OCIPAMA 36
Kala Ukuacili Kovina Viosi
Omanu vosi va yongola oku kuata akamba vakuacili. Yehova o lavokavo okuti, akamba vaye va kala vakuacili. Pole, voluali tu kasi okuti omanu valua havakuaciliko, ka ca lelukile. Onima yipi yi tunda koku kala vakuacili kovina viosi?
1. Lipi esunga lia velapo lioku kala vakuacili?
Nda tuakuacili la vakuetu, tu lekisa ku Yehova okuti tu u sole kuenda tuo sumbila. Kũlĩha okuti: Yehova wa kũlĩha ovina viosi tu sima levi tu linga. (Va Heveru 4:13) Eye o limbuka eci tu nõla oku kala vakuacili kuenda o ci sanjukila. Ondaka yaye yiti: “Yehova o suvuka omunu ukuelimbi, pole, Eye o kuete ukamba wocili lomunu wa suñama.”—Olosapo 3:32.
2. Vipi olonjila vimue vioku kala vakuacili eteke leteke?
Yehova o yongola okuti, tu ‘vangula ocili omunu lukuavo.’ (Sakariya 8:16, 17) Eci ci lomboloka nye? Ci kaile okuti tu vangula la vakuepata lietu, lava tu talavayela kumosi, la vamanji ale la va kesongo kolombiali, ka tu kembi ale oku eca olonumbi viuhembi. Omanu vakuacili, ka va nyani vakuavo. (Tanga Olosapo 24:28 kuenda Va Efeso 4:28.) Ovo va feta elisimu liosi va kisikiwa oku feta. (Va Roma 13:5-7) Lonjila eyi, tu “likolisilako oku kala vakuacili kovina viosi.”—Va Heveru 13:18.
3. Asumũlũho api a tunda koku kala vakuacili?
Nda tua kũlĩhĩwa locituwa coku kala vakuacili, tu ka koleliwa lomanu vakuavo. Tu ka kuatisa vosi vekongelo oku liyeva okuti va kolapo kuenda ndepata li likuetele ocisola. Tu kuata utima wa yela. Oku kala kuetu vakuacili, ku “posuisa elongiso Liupopeli wetu, Suku” kuenda ci vetiya omanu vakuavo oku vumba Yehova.—Tito 2:10.
LILONGISA ONDONGOSI
Tala ndomo oku kala vakuacili ci sanjuisa Yehova kuenda ove. Lilongisa ndomo o kala ukuacili kolonepa vialua viomuenyo.
4. Ocituwa coku kala ukuacili ci sanjuisa Yehova
Tanga Olosamo 44:21 kuenda Malakiya 3:16, noke konomuisa apulilo a kuãimo:
Momo lie o tavela okuti ka ca sungulukile kokuetu oku limbika ocili?
Kovisimĩlo viove, Yehova o liyeva ndati eci tu nõlapo oku vangula ocili ndaño vapuluvi ana ka a lelukile?
Eci omãla va vangula ocili, va sanjuisa olonjali viavo. Eci tu vangula ocili, tu sanjuisa Yehova
5. Lekisa okuti wukuacili otembo yosi
Omanu valua va tava okuti, otembo yosi oku kala ukuacili, ka ci tẽliwa. Pole, kũlĩha esunga lieci tu sukilila oku kala vakuacili otembo yosi. Tala OVIDEO.
Tanga Va Heveru 13:18, noke konomuisi ndomo tu kala vakuacili . . .
lepata lietu.
kupange ale kosikola.
kuenda kolonepa vikuavo.
6. Oku kala vakuacili ci tu kuatisa
Oku kala vakuacili pamue ci molẽha ndu okuti, ci koka ovitangi vimue. Pole, noke yotembo yimue o limbuka okuti, oco ocina ca velapo o sukila oku linga. Tanga Olosamo 34:12-16, noke konomuisa epulilo li kuãimo:
Oku kala vakuacili ci tu kuatisa ndati komuenyo?
Alume kuenda akãi vakuacili, va pamisa olohuela viavo
Olonalãvayi vakuacili, va koleliwa la vacime cavo
Olonungi vakuacili viofeka, va tendiwa ndomanu vawa la va kesongo kolombiali
OMANU VAMUE VA POPIA VATI: “Ovohembi amue, atito calua okuti, ka a tendiwa.”
Momo lie o tavela okuti Yehova wa suvuka ovohembi osi?
NYE WA LILONGISA?
Yehova o yongola okuti, akamba vaye va kala vakuacili kovina viosi va popia, levi va linga.
Oku Pitulula
Vipi olonjila vimue vioku kala vakuacili?
Momo lie ka ca sungulukilile oku sima okuti citava oku limbika ocili?
Momo lie tu sukilila oku kala vakuacili otembo yosi?
OCO O KŨLĨHE OVINA VIKUAVO
Olonjali vi longisa ndati omãla vavo oku kala vakuacili?
Onima yipi yi tunda koku tẽlisa olohuminyo vietu?
Kũlĩha okuti, tu sukila oku feta elisimu ndaño va talavaya lalio lonjila ka ya sungulukile.
“Anga hẽ o Sukila Oku Feta Elisimu?” (Utala Wondavululi 1 wa Mbalavipembe 2011)
Nye ca vetiya ulume umue ka kaile ukuacili oku linga apongoloko komuenyo waye kuenda oku linga upange uwa?
“Nda Lilongisa Okuti Yehova Ukuahenda Haiye Ukuakuecela” (Utala Wondavululi 1 wa Kupemba 2015)