“Noke yoku liyaka loku vela calua, ukãi wange Sophiaa wa fa. Tunde eci tua kuela pa pitile ale 39 kanyamo. Akamba vange va ndi kuatisa calua kuenda olonjanja viosi va enda oku nyĩha cimue coku linga. Pole, vokuenda kunyamo umosi nda liyeva ndu okuti ovina viosi via nyõleha. Olonjanja vimue nda kala ciwa, pole, olonjanja vikuavo sio. Ekalo liange lia enda oku pongoloka vocipikipiki. Toke cilo okuti pa pita ale anyamo atatu, vocipikipiki ndi kuata esumuo lialua kuenda esumuo liaco, li kala vokuenda kuotembo yimue.”—Kostas.

Anga hẽ wa fisa ngandiove? Nda oco pamue o kuete elomboloko konjila ndomo Kostas a liyeva. Ka kuli ocina cikuavo ci nena esumuo lialua okuti olofa via umue ngandiove ndeci, ulume ale ukãi, epata ale ekamba limue ci sule. Olonoño vi kũlĩhĩsa evalo liomunu umue wa fisa, vi tava kondaka yaco. O revista yimue yoko Estadus Unidus, ya popia okuti olofa oco ocitangi ca velapo okuti, ci kala otembo ka yi pui. Poku liyaka locitangi cimue coku fisa, omunu pamue o lipula ndoco: ‘Toke otembo yipi evalo liaco li kala? Anga hẽ eteke limue ndi ka kuata vali esanju? Nye ndi pondola oku linga oco ndi tepulule evalo?’

Apulilo a-a, a ka tambuluiwa vovipama Viomasuli! yilo. O kasi hẽ oku tala ohali omo lioku fisa ngandiove? Ocipama ci kuãimo, ci ka lekisa ndomo omanu valua va fisa va siata oku liyeva lovitangi va liyaka lavio. Ovipama vikuavo, vi ka eca olonumbi viovina o pondola oku linga oco o tepulule evalo.

Tu lavoka okuti, o revista yilo yi pondola oku lembeleka loku kuatisa vosi vana va kasi oku liyaka locitangi caco ka ca lelukile.

Ndaño olondotolo vimue vi popia okuti omunu umue wa fisa, noke yotembo yimue o yeva ekavuluko, pole, omunu lomunu o kuete onjila yaye yoku liyaka levalo liaco. Nda omanu vavali va liyaka levalo liaco lonjila ya litepa, anga hẽ ci lomboloka okuti omunu umue o tala vali ohali yalua kuenda omunu ukuavo ka yongola oku lekisa esumuo liaye? Ocili okuti sio. Oku tava ekalo loku situlula esumuo, ci pondola oku kuatisa calua. Pole, “ka kuli lika yimosi” ya sunguluka yoku liyaka lesumuo. Ovina viaco, via tamba komunu lomunu, ovituwa viaye, ovina a li pita lavio komuenyo kuenda omunu eye a fisa.

ANGA HẼ EVALO LIACO LI KA LIVOKIYA?

Omunu wa fisa ngandiaye, pamue ka kũlĩhĩle ovina vi ka li pita laye kovaso yoloneke. Pole, ovisimĩlo vimue kuenda ovitangi via siata oku molẽha vapuluvi aco. Tala ovolandu amue ovina a pondola oku li pita.

Ovitangi poku liyaka lesumuo. Ca sunguluka oku lila calua loku kuata ovisimĩlo via litepa viesumuo, omo liongeva yomunu wa fa. Esumuo liaco, li pondola oku livokiya eci o sokolola ovina a solaile ale, ceci olonjoi vi molẽha ndu okuti o kasi laye. Pole, pamue kefetikilo ku tava kovina via li pita. Kũlĩhĩsa ulandu wa Tina. Ulume waye okuti Timo, wa fa vocipikipiki. Tina wa popia hati: “Kefetikilo sia kũlĩhĩle eci ndi popia. Sia tẽlele ndaño muẽle oku lila. Nda sumuile calua okuti olonjanja vimue, sia endaile oku fuima ciwa. Sia tavele kovina via kala oku li pita.”

Ovitangi vi tunda kesakalalo, konyeño kuenda koku li vetela evelo. Ivan wa popia hati: “Omõletu Eric wa fa eci a kuata 24 kanyamo noke tua kuata onyeño yalua! Eci ca li pita vocipikipiki, momo ame lukãi wange Yolanda, ka tua endaile oku kuata onyeño! Tua li vetelavo evelo loku sima okuti, nda tua sukilile oku linga ovina vikuavo oco tu kuatise omõletu.” Alejandro, wa livetelavo evelo eci ukãi waye a fa noke lioku liyaka luvei vokuenda kuotembo yalua. Eye wa popia hati: “Kefetikilo nda simĩle okuti, Suku eye wa kala oku ecelela ovina viaco omo okuti, nda kala omunu umue uvĩ. Pole, noke nda kuata esumuo momo ca kala ndu okuti nda kala oku lundila Suku omo liovina via li pita.” Kostas wa tukuiwa vocipama ca pita, wa lombolola hati: “Olonjanja vimue nda enda oku kuatela onyeño ukãi wange Sophia, omo okuti wa fa. Noke nda liyeva okuti ame ñuete eko, omo lioku kuata onyeño. Nda limbuka okuti, hayeko wa kuata eko.”

Ovisimĩlo ka via suilepo. Vapuluvi amue, omunu wa fisa pamue o kuata ovisimĩlo vimue ka via sungulukile. Ndeci, poku sokolola pamue eye o tava okuti o yevite, ale o lete omunu wa fa. Ale ci tila kokuaye oku tula utima kuenda oku ivaluka ovina. Tina o lombolola ndoco: “Olonjanja vimue nda enda oku sapela, pole, ovisimĩlo viange via kala kupãla! Nda enda oku sakalala calua, poku sokolola ovina viosi via li pita eci Timo a fa. Oku kala okuti si tẽla oku tula utima, ca enda oku ndi kokela esumuo lialua.”

Onjongole yoku kala ulika. Omunu wa fisa, pamue o kuata onyeño yalua ale, ka liyevi ciwa pokati komanu vakuavo. Tala eci Kostas a popia hati: “Eci nda enda oku kala lakamba vamue olohueli, nda enda oku liyeva ndombisi ya tunda vovava. Pole nda kuatavo ovisimĩlo vimuamue eci nda enda oku kala lakamba ka va kuelele.” Yolanda ukãi wa Ivan ivaluka ndoco: “Ka ca lelukile oku kala lomanu va vangula catiamẽla kovitangi viavo momo, ca kala ndu okuti ovitangi viavo vitito calua oku vi sokisa levi vietu! Ka ca lelukilevo oku yeva ndomo olonjali vimue via enda oku sapela lomãla vavo ndomo va kala oku li tunda ciwa. Poku va yeva nda sanjukile, pole, ca lelukile. Ame lulume wange tua kũlĩhĩle okuti, omunu lomunu wa kala oku vangula lika catiamẽla komuenyo waye. Pole, ka tua kuatele ombili ndaño muẽle epandi oco tu liyake lovina viaco.”

Ovitangi vioku vela. Epongoloko konjongole yokulia, oku kopa kuenda ekambo liotulo, via siata calua. Aaron ivaluka ndomo eye a kala noke liunyamo umosi tunde eci isiaye a fa poku popia hati: “Sia tẽlele oku pekela. Kovoteke osi nda enda oku pasuka velivala limuamue oku sokolola olofa via isiange.”

Alejandro ndaño okuti ka kuatele esunga limue, wa fetika oku vela, eye hati: “Ndotolo wa ndi kũlĩhĩsa olonjanja vialua kuenda wa ndi sapuila okuti si vela. Kuenje nda limbuka okuti nda kala oku liyeva ndoco omo okuti, nda fisa ukãi wange.” Noke liotembo yimue, evalo liaco lia pita.” Ndaño ndoco, Alejandro wa linga ciwa poku sandiliya ondotolo yimue. Evalo lioku fisa ngandietu, li koka okuti omunu ka kuata ndomo a li teyuila kovovei, uvei a kuete u livokiya, ale oku koka uvei ukuavo.

Ekambo lionjongole yoku linga ovopange a kuete esilivilo. Ivan wa popia hati: “Noke liolofa via Eric tua sukilile oku sapuilako epata lietu kuenda omanu vakuavo ndeci, cime cupange eye a talavaya kuenda muẽle anjo muna a kala. Handi vali, tua sukililevo oku soneha ovicapa vialua. Tua sukililevo oku sokiya ovina Eric a kuata. Oku linga ovina viosi evi, tua sukilile oku tula utima. Pole, ka ca lelukile omo okuti, tua kavele ketimba kuenda kovisimĩlo.”

Omanu vamue va sima okuti ovitangi viya noke. Kokuavo ka ca lelukile oku linga ovopange a enda oku lingiwa la ngandiavo wa fa. Eci oco ca li pita la Tina. Eye wa lombolola ndoco: “Timo eye wa enda oku tu kuatisa kovina viatiamẽla kombango kuenda ovina vikuavo mua kongelele olombongo. Kaliye ocikele caco ca linga cange kuenda esakalalo lia li vokiya. Nda enda oku sokolola nda ndi ka tẽla muẽle oku linga ovina viaco okuti si vi nyõli.”

Ekavo liaco lio ketimba kuenda kovisimĩlo, vi pondola oku lingisa okuti omunu wa fisa o kuata usumba. Ocili okuti evalo lioku fisa ngandietu tu sole, li pondola oku tu kokela evalo lialua. Pole, oku kũlĩha ovitangi viaco osimbu kua fisile, ci pondola oku kuatisa omunu umue o kasi oku li pita locitangi caco. Ca sunguluka oku ivaluka okuti havosiko va siata oku li pita lovitangi viosi via tukuiwa ndeti. Handi vali, vana va fisa va pondola oku lembelekiwa poku kũlĩha okuti, ovisimĩlo viavo ka vĩviko.

ANGA HẼ ETEKE LIMUE NDI KA KUATA VALI ESANJU?

Ovina o pondola oku lavoka: Esumuo liaco lialua, ka li tumãla otembo ka yi pui. Eci ka ci lomboloka okuti ku ka “yeva vali esumuo,” ale ku ka sokolola vali omunu wa fa. Pole, vokuenda kuotembo “ci ka leluka” oku liyaka levalo liaco. Citava okuti, evalo liaco li tiuka omo lioku ivaluka ovina vimue ale, oloneke vi likasi. Ndaño lovina viaco, noke liotembo yimue, omanu valua va tẽla oku yula esumuo liaco loku tiamisila vali utima kovopange eteke leteke. Ovina viaco, vi li pita ca piãla enene eci va tambula ekuatiso liepata kuenda liakamba loku linga ovina vi va kuatisa oku liyaka levalo liaco.

Evalo liaco li kala toke otembo yipi? Komanu vamue, evalo lioku fisa li tepuluka noke yolosãi vimue. Pole, ku vamue li tepuluka lika noke liunyamo umosi ale avali. Omanu vakuavo va sukila otembo yalua.a Alejandro wa popia hati: “Nda yeva evalo lialua vokuenda kuanyamo atatu.”

Kuata epandi love muẽle. Yuvula oku lisakalaisa lovina via hẽla. Sumbila ekalo liove kuenda ivaluka okuti, esumuo ka li kala otembo ka yi pui. Anga hẽ o pondola oku tepulula evalo liove cilo oco ku ka tale ohali yalua?

Kuli olonumbi vialua viatiamẽla konjila ndomo tu liyaka lesumuo lioku fisa ngandietu. Vimue vi kuatisa vali okuti vikuavo ci sule. Ovina viaco, pamue vi lipita omo okuti ndomo tua kũlĩhĩsa ale, omunu lomunu o liyaka lesumuo lonjila yimue ya li tepa. Omo liaco, ovina vi kuatisa munu umue, pamue ka vi kuatisa omunu ukuavo.

Pole, alungulo amue a kuatisa ale omanu valua. Alungulo aco olonjanja vialua a eciwa lolonoño havio vi tu ivaluisa ocili kuenda alongiso tu sanga velivulu limue liosimbu liolondunge okuti, Embimbiliya.

1: TAVA EKUATISO LI TUNDA KEPATA KUENDA KAKAMBA

• 

  Olonoño vimue vi sima okuti onumbi eyi, oyo ya velapo pokati kolonumbi vi kuatisa oku liyaka lesumuo lioku fisa ngandietu. Pole, olonjanja vimue o nõlapo oku kala lika liove kuenda pamue o kuatela onyeño vana va kasi oku seteka oku ku kuatisa. Ka cĩviko oku liyeva ndoco.

• Ku ka kisikiwe oku kala olonjanja viosi ocipepi lomanu, pole, ku ka liamũhe lavo. Citava okuti noke, o ka sukila ekuatiso liavo. Lomboluila komanu ovina o sukila levi ku sukila pole, lekisa ocikembe poku ci linga.

• Omo liekalo o sangiwa, lekisa esunguluko poku nõla otembo o kala lika liove kuenda otembo o kala lomanu vakuavo.

ONUMBI YEMBIMBILIYA: “Vavali va velapo okuti umosi o sule . . . Momo nda umue pokati kavo o kupuka, ukuavo o pondola oku u kuatisa oku katuka.”—Ukundi 4:9, 10.

2: Lia Ciwa Kuenda Pindisa Etimba Liove

• Oku lia lonjila ya sunguluka, ci ka ku kuatisa oku liyaka lesakalalo lioku fisa. Kovina olia kongelamo apako, amẽla kuenda ovina ka vi kuete ulela walua.

• Nyua ovava alua kuenda ovinyua vikuavo vi eca uhayele.

• Nda ku kuete ombili yoku lia, lia ovina vitito olonjanja vialua veteke. O pondolavo oku pinga ku ndotolo yove olonumbi viatiamẽla kokulia.a

• Oku enda lonjanga kuenda olonjila vikuavo vioku pindisa etimba, vi pondola oku tepulula ovisimĩlo ka via sungulukile. Oku pindisa etimba ci pondola oku ku ĩha epuluvi lioku sokolola kovina via pita, ale oku liwekapo oku sokolola vokuenda kuotembo yimue.

ONUMBI YEMBIMBILIYA: “Lomue omunu wa suvukile etimba liaye muẽle, pole, o li tekula loku li tata.”—Va Efeso 5:29.

3: SANDA OKU PEKELA OTEMBO YA SOKIYIWA

• 

  Oku pekela ku kuete esilivilo komanu vosi capiãla enene ku vana va fisa. Esunga limue lieli liokuti, esumuo li koka okuti omunu o kava calua.

• Kuata utate loku nyua o kafe kuenda ovinyua vi koluisa momo, vi pondola oku nyõla otulo tuove.

ONUMBI YEMBIMBILIYA: “Epupu limosi liepuyuko lia velapo okuti, apupu avali wupange walua a sule kuenda oku lupukila konyima yofela.”—Ukundi 4:6.

4: LIMBUKA ECI CI PONDOLA OKU KU KUATISA

• 

  Omunu lomunu o kuete onjila ya litepa yoku liyaka lesumuo. Kuenje, o sukila oku nõla ovina vi ku kuatisa oku yula ocitangi cove.

• Omanu valua va liyeva ciwa eci va sapuilako esumuo liavo komanu vakuavo. Pole, vakuavo va nõlapo okuti ka va sapela lomunu umue. Olonoño vi kuete ovisimĩlo vialua via li tepa viatiamẽla kesilivilo lioku sapuilako omunu umue evalo lioku fisa ngandietu. Nda ove o sukila oku sapela lomunu umue catiamẽla kovisimĩlo viove pole, o kuete osõi yoku ci linga, fetika poku sapela kamue kamue lekamba limue.

• Vamue va limbuka okuti, oku lila onjila yimue yiwa yoku liyaka lesumuo. Pole ci molẽha okuti, omanu vakuavo ndaño okuti ka va lilile calua, va tẽla oku liyaka levalo liaco.

ONUMBI YEMBIMBILIYA: “Utima u kũlĩha okuvala kuawo muẽle.”—Olosapo 14:10, Embimbiliya li Kola.

5: YUVULA OVITUWA VI KOKA OVITANGI

• 

  Omanu valua oco va tepulule evalo lioku fisa ngandiavo, va fetika oku nyua calua ovinyua vi koluisa, ovihemba ale olodroga. Pole, “oku ci linga” ci koka lika ovitangi. Ndaño okuti esumuo liaco li tepuluka, pole, ka ci kala otembo yalua kuenda ci pondola oku nena ovitangi. Ca sunguluka oku liyaka lasakalalo lonjila yimue yi nena uhayele.

ONUMBI YEMBIMBILIYA: “Tu liyelisi kevĩho liosi.”—2 Va Korindo 7:1.

6: LEKISA ESUNGULUKO

• Tava okuti o ka kuata apuluvi esumuo, pole, sanda otembo yoku linga ovina vi tepulula evalo. Valua va limbuka esilivilo lioku linga ovina viaco.

• Oku kala lakamba, oku linga akamba vokaliye, oku lilongisa ovina viokaliye, ale o ku papalapo kamue, ci pondola oku ku kuatisa oku liyeva ciwa.

• Vokuenda kuotembo ekalo li pondola oku pongoloka. Pamue o limbuka okuti apuluvi ana okuti o liyeva ciwa a livokiya kuenda a kala otembo yalua okuti apuluvi esumuo ci sule. Eci ci panga onepa koku tepuluka kuevalo.

ONUMBI YEMBIMBILIYA: “Kuli otembo ya sokiyiwa oco ku tẽlisiwe ovina viosi, . . . otembo yoku lila kuenda otembo yoku yola;otembo yoku lisiõsiõla kuenda otembo yoku piluka.”—Ukundi 3:1, 4.

7: SOKIYA CIWA OTEMBO YOVE

• 

  Eci otembo yecelela, fetika vali oku linga ovina wa enda oku linga.

• Sanda oku pekela olowola via sokiyiwa loku sokiya otembo mu kongela oku linga ovopange lovina vikuavo. Eci ci pondola oku ku kuatisa oku limbuka okuti, ovina vi kasi oku kala ndomo via kala ale.

• Oku seteka oku linga ovopange ana a ku kuatisa oku liyeva ciwa, ci pondola oku ku kuatisa oku tepulula evalo.

ONUMBI YEMBIMBILIYA: “Eye ka ka sokolola calua koloneke viomuenyo waye vi kasi oku pita, momo Suku yocili amamako oku u wĩha esanju vutima waye.”—Ukundi 5:20.

8: YUVULA OKU NÕLA LONJANGA OLONJILA VI KUETE ESILIVILO

• Omanu valua va nõla lonjanga olonjila vi kuete esilivilo, noke yoku fisa ngandiavo va livela.

• Nda citava, kevelela otembo yimue osimbu kua nõlelepo oku iluka, oku sanda upange ukuavo, ale ceci o linga lovina viomunu wa fa.

ONUMBI YEMBIMBILIYA: “Asokiyo omunu ukuambili, a nena muẽle onima yiwa, pole, vosi vakuanjanga va ka kala olohukũi.”—Olosapo 21:5.

9: SOKOLOLA NGANDIOVE WA FA

• 

  Omanu valua va limbuka okuti, ciwa oku linga ovina vi va kuatisa oku sokolola ngandiavo wa fa.

• Ocina cimue ci pondola oku ku kuatisa oku li yeva ciwa, oku soneha ovina via pita kuenda ovolandu ana ku yongola oku ivalako. Ale pamue, o pondola oku pongolola alitalatu ale ovina vikuavo vioku ivaluka.

• Seleka ovina vi nena onjivaluko yiwa. Kuenje eci o liyeva ciwa, o pondola oku pita otembo oku vanja kovina viaco.

ONUMBI YEMBIMBILIYA: “Ivaluka oloneke vio kosimbu.”—Esinumuĩlo 32:7.

10: UPA OTEMBO YEPUYUKO

• Sokolola oku upa otembo yimue yepuyuko.

• Nda ka citava oku upa otembo yalua yepuyuko citava okuti, o linga ocina cimue o sole vokuenda kueteke limosi ale vivali ndeci, oku nũala nũala lakamba, oku nyũla ocitumãlo cimue ca posoka, oku kũlĩha ovitumãlo viokaliye, ale oku ka tala okalunga.

• Oku linga ocina cimue ca litepa, ndaño okuti votembo yimue yitito, ci ka ku kuatisa oku liyaka levalo.

ONUMBI YEMBIMBILIYA: “Enjui, tuendi pocitumãlo cimue culika oco tu puyukipo kamue.”—Marko 6:31.

11: KUATISA OMANU VAKUAVO

• 

  Eci o sanda otembo yoku kuatisa omanu vakuavo, ci kala ndu okuti o kasi oku likuatisa ove muẽle.

• O pondola oku ci linga poku fetikila oku kuatisa omanu vana va kasivo oku tala ohali omo lia ngandiove wa fa. Ndeci, citava okuti akamba vove kuenda epata, pamue va sukila oku sapela lomunu umue o kuete elomboloko liovina va kasi oku pita kuenda eci va yevite.

• Oku kuatisa loku lembeleka omanu vakuavo, ci pondola oku ku kuatisa oku kuata vali esanju kuenda oku liyeva okuti o kuete esilivilo okuti, ovio ovina o sukila.

ONUMBI YEMBIMBILIYA: “Esanju li tunda koku eca olio lia velapo, li tunda koku tambula li sule.”—Ovilinga 20:35.

12: KŨLĨHĨSA OVINA VIA VELAPO

• Olofa via umue ngandiove, vi pondola oku ku kuatisa oku limbuka ovina via velapo komuenyo wove.

• Talavaya lekalo liaco, oco o sokolole ndomo o kasi oku ambata omuenyo wove.

• Nda ci sukiliwa, linga apongoloko oco o tiamisile utima kovina via velapo.

ONUMBI YEMBIMBILIYA: “Ca velapo oku enda konjo yonambi okuti, konjo yocipito ci sule, momo olofa esulilo liomanu vosi kuenda ava va kasi lomuenyo va ci kape kutima.”—Ukundi 7:2.

Ocili okuti, lacimue o pondola oku linga okuti ci malako evalo o yevite. Pole, omanu valua okuti va fisa ngandiavo kuenda va kuama olonumbi via tukuiwa vocipama cilo, va popia okuti olonumbi viaco vi nena elembeleko. Vulala owu, ka mu sangiwa olonjila viosi vi kuatisa oku tepulula evalo tu yevite omo lioku fisa ngandietu. Pole, nda wa kapako vimue pokati kolonumbi viaco, pamue o ka liyeva ciwa.

VANYAMO A SULAKO, OLONOÑO VIA SIATA OKU LILONGISA CALUA CATIAMẼLA KEVALO LIOMUNU WA FISA NGANDIAYE. Pole, ndomo tua kũlĩhĩsa vovipama via pita, olonumbi via velapo violonoño olonjanja vialua vi tu ivaluisa eci Embimbiliya li popia. Eci ci lekisa okuti, olonumbi vi sangiwa velivulu liaco liosimbu liolondunge, olonjanja viosi viokaliye. Pole, Vembimbiliya ka mu sangiwa lika alungulo awa. Mu sangiwavo olonumbi vina okuti, ka tu pondola oku vi sanga kocitumãlo cikuavo kuenda ovio vi eca elembeleko komanu vana va fisa ngandiavo. Konomuisa vimue pokati kavio:

• Vangadietu kuenda akamba okuti va fa ka va kasi oku tala ohali.

  Embimbiliya li popia okuti, “ava va fa ka va kũlĩhĩle lacimue” kuenda okuti, “onjivaluko yavo yosi ya nyõleha.” (Ukundi 9:5; Olosamo 146:4) Eli olio esunga Embimbiliya li sokisila olofa ndotulo.—Yoano 11:11.

• Oku kolela ku Suku umue ukuacisola, ci lembeleka calua

  Embimbiliya kelivulu Liolosamo 34:15 ku popia hati: “Ovaso a Yehovaa a kasi la vakuesunga, kuenda ovatũi aye a yevelela epingilo liavo liekuatiso.” Ka tu ka simi okuti, ohutililo onjila yimue lika yoku situlula ovisimĩlo vietu oco tu liyeve ciwa ale, coku tu kuatisa lika oku tula utima. Pole, oku lomboluila Suku ovina tu yevite, ci tu kuatisa oku kuata ukamba Lululiki wetu. Eye o pondola oku talavaya lunene waye oco a tu lembeleke.

• Elavoko liekalo liwa kovaso yoloneke

  Sokolola esanju tu ka kuata palo posi, eci vangandietu kuenda akamba vana va fa va ka piduiwa! Embimbiliya li tukula olonjanja vialua otembo yaco. Olio li lombololavo ndomo omuenyo palo posi u ka kala, eci Suku a ‘ka puenya asuẽlẽla osi vovaso etu okuti, oku fa ka ku ka kalako vali, ndaño oku lila loku liyula levalo ka vi ka kalako vali.’—Esituluilo 21:3, 4.

Omanu valua okuti va tava ku Yehova, o Suku Yembimbiliya, va pamisiwa eci va fisa umue ngandiavo omo okuti, va kolela kohuminyo yaco. Ndeci, ukãi umue o tukuiwa Ann okuti noke lioku tẽlisa ci soka 65 kanyamo tunde eci va kuela ulume waye wa fa, wa popia hati: “Embimbiliya li nyĩha elavoko liokuti, vangandietu kuenda akamba okuti va fa, ka va kasi oku tala ohali kuenda Suku o ka va nena vali komuenyo. Olonjanja viosi eci ndi sokolola kolofa viulume wange, ndi ivaluka olohuminyo viaco. Ovio, vi ndi kuatisa oku liyaka locina cĩvipovali ca li pita lame!”

Tiina wa tukuiwa ale vorevista yilo, wa popia hati: “Tunde eci Timo a fa, nda siata oku limbuka ekuatiso lia Suku. Ka citava oku lombolola ndomo Yehova a siata oku ndi kuatisa oku liyaka lekalo liaco ka lia lelukile liomuenyo wange. Embimbiliya li likuminya okuti, ava va fa va ka pinduiwa kuenda ame si kuete atatahãi wokuti ohuminyo yaco yi ka tẽlisiwa. Owo u nyĩha ongusu yoku amamako oku pandikisa toke keteke ndi ka mola vali Timo.”

Omanu valua va kolela okuti Embimbiliya liocili, va siatavo oku liyeva ndoco. Pamue ove o sima okuti, olohuminyo vi sangiwa Vembimbiliya viwa calua oco vi kale viocili ale, vi kasi lika ndonjoi yimue. Pole, ku simi hẽ okuti ciwa oku linga akonomuiso atiamẽla kolonumbi kuenda olohuminyo vi sangiwa Vembimbiliya oco o kũlĩhe nda ovio via koleliwa ale sio? O ka limbuka okuti Embimbiliya olio lieca ekuatiso lia velapo komanu vana va liyaka lesumuo omo lioku fisa umue ngandiavo.

KŨLĨHA OVINA VIKUAVO EMBIMBILIYA LI LONGISA VIATIAMẼLA KELAVOKO TU KUETELE VANA VA FA

Tala olovideo viatiamẽla kelavoko tu kuetele vana va fa vonumbi yetu jw.org

LIPI EKALO LIAVA VA FA?

Nye ci pita lomunu umue eci a fa? Embimbiliya li tu ĩha etambululo limue li lembeleka calua

Tala ponepa OCISELEKO CALIVULU > OLOVIDEO (kuende ponepa Olovideo: EMBIMBILIYA)

O YONGOLA OKU YEVELELA OLONDAKA VIWA?

Lasapulo alua avĩ a siata voluali, pi tu pondola oku sanga asapulo awa?

Tala ponepa ALONGISO EMBIMBILIYA > OMBEMBUA KUENDA ESANJU