Olonumbi Viohongele Yofeka
◼ Elivala Lioku Fetika Ovipama: Vokuenda kuoloneke vitatu, ovipama viohongele yofeka vi ka fetika kelivala 8:20. Apito a ka yuluiwa kelivala 6 komẽle. Eci manji o songola a tukula ovisikilo vioku fetika, vosi tu sukila oku tumãla polomangu vietu, oco tu fetike ciwa ohongele. Votãlo kuenda Casapalo, ohongele yi ka malusuiwa kelivala 15:55, pole, Calumingu yi ka malusuiwa kelivala 15:00.
◼ Ovitumãlo Vioku Yeka Oviendelo: Kolohongele viofeka, ku sangiwa ocitumãlo cimue coku yeka oviendelo okuti, ka ci sukila oku feta. Pole, oviendelo vi ka kapiwa loku kuama otembo omunu a pitila. Oviendelo via vana va lemãla, ovio lika vi kuete ovitumãlo via selekiwa. Omo okuti ovitumãlo vioku yeka akãlu vitito, nda citava, vamanji vamue poku enda kohongele, va sukila oku linga eliangiliyo lioku li kongela vakãlu amue.
◼ Oku Seleka Olomangu: Ci tava lika oku selekela olomangu vana wendeli vocendelo cimuamue ale, vana u kasi lavo konjo yimuamue, kuenda vana va kasi oku lilongisa love Embimbiliya.—1 Va Kor. 13:5.
◼ Onanya: Nena okulia kuove oco ku ka tunde pocitumãlo cohongele oku ka landa okulia kelivala lionanya. Ku ka ambate ekualu lina okuti ka li iñila vemehi liomangu. Ka ca sungulukile oku nena ekualu linene lioku ambata okulia, kuenda olokopo vi tetuka lonjanga.
◼ Olombanjaile: Tu lekisa olopandu keliangiyo lia lingiwa poku eca olombanjaile vietu kohongele yofeka, ale Vonjango Yusoma, oco vi kuatise kupange woku kunda u kasi oku lingiwa voluali luosi. Nda umue wa eca ombanjaile yopapelo yoku tambula olombongo kombango, ku sonehiwe hati, ya loña ko “Associação das Testemunhas de Jeová.”
◼ Oku Lemehiwa Kuenda Oku Sakuiwa Kuonjanga: Nda kua moleha umue o sukila oku sakuiwa lonjanga, citava oku vangula lamanji umue ukuakutumãlisa o kasi ocipepi laye. Noke, o ka tuala ocitangi caco Koseketa yoku sakula, kuenje vamanji vaco va ka eca ekuatiso li sukiliwa.
◼ Olosapato: Unyamo lunyamo kua siata oku kala omanu valua va li lemẽha omo liolosapato. Omo liaco, wala olosapato via sunguluka, vina vi kusua ciwa okuti vi ku ecelela oku liatela ciwa posi ndaño pana pa sielena.
◼ Ovisitatũi: Pokati kolohongele viofeka vi ka lingiwila Konjango yo ko Viana, ku ka kala eliangiliyo lioku pongoluila ulandu wovipama Velimi Lioku Ilaika.
◼ Oku Ngalavala: Olomakina vioku ngalavala ka citava okuti, vi tokekisiwa kolofiyu violusu kua tokekiwa omakina yi yevalisa ocileñi. Pole, ci lingiwe lonjila yimue okuti, ka ci tateka omanu oku yevelela.
◼ Otuakãlu Tuoku Ambata Oloñaña: Otuakãlu tuoku ambatela oloñaña, ka citava okuti, tu ambatiwa kohongele yofeka. Pole, citava lika oku ambata uhamba woloñaña okuti wecelela oku u kapa ponele yomangu yolonjali. Onumbi eyi, yi kuamiwa lika la vana va lingila ohongele yofeka vocila coku imbila ombunje.
◼ Ulela Welemba: Olohongele vialua viofeka via siata oku lingiwila vocitumãlo cimue okuti, ka mu piti ofela yalua. Omo liaco, ciwa okuti, poku liwaveka ulela u kuete elemba, tu likapa ño katito oco ka cika pange lãvi vamanji vana va kuete uvei wesuka ale uvei ukuavo.—1 Va Kor. 10:24.
◼ Oloformulariu Queira Visitar: Vo formulariu losapi hati, Queira Visitar (S-43) mu sonehiwe olonumbi viatiamẽla komanu vana va lekisa onjongole kepuluvi liohongele yofeka eci va tambula uvangi. Akundi va sukila oku nena kohongele o formulariu yimosi ale vivali. Noke yoku soneha vo formulariu yaco olonumbi vi sukiliwa, citava oku yeca kukulu wekongelo usonehi.—Tala Upange Wetu Wusoma wa Kuvala wo 2009, kemẽla 4.
◼ Upange Woku Lieca Olumue: Tu pondola oku kuata esanju lialua nda tua lieca olumue kupange u sukiliwa kohongele yofeka. (Ovil. 20:35) Nda umue o yongola oku lieca kupange waco, o sukila oku sapela la vamanji va talavaya vo Departamentu Yupange Woku Lieca Olumue kohongele yofeka. Omãla vana va kuete 16 kanyamo, va pondolavo oku kuatisa kupange waco, poku kuama olonjali viavo, ale omunu ukuavo ukulu okuti, wa taviwa lolonjali viavo.