Apulilo Valingiwa Lavakuakutanga
Lonjongole ya Yehova yoku ecele akandu vonduko yocilumba cocisembi, momo lie ci sukilila vali okuti Akristão va litavela akandu avo kakulu vekongelo?
Ndomo ca muiwa vocitangi ca Daviti kuenda Batisieva, Yehova wa ecela ekandu lia Daviti mekonda wa likekembela cocili ndaño okuti lia kala ekandu limue linene. Eci uprofeto Natana eya kokuaye, Daviti wa litavela ekandu liaye lulelu hati: “Nda linga ekandu kovaso a Yehova.”—2 Samuele 12:13.
Omo liaco, Yehova ka tava lika oku litavela kuocili kuondingaivi loku ecela akandu, pole o lingavo aliangiliyo oku kuatisa ondingaivi oco yamameko oku veluka kespiritu. Vocitangi ca Daviti, ekuatiso lieyilila vonduko yuprofeto Natana. Cilo, vekongelo Liakristão muli alume vamako kespiritu ale akulu vekongelo. Ondonge Tiago wa lombolola hati: “Pokati kene pali umue o vela [kespiritu]? A kovonge akulu vekongelo kuenje vo likutilile loku u sieketa lulela vonduko ya Ñala. Kuenje ohutililo yekolelo yi popela u o vela, kuenje Ñala u pindula, kuenda vali nda wa linga akandu ecelua.”—Tiago 5:14, 15.
Akulu vekongelo valoñoloha va pondola oku leluisa calua evalo liutima ndingaivi akasi loku yeva. Ovo va likolisilako oku setukula Yehova koku linala kuaye la vakuakandu. Ovo ka va yongola lalimue eteke oku kala olongangala ndaño ceci pamue ku sukiliwa epindiso limue lia kãla. Handi vali, ovo lohenda yalua va kapako asukila a velapo omunu. Lepandi lialua, ovo va likolisilako oku pongolola ovisimilo via yu walinga ekandu poku tanga Ondaka ya Suku. (Va Galatia 6:1) Ndaño omunu ka tẽlele eye muẽle oku litavela ekandu liaye, pamue eye handi o vetiyiwa oku likekembela eci akulu vekongelo veya kokuaye, ndeci ca lipita la Daviti, eci Natana eya kokuaye oco o kuatise. Ekuatiso lieciwa lakulu vekongelo li kuatisa ondingaivi oku yuvula ohele yoku linga vali ekandu kuenda ovitangi viyilila koku kala ondingekandu ya sina.—Va Heveru 10:26–31.
Ka ca lelukile oku litavela akandu a kutisa osõi kuenda oku sandiliya ongecelo. Ci sukila oku kuata utõi wovutima. Pole, kuata epuluvi lioku sokolola eci ci nõliwapo. Ulume umue ka tẽlele oku litavela akandu aye okuti anene calua kakulu vekongelo wa vangula hati: “Ame nda kala loku yeva evalo vutima wange okuti ka lia kale loku pua. Nda likolisilako oku vokiya upange wange woku kunda, pole evalo liutima ka lia puile.” Eye wa liyeva okuti oku litavela akandu ku Suku volohutililo ci tẽla, pole ci molẽha ciwa okuti hacoko, momo eye wa lipitavo leci ca yeva Soma Daviti. (Osamo 51:8, 11) Homoko ciwa cimue oku tava ekuatiso liocisola lieciwa la Yehova omo liakulu vekongelo!