Anga hẽ Yesu Eye Suku Tõlo?
Omanu vamue va tambulula ndoco:
▪ “Oco muẽle. Yesu eye Suku Tõlo.”
▪ “Yesu eye Suku wa li situluila vetimba liositu.”
Nye Yesu a popia?
▪ “Nda wa soleli, nda wa sanjukili omo ngenda ku Isia, momo Isia wa mbelapo, ame ndi sule.” (Yoano 14:28) Yesu wa kũlĩhĩle okuti eye la Isiaye ka va li sokele.
▪ “Ndonda ku Tate kuenda ku Isiene, ndonda ku Suku yange kuenda ku Suku yene.” (Yoano 20:17) Yesu ka li tukuile eye muẽle nda Suku, pole wa lekisa okuti Suku Omunu umue wa litepa laye.
▪ “Sia popele ño ocipango cange, Isia wa numa eye wa ñundika eci mopia leci mbangula.” (Yoano 12:49) Yesu ka longisile ovina viaye muẽle, te evi via tunda ku Isia.
YESU wa popia hati Ndimõla a Suku, ka popele okuti Ndi Suku Tõlo. Nda okuti Yesu wa kaile Suku, kulie eye a enda oku likutilila eci a kala palo posi? (Mateo 14:23; 26:26-29) Ocili okuti Yesu nda ka vanguile vali lomunu ukuavo!
Eci olondonge vivali via Yesu via pinga kokuaye oco va tambule omangu ya velapo Vusoma waye, eye wa tambulula hati: “Oku tumala kondio yange lo kepĩli liange hacangeko oku ceca, puãi, cava ca va angiliyiwila la Tate.” (Mateo 20:23) Anga hẽ eci Yesu a popia olondaka evi, wa va kemba okuti ka kuatele omoko yoku tẽlisa epingilo liavo? Lakamue! Eye wa limbuka lumbombe okuti Suku eye lika o kuete omoko yoku ci linga. Yesu wa lombolola hati kuli ovina vimue okuti ndaño eye pamue ovangelo ka va vi kũlĩhĩle, te lika Isiaye.—Marko 13:32.
Anga hẽ Suku wa velelepo lika Yesu, eci a kala palo posi ndomunu? Sio. Noke liepinduko liaye, Embimbiliya li lekisa okuti Yesu wamamako oku pokola ku Suku. Upostolo Paulu wa popia hati, “Suku wa velapo Kristu o sule.” (1 Va Korindo 11:3, Today’s English Version) Embimbiliya li popia okuti kotembo yi laika oku iya “eci ovina viosi vi pokuisua kuviali wa Kristu, oco Omõlaco layevo, o pokola ku Suku, una wa pokuisa ovina viosi kokuaye, kuenda Suku oka viala ovina viosi.”—1 Va Korindo 15:28,TEV.
Ocili okuti, Yesu hayeko Suku Tõlo. Eli olio esunga lieci a popela hati, “Suku yange.”—Esituluilo 3:2, 12; 2 Va Korindo 1:3, 4.a
[Atosi pombuelo yamẽla]
a Oco o sange alomboluilo akuavo atiamẽla kondaka eyi, tanga elivulu Embimbiliya Li Longisa Nye? kamẽla 201-204, lia sandekiwa Lolombangi Via Yehova.
[Etosi Liavelapo kemẽla 7]
Yesu wa popia hati kuli ovina vimue okuti ndaño eye pamue ovangelo ka va vi kũlĩhĩle, te lika Isiaye