Suku o yongola okuti tu kala lombembua kuenda lesanju otembo ka yi pui voluali luokaliye palo posi!

Ove pamue o komõha loku popia ndoco: ‘Eci hẽ ci ka tẽlisiwa ndati?’ Embimbiliya li lekisa okuti Usoma wa Suku owo lika u ka ci tẽlisa, kuenda onjongole ya Suku yeyi okuti omanu vosi va lilongisa eci catiamẽla Kusoma waye kuenda kocipango caye.—Osamo 37:11, 29; Isaya 9:7.

Suku o yongola okuti tu kuatisiwa.

Isietu wo kilu o yongolavo okuti tu kuata esanju otembo ka yi pui, ndeci isia umue ukuacisola a yongola ekalo liwa komãla vaye. (Isaya 48:17, 18) Eye wa likuminya okuti wosi o “lingainga ocipango ca Suku o kala oloneke ka vi pui.”—1 Yoano 2:17.

Suku o yongola okuti tu endela volonjila viaye.

Embimbiliya li popia okuti Ululiki wetu “o tu longisa ovituwa viaye” oco tu ‘endele volonjila viaye.’ (Isaya 2:2, 3) Eye wa li “nolela onduko yaye epata” limue liomanu oco va sapule ocipango caye koluali luosi.—Ovilinga 15:14.

Suku o yongola okuti tu likuata omunga poku u fendela.

Efendelo liocili lia Yehova ka li tepa omanu, pole li va tokekisa vomunga yocisola. (Yoano 13:35) Koloneke vilo velie va kasi oku longisa omanu ndomo va pondola oku vumba Suku lelitokeko? Tu ku laleka oco o kũlĩhe omanu vaco lekuatiso liombrochura yilo.

Viñami Olombangi Via Yehova wa kũlĩha? Vamue pokati kavo citava okuti va kasi vimbo liove, vakuavo va talavaya love kupange woku sanda eteku, ale akamba vove vo kosikola. Handi vali, pamue va sapelele ale love catiamẽla Kembimbiliya. Oco hẽ, Olombangi Via Yehova velie, kuenda momo lie va siatela oku sapela lomanu catiamẽla kalongiso avo?

Etu tumanu vaño. Etu tua tunda kapata osi kuenda tu kuete akalo a litepa. Vamue pokati ketu va kala vatavo a litepa, pole, vakuavo ka va tavele okuti kuli Suku. Osimbu ka tua lingile handi Olombangi Via Yehova, tua sandiliya otembo yoku konomuisa lutate alongiso Embimbiliya. (Ovilinga 17:11) Noke tua tava kovina tua lilongisa, kuenje tua nõlapo oku vumba Yehova Suku.

Tua siata oku kuatisiwa lelilongiso Liembimbiliya. Ndeci ca siata oku pita lomanu vosi, etu tu liyakavo lovitangi vialua kuenda ahonguo etu. Pole, omo lioku likolisilako oku kapako olonumbi Viembimbiliya komuenyo wetu, tua limbuka ndomo ekalo liomuenyo wetu lia pongoloka. (Osamo 128:1, 2) Eli olio esunga lieci tua siatela oku sapela la vakuetu ovina viwa tu lilongisa Vembimbiliya.

Tua kapako olonumbi via Suku. Ndomo Embimbiliya li longisa, olonumbi viaco vi tu kuatisa oku kuata ekalo liwa, oku sumbila vakuetu, oku kala vakuacili, kuenda oku kala vakuahenda. Olonumbi viaco, vi kuatisa oku kuata uhayele uwa, oku kala omanu vawa, loku kuatisa apata oku likuata omunga kuenda oku lekisa ovituwa viwa. Omo lioku kolela okuti “Suku ka kuete ocame,” tua tiamẽla kongongela ya vamanji kespiritu voluali luosi, vana ka va kuete olonepele haivo ka va litengi vopulitika. Ndaño okuti tumanu vaño, pole, tua litepa lomanu vakuavo.—Ovilinga 4:13; 10:34, 35.

• Ovina vipi Olombangi Via Yehova vi kuete ndeci ci kasi omanu vakuavo?

• Olonumbi vipi Olombangi Via Yehova via siata oku lilongisa Vembimbiliya?

Omanu valua va sima okuti Olombangi Via Yehova, onduko yetavo limue liokaliye. Cimue ci pitahãla 2.700 kanyamo konyima, afendeli va Suku yocili va tukuiwile hati, ‘olombangi’ viaye. (Isaya 43:10-12) Osimbu ka tua pitilile kunyamo wo 1931, tua enda oku tukuiwa hati, Vakuakulilongisa Embimbiliya. Momo lie cilo tu tukuiwila hati, Olombangi Via Yehova?

Onduko yaco yi situlula Suku yetu. Ndomo ca lekisiwa voviña vio kosimbu, onduko ya Suku, okuti Yehova, yi molẽha olonjanja vialua Vembimbiliya. Vambimbiliya alua, onduko yaco ya piñanyiwa lolonduko viokuti, Ñala ale Suku. Pole, Suku yocili wa lisitulula ku Mose londuko yaye okuti Yehova, poku popia hati: “Onduko yaco oyo yi linga onduko yange otembo ka yi pui.” (Etundilo 3:15) Omo lionduko yaco citava oku u tepisa pokati kolosuku vikuavo viesanda. Tu kuete esanju lialua omo lioku kunda onduko yi kola ya Suku.

Oyo yi situlula upange wetu. Omanu valua kosimbu oku fetikila ku Havele ulume watete ukuesunga, vosi va eca uvangi wekolelo va kuatela Yehova. Vokuenda kuanyamo alua, Noha, Avirahama, Sara, Mose, Daviti, kuenda vakuavo, va likongelavo ‘kelende linene liolombangi.’ (Va Heveru 11:4–12:1) Ndeci omunu umue a eca uvangi woku teyuila ukuavo kombonge okuti ka kuete eko, etu tua nõlapo oku kundila omanu ocili catiamẽla ku Suku yetu.

Tu kasi oku setukula Yesu. Eye Vembimbiliya wa tukuiwa hati, “ombangi yina yocili lesunga.” (Esituluilo 3:14) Yesu wa popia hati, wa ‘situlula onduko ya Suku’ kuenda wa ‘imbila ocili uvangi’ watiamẽla ku Suku. (Yoano 17:26; 18:37) Olondonge via Kristu vi sukilavo oku eca uvangi wonduko ya Yehova kuenda oku yi situlula. Eci oco Olombangi Via Yehova vi kasi oku likolisilako oku linga.

• Momo lie Vakuakulilongisa Embimbiliya, va nõlelapo oku litukula hati, Olombangi Via Yehova?

• Tunde otembo yipi Yehova a kuete olombangi viaye palo posi?

• Helie Ombangi ya velapo ya Yehova?