Lilongisila Kakulueya a va Isareli

VA Isareli va kũlĩhĩle eci Yehova a lavokaile kokuavo, eci va iñila Vofeka Yohuminyo. Vonduko ya Mose, Suku wa va handeleka hati: “Vu tundisa kovaso ene olonungi viosi viofeka, loku nyõla ovawe avo osi a songiwa oviñumañuma. Vu nyõlavo oviteka viavo viosi via itilua, loku tungulula olonumbuko viavo viosi.”​—⁠Atend. 33:⁠52.

Va Isareli va sukilile oku yuvula oku linga ukamba lolonungi viofeka, kuenda oku yuvula oku likuela lavo. (Esin. 7:​2, 3) Suku wa lunguile omanu vaye a nõla hati: “Lunguka sanga o lisila ocisila lolonungi viofeka oko wenda, kuenje ci ku lingila ndonjanjo.” (Etu. 34:​12) Pole, va Isareli ka va pokuile ku Suku, kuenje va wila vonjanjo. Nye ca va vetiya oku wila vonjanjo? Nye tu lilongisa kulandu wavo?​—⁠1 Va Kor. 10:⁠11.

Va li Kongela Kefendelo Lioviteka

Oco va Isareli va piñale Ofeka Yohuminyo, va sukilile oku lundula olonungi via kalamo. Pole, va Isareli ka va pokuile kolonumbi via Suku. Ovo, ka va lunduile ovanyãli vavo. (Olong. 1:1–2:​10) Osimbu va Isareli va kala kumosi ‘lapata epanduvali,’ vana va tungile vofeka yaco, va fetika oku li kũlĩha pokati kuenda oku linga ukamba lavo. (Esin. 7:⁠1) Elinga liaco lia nena nye ku va Isareli? Embimbiliya li popia hati: “Va kuela omãla vavo vakãi. Lomãla vavo vakãi va va kuelisa lomãla valume va va Kanana, kuenda va vumba olosuku viavo. Va Isareli va linga eci cĩvi kovaso a Yehova. Va ivala Yehova Suku yavo, kuenje va vumbavo Baale la Asera.” (Olong. 3:​5-7) Omo liukamba va Isareli va linga lolonungi viofeka, va likuela lavo, kuenda va kuama efendelo lioviteka. Omo liolohuela va Isareli va linga, ka va kuatele vali epondolo lioku yuvula efendelo liesanda lia kala vofeka. Omo liaco, efendelo liocili lia vihĩsiwa, kuenda va Isareli va fetika oku vumba olosuku viesanda.

Eci olonungi Viofeka Yohuminyo via kala ovanyali, va kapele kohele omuenyo wa va Isareli, momo va enda oku liyaka lavo. Pole, cilo omo okuti, va linga akamba, va kapele vali enene kohele omuenyo wa va Isareli, momo va nyõla ovisimĩlo viavo kuenda ukamba wavo la Suku. Omo liaco, tu konomuisi ulandu ukuavo u lekisa ndomo va yapuisiwa letavo liesanda.

Kupange Woku Lima Toke Koku Fendela Baale

Eci va Isareli va iñila Vofeka Yohuminyo, va siapo omuenyo woku tumboka, kuenje valua pokati kavo va linga vakuakulima. Ovo va kuamele ocituwa coku lima ndeci colonungi via kala vofeka yaco. Kuenje, ca va vetiya oku kuama ovituwa via va Kanana poku lima. Va Isareli omo lioku kuata ukamba lomanu vaco, va fetika oku tava kefendelo liatiamẽla koku lima.

Va Kanana va enda oku fendela va Baale valua, kuenda va kolelele okuti, olosuku viaco vi va kuatisa okuti ovikũla vima ciwa. Ndaño okuti, va Isareli va enda okungula ovikulia vialua, pole, va fetika oku fendela olosuku via va Kanana loku sima okuti, ovio via enda oku va kuatisa oku ungula ovikulia viaco. Valua pokati ka va Isareli va yonguile oku fendela Yehova, pole va litumbikile kefendelo liolosuku viesanda.

Elungulo Kokuetu

Eci va Isareli va lisanga onjanja yatete lomanu va kala Vofeka Yohuminyo, ka va simĩle okuti, vaka litenga vefendelo lia Baale kuenda vovituwa viavo vĩvi. Pole, ukamba va kuata lomanu vaco, wa va tuala koku fendela Baale. Cimuamue haico ci pondola oku pita letu. Nda tua kuata ukamba lomanu vana ka va fendela Yehova, haivo ka va kuete ovituwa ndevi vietu, tu yapuisiwavo. Citava okuti tu lisanga lomanu vaco kupange, kosikola, ale konjo. Pole, ulandu wa va Isareli u tu lungula okuti, oku kuata ukamba lomanu vaco, ci nena ovitangi. Embimbiliya li lungula hati: “Akamba vãvi va nyõla ovituwa viwa.”​—⁠1 Va  Kor. 15:⁠33.

Koloneke vilo, tua siata oku liyaka layonjo alua, ndeci ca pita la va Isareli. Kuli ovina vialua okuti omanu va vi kapako ndolosuku viavo ndeci: Olombongo, olomapalo, omanu va kemãla koku tasula ombunje, opulitika, asongui vamue vatavo, kuenda omanu vamue vepata. Nda ka tua lavuluile, tu pitisa kovaso ovina viaco komuenyo wetu. Oku kuata ukamba la vana ka va sole Yehova, ci nyola ekalo lietu kespiritu.

Ukahonga wa kala ocina ca velapo kefendelo lia Baale, kuenda wa yapula valua pokati ka va Isareli. Koloneke vilo, ovituwa viaco via siatavo oku yapula valua pokati komanu va Suku. Oku tala omanu va kasi epolõla vo Kombutador ale vo Televisãu, ci vĩhisa utima. Ci sumuisa calua nda Ukristão wa yonjiwa koku tala omanu va kasi epolõla vo Internet ale vo Televisãu!

‘Ava va Pokola Kovihandeleko Via Yehova, va Sumũlũha’

Onjongole yoku pokola ku Yehova ale yoku tomba olonumbi viaye poku nõla akamba, yi tunda vutima womunu. (Esin. 30:​19, 20) Omo liaco, tu sukila oku li pula ndoco: ‘Akamba vapi ndi nõla kolomapalo? Ovina vipi va pitisa kovaso kuenda ovituwa vipi va kuete? Anga hẽ, afendeli va Yehova? Oku kuata ukamba lavo ci ndi kuatisa oku linga Ukristão uwa?’

Ukualosamo wa imba ocisungo hati: “Ava va endela vonjila ya suñama, okuti vonjila yovihandeleko via Yehova, ovo va sumũlũha. Ava va linga ovisila viaye, loku u vanjiliya lutima wavo wosi [va sumũlũha].” (Osa. 119:​1, 2) Handi vali, “vosi va sumbila Yehova loku endaila volonjila viaye, va sumũlũha.” (Osa. 128:⁠1) Omo liaco, tu sukila oku lilongisa kakulueya a va Isareli poku nõla akamba vetu, kuenda oku amamako oku pokola ku Yehova.​—⁠Olosap. 13:⁠20.

[Elitalatu kemẽla 26]

Oku kuata ukamba la vana ka va sole Yehova, ci tu tuala koku fendela oviteka