Tiamisila Utima Koku Longisa Omanu Oco va Linge Olondonge
1. Nye tu sukila oku linga oco omanu va popeliwe?
1 Ulandu wupange woku kunda wunyamo wo 2014, u situlula ombili afendeli va Suku va lekisa poku kunda olondaka viwa Viusoma. (Mat. 24:14) Tua siata oku sanga omanu va lekisa onjongole kesapulo Liembimbiliya poku kundila konjo lanjo, kupange u likasi woku eca otuikanda, kumue lotuikanda tuelaleko, kuenda oku kundila kovitumãlo ku sangiwa omanu valua. Omo liaco, oco omanu va popeliwe, tu sukila oku va kuatisa oco va linge olondonge via Yesu poku va longisa Embimbiliya.—1 Tim. 2:4.
2. Apulilo api a tu kuatisa oku longisa Embimbiliya komanu?
2 Lipongiya Oco o Fetike Oku Longisa Embimbiliya: Nda wa sanga omunu umue o lekisa onjongole, wa siata hẽ oku likolisilako oku kũlĩha pocitumãlo caye oco o tiukile kokuaye locimãho coku fetika oku u longisa Embimbiliya? Onjanja yipi ya sulako wa seteka oku longisa Embimbiliya komunu umue? Onjanja yipi ya sulako wa longisa Embimbiliya komanu vana wa siata oku eca olorevista? Wa siata hẽ oku lekisa o video losapi hati: Momo lie ndi Lilongisila Embimbiliya? kuenda Nye ci Lingiwa Velilongiso Limue Liembimbiliya? ka kamba vo kupange woku sanda eteku, kosikola, komanu o lisungue lavo, kepata, kuenda komanu vakuavo? Wa siata hẽ, oku talavaya lolorevista o kuete, loku likolisilako oku longisa Embimbiliya komanu va siata oku tambula alivulu etu?
3. Nye tu sukila oku linga, oco tu kuate onima yiwa poku longisa ocili Cembimbiliya?
3 Ekuatiso li Tunda ku Yehova Kuenda ku Yesu: Kefetikilo liocihandeleko caye coku longisa omanu oco “va linge olondonge” Yesu wa fetika londaka hati, “kuendi” oco a lekise okuti tu sukila oku likolisilako loku lekisa onjongole komanu. Omo liaco, Yesu wa li kuminya oku tu kuatisa. (Mat. 28:19, 20) Yehova, wa siatavo oku tu ĩha espiritu sandu, ovimalẽho kuenda epindiso tu sukila oco tu longise omanu ocili Cembimbiliya. (Sak. 4:6; 2 Va Kor. 4:7) Tu sukilavo oku likutilila oco ‘a tu ĩhe ongusu kuenda utima woku linga ocipango caye’ momo oco ci kuete esilivilo liavelapo.—Va Fil. 2:13.
4. Momo lie tu sukilila oku tiamisila utima wetu koku longisa omanu oco va linge olondonge?
4 Oku kunda olondaka viwa ci nena esanju lialua. Omo liaco, esanju lietu li livokiya eci tu longisa omunu umue ocili Cembimbiliya loku u kuatisa oku sanjukila “ombundi yoku iñila komuenyo.” (Mat. 7:14; 1 Va Tes. 2:19, 20) Oku tiamisila utima koku longisa omanu oco va linge olondonge, ci kuete esilivilo, momo ci sanjuisa Yehova una “ka yongola okuti umue o nyõleha, puãi o yongola okuti vosi va likekembela akandu avo.”—2 Pet. 3:9.