Tu Yevelela Ndati Suku?

Suku o vangula letu lekuatiso Liembimbiliya.​—2 Timoteo 3:16

Suku yocili wa tuma alume vamue oco va sonehe ovisimĩlo viaye velivulu limue li kola. Elivulu liaco Embimbiliya. Velivulu liaco, mu sangiwa ulandu Suku a yongola okuti, tu u kũlĩha.

Suku wa kũlĩha eci ciwa kokuetu, kuenda eye Ono yolondunge viosi. Nda wa yevelela kokuaye, o ka kuata olondunge viocili.​—Olosapo 1:5.

Suku o yongola okuti, omanu vosi palo posi va tanga Embimbiliya. Olio, lia sandekiwa valimi alua.

Nda o yongola oku yevelela Suku, o sukila oku tanga Embimbiliya, kuenda oku kuata elomboloko lialio.

Omanu kolonepa viosi violuali va kasi oku yevelela.​—Mateo 28:19

Olombangi Via Yehova vi pondola oku ku kuatisa oco o kuate elomboloko Liembimbiliya.

Ovio vi longisa ocili catiamẽla ku Suku koluali luosi.

Ku sukila oku feta elongiso liaco. O pondolavo oku lilongisa catiamẽla ku Suku Vonjanjo Yusoma Yolombangi via Yehova posongo yene.