Yuvula Efendelo Liesanda
“Tundi pokati kavo, litepi lavo. Oco ca popia Ñala [Yehova]. Leci ca vĩha ko ka ci lambi.”—2 VA KORINDO 6:17.
1. Ovina vipi omanu va sukila oku kũlĩha catiamẽla ku Suku?
OMANU valua ka va kũlĩhĩle ocili catiamẽla ku Suku lelavoko liomanu vosi. Omo okuti ka va sangele etambululo kapulilo avo, va kasi latatahãi alua. Omanu valua, va linga apika oviholo kuenda apika ovipito vi sumuisa Suku. Citava okuti omanu vana o lisungue lavo kuenda epata liove, va kolela kalongiso amue ndeci: Ondalu yifelu, Suku umosi Muvatatu, ocilelembia ka ci fi kuenda alongiso akuavo esanda.
2. Ovitunda viatavo esanda via siata oku linga nye? Nye ca siata oku iyilila kovilinga viavo?
2 Helie wa nena owelema wespiritu pokati komanu? Atavo esanda kuenda ovitunda viaco ovio via nena owelema wespiritu voluali. Momo ka va longisa ocili catiamẽla ku Suku. (Marko 7:7, 8) Omanu valua va siata oku kembiwa oco va tave okuti, va kasi oku fendela Suku yocili. Pole, efendelo liavo ka li taviwa la Suku. Etavo liesanda olio lia nena ekalo lĩvi voluali.
3. Helie wa siata oku vetiya etavo liesanda voluali, kuenda wa lomboluiwa ndati Vembimbiliya?
3 Kuli omunu ukuavo wa siata oku vetiya atavo esanda oku nena owelema wespiritu pokati komanu. Catiamẽla kokuaye upostolo Paulu wa popia hati: “O suku yoluali lulo ya tekavisa ovitima [viomanu], okuti ocinyi cokanda yiwa yulamba wa Kristu, haeye ukuesetahalo lia Suku, ka ci va tuila.” (2 Va Korindo 4:4) Satana Eliapu eye “o suku yoluali lulo.” Eye wa siata oku vetiya efendelo liesanda voluali. Upostolo Paulu wa popia hati: “Satana o liluvikiya ndungelo wocinyi. . . . Nda oloñuatisi viaye vi liluvikiya ndoloñuatisi viesunga, ka ci komohisa.” (2 Va Korindo 11:14, 15) Satana wa siata oku lingisa okuti, ovina vĩvi vi molẽha okuti viwa. Kuenje o yapuisa omanu valua poku va vetiya oku tava kovina viaco.
4. Ocihandeleko Yehova a ecele ku va Isareli, ca lomboluile nye catiamẽla kovaprofeto vesanda?
4 Embimbiliya li pisa etavo liesanda. Ocihandeleko ca Mose ca lunguile va Isareli okuti, va sukilile oku yuvula ovaprofeto vesanda. Ocihandeleko ca lekisile okuti, omunu wosi o vetiya elongiso liuhembi kuenda efendelo liolosuku viesanda, o sesamẽla oku fa. Momo o kasi ‘oku longisa oku ñualelapo Yehova.’ Handi vali, va tambuilevo ocihandeleko coku ‘tundisa evĩho pokati kavo.’ (Esinumuĩlo 13:1-5) Ocili okuti, Yehova o nyãle etavo liesanda.—Esekiele 13:3.
5. Koloneke vilo elungulo lipi tu sukila oku pokola?
5 Yesu Kristu lolondonge viaye, va suvukilevo etavo liesanda ndeci Yehova a li suvuka. Eye wa lungula olondonge viaye hati: “Lunguki lovaprofeto vesanda, vana veya kokuene luwalo wolomeme, puãi vokati kavo va linga ovimbungu vi kukulula.” (Mateo 7:15; Marko 13:22, 23) Upostolo Paulu wa lombolola okuti, “onyeño ya Suku yi situluiwa tunde kilu, kuenje yi veta etombo liosi, lakandu osi omanu vana va tateka ocili ca Suku lakandu avo.” (Va Roma 1:18) Akristão vocili va sukila oku pokola kelungulo eli loku yuvula omanu vana va tateka ukũlĩhĩso Wondaka ya Suku.—1 Yoano 4:1.
Tunda ‘Vombavulono Yinene’
6. ‘Obavulono Yinene’ ya lomboluiwa ndati Vembimbiliya?
6 Kũlĩhĩsa ndomo Embimbiliya kelivulu Liesituluilo li lombolola etavo liesanda. Olio lia sokisiwa ndukãi umue ocipuepue okuti, wa kolua haeye o kuete unene lolosoma viokilu lieve kuenda omanu vaco. Ukãi waco wa linga ukahonga lolosoma vialua viokilu lieve loku nyua osonde yomanu va Suku va pondiwa voluali. (Esituluilo 17:1, 2, 6, 18) Eye o kuete onduko ya sonehiwa pupolo waye omo liumbondo waye. Onduko yaco, ‘Bavulono Yinene, ina ya vakahonga lovina viosi vi lingisa onyanya kilu lieve.’—Esituluilo 17:5.
7, 8. Atavo esanda a livĩhisa ndati? Nye ceyilila kevĩho liavo?
7 Onduko yo Bavulono Yinene, ya sunguluka oku yi tiamisila kovisoko viatavo esanda. Ndaño okuti, atavo amue ka a kũlĩhĩwile ndocisoko ci sangiwa voluali luosi, pole vosi yavo va kuete ovituwa vimuamue. Atavo esanda ndomo a lekisiwa kelivulu Liesituluilo, a kuete unene walua lolombiali violuali. Omo lioku kuata ukamba lolombiali viaco, va kasi ndukãi umue ka sumbilile ocisila colohuela. Ndonge Tiago wa popia hati: “A vakahonga, ka wa kũlĩhili okuti ukamba wa livali loluali owo ukuse la Suku? . . . Wosi o yongola oku linga ekamba lioluali o lilingisa unyali wa Suku.”—Tiago 4:4.
8 Ukamba watavo oluali lolombiali viopulitika, wa siata oku nena ovitangi vialua voluali. Ulume umue o tukuiwa hati, Xolela Mangcu, wa siata oku konomuisa ovina viopulitika vo Afrika, wa popia hati: ‘Ovolandu oluali eyuka asapulo alua atiamẽla kolofa viomanu omo liatavo a litenga vopulitika.’ Ukanda umue wasapulo wa lombololavo hati: ‘Olofa kuenda ovitangi vi kasi voluali, via tunda vatavo.’ Ocili okuti, atavo omo lioku kuatisa ovoyaki oluali, va siata oku nena olofa vialua komanu. Obavulono Yinene ya nyua osonde yomanu va Suku omo lioku va lambalala loku va ponda.—Esituluilo 18:24.
9. Elivuli Liesituluilo li lombolola ndati esuvu Yehova a kuetele etavo liesanda?
9 Uvangi wa Yehova woku suvuka etavo liesanda, wa lekisiwa kueci cika pita Lobavulono Yinene. Elivulu Liesituluilo 17:16, li popia hati: “Olombinga ekũi wa mola ovio kumue locinyama caco vi suvuka ocipuepue. Viu lingisa ekundu, viu wendisa epõlõla. Ositu yaye va yi takila kuenje vo yoka londalu.” Catete, ocinyama cinene cika ponda ukãi waco loku lia ositu yaye. Noke olonepa via supapo vika yokiwa londalu. Cimuamue haico olosoma violuali vika linga latavo esanda. Yehova eye oka endisa ovina viaco. (Esituluilo 17:17) Ombavulono Yinene okuti, ocisoko catavo esanda, yi lavoka enyolẽho. Oyo ‘ka yika kalako vali.’—Esituluilo 18:21.
10. Nye tu sukila oku linga letavo liesanda?
10 Akristão vocili va sukila oku linga nye Lobavulono Yinene? Embimbiliya li popia hati: “Amanu vange, tundi vimbo liaco, sanga wu linala lakandu alio, kuenda sanga afengi alio o kuati.” (Esituluilo 18:4) Vosi va yongola oku popeliwa kenyoleho lietavo liesanda, va sukila oku tundamo. Yesu eci a kala palo posi, wa popele okuti, koloneke via sulako omanu valua vaka popia hati, va kasi oku pokola kokuaye. (Mateo 24:3-5) Pole, eye oka popia lomanu vaco hati: “Sia lo kũlĩhi. Nundi, alondingaĩvi.” (Mateo 7:23) Cilo Yesu wa vialekiwa komangu yusoma. Eye onyale etavo liesanda.
Tu Liyelisa Ndati Kefendelo Liesanda?
11. Nye tu sukila oku linga oco tu yuvule efendelo liesanda?
11 Akristão vocili va suvuka efendelo liesanda poku yuvula alongiso atavo esanda. Eci ci lomboloka okuti, tu sukila oku yuvula ovina viosi viatavo vi lekisiwa vo radio, vo televisão kuenda valivulu. Momo va vangula uhembi watiamẽla ku Suku kuenda Kondaka yaye. (Osamo 119:37) Tu sukilavo oku yuvula olomapalo viatavo esanda kuenda ovipito viavo. Ka tu sukila oku eca ekuatiso limue kefendelo liesanda. (1 Va Korindo 10:21) Oku yuvula ovina viaco, ci tu kuatisa oku lunguka okuti, ka tu ‘vĩhisa etavo lietu lovilongua viesanda.’ Ci tu kuatisavo oku yuvula vana ‘va sole oku velisapo ovisila viomanu loviholo violuali, vina ka via tundile ku Kristu.’—Va Kolosai 2:8.
12. Nda omunu o yongola oku siapo etavo liesanda o sukila oku linga nye?
12 Nye omunu a sukila oku linga nda o yongola oku kala Ombangi ya Yehova pole, watiamẽla ketavo liesanda? Eye, o sukila oku soneha ukanda umue wuvangi u lekisa okuti, ka yongola vali oku tiamẽla ketavo liaco. Handi vali, o sukilavo oku kuata utõi woku yuvula ovina viosi viefendelo liesanda. Ovilinga viaye te vi eca uvangi komanu vosi okuti, ka tiamẽlele vali ketavo liaco. Capiãla enene komanu vana vatiamẽla ketavo liaco.
13. Elungulo lipi Liembimbiliya tu sukila oku pokola liatiamẽla kefendelo liesanda?
13 Upostolo Paulu wa popia hati: “Ko ka kutiwili kokanga ka ya lisokele kumosi lava ka va tavele. Momo esunga leci hesungako ci kutiwila ndati pamosi? Utanya u livala ukamba we lowelema? Okulinala kue ku kala pokati ka Kristu la Beliale? Pamue ekuta lie li kasi pokati kukuetavo lu hokuetavoko? Onembele ya Suku yi tava ndati koviteka? . . . Oco, tundi pokati kavo, litepi lavo. Oco ca popia Ñala [Yehova]. Leci ca vĩha ko ka ci lambi.” (2 Va Korindo 6:14-17) Tu pokola lika kelungulo eli, poku yuvula efendelo liesanda. Anga hẽ elungulo lia Paulu li lekisa okuti, tu sukila oku yuvula omanu vatiamẽla ketavo liesanda?
“Kali Lolondunge”
14. Anga hẽ tu sukila oku yuvula omanu vatiamẽla kefendelo liesanda? Ci lombolola.
14 Anga hẽ Akristão vocili va sukila oku yuvula omanu vatiamẽla ketavo liesanda? Citava hẽ okuti, ka tu kala vali lomanu vaco? Sio haicoko. Pokati kovihandeleko vivali via velapo, ocihandeleko cavali ca popia hati: “Sola [vakuene] ndeci o lisole ove muẽle.” (Mateo 22:39) Etu tu lekisa ocisola ku vakuetu, poku va kundila olondaka viwa Viusoma. Ocisola tu va kuetele ci lekisiwavo poku lilongisa lavo Embimbiliya kuenda oku va lomboluila esilivilo lioku yuvula efendelo liesanda.
15. Oku ‘yuvula oku panga onepa yoluali’ ci lomboloka nye?
15 Tu kuete ocikele coku kundila vakuetu olondaka viwa Viusoma. Pole, tu yuvula ‘oku panga onepa yoluali.’ (Yoano 15:19) Ondaka ‘oluali,’ yi lomboloka omanu ka va pokola ku Suku. (Va Efeso 4:17-19; 1 Yoano 5:19) Etu tua litepa loluali omo okuti, tu yuvula ovituwa viavo, lupopi wavo ũvi, kuenda ovilinga vi sumuisa Yehova. (1 Yoano 2:15-17) Tu pokola kelungulo li popia hati: “Akamba vãvi va nyõla ovituwa viwa.” Omo liaco, tu yuvula oku kuata ukamba lomanu vana ka va pokola kolonumbi via Suku. (1 Va Korindo 15:33) Oco tu yuvule oku kuata onepa yoluali, tu sukilavo oku ‘lilava keliño liosi lioluali.’ (Tiago 1:27) Pole, oku litepa loluali, ka ci lomboloka oku yuvula oku vangula lomanu vaco.—Yoano 17:15, 16; 1 Va Korindo 5:9, 10.
16, 17. Akristão vocili va pondola ndati oku kala lomanu vatiamẽla ketavo liesanda?
16 Ndamupi tu pondola oku kala lomanu vana ka va kũlĩhĩle ocili Condaka ya Suku? Upostolo Paulu poku sonehela ekongelo lioko Kolosai, wa popia hati: “Kali lolondunge eci vu kasi la vakualuali. Popeli otembo, ka yi ka peseke ño. Upopi wene u kale lumbombe loku singiwa lomongua, okuti vu kumbulula ciwa omunu [wosi] wo puli cimue.” (Va Kolosai 4:5, 6) Upostolo Petulu wa popiavo hati: “Vovitima viene sumbili Kristu nda Ñala. Olonjanja viosi lipongiyi okuti vu tẽla oku kumbulula komunu wosi o pula oku kũlĩhĩsa elavoko vu kasi lalio. Ci lingi puãi lumbombe kuenda lesumbilo.” (1 Petulu 3:15) Paulu wa lungula Akristão okuti, “ka va ka popie umue cĩvi. Ka va ka linge olonjaki. Vomboke, loku kala lusima pokati komanu vosi.”—Tito 3:2.
17 Etu Tulombangi via Yehova, tu sukila oku yuvula oku kuata epela la vakuetu. Ka tu tukula olonduko vĩvi komanu vatiamẽla ketavo liesanda. Pole, tu lekisa esumbilo kepata lietu, komanu tu lisungue lavo kuenda ava tu talavaya lavo, ndaño okuti ka va tiamẽla ketavo lietu.—Va Kolosai 4:6; 2 Timoteo 2:24.
“Pokola Kolondaka Viocili”
18. Noke yoku kũlĩha ocili Cembimbiliya, nye ci pita lomunu nda o tiukila vali kefendelo liesanda?
18 Noke yoku kũlĩha ocili Cembimbiliya, omunu o sukila oku yuvula oku tiukila kefendelo liesanda. Momo nda ka ci lingile, o kuata ovitangi. Embimbiliya poku lombolola ovitangi viaco li popia hati: “Eci va puluka ale kevĩho lioluali omo va kasi lukũlĩhiso wonjovoli yetu Ñala Yesu Kristu, nda va tangiwa vali lalio kuenje va yuliwa, esulilo liavo li vĩha enene, cina va kaile tete hise. . . . Ci pita lavo ndolusapo luocili okuti, Mbua o tiukila kosanjo yaye. Ngulu wa lisukula kuenje o tiukila kocilivombelo.”—2 Petulu 2:20-22.
19. Momo lie tu sukilila oku lunguka lovina viosi vi nyõla ekalo lietu kespiritu?
19 Tu sukila oku lunguka lovina viosi vi nyõla ekalo lietu kespiritu. Nda ka tua ci lingile, tu kuata ovitangi vialua. Upostolo Paulu wa popia hati: “Espiritu li popia longusu, halatatahãiko liti: Kotembo yesulilo vamue va konyoha ketavo ha va yevelela kaspiritu uhembi lo kovilongua Vieliapu.” (1 Timoteo 4:1) Tu kasi “koloneke via sulako.” Omanu vana ka va yuvula efendelo liesanda, va pondola oku ‘ambatiwa lolofela viosi viokulongisa lokulunguka kuomanu, latutu avo esanda.’—Va Efeso 4:13, 14.
20. Ndamupi tu liteyuila kovituwa vietavo liesanda?
20 Ndamupi tu liteyuila kovituwa viefendelo liesanda? Kũlĩhĩsa ovina Yehova a tu ĩha vioku tu kuatisa. Tu kuete Embimbiliya okuti, Ondaka yaye. (2 Timoteo 3:16, 17) Yehova wa siatavo oku tu ĩha okulia kualua kuespiritu vonduko ‘yukuenje wa kolelua haeye wa lunguka.’ (Mateo 24:45) Osimbu tu amamako kespiritu, tu kuata onjongole yoku lia ‘okulia kua kola ku sesamẽla akulu.’ Tu kuatavo onjongole yoku likongela la vakuetu koku lilongisa olonumbi via Yehova. (Va Heveru 5:13, 14; Osamo 26:8) Omo liaco, tu amamiko okupa esilivilo kaliangiliyo a Yehova. Momo a tu kuatisa ‘oku pokola kolondaka viocili’ tua siata oku yeva. (2 Timoteo 1:13) Tu nõlipo oku yuvula efendelo liesanda.
Ivaluka Eci Tua Lilongisa?
• ‘Obavulono Yinene’ yi lomboloka nye?
• Nye tu sukilila oku linga oco tu yuvule etavo liesanda?
• Ohele yipi tu sukila oku yuvula oco tu teyuile ekalo lietu kespiritu?
[Elitalatu kemẽla 14]
Ove hẽ wa kũlĩha esunga lieci o “Bavulono Yinene” ya sokisiwila ndukãi wocipuepue?
[Elitalatu kemẽla 15]
O “Bavulono Yinene” yi lavoka oku kunduiwa
[Elitalatu kemẽla 17]
Tu sukila oku lekisa ‘umbombe lesumbilo’ komanu vana ka va lilongisa Embimbiliya