7, 8. Yehova o ka tu sombisa ndati omo liolondaka vietu?

⁷ Esunga liatatu tu sukilila oku likandangiya poku vangula lieli okuti Yehova o ka tu sombisila kolondaka vietu. Olombangulo ka vi nyõli lika ukamba wetu lomanu, vi nyõlavo ukamba wetu la Yehova. Elivulu lia Tiago 1:26, li popia hati: “Nda umue wa soka hati, ndukuetavo, puãi ka kapi olelia kelimi liaye, kuenje o kembisa utima waye, etavo liomunu waco liesanda.”b Ndomo tua ci mola vocipama ca pita, efendelo lietu li kuete elitokeko locituwa cetu coku vangula. Nda tu kuete ocituwa coku popia ovina vi lemeha ño vakuetu​—haivio via soka ndowule wenyenya​—upange wosi tu lingila Suku u kala wolivova. Anga hẽ eci ka cu ku vetiya oku likandangiya?​—Tiago 3:8-10