3. Suku o tambulula ndati olohutililo vietu?

Eye o ci linga volonjila vialua. Yehova wa eca Ondaka yaye Embimbiliya muna tua siata oku sanga atambululo apulilo etu. Oku tanga Ondaka ya Suku, ku kuatisa “omunu wa kamba olondunge oku kuata olondunge.” (Olosamo 19:7; tanga Tiago 1:5.) Yehova o pondola oku tu ĩha ombembua yo vutima eci tu liyaka lovitangi. Eye o vetiya afendeli vaye oco va tu kuatise eci tu sukila ekuatiso.

Vosi yetu tu sukila oku nõla olonjila tu kuama. Vialua pokati kolonjila viaco, citava okuti viwa ale vĩvi kokuetu. Ndeci, pamue tu sukila oku nõla kocitumãlo tu kala, ndomo tu kuata olombongo vioku litekula lavio, nda tu kuela ale sio. Nda tu nõla olonjila viwa, tu kuata esanju komuenyo loku sanjuisa Yehova.

1. O talavaya ndati Lembimbiliya oco li ku kuatise oku nõla olonjila viwa?

Osimbu kua nõlele onjila yimue, likutilila ku Yehova oku pinga ekuatiso kuenda kũlĩhĩsa Embimbiliya oco o limbuke ndomo eye a tenda onjila wa nõlapo. (Tanga Olosapo 2:3-6.) Kolonepa vimue, Yehova eca onumbi yimue yi lomboloka ciwa. Omo liaco, onjila yiwa o pondola oku nõla, oku pokola konumbi yaco.

Nda ka kuli onumbi yimue Yembimbiliya yi lomboloka ciwa haiyo yi lekisa eci o sukila oku linga, nda wa linga nye? Yehova o ka ku songuila “vonjila o sukila oku endela.” (Isaya 48:17) Ndamupi? Kuli olonumbi vi pondola oku ku songuila. Onumbi, ocili cimue ci situlula ovisimĩlo via Suku. Olonjanja vialua tu kũlĩha ndomo Suku a tenda ocina cimue poku tanga ulandu umue Vembimbiliya. Eci tu limbuka ndomo Yehova a liyeva, tu pondola oku nõla olonjila viu sanjuisa.

2. Ovina vipi o sukila oku kapako osimbu kua nõlele onjila yimue?

Embimbiliya liti: “Ukualondunge o kũlĩhĩsa onjila yosi.” (Olosapo 14:15) Eci ci lomboloka okuti, osimbu ka tua nõlele onjila yimue, tu sukila oku sokiya otembo yoku sokolola kueci tu nõla. Poku kũlĩhĩsa onjila lonjila, lipula ndoco: ‘Onumbi yipi Yembimbiliya yi kapiwako? Onjila yipi yi ka nyĩha ombembua yo vutima? Onjila ndi nõla ndeti yi ka kokela nye ku vakuetu? Handi vali, yi ka sanjuisa Yehova?’—Esinumuĩlo 32:29.

Yehova o kuete omoko yoku tu sapuila eci ciwa leci cĩvi. Nda tu kũlĩha ciwa ovihandeleko, olonumbi viaye loku nõlapo oku vi kuama, tu ka kuata owanji wutima wa pindisiwa. Owanji wutima, ovisimĩlo vioku limbuka eci ca sunguluka leci ka ca sungulukile. (Va Roma 2:14, 15) Owanji wutima wa pindisiwa, u tu kuatisa oku nõla olonjila via sunguluka.

LILONGISA ONDONGOSI

3. Ecelela oku songuiwa Lembimbiliya

OVIDEO: Ecelela Oku Songuiwa Lolonumbi Viembimbiliya (5:54)

• Elianjo lioku nõla li lomboloka nye?

• Momo lie Yehova a tu ĩhila elianjo lioku nõla?

• Nye eye a tu ĩha oco tu talavaye ciwa lelianjo lioku nõla?

Oco tu kũlĩhe onumbi yimue Yembimbiliya, tu tangi Va Efeso 5:15, 16. Kuenje kũlĩhĩsa ndomo o “talavaya ciwa lotembo” yove poku . . .

• tanga Embimbiliya oloneke viosi.

• kala ohueli yiwa, onjali yiwa, omõla uwa.

• endaenda kolohongele viekongelo.

4. Pindisa owanji wutima wove poku nõla olonjila viwa

OVIDEO: “Amamiko Oku Kuata Owanji Wutima wa Yela” (5:13)

• Ndeci ca lekisiwa vovideo, ananga api manji a eca oco a pindise owanji wutima waye kuenda oku nõla onjila yi sanjuisa Yehova?

Momo lie ka ci tavela oku pula vakuetu poku nõla onjila tu sukila oku kuama? Tanga Va Heveru 5:14, noke konomuisa apulilo a kuãimo:

• Ndaño okuti oku pula vakuetu poku nõla onjila yimue ci kasi ndu okuti oco ocina ca leluka, nye tu sukila oku tepisa?

• Ocina cipi ci kuatisa oku pindisa owanji wutima wove kuenda oku nõla onjila yiwa?

5. Sumbila owanji wutima wa vakuene

Omanu va litepa, va pondola oku nõla olonjila via litepa. Tu sumbila ndati owanji wutima wa vakuetu? Tu kũlĩhĩsi ovitangi vivali:

Ocitangi 1: Manji umue ukãi, o sole oku li pindala calua kocipala kuenje ilukila kekongelo limue okuti, vamanji valua vo vekongelo liaco ci va kokela ocilondokua.

Tanga Va Roma 15:1 kuenda 1 Va Korindo 10:23, 24, noke konomuisa apulilo a kuãimo:

• Ndomo ca lekisiwa vovinimbu evi, nye manji ukãi a pondola oku nõlapo oku linga? Nye ove o nõlapo oku linga nda o kasi lomunu umue okuti owanji wutima waye ka u wecelela oku linga ocina cimue, pole, owanji wutima wove u ku ecelela oku ci linga?

Ocitangi 2: Manji umue ulume wa kũlĩha okuti, Embimbiliya ka li pisa oku nyua lonjila ya sunguluka ovinyua vi koluisa, pole, eye o nõlapo okuti ka nyui. Eye o lalekiwa oku ka lia konjo yimue kuna a mola vamanji va nyua ovinyua vi koluisa.

Tanga Ukundi 7:16 kuenda Va Roma 14:1, 10, noke konomuisa apulilo a kuãimo:

• Ndomo ca lekisiwa vovinimbu evi, nye manji ulume a pondola oku nõlapo oku linga? Nye ove o nõlapo oku linga nda o mola omunu ukuavo o linga cimue okuti owanji wutima wove u ku kokela ocilondokua?

Ananga api a kuatisa oku nõla olonjila viwa?

1. Pinga ku Yehova oco a ku kuatise oku nõla eci o linga. —Tiago 1:5.

2. Konomuisa Vembimbiliya kuenda valivulu etu oco o sange olonumbi vi kuatisa. Citava oku pingavo ekuatiso Liakristão va loñoloha.

3. Kapako eci o pondola oku kokela kowanji wutima wove kuenda kowanji wutima womanu vakuavo.

NYE WA LILONGISA?

Tu nõla olonjila viwa nda tu kapako ocisimĩlo ca Yehova catiamẽla kocina cimue kuenda eci tu kũlĩhĩsa nda ovilinga vietu vi ka kuatisa vakuetu ale vi va sumuisa.

Oku Pitulula

• Tu nõla ndati olonjila vi sanjuisa Yehova?

• O pindisa ndati owanji wutima wove?

• O lekisa ndati esumbilo kowanji wutima womanu vakuavo?

OCO O KŨLĨHE OVINA VIKUAVO

O pondola oku nõla ndati olonjila vi pamisa ukamba wove la Suku?

“Nõla Olonjila vi Eca Esivayo Ku Suku” (Utala Wondavululi 15 wa Kupupu 2011)

Lilongisa ovina vikuavo vi lekisa ndomo Yehova a tu ĩha alungulo.

Yehova o Songuila Omanu Vaye (9:50)

Tala eci ca kuatisa ulume umue oku nõla onjila yimue ka ya lelukile.

La Yehova Ovina Viosi Viwa vi Tẽlisiwa (5:46)

Lilongisa ovina vikuavo ndomo o sanjuisa Yehova nda eye ka ecele onumbi yimue yi lekisa eci o sukila oku linga.

“Otembo Yosi o Sukila hẽ Onumbi Yimue Yembimbiliya?” (Utala Wondavululi 1 wa Cembanima 2003)