Tava Kelungulo Lia Yehova
“Ku ka pukule okupindisa kua Yehova.”—OLOSAPO 3:11.
1. Momo lie tu sukilila oku tava kelungulo lia Yehova?
SOMA SALOMONE, wa tu sila ongangu yiwa yoku tava kelungulo li tunda ku Suku. Eye wa popia hati: “Amõlange, ku ka pukule okulongisa kua Yehova. Okulonga kuaye ka ku ka ku kume. Yehova o pokuisa u a sole, ndeci ci lingainga onjali lomõlaye a sanjukila.” (Olosapo 3:11, 12) Ocili okuti, Yehova eca elungulo kokuove omo liocisola.
2. “Elungulo” li lomboloka nye? Ndamupi omunu a tambula elungulo liaco?
2 ‘Elungulo’ li lomboloka oku pokuisa, loku longisa kuenda oku pindisa. Upostolo Paulu wa popia hati: “Epokuiso liosi tete ka lia sokele ndesanju, te ndesumuo, noke li imila ava va pindisiwa lalio epako liombembua lesunga.” (Va Heveru 12:11) Oku tava kelungulo lia Yehova, ci ku kuatisa oku endela vonjila yesunga loku kuata ukamba laye. (Osamo 99:5) Elungulo citava okuti liyilila ku vamanji, kovina wa siata oku lilongisa kolohongele, kelilongiso Liondaka ya Suku, kuenda kalivulu a sandekiwa ‘lukuenje wa lunguka.’ (Luka 12:42-44) Oku yeva ondaka yimue yi tukuatisa oku pongolola ovituwa vietu, ci sanjuisa calua. Oco hẽ, elungulo lipi o tambula nda wa linga ekandu?
Esunga Lieci Vamue va Tundisiwila Vekongelo
3. Nye ci koka omunu oku tundisiwa vekongelo?
3 Omanu va Yehova va siata oku lilongisa Embimbiliya kuenda alivulu a sandekiwa lukuenje wa lunguka. Ovo va lilongisa olonumbi Viaye kolohongele vekongelo, kolohongele vimbo, kuenda viofeka. Omo liaco, va kũlĩha ciwa ovina Yehova a yongola kokuavo. Omunu o tundisiwa lika vekongelo nda wa linga ekandu linene okuti, ka yongola oku likekembela.
4, 5. Ulandu upi Wembimbiliya u lekisa oku tundisiwa kuomunu umue vekongelo? Momo lie vamanji va tambuila onumbi yoku ecela omunu waco?
4 Kũlĩhĩsa ulandu u sangiwa Vembimbiliya watiamẽla komunu umue wa tundisiwile vekongelo. Vekongelo lioko Korindo vamanji va enda oku ecelela ‘ukahonga umue okuti, ndaño pokati ka vakualofeka ka wa kalepo.’ Momo ‘umue pokati kavo wa kala lukãi wa isiaye.’ Omo liaco, Paulu wa va vetiya hati: “Omunu waco weci ku Satana okuti, etimba liaye li nyõleha, oco espiritu liaye li popeliwe.” (1 Va Korindo 5:1-5) Eci omunu wa linga ekandu a tundisiwa vekongelo loku eciwa ku Satana, o tiukila voluali. (1 Yoano 5:19) Oku tundisiwa kuaye, ku yelisa ekongelo okuti, liamamako oku situlula ovituwa via Yehova.—2 Timoteo 4:22; 1 Va Korindo 5:11-13.
5 Eci papita otembo yimue, Paulu wa vetiya vamanji va Korindo oco va tambule vali omunu waco va tundisile. Momo lie? Eye wa lombolola okuti, va sukila oku ci linga oco ka ‘vaka yuliwe la Satana.’ Citava okuti, omunu waco wa linga ekandu, wa likekembela, kuenje wa yelisa omuenyo waye. (2 Va Korindo 2:8-11) Nda va Korindo va yuvuile oku tambula omunu waco poku lekisa ekambo liocisola loku ecela, nda va yuliwa la Satana. Momo ovituwa viaco ovio Satana a yonguila omanu. Omo liaco, vamanji va Korindo va tava konumbi yoku ‘ecela omunu waco kuenda oku u lembeleka.’—2 Va Korindo 2:5-7.
6. Oku tundisa vekongelo omunu wa linga ekandu ci kuete esilivilo lie?
6 Oku tundisa vekongelo omunu wa linga ekandu ci kuete esilivilo lie? Oku tundisa omunu waco, ci yelisa onduko ya Yehova kevĩho, kuenda ci teyuila ekalo liwa liekongelo. (1 Petulu 1:14-16) Oku tundisa vekongelo omunu wa linga ekandu, ci lekisa oku pokola kolonumbi via Yehova, kuenda oku teyuila ekongelo konepa yespiritu. Handi vali, ci kuatisavo omunu waco oku likekembela.
Esilivilo Lioku Likekembela
7. Daviti omo lioku seteka oku limbika ekandu liaye, nye ca pita laye?
7 Kuli omanu valua va lingile ekandu okuti ka va tundisiwile vekongelo. Ocili okuti, ka ca lelukile oku likekembela lutima wosi. Kũlĩhĩsa ulandu wa Soma Daviti ko Isareli, una wa soneha Osamo 32. Ocisungo caco, ci lombolola ndomo a seteka oku limbika ekandu a linga la Batisieva. Noke omo liesakalalo liovutima, etimba liaye lia fetika oku hongua nduti u kasi vekango. Eye wa liyaka lovitangi vialua kuenda esumuo. Pole, eci a ‘likekembela ekandu liaye, Yehova wo wecela.’ (Osamo 32:3-5) Noke wa imba ocisungo hati: “Wa sumũlũha omunu Yehova ko veta eko.” (Osamo 32:1, 2) Daviti weya oku sanjuka calua omo lioku taviwa vali la Yehova.
8, 9. Oku likekembela ku lekisiwa ndati, kuenda ku kuete esilivilo lie komunu oyongola oku tambuiwa vekongelo?
8 Omunu wosi wa linga ekandu, o sukila oku likekembela nda o yongola oku taviwa vali la Yehova. Eye ka citava okuti, o kuata osõi ale ohele yoku limbukiwa okuti wa lueya. Oku ‘likekembela’ ku lomboloka oku ‘pongolola ovisimĩlo’ viatiamẽla kovituwa vĩvi omo liesumuo. Omunu una wa likekembela o kuete “utima wa teka, haiwo wa samba,” kuenje o yongola oku siapo elinga liaco lĩvi.—Osamo 51:17; 2 Va Korindo 7:11.
9 Oco omunu a tambuiwe vali vekongelo, o sukila oku likekembela lutima wosi. Omunu una wa tundisiwa ka tambuiwa vekongelo noke yoku pita lika okatembo kamue katito. Osimbu handi ka vo tambuile, o sukila oku pongolola utima waye. O sukilavo oku limbuka ohele yekandu liaye, loku kũlĩha ndomo lia nena etombo ku Yehova kuenda vekongelo. Poku likekembela, o sukila oku likutilila lutima wosi loku pinga ongecelo ku Yehova, kuenda oku pokola kolonumbi Viaye. Eci omunu waco a pinga oco a tambuiwe vekongelo, o sukila oku eca uvangi woku likekembela lutima wosi, kuenda ‘ovilinga vioku likekembela kuaco.’—Ovilinga 26:20.
Momo Lie Omunu a Sukilila Oku Litavela?
10, 11. Momo lie ka tu sukilila oku limbika ekandu?
10 Omanu vamue va linga ekandu, pamue va sokolola ndoco: ‘Nda nda sapuilako manji umue ekandu liange, o ndi pula ovina vi sumuisa. Noke ndi tundisiwa vekongelo. Pole, nda sia tukuile ekandu liaco, ndi yuvula ovina viaco. Kuenje, vekongelo lomue o kũlĩha ekandu liange.’ Ovisimĩlo evi ka vi vetiya omunu oku ivaluka ondaka yimue yi kuete esilivilo. Yipi ondaka yaco?
11 Yehova eye “Suku yohenda, ukuacali, ukuakulivala konyeño, ukuacisola calua haeye ukuacili, ukuakumuisa kolohulukãi viomanu ocisola ka ci pui. Ukuakuecela olongole levĩho kuenda akandu.” Pole, o pindisa omanu vaye ‘ndeci ca va sesamẽla.’ (Etundilo 34:6, 7; Yeremiya 30:11) Nda ove wa linga ekandu, noke wa seteka oku limbika ekandu liaco ku Yehova, ku taviwa vali Laye. Yehova o lete ovina viosi, kuenda ka sepula ovilinga vĩvi.—Olosapo 15:3; Va Heveru 1:13.
12, 13. Nye ci pita lomunu nda wa seteka oku limbika ekandu liaye?
12 Nda wa linga ekandu, o sukila oku likekembela. Momo nda wa cilinga, o kuata utima wa yela. (1 Timoteo 1:18-20) Pole, nda wa limbika ekandu liaco, utima wove u tindila, kuenje u ku tuala koku linga akandu akuavo. Ivaluka okuti, kua lueyelele omunu ale ekongelo. Pole, wa lueyela Suku. Ukualosamo wa popia hati: “Ocalo ca Yehova ci kasi kilu. Ovaso aye a tala tala omãla vomanu, ovisokopia viaye vi va seteka. Yehova o seteka vakuesunga kuenda vakuakandu. Utima waye u suvuka u o sole ungangala.”—Osamo 11:4, 5.
13 Yehova ka sumũlũisa omunu o limbika ekandu linene, okuti o kala vekongelo ndu okuti, utima waye wa yela. (Tiago 4:6) Omo liaco, nda wa linga ekandu, okuti o yongola oku linga eci ca sunguluka, kuka kuate ohele yoku litavela. Momo nda kua ci lingile, utima wove u ku vetela evelo. Capiãla enene eci o tanga ocisonehua cimue, ale ceci o yeva elungulo limue liatiamẽla kekandu liaco. Nye cipita love nda Yehova wa kupa espiritu sandu liaye ndeci a linga la Soma Saulu? (1 Samuele 16:14) Nda Yehova wa kupa espiritu liaye, o wila vekandu linene.
Kolela Vamanji
14. Omunu wa lueya, momo lie a sukilila oku kuama elungulo lielivulu lia Tiago 5:14, 15?
14 Nye omunu a sukila oku linga nda wa lueya kuenje o yongola oku likekembela? Embimbiliya li popia hati: “A kovonge akulu vekongelo kuenje vo likutilile loku u sieketa lulela vonduko ya Ñala. Kuenje ohutililo yekolelo yi popela u o vela, kuenje Ñala u pindula.” (Tiago 5:14, 15) Oku sapula ekandu lietu kakulu vekongelo, oyo onjila yi kuatisa omunu oku ‘ima apako a sungulukila epongoloko liutima.’ (Mateo 3:8) Akulu vaco vekongelo vakuacisola, ‘vo likutililako loku u sieketa ulela vonduko ya Yehova.’ Omo okuti, elungulo liavo li tunda Vembimbiliya, li kasi ndulela. Momo li lembeleka omunu o yongola oku likekembela.—Yeremiya 8:22.
15, 16. Ndamupi akulu vekongelo va kuama ongangu ya Suku ndomo ya lekisiwa kelivulu lia Esekiele 34:15, 16?
15 Yehova Ungombo wetu haeye ukuacisola, wa tu ĩha ongangu yiwa eci a yovola va Yudea kupika woko Bavulono kunyamo wo 537. Wa tu ĩhavo ongangu yiwa eci a yovola va Isareli yespiritu ko ‘Bavulono Yinene’ kunyamo wo 1919. (Esituluilo 17:3-5; Va Galatia 6:16) Eye wa tẽlisa ohuminyo yaye eci a popia hati: “Ame muẽle, ndinga ungombo wolomeme viange haime ndi va puyuisa. . . . Ya nyẽlẽla ndi yi vanjiliya. Ya pambuka ndi yi kondolola. Ya teka ndi yitika. Ya hongua ndi yi kolisa.”—Esekiele 34:15, 16.
16 Yehova wa tekula olomeme viaye, loku vi puyuisa, kuenda oku sandiliya evi via nyelela. Cimuamue haico akulu vekongelo va siata oku linga locunda ca Suku. Ovo va kũlĩhĩsa okuti, ocunda caco ci tekuiwa ciwa kuenda ci laviwa. Akulu vekongelo va sandiliya vana va yapuka vekongelo. Ndeci Yehova ‘akuta apute vomanu vaye,’ haico akulu vekongelo va linga. Ovo, va lembeleka vana va livalula lolondaka kutima ale lovilinga. Akulu vekongelo va kuatisavo ava va vela kespiritu omo liovituwa viavo vĩvi, ndeci Yehova ‘a pamisa ava va hongua.’
Ndomo Akulu Vekongelo va Eca Ekuatiso
17. Momo lie ka tu sukilila oku kuata ohele yoku sanda akulu vekongelo oco va tu kuatise kespiritu?
17 Akulu vekongelo va pokola kelungulo li popia hati: “Kuateli vamue ohenda lohele.” (Yuda 23) Vamanji vamue, va siata oku wila vekandu linene liukahonga. Pole, nda va likekembela, va kuatisiwa lohenda kuenda locisola cakulu vekongelo poku va ĩha ekuatiso konepa yespiritu. Upostolo Paulu poku likongela eye muẽle velungulo liaco, wa popia hati: “Ka ci kasi okuti tu kuete omoko yoku pangisa ekolelo liene. Tu talavaya lene oku vokiya kesanju liene.” (2 Va Korindo 1:24) Omo liaco, kuka kuate ohele yoku sanda akulu vekongelo oco va ku kuatise kespiritu.
18. Akulu vekongelo va lekisa ocituwa cipi poku vangula la manji umue wa lueya?
18 Nda wa linga ekandu linene, momo lie o sukilila oku sapuilako akulu vekongelo? Momo okuti, ovo angombo vocunda ca Suku. (1 Petulu 5:1-4) Ka kuli ungombo umue okuti, o veta omeme ya hongua nda ya linga eci cĩvi. Cimuamue haico catiamẽla kakulu vekongelo. Eci va tumãla lamanji umue wa lueya, ka vo yambula ndondingaĩvi. Pole, vatiamisila ombangulo yavo kekandu a linga, kuenda oku u tumbulula konepa yespiritu. (Tiago 5:13-20) Akulu vekongelo va tetulula lesunga, kuenda va “kuatela ohenda ocunda.” (Ovilinga 20:29, 30; Isaya 32:1, 2) Ovo kumosi Lakristão vakuavo, va ‘lekisa esunga, loku sola ohenda kuenda oku endaenda la Suku lesunguluko.’ (Mika 6:8) Ovituwa evi, vi kuatisa poku nõla onjila yi kuamiwa okuti, mu kongela omuenyo womunu lupange woku ‘lisa olomeme via Yehova.’—Osamo 100:3.
19. Ocituwa cipi akulu vekongelo va sukila oku lekisa poku kuatisa manji umue wa lueya?
19 Akulu vekongelo va nõliwa lespiritu sandu, kuenje va sandiliya oku songuiwa lalio. “Nda umue wa kuatiwa lokulueya” osimbu ka ci limbukile, akulu vekongelo va loñoloha kespiritu, va seteka oku u ‘tiula lutima womboka.’ (Va Galatia 6:1; Ovilinga 20:28) Ovo va lekisa eliketiso loku pokola kolonumbi via Yehova, poku pengulula ovisimĩlo viomunu waco ndeci ondotolo yi kuta lutate akepa vomunu wa teka oco a sakuiwe. (Va Kolosai 3:12) Ocili okuti, ohenda yakulu vekongelo, yi tunda kohutililo yavo loku konomuisa ovisonehua. Omo liaco, poku tetulula ocitangi cimue, onjila yosi va nõlapo te yi situlula ovisimĩlo via Yehova.—Mateo 18:18.
20. Vepuluvi lipi ci sukila oku linga esapulo vekongelo okuti manji umue wa tumbikiwa posi?
20 Nda manji umue wa linga ekandu okuti lia kũlĩhĩwa lomanu ale kuli ohele yokuti ekandu liaco lika kũlĩhĩwa, te ku lingiwa esapulo vekongelo. Esapulo liaco, ka li teyuila lika ekongelo. Pole, liecavo elungulo ku vamanji. Vokuenda kuotembo, omunu waco wa tumbikiwa posi o sakuiwa kespiritu. Kuenje, o kala ndomunu o kasi okupiwa esepu li tateka upange waye. Votembo yaco, ka citava okuti eca atambululo kolohongele. Noke, akulu vekongelo va sanda manji umue o linga elilongiso Liembimbiliya lomunu wa lueya oco a kuate vali ‘ekolelo.’ (Tito 2:2) Ovina evi ka citava okuti vi lingiwa locisimĩlo coku yambula omunu. Pole, vi lingiwa locisola.
21. Ovitangi vimue viekongelo viatiamẽla koku lueya, vi tetuluiwa ndati?
21 Akulu vekongelo va eca ekuatiso kespiritu volonepa vialua. Sokolola ndeci okuti manji umue kosimbu wa kuatele ocitangi coku nyua calua ovina vi koluisa. Kuenje, olonjanja vimue nda o kasi likaliaye konjo, wa siata oku wila vali veyonjo liaco. Ale pamue manji umue kosimbu wa kuatele ocitangi coku sipa. Kuenje, cilo nda o kasi likaliaye wa siata oku wila vali vocitangi caco. Ndaño okuti, wa siata oku likutilila ku Suku kuenda wa kũlĩha okuti Suku ecela, o sukila oku sanda ekuatiso kakulu vekongelo. Nda wa cilinga, ekandu liaco ka li kala ndocituwa komuenyo waye. Ukulu wekongelo ale vavali, va pondola oku u kuatisa kocitangi caco. Noke, ukulu waco wekongelo ale vavali, va sapuilako ukulu wekongelo mitavaso loku u lomboluila ovina vikuavo via kongela vocitangi caco.
Amamako Oku Tava Kelungulo Lia Yehova
22, 23. Momo lie o sukilila oku amamako oku tava kelungulo lia Yehova?
22 Oco Akristão va taviwe la Yehova, va sukila oku pokola kelungulo Liaye. (1 Timoteo 5:20) Omo liaco, kapako elungulo liosi o tambula eci o lilongisa Embimbiliya, leci o tanga alivulu a sandekiwa lukuenje wa lunguka. Pokolavo kelungulo o tambula kolohongele viekongelo, kolohongele vimbo kuenda viofeka. Kũlĩhĩsa ndomo o linga ocipango ca Yehova. Nda wa ci linga, elungulo lia Yehova lika ku kuatisa oku amamako kespiritu kuenda oku tamãlala leyonjo li tuala kekandu.
23 Oku tava kelungulo lia Yehova ci ku kuatisa oku kala vocisola caye. Kuli omanu valua va siata oku tundisiwa vekongelo. Pole, nda wa “lava utima wove” loku ‘endaenda lolondunge,’ lalimue eteke oka pita locitangi caco. (Olosapo 4:23; Va Efeso 5:15) Nda cilo wa tundisiwa vekongelo, momo lie ku sandiliyila onjila yoku tiuka? Yehova o yongola okuti, omanu vosi va litumbika kokuaye vamamako oku u fendela locili kuenda “lesanju liutima.” (Esinumuĩlo 28:47) Ove, o pondola lika oku cilinga otembo ka yi pui nda wamamako oku tava kelungulo lia Yehova.—Osamo 100:2.
O Tambulula Ndati?
• Momo lie vamue va siatela oku tundisiwa vekongelo?
• Nye ca kongela voku likekembela lutima wosi?
• Momo lie vana va linga ekandu linene va sukilila oku likekembela?
• Akulu vekongelo, va kuatisa ndati una wa likekembela?
[Elitalatu kemẽla 13]
Momo lie upostolo Paulu a ecela onumbi ku vamanji va Korindo oco va tundise vakuakandu vekongelo?
[Elitalatu kemẽla 16]
Akulu vekongelo va ‘sakula’ apute olomeme via Suku ndeci angombo vokosimbu va lingaile