunga u kasi ocipepi calua, etu tu sukilavo oku puyuka kovopange etu muẽle kuenda oku linga eci ca velapo kokuetu oco tu iñile vepuyuko liaco.−Mateo 6:10, 33; 2 Petulu 3:13.