Kuama Ongangu Ya Yesu Yoku Fendela Ndomo Suku A Yongola
SUKU o laleka omanu vo ‘kolofeka viosi vakuapata osi, kuenda vakualimi osi’ oco vo fendele. (Esit. 7:9, 10; 15:3, 4) Vana va tava kelaleko liaco, va pondola oku “tala unumbu wa Yehova.” (Osa. 27:4; 90:17) Ovo va sivaya Suku, ndeci ukualosamo a linga poku popia hati: “Tu kekameli kovaso a Yehova, [ululiki] wetu.”—Osa. 95:6.
Efendelo li Taviwa la Yehova
Omo okuti Yesu eye Omõla wongunga wa Suku, wa kuata epuluvi lioku lilongisa ovisimĩlo via Isiaye, kuenda olonumbi viaye. Omo liaco, Yesu eye lika wa tẽla oku lekisa onjila yocili yoku fendela Yehova. Eye wa popia hati: “Ame ndinjila, haime ndicili, haime ndimuenyo. Lomue iya ku Isia, te lame.”—Yoa. 1:14; 14:6.
Yesu wa lekisa ongangu yiwa yoku pokola ku Isiaye. Eye wa popia hati: “Si lingi cimue locipango cange, puãi mopia ovina evi ndomo Isia a ndongisa.” Noke wamisako hati: “Ndingainga ño-o ovina viu sanjuisa.” (Yoa. 8:28, 29) Yesu wa sanjuisa ndati Isiaye?
Yesu wa li tumbikile koku tẽlisa ocipango ca Isiaye, momo oco ca velapo koku fendela Suku. Yesu wa kuata ukamba wocili la Isiaye poku lekisa epokolo Kokuaye, kuenda oku tẽlisa ocipango Caye, ndaño ka ca lelukile oku ci linga. (Va Fil. 2:7, 8) Omo okuti Yesu wa velisilepo upange woku kunda, omanu va enda oku u tukula hati, Ulongisi, ci kale vakuetavo ale vana okuti havakuetavoko. (Mat. 22:23, 24; Yoa. 3:2) Yesu wa pesela otembo yalua koku kuatisa omanu. Ndaño ka kuatele otembo yoku tẽlisa olonjongole viaye, pole wa sanjukilile oku kuatisa vakuavo. (Mat. 14:13, 14; 20:28) Ndaño Yesu wa kuata upange walua, pole ka wo tatekele oku linga olohutililo ku Isiaye. (Luka 6:12) Efendelo lia Yesu lia sanjuisa Suku!
Fendela Suku Lonjila yu Sanjuisa
Yehova wa sanjukila ovituwa Omõlaye a lekisa. (Mat. 17:5) Satana Eliapu wa limbuka ekolelo lia Yesu. Noke wa fetika oku u lambalala. Momo lie? Momo ka kua kaile omunu wa lekisa epokolo lia suapo koku fendela Suku ndeci Yesu a linga. Kuenje, Eliapu lia seteka oku tateka Yesu oku fendela Yehova.—Esit. 4:11.
Satana wa seteka oku yapuisa Yesu poku eca kokuaye ombanjaile yimue. Eye wa tuala Yesu ‘komunda ya lepa ca lua, kuenje wo lekisa ovosoma osi okilu lieve lulamba waco.’ Noke wa popia hati: “Huĩha ovina evi viosi nda o wila posi hu fendela.” Yesu wa tambulula ndati? Eye wa popia hati: “A Satana, tundapo, momo ca sonehiwa citi, ‘Fendela Yehova Suku yove, eye lika o vumba.’” (Mat. 4:8-10) Yesu ka tavele kolondaka via Satana, momo wa kũlĩhĩle okuti, oku ci linga ci lomboloka oku u fendela. Eye ka yonguile oku eca efendelo li sesamẽla Yehova.
Koloneke vilo, Satana ka tu ĩha vali ovosoma oluali kuenda ulamba waco oco tu u fendele. Pole, wa siata oku tateka Akristão oku fendela Suku. Eliapu li yongola okuti, tu fendela omunu umue ale ocina cikuavo.—2 Va Kor. 4:4.
Kristu Yesu wa lekisa ekolelo toke kolofa. Poku amamako oku kolela Suku, Yesu wa sivaya Yehova okuti lomue omunu wa ci linga. Koloneke vilo, etu Tuakristão tu sukila oku kuama ongangu ya Yesu yoku lekisa ekolelo poku pitisa kovaso oku fendela Ululiki wetu. Ukamba wetu la Suku oco oyo ombanjaile ya velapo tu kuete.
Onima yi Tunda Koku Fendela Lonjila ya Sunguluka
Oku pitisa kovaso “etavo liocili, hailio lia pua evĩho,” ci nena asumũlũho alua. (Tia. 1:27) Koloneke vilo, tua siata oku mõla omanu ‘vakuakulisola ovo muẽle, vakuakusola olombongo, vakuakulipandiya kuenda ka va sole eci ciwa.’ (2 Tim. 3:1-5) Etu tuafendeli va Suku, tu kuete esumũlũho lioku kala pokati komanu va sunguluka okuti va likolisilako oku pokola kolonumbi via Suku viatiamẽla koku u fendela. Eci hẽ ka ci tu lembeleka?
Oku yuvula evĩho lioluali lulo, ci tu kuatisa oku kuata utima wa sunguluka. Tu yongola oku amamako oku kapako olonumbi via Suku vioku pokola ku Kaisare.—Mar. 12:17; Ovil. 5:27-29.
Oku fendela Suku lutima wosi ci nena asumũlũho akuavo. Nda tua pitisa kovaso ocipango Caye, tu kuata esanju komuenyo. Omo okuti tu lavoka oku kuata omuenyo ko pui voluali luokaliye palo posi, tu yuvuli ocisimĩlo coku popia hati: “Tu li, tu nyui, momo hẽla tu fa.”—1 Va Kor. 15:32.
Elivulu Liesituluilo li lekisa okuti, vana va kuete ekalo liwa kovaso a Yehova, vaka puluka “kohali ya piãla.” Ulandu waco u lekisavo okuti, ‘U wa tumala kocalo o linga ombindikiyo yavo.’ (Esit. 7:13-15) Momo Yehova Suku wa tumãla kocalo caco, Eye wa velapo voluali luosi. Sokolola esanju oka kuata eci aka ku teyuila okuti, lacimue cika ku lingisa usumba! Osimbu otembo yaco kayeyile, tu pondola oku kuata esanju cilo, momo eye o tu tata.
Vosi va fendela Suku ndomo a yongola, eye “o va songuila kolono viovava omuenyo.” Olono viaco, vi lomboloka aliangiliyo Yehova a siata oku linga oco tu kuate omuenyo ko pui. Omo liocisembi ca Kristu, Suku oka “puenya asuelela osi kovaso avo.” (Esit. 7:17) Omanu vosi vaka lipua, kuenda vaka kuata esanju lioku kala otembo ka yi pui voluali luokaliye palo posi. Afendeli va Yehova Suku, va kasi oku eca olopandu kokuaye poku imba lovangelo ocisungo cesivayo, hati: “A Yehova Suku Tõlo, ovilinga viove vinene, kuenda vi komohisa cimue. A Soma yolofeka, olonjila viove via suñama kuenda viocili. A Yehova, u ka tava oku ku sumbila loku tumbangiya onduko yove, helie? Momo ove lika o kola. Olofeka viosi viya, vi ku fendela, momo okutetulula kuove kua moleha.”—Esit. 15:3, 4.
[Elitalatu kemẽla 27]
Ovina vipi Satana a siata oku tu yonja lavio oco tu u fendele?