Kuata Ukamba la Suku
Ululiki Una o Sesamẽla Esivayo Lietu
ANGA wa li pulile ale esunga lieci ‘Tu kasilili komuenyo?’ Vana va tava okuti omuenyo wa tukuluka ño, ka va tẽla oku sanga etambululo liaco. Pole, eci hacoko ci pita la vana va tava okuti Yehova Suku eye Ono yomuenyo. (Osamo 36:9) Ovo va kũlĩha okuti Suku wa tu lulika locipango cimue. Ocipango caco ca lomboluiwa kelivulu Liesituluilo 4:11. Tu konomuisi olondaka viaco, via sonehiwa lupostolo Yoano, okuti vi lekisa esunga lieci tu kasilili komuenyo.
Yoano wa mola ovangelo kilu va kala oku sivaya Suku hati: “Wa posokela oku muisua ulamba lesumbilo lunene. Momo ove wa sovola ovina viosi. Vi kasilili ocipango cove, haico via lulikiwa laco.” Yehova eye lika o posokela ulamba. Momo lie? Momo eye “wa sovola ovina viosi.” Eci ci vetiya oviluvo viaye oku linga nye?
Yehova o “posokela” oku muisua ulamba lesumbilo kuenda unene. Ocili okuti, Yehova o sesamẽla ulamba esivayo lunene, momo Eye lika wa velapo koluali luosi. Omanu valua, ka va tava okuti Yehova eye Usovoli wetu. Pole vamue va sumbila Suku omo va letele “unu waye, una ko muiwa muiwa lovaso,” kovina a lulika. (Va Roma 1:20) Lesanju lialua va vetiyiwa oku eca ku Yehova esivayo kuenda ulamba. Ovo va sapuila omanu okuti Yehova eye ululiki wovina viosi, haeye lika o sesamẽla efendelo lietu.—Osamo 19:1, 2; 139:14.
Anga hẽ unene Yehova a kuete u tunda kafendeli vaye? Ocili okuti ka kuli ociluvo ci pondola oku eca unene Kululiki ukuonenewosi. (Isaya 40:25, 26) Omo okuti tua lulikiwa lesetahãlo lia Suku tu kuete ovituwa viaye, ndeci unene. (Efetikilo 1:27) Nda tu sanjukila ovina Ululiki wetu a siata oku tu lingila, tuka vetiyiwa oku talavaya longusu kuenda olohõlo vietu poku eca esivayo kokuaye. Oku yuvula oku tẽlisa olonjongole vietu muẽle, ci tu kuatisa oku limbuka okuti Yehova Suku, eye lika o sesamẽla oku u vumba longusu yetu yosi.—Marko 12:30.
Momo lie tu kasilili komuenyo? Onepa ya sulako yeluvulu Liesituluilo 4:11, yi popia ndoco: “Ove wa sovola ovina viosi. Vi kasilili ocipango cove, haico via lulikiwa laco.” Ka tua li lulikile etu muẽle. Tu kasi komuenyo locipango ca Suku. Omo liaco, oku pitisa lika kovaso olonjongole vietu, ka ci silivila. Oco tu kuate ombembua kuenda esanju liocili tu sukila oku kũlĩha ocipango ca Suku kuenda oku linga ovina vi litava locipango caco. Nda tua ci linga tuka limbuka esunga lieci tu kasilili komuenyo.—Osamo 40:8.
[Ono Yelitalatu kemẽla 27]
NASA, ESA, and A. Nota (STScI)