OCISELEKO CALIVULU VO INTERNET Colombangi Via Yehova
Olombangi Via Yehova
OCISELEKO CALIVULU VO INTERNET
Umbundu
Ũ
  • Ñ
  • ñ
  • õ
  • Õ
  • ũ
  • Ũ
  • ĩ
  • Ĩ
  • ã
  • Ã
  • ẽ
  • Ẽ
  • EMBIMBILIYA
  • ALIVULU
  • OLOHONGELE
  • mwbr19 Kupemba kam. 1-8
  • Ono Yovipama Viohongele Ekalo Lietu Tuakristão Kuenda Oku Kunda

Vonepa eyi ka mu sangiwa ovideo layimue.

Tu ecele, kua pita ocitangi cimue poku lekisa ovideo.

  • Ono Yovipama Viohongele Ekalo Lietu Tuakristão Kuenda Oku Kunda
  • Ono Yovipama Viohongele Ekalo Lietu Tuakristão Kuenda Oku Kunda—2019
  • Otulosapi
  • OSEMANA 6-12 YA KUPEMBA
  • OVOKUASI A SANGIWA VONDAKA YA SUKU | 2 VA KORINDO 4-6
  • “Ka tu Liwekapo”
  • Va Kava Pole Ka Va Liwekapo
  • Oku pandikisa
  • Oku Konomuisa Lutate Ovina vi Sangiwa Vembimbiliya
  • “Sanjuisi Yehova”
  • Amamako Oku Lekisa Ocisola Ku Vamanji
  • Oku Tangiwa Kuembimbiliya
  • OSEMANA 13-19 YA KUPEMBA
  • OVOKUASI A SANGIWA VONDAKA YA SUKU | 2 VA KORINDO 7-10
  • “Upange Wetu Woku Eca Ekuatiso Komanu va Lipita Lovilunga, u Panga Onepa Kupange Woku Kunda”
  • “Suku o sole u eca lesanju”
  • Upange Woku Eca Ekuatiso
  • Upange Woku Eca Ekuatiso
  • Koku ku Tunda Olombongo vi Kuatisa Kupange Usoma
  • Oku Konomuisa Lutate Ovina vi Sangiwa Vembimbiliya
  • Vetiyiwa ‘Locali ca Piãla’ ca Suku
  • Ciwa hẽ Oku Lipanda?
  • Oku Tangiwa Kuembimbiliya
  • OSEMANA 20-26 YA KUPEMBA
  • OVOKUASI A SANGIWA VONDAKA YA SUKU | 2 VA KORINDO 11–13
  • “Paulu wa Kuatele ‘Osongo Ketimba’”
  • Va Kuete Ongusu Ndaño Va Hongua
  • Yehova Eca ‘Espiritu Liaye Kuava Vo Pinga’
  • ‘Yehova o Kolisa Vana va Kava’
  • Oku Konomuisa Lutate Ovina vi Sangiwa Vembimbiliya
  • Apulilo a Lingiwa la Vakuakutanga
  • Oku Tangiwa Kuembimbiliya
  • OSEMANA 27 YA KUPEMBA-2 YEVAMBI
  • OVOKUASI A SANGIWA VONDAKA YA SUKU | VA GALATIA 1-3
  • “Ndo Vetela Evelo”
  • O Kuete hẽ Ovisimĩlo Ndevi Via Yehova Viatiamẽla Kesunga?
  • Vana va Sole Yehova Lacimue ci va Kokela Ocilondokua
  • Oku Konomuisa Lutate Ovina vi Sangiwa Vembimbiliya
  • Vumba Suku Lekolelo Ndaño “Lohali Yalua”
  • Ukanda ku va Galatia
  • Oku Tangiwa Kuembimbiliya
Ono Yovipama Viohongele Ekalo Lietu Tuakristão Kuenda Oku Kunda—2019
mwbr19 Kupemba kam. 1-8

Ono Yovipama Viohongele Ekalo Lietu Tuakristão Kuenda Oku Kunda

OSEMANA 6-12 YA KUPEMBA

OVOKUASI A SANGIWA VONDAKA YA SUKU | 2 VA KORINDO 4-6

“Ka tu Liwekapo”

(2 Va Korindo 4:16) Oco, ka tu konyoha ndaño etimba lietu li kasi oku nyõleha, haimo utima wetu u kasi oku tumbuluiwa eteke leteke.

utala wondavululi 1/9/2004 kem. 21 ocin. 16-17

Va Kava Pole Ka Va Liwekapo

16 Oku tata uhayele wetu kespiritu oco ocina cavelapo. Nda tu kuete ukamba la Yehova, tu pondola oku kavuluka ketimba. Kuenda lalimue eteke tu yeva ekavo lioku u fendela. Yehova “o kolisa ava va lenda, o vokiya olohõlo ku ka vi kuete.” (Isaya 40:28, 29) Upostolo Paulu wa limbuka ocili colondaka evi. Eye wa popia hati: ‘Etu ka tu konyoha. Ndaño etimba li kasi loku nyõleha, haimo utima u tumboluawa eteke leteke.’—2 Va  Korindo 4:16.

17 Upostolo Paulu wa tukula ondaka yoku popia hati, ‘oku tumbuluiwa eteke leteke.’ Ondaka eyi yi lomboloka okuti, tu sukila oku tambula ovina viespiritu Yehova a siata oku tu ĩha. Manji umue ukãi o kasi loku talavaya kupange wumisionaliu vokuenda kueci ci soka 43 kanyamo. Ndaño okuti wa siata oku liyaka lovitangi viekavo kuenda esumuo pole, kaliwekelepo kupange waco. Eye wa popia hati: ‘Nda siata oku pasuka selo. Osimbu handi sia fetikile upange wange, ndi likutilila ku Yehova kuenda ndi tanga Embimbiliya. Ocituwa caco, ci kasi loku ndi kuatisa oku pandikisa kupange wa Yehova toke cilo.’ Omo liaco, tu pondola oku kolela kunene wa Yehova nda tua likutilila kokuaye olonjanja viosi. Tu sukilavo oku sokolola kovituwa viaye lolohuminyo viaye. Momo poku ci linga ci tu ĩha ongusu yoku pandikisa kovitangi.

(2 Va Korindo 4:17) Momo ohali tu kasi oku tala yokatembo kamue kuenda yitito, pole, ohali yaco yi tu nenela ulamba walua haiwo wotembo yosi;

perspicaz volume-3 kem. 255

Oku pandikisa

Ci kuete esilivilo oku kuata elavoko Akristão va kuete, womuenyo kopui wa lipua. Ndaño muẽle olofa povaka avakuakulambalala ka vi pondola oku tateka elavoko liaco. (Va Rom. 5:4, 5; 1 Va Tes. 1:3; Esit. 2:10) Ohali tu tala cilo, ka lia velelepo poku yi sokisa loku tẽlisiwa kuelavoko liaco li komõhisa. (Va Rom. 8:18-25) Poku sokolokola kelavoko liaco, ohali yosi tu talo ndaño okuti vepuluvi liaco li molẽha ndu okuti lialua, ‘yokatembo kamue kuenda yitito.’ (2 Va Kor. 4:16-18) Oku ivailuka okuti ohali tu tala yi kala lika okatembo kamue loku kakatela kelavoko tu kuete, ci pondola oku tu kuatisa oku yuvula esumuo kuenda oku yapuka vonjila ya Yehova Suku.

(2 Va Korindo 4:18) okuti ka tu luluvalela kovina vi muiwa, te kovina ka vi muiwa. Momo ovina vi muiwa ka vi kala otembo yosi, pole, ovina ka vi muiwa vi kala otembo ka yi pui.

Oku Konomuisa Lutate Ovina vi Sangiwa Vembimbiliya

(2 Va Korindo 4:7) Tu kuete ukuasi owu volombia viotuma, okuti unene wa piãla u tunda ku Suku, kokuetu hakoko.

utala wondavululi 1/2/2012 kem. 28-29 kelimi Lioputu

“Sanjuisi Yehova”

Manji David Splane, o panga onepa Kosungu Yolombangi Via Yehova, wa lombolola osapi eyi ya kunamela kovisonehua. (2 Va Korindo 4:7) Ukuasi waco nye? Anga hẽ ci lomboloka ukũlĩhĩso ale uloño? Hundi hati, “sio.” Ukuasi upostolo Paulu a tukula, u lomboloka ‘upange woku kunda’ okuti woku ‘situlula ocili.’ (2 Va Korindo 4:1, 2, 5) Manji Splane, wa ivaluisa olondonge okuti olosãi vitãlo ovo va pita poku lilongisa, ya va pongiya oku tẽlisa onepa yimue yi likasi kupange woku kunda. Va sukilile oku velisapo ocikele caco.

Hundi wa lombolola okuti “olombia viotuma” vi lomboloka atimba etu. Eye wa sokisa ombia yimue yotuma lombia yimue ya pangiwa lulu. Omanu ka va siatele oku talavaya lolombia via pangiwa lulu olonjanja vialua. Pole olombia viotuma va siata oku talavaya lavio oloneke viosi. Nda tu seleka ukuasi umue vombia ya pangiwa lulu, tu tiamisila calua utima kombia yaco kuenda kukuasi wa kapiwamo. Manji Splane wa popia hati: “Ene vulondonge, ka vu yongola oku litenda ndomanu va velapo. Ndolomisionaliu, vu sukila oku kuatisa omanu oku sivaya Yehova. Ene wa sokisiwi lolombia viotuma.”

(2 Va Korindo 6:13) Nambulula—poku popia lene ndomãla vange okuti—yikuli ovitima viene.

utala wondavululi 15/11/2009 kem. 21 ocin. 7

Amamako Oku Lekisa Ocisola Ku Vamanji

7 Nye ci popiwa catiamẽla kokuetu? Tu pondola ndati oku ‘lianja’ la vamanji loku lekisa ocisola kokuavo? Ca leluka oku kuata ukamba la vana va kuete anyamo amuamue, ale vakuekova limuamue, kuenda ovituwa vimuamue. Vana va kuete ovisimĩlo vimuamue vioku linga ovitalukilo, va siata oku kala pamosi otembo yalua. Nda ukamba tu kuete la vamanji vamue u tu vetiya oku litepa la vakuetu, tu sukila oku kũlĩhĩsa ndomo tu ‘lianja’ lavo. Omo liaco, tu sukila oku lipula ndoco: ‘Anga hẽ, nda tepulula ombili yange yoku endaenda kupange woku kunda ale oku linga ovitalukilo la vamanji vana okuti, hakamba vangeko? Vonjango Yusoma nda siata hẽ oku yuvula oku sapela la vana va fetika ndopo oku endaenda kolohongele, momo nda kũlĩha okuti, va yongola oku linga ukamba lame? Vekongelo nda siata hẽ, oku lama akulu kuenda amalẽhe?’

Oku Tangiwa Kuembimbiliya

(2 Va Korindo 4:1-15) Omo okuti tu kuete upange owu omo liohenda ya tu ĩhiwa, ka tu liwekapo. 2 Pole, tu likala ovina viuhembi, vi kutisa osõi kuenda ka tu endela vatutu ãvi, ndaño oku pengisa ondaka ya Suku; puãi tu situlula ocili loku lekisa okuti tuakuangangu yiwa kovaso omanu vosi kuenda kovaso a Suku. 3 Nda olondaka viwa tu kasi oku kunda via sitikiwa, via sitikiwila vana va kasi oku nyõleha, 4 omo osuku yoluali lulo ya tekãvisa ovitima viava ka va tavele, okuti ocinyi culamba wolondaka viwa via Kristu haeye esetahãlo lia Suku ka ci tuila vovitima viavo. 5 Momo ka tu kasi oku likundila etu muẽle, pole, tu kasi oku kunda Yesu Kristu okuti Ñala kuenda tuakuenje vene omo lia Yesu. 6 Momo Suku eye wa popia hati: “Ocinyi ci tuile vowelema” kuenda Suku o tuisa ocinyi caye vovitima vietu, okuti ci nina vokuavio lulamba wukũlĩhĩso wa Suku, omo liocipala ca Kristu. 7 Tu kuete ukuasi owu volombia viotuma, okuti unene wa piãla u tunda ku Suku, kokuetu hakoko. 8 Tu pita lovitangi viñi viñi, pole, ka tu sipatiwa okuti ka tu lisengi; tu sakalaisua, pole ka tu tokoka; 9 tu lambalaliwa, pole, ka tu yandulukiwa; tu tipuiwa, pole, ka tu nyõliwa. 10 Kuosi tu enda tu kala kohele yoku fa ndeci ca pita la Yesu, oco okuti omuenyo wa Yesu u situluiwa vatimba etu. 11 Tu kasi lomuenyo, pole, olonjanja viosi tu kasi kohele omo tu kuãi Yesu, oco omuenyo wa Yesu u situluiwevo vatimba etu. 12 Kuenje oku fa ku kasi oku talavaya vokuetu, pole, omuenyo vokuene. 13 Omo okuti tu kuete ekolelo limuamue ndeli lia sonehiwa liti: “Nda kolela kuenje nda popia”; etu tua kolelavo kuenda tua popia, 14 omo tua kũlĩha okuti Una wa pindula Yesu o tu pinduilavo kumuamue la Yesu, loku tu nena kovaso aye. 15 Ovina viosi evi vio lingiwili ene, okuti ohenda ya piãla yamamako kuenda yi li vokiya calua, momo valua va kasi oku eca olopandu oku muisa ulamba Suku.

OSEMANA 13-19 YA KUPEMBA

OVOKUASI A SANGIWA VONDAKA YA SUKU | 2 VA KORINDO 7-10

“Upange Wetu Woku Eca Ekuatiso Komanu va Lipita Lovilunga, u Panga Onepa Kupange Woku Kunda”

(2 Va Korindo 8:1-3) A vamanji, cilo tu yongola okuti wu kũlĩhi eci catiamẽla kohenda ya piãla ya Suku ya eciwa kakongelo o ko Makedonia. 2 Eci va nyikiwa lohali ya piãla, va lekisa esanju lialua kuenda ndaño luhukũi walua va eca olombanjaile vi supoka. 3 Ndi va imbila uvangi wokuti olombanjaile va eca vi pitahãla leci va tẽla,

utala wondavululi, 1/11/1998 kem. 25 ocin. 1

“Suku o sole u eca lesanju”

Catete, Paulu wa sapuila va Korindo catiamẽla Kakristão vo ko Makedonia vana okuti va lekisa ongangu yiwa poku kuatisa. Eye wa soneha ndoco: “Eci va nyikiwa lohali ya piãla, va lekisa esanju lialua kuenda ndaño luhukũi walua va eca olombanjaile vi supoka.” Akristão vo ko Makedonia, ka va sukilile oku kisikiwa oco va ece olombanjaile. Pole, Paulu wa popia okuti, “va tu pinga lolupili oco va kuatevo esumũlũho lioku eca olombanjaile.” Ombili Akristão vo ko Makedodia va lekisa yoku eca olombanjaile viavo, yi limbukiwa eci tu sokolola okuti ovo muẽle va kala “luhukũi walua.”—2 Va Korindo 8:2-4.

usoma wa suku, kem. 209 ocin. 1

Upange Woku Eca Ekuatiso

KUNYAMO wa 46 K.K., vo Yudea mua kala onjala. Olondonge via Kristu va Yudea via kala volupale luaco, ka via kuatele olombongo vioku landa okulia, momo kua tĩlile calua. Ovio via kala lonjala yalua. Pole, via kala oku lavoka ekuatiso lia Yehova lonjila yimue okuti lomue pokati kolondonge via Kristu wa tambuile ekuatiso liaco. Nye ca pitako?

(2 Va Korindo 8:4) osimbu okuti va tu pinga lolupili oco va kuatevo esumũlũho lioku eca olombanjaile kuenda oku kuatisa olosandu.

usoma wa suku kem. 209-210 ocin. 4-6

Upange Woku Eca Ekuatiso

4 Upostolo Paulu, vukanda waye wavali a sonehela va Korindo, wa lombolola okuti Akristão va tambula ovikele vivali viupange. Ndaño okuti Paulu wa sonehela ukanda waco Akristão olombuavekua, pole, koloneke vilo, olondaka viaco vi tiamisiwilavo “kolomeme vikuavo” via Kristu. (Yoano 10:16) Onepa yimue yupange woku kunda, yi tiamisiwila “kupange woku inalisa,” ale upange woku kunda kuenda oku longisa. (2 Va Kor. 5:18-20; 1 Tim. 2:3-6) Vonepa yikuavo mua kongela upange woku kuatisa vamanjetu. Paulu wa tukula ‘upange woku eca ekuatiso.’ (2 Va Kor. 8:4) Olondaka viokuti “upange woku inalisa,” kuenda ‘upange woku eca ekuatiso,’ vi lomboloka ondaka yimuamue yokuti, “upange.” Ondaka yaco ya pongoluiwa yopiwa kondaka yimue yo Helasi yokuti, di·a·ko·ni’a. Momo lie ci kuetele esilivilo?

5 Paulu poku tukula ondaka yimuamue yo Helasi, loku yi tiamisila kovopange avali, eye wa kongela upange woku kuatisa lovopange akuavo a sukila oku tẽlisiwa vekongelo Liakristão. Eye wa popele hati: “Kuli oku talavaya kuiñi kuiñi, puãi Cime umuamue. Kuli oku talavaya kuiñi kuiñi, . . . Puãi olongavelo viaco viosi via eciwa lespiritu limuamue.” (1 Va Kor. 12:4-6, 11) Paulu wa sokisa upange wakongelo osi, “lupange u kola.” (Va Rom. 12:1, 6-8) Ka tu komõha poku limbuka okuti ca sungulukile kokuaye oku pesila otembo yaye koku ‘kuatisa olosandu’!—Va Rom. 15:25, 26.

6 Paulu wa kuatisa va Korindo oku limbuka esunga lieci upange woku kuatisa, wa pangelele onepa kupange wavo woku kunda kuenda kefendelo li eciwa ku Yehova. Kũlĩhĩsa ocisimĩlo caye: Akristão va eca ekuatiso, va ci linga omo lioku ‘pokola kondaka yiwa yatiamẽla ku Kristu.’ (2 Va Kor. 9:13) Akristão omo lioku vetiyiwa lonjongole yoku kapako alongiso a Kristu, va likolisilako oku kuatisa vamanjavo. Paulu wa popia hati: Ovilinga viavo viohenda vioku kuatisa vamanjavo, ‘ongavelo va tambula ku Suku.’ (2 Va Kor. 9:14; 1 Pet. 4:10) Voku lombolola catiamẽla ku vamanjetu va sukila ekuatiso okuti mua kongela upange woku kuatisa, Utala Wondavululi 1 ya Cembanima wo 1975, wa lombolola ndoco: “Lalimue eteke ka tu ka tatãli okuti Yehova Suku kuenda Omõlaye Yesu Kristu va kapako ovilinga viaco viohenda.” Ocili okuti, upange woku kuatisa, onepa yimue yupange u kola.—Va Rom. 12:1, 7; 2 Va Kor. 8:7; Va Hev. 13:16.

(2 Va Korindo 9:7) Omunu lomunu a linge ndeci a sokiya vutima waye, halocikukũiko pamue oku kisikiwa, momo Suku o sole u eca lesanju.

usoma wa suku, kem. 196 ocin. 10

Koku ku Tunda Olombongo vi Kuatisa Kupange Usoma

10 Catete, tu eca lutima wosi omo okuti tu sole Yehova kuenda tu yongola “oku linga ovina viu sanjuisa.” (1 Yoano 3:22) Yehova o sanjukila afendeli vaye va eca lutima wosi. Tu kũlĩhĩsi olondaka viupostolo Paulu viatiamẽla Kakristão va siata oku eca. (Tanga 2 Va Korindo 9:7.) Ukristão wocili ka eci locikukũi ale o ci linga omo a kisikiwa. Pole, o ci linga “ndeci a panga kutima waye.” Eye eca eci a limbuka okuti ci sukiliwa kuenda wa kũlĩha okuti ci kuatisa kupange waco. Omunu ukuakueca o soliwe la Yehova, momo “Suku o sole u eca lesanju.” Embimbiliya likuavo li lombolola okuti: “Suku o sole vana va sole oku eca.”

Oku Konomuisa Lutate Ovina vi Sangiwa Vembimbiliya

(2 Va Korindo 9:15) Pandu pandu ku Suku omo liocali caye ca piãla.

utala wondavululi, 01.2016 kem. 12 ocin. 2

Vetiyiwa ‘Locali ca Piãla’ ca Suku

2 Paulu wa kũlĩhile okuti ocilumba ca Yesu ocindekaise cokuti olohuminyo viosi via Suku vi ka tẽlisiwa ocili. (Tanga 2 Va Korindo 1:20.) Eci ci lomboloka okuti ‘vocali caye ca piãla’ mua kongela ocilumba ca Yesu, ovina viosi viwa kuenda ocisola cocili Yehova a siata oku lekisa kokuetu. Ocili okuti, ocali caco ci komohĩsa kuenda ka tu tẽla oku ci lombolola. Nye tu yeva vutima omo liocali caco ci likasi? Ocali caco, ci tu vetiya oku li pongiyila ndati, Kocipito Conjivaluko Colofa via Kristu yi ka lingiwa Votatu keteke 23 Yelombo yunyamo wo 2016?

(2 Va Korindo 10:17) “Pole, u o lipanda, a lipandele Yehova.”

o despertai! 8/7/1999 kem. 20-21

Ciwa hẽ Oku Lipanda?

Vovisonehua vio Helasi, ondaka kau·khaʹo·mai okuti “oku kuata epela, oku sanjuka, oku litunula,” ya siata oku popiwa cikaile lonjila ya sunguluka ale lonjila ka ya sungulukile. Ndeci, Paulu wa popia okuti tu pondola oku ‘sanjuka omo lielavoko li tunda kulamba wa Suku.’ Eye wa popiavo hati: “Pole, u o lipanda, a lipandele Yehova.” (Va Roma 5:2; 2 Va Korindo 10:17) Eci ci lomboloka oku lipanda omo Yehova eye Suku yetu, okuti ocituwa cimue ci tu vetiya oku sandeka onduko yaye yiwa kuenda ovituwa viaye.

Oku Tangiwa Kuembimbiliya

(2 Va Korindo 7:1-12) A vamanji wa soliwi, omo tu kuete olohuminyo evi, tu liyelisi kevĩho liosi lioketimba kuenda kutima, okuti tu kola koku sumbila Suku. 2 Tu yikuili ovitima viene. Ka tua lingile umue cĩvi, ka tua vĩhisile laumue, ka tua pundile laumue. 3 Si ci popela oku vu pisi. Momo nda popele ale okuti ene wu kasi vovitima vietu, okuti tu fila kumosi kuenda tu kala kumosi komuenyo. 4 Ñuete utõi woku vangula lene. Ndi lipanda calua mekonda liene. Nda lembelekiwa calua; ndaño lohali yetu, pole, esanju liange li supoka. 5 Eci tua pitĩla ko Makedonia, atimba etu ka a tẽlele oku puyuka, pole, kuosi tua amamako oku sakalaisua—kosamua uyaki, vokati ohele. 6 Puãi Suku una o lembeleka vana va sumua, wa tu lembeleka loku iya kua Tito; 7 halokuiya kuayeko lika, te elembeleko eye a tambula mekonda liene, osimbu a tu lomboluila ndomo ene vu ñueteli ongeva, loku lisiõsiõla kuene kuenda ndomo wa sakalali lame; kuenje esanju liange lia livokiya calua. 8 Momo ndaño ndo sumuisi lukanda wange, haimo si liveli. Ndaño okuti tete nda ci livela (poku limbuka okuti ukanda waco wo sumuisi, ndaño vokatembo kamue), 9 cilo nda sanjuka, hamomoko wa sumuisiwi, te omo esumuo liene lio tuali koku likekembela. Momo esumuo liaco li sanjuisa Suku, okuti ka vu talisiwa ohali mekonda lietu. 10 Momo esumuo lina li sanjuisa Suku li tuala koku likekembela loku popeliwa kuna okuti ka ku koki oku livela; puãi esumuo lioluali li tuala koku fa. 11 Limbuki okuti esunga lialua lio kokeli esumuo li sanjuisa Suku, lio neneli oku liyelisa, oku suvuka eci cĩvi, oku sumbila Suku, onjongole yovutima, ombili kuenda oku pengulula eci ca vĩha! Kovina viosi evi, wa lekisi okuti wa pui eko. 12 Ndaño ndo soneheli, sia ci lingilile omo liomunu wa linga cĩvi, ale pamue yu wa lingiwa cĩvi, nda ci lingila oco ombili vu tu kueteli yi limbukiwe pokati kene kovaso a Suku.

OSEMANA 20-26 YA KUPEMBA

OVOKUASI A SANGIWA VONDAKA YA SUKU | 2 VA KORINDO 11–13

“Paulu wa Kuatele ‘Osongo Ketimba’”

(2 Va Korindo 12:7) omo liasituluilo alua nda tambula. Oco si ka lipande, kua nyĩhiwa osongo ketimba, okuti ungelo wa Satana o mbeta mbeta okuti si lipandi enene.

utala wondavululi, 15/6/2008 kem. 3-4

Va Kuete Ongusu Ndaño Va Hongua

Omo liekolelo upostolo Paulu a kuata, wa pinga ku Yehova oco o upe ocitangi a liyaka laco okuti ca kala ‘ndosongo vetimba’ liaye. Eye, wa likutilila ku Suku olonjanja vitatu, oco o popele kocitangi caco. Ndaño ka tua kũlĩhĩle ovitangi viaco, pole, via tepuluile esanju lia Paulu kupange wa Yehova. Ovitangi viaco, wa vi sokisa loku vetiwa olonjanja viosi. Omo liaco, Yehova wo tambulula hati: “Ocali cange cu ku tẽla, momo unene wange u loñolohela poku pekengua.” Yehova kopile osongo yaco vetimba lia Paulu. Ndaño losongo yaco, Paulu wamamako oku pandikisa, kuenje wa popia hati: “Eci nda pekengua, oco ñuete ongusu.” (2 Va  Kor. 12:7-10) Nye a yonguile oku popia lolondaka evi?

(2 Va Korindo 12:8, 9) Kuenje nda livondela ku Ñala olonjanja vitatu, okuti osongo yaco yi nunda. 9 Puãi eye wa ndi sapuila hati: “Ohenda yange ya piãla yi tẽla kokuove, momo unene wange u suapo poku hongua.” Kuenje ndi sanjukila calua oku lipandela oku hongua kuange, okuti unene wa Kristu u mbuila ndombalaka.

utala wondavululi, 1/1/2007 kem. 17 ocin. 17-18

Yehova Eca ‘Espiritu Liaye Kuava Vo Pinga’

17 Yehova poku tambulula ohutililo ya Paulu wo sapuila hati: “Ocali cange cu ku tẽla, momo unene wange u loñolohela poku pekengua.” Noke, Paulu wa popia hati: [“Ndi] sole cimue oku lipandela okupekengua kuange okuti unene wa Kristu u mbuila.” (2 Va  Korindo 12:9; Osamo 147:5) Ovolandu a lekisa okuti, ekuatiso Paulu a tambula ku Suku vonduko ya Kristu, lio teyuila ndosinge yi teyuila omunu kutanya. Koloneke vilo, Yehova wa siata oku tambulula olohutililo vietu lonjila yimuamue. Afendeli vaye, wa siata oku va teyuila ndosinge yi teyuila omunu kutanya.

18 Ocili okuti, osinge ka yimula ombela ale ofela. Pole, yi teyuila omanu va kasimo. Cimuamue haco ci pita ‘lunene wa Kristu,’ okuti ka u maliko ovitangi tu liyaka lavio cilo. Pole, u tu teyuila kolonjanjo violuali lulo lua vialiwa la Satana. (Esituluilo 7:9, 15, 16) Nda ove o kasi oku liyaka lovitangi vimue okuti viamamako, kolela okuti, Yehova wa vi kũlĩha. Kuenda ‘o yevelela olohutililo viove.’ (Isaya 30:19; 2 Va  Korindo 1:3, 4) Paulu wa popia hati: “Suku wa kolelua, kuenje ka tava okuti wu yonjiwa te leli wu tẽla, puãi kumuamue leyonjo u muisavo evelo lioku puluka okuti vu soka lalio.”—1 Va  Korindo 10:13; Va Filipoi 4:6, 7.

(2 Va Korindo 12:10) Omo liaco, nda sanjukila oku hongua, oku fukĩlisua, usuke, oku lambalaliwa, ovitangi kuenda oku talisiwa ohali omo lia Kristu. Momo eci ndi hongua, oco ñuata vali ongusu.

utala wondavulul, 1.2018 kem. 9 ocin. 8-9

‘Yehova o Kolisa Vana va Kava’

8 Tanga Isaya 40:30. Ndaño okuti tua loñoloha koku linga ovina vialua, pole, ka tu tẽla oku ci linga longusu yetu muẽle. Eci oco vosi tu sukila oku limbuka. Upostolo Paulu wa loñolohele koku linga ovina vialua, pole, ka ponduile oku linga ovina viosi a yonguile. Eci a likutilila catiamẽla kocitangi caco, Yehova wo sapuila hati: “Unene wange u suapo poku hongua.” Paulu wa kuata elomboloko lieci Yehova o sapuila. Eli olio esunga lieci a popela hati: “Eci ndi hongua, oco ñuata vali ongusu.” (2 Va Korindo 12:7-10) Eci ci lomboloka nye?

9 Paulu wa limbukile okuti kua kala ovina eye ka tẽlele oku linga longusu yaye muẽle. Pole, Yehova wa kuatisa Paulu oco a linge ovina okuti longusu yaye muẽle nda ka ci tẽlele. Handi vali, Yehova wa eca ku Paulu unene woku linga ovina vimue okuti lomue wa ponduile oku vi linga. Cimuamue haico ci pondola oku pita letu. Omo liaco, nda ongusu yetu yi tunda ku Yehova lacimue ci tu yula!

Oku Konomuisa Lutate Ovina vi Sangiwa Vembimbiliya

(2 Va Korindo 12:2-4) Nda kũlĩha ulume umue vu Kristu, okuti 14 kanyamo a pita—wambatiwa toke kilu liatatu—nda letimba nda haletimbako si cĩ, Suku eye wa ci kũlĩha. 3 Nda kũlĩha ulume waco—nda letimba nda haletimbako si cĩ; Suku eye wa ci kũlĩha— 4 okuti wambatiwa kocumbo celau kuenje eye wa yeva olondaka ka vi popaiwa kuenda ka ca sungulukile omunu oku vi popia.

utala wondavululi, 12.2018 kem. 8 ocin. 10-12 kelimi Lioputu

Apulilo a Lingiwa la Vakuakutanga

“Ilu liatatu” lia tukuiwa kukanda 2 Va Korindo 12:2, li lomboloka Usoma wa Mesiya wa vialiwa la Yesu kuenda 144,000 okuti yi tukuiwavo “ilu liokaliye.”—2 Pet. 3:13.

Ilu liaco, “Ilu liatatu” momo Usoma waco uviali umue u likasi, hawo wa velapo.

“Ocumbo celau” ci tiamisiwila (1) vocumbo celau yi laika oku kala palo posi, (2) Ocumbo celau konepa yespiritu yi ka kala kotembo yaco, okuti yi ka velapo ocumbo celau konepa yespiritu tu kuete cilo kuenda (3) “ocumbo celau” ca Suku kilu. Viosi vi ka kala otembo yimuamue voluali luokaliye.

(2 Va Korindo 13:12) Lilami pokati lasipulo ocisola.

perspicaz volume-1 kem. 325

‘Asipulo Ocisola.’ Akristão kocita catete, va enda oku lilama pokati ‘lasipulo a kola” (Va Roma 16:16; 1 Va Kor. 16:20; 2 Va Kor. 13:12; 1 Va Tes. 5:26) ale “asipulo ocisola” (1 Pet. 5:14), okuti va enda oku ci linga komanu vakuavimatamata vimuamue. Ocituwa caco coku lilama cakristão kocita catete, citava okuti ci likuata locituwa cosimbu ca va Heveru okuti omanu va enda oku lilama lasipulo. Ndaño okuti ovisonehua ka vi lombolola ovina vialua viatiamẽla kondaka yaco, ‘asipulo a kola’ ale “asipulo ocisola,” ca enda oku situlula ocisola kuenda omunga ya kala kekongelo Liakristão.—Yoa. 13:34, 35.

Oku Tangiwa Kuembimbiliya

(2 Va Korindo 11:1-15) Ndi yongola okuti vu pandikisa kokoveke kange. Pole, ene vu kasi oku pandikisa lame! 2 Ame ndo tati ciwa ndeci Suku a linga, momo ndo likuminyi oku weci kolohuela kulume umosi ndufeko wosombo eciwa ku Kristu. 3 Puãi ñuete ohele yokuti ndeci onyõha ya yonja Eva latutu ayo, ovitima viene vi yapuisiwa kesunguluko kuenda koku liyelisa kovituwa Kristu a sesamẽla. 4 Momo nda kuiya umue o kunda Yesu wiñi okuti una tua kunda hayeko, ale vu tambula espiritu likuavo okuti lina wa tambuli halioko, pamue olondaka viwa viñi okuti vina wa tavi havioko, ene vu tava ño lonjanga. 5 Ndi sima okuti ame si sule, okuti ovapostolo vene va kemãla va mbelapo. 6 Ndaño sia loñolohele koku vangula, pole, kukũlĩhĩso si sule; momo kolonepa viosi tuo situluili ovina viosi. 7 Anga nda linga ekandu poku liketisa okuti ene vu kemalisua omo ndo kundili olondaka viwa via Suku ocali? 8 Kakongelo akuavo nda punda poku tava oku tambula olombanjaile oco ndu kuatisi. 9 Eci nda kala lene ndaño nda sukile, pole, sia sakalasaile umue okuti o nekula, momo vamanji va tunda ko Makedonia va ñuatisa calua leci nda sukilile. Nda yuvula oku wu sakalaisi kuenje ndamamako oku ci linga. 10 Ndeci ocili ca Kristu ci kasi vokuange, si liwekapo oku lipanda volofeka vio Akaya. 11 Momo lie sio sakalasaili? Anga momo siu soli? Suku wa kũlĩha okuti ndu soli. 12 Puãi cilo ndamamako leci ñasi oku linga, okuti ndi tateka vana va sanda esunga lioku lisokisa letu kovina va kasi oku lipandela. 13 Momo omanu vaco ovapostolo vesanda, olonalavayi vieyuka elimbi, va liluvikiya ovo muẽle okuti ovapostolo va Kristu. 14 Kuenje ka ci komõhisa, momo Satana o liluvikiya ndungelo wocinyi. 15 Ka ci komõhisa nda oloñuatisi viaye vi liluvikiyavo ndoloñuatisi viesunga. Puãi esulilo liavo li lisoka lovilinga viavo.

OSEMANA 27 YA KUPEMBA-2 YEVAMBI

OVOKUASI A SANGIWA VONDAKA YA SUKU | VA GALATIA 1-3

“Ndo Vetela Evelo”

(Va Galatia 2:11-13) Kuenje eci Kefa eya ko Antiokea, ndo vetela evelo omo wa sesamẽlele oku pisiwa. 12 Momo osimbu alume vamue va tunda ku Tiago ka veyile handi, eye wa enda oku lia la vakualofeka; pole, eci alume vaco veya, wa liwekapo oku ci linga kuenda wa litepa lavo omo liusumba a kuatela vana va seviwa evamba. 13 Va Yudea vakuavo va likongela kokuaye kelimbi liaco, ndaño Barnaba wa yapuisiwavo lelimbi liavo.

utala wondavululi, 04.2017 kem. 27 ocin. 16

O Kuete hẽ Ovisimĩlo Ndevi Via Yehova Viatiamẽla Kesunga?

16 Tanga Va Galatia 2:11-14. Petulu wa kuatela usumba omanu. (Olosap. 29:25) Eye wa kũlĩhĩle ndomo Yehova a tendele Vakualofeka. Handi vali, wa kuatele usumba Akristão va Yudea va seviwa evamba va tunda ko Yerusalãi, okuti va ponduile oku u popia lãvi omo lioku kala Lakristão Vakualofeka. Upostolo Paulu wa sapuila Petulu okuti wa kala oku lekisa ombambe. Momo lie? Momo Paulu wa yeva okuti Petulu wa teyuila Vakualofeka kohongele yimue ya lingiwa kunyamo 49. (Ovil. 15:12; Va Gal. 2:13, vetosi) Akristão Vakualofeka Petulu a sumuisa, nye va yeva vutima? Anga hẽ elinga liaco lia va kokela ocilondokua? Petulu wopiwa hẽ ovikele viaye omo liakulueya aco?

(Va Galatia 2:14) Eci nda limbuka okuti ka va kasi oku endela vocili colondaka viwa, nda sapuila Kefa kovaso avo siti: “Nda ove u Yudea o lingainga ndeci ci lingainga vakualofeka kuenje ku lingainga ndeci va Yudea, o vetiya ndati vakualofeka oco va linge ovina va Yudea va lingainga?”

utala wondavululi, 15/3/2013 kem. 5 ocin. 12

Vana va Sole Yehova Lacimue ci va Kokela Ocilondokua

12 Ndaño usumba Petulu a kuatela omanu wo kokela ocilondokua, pole, wa amamako oku pokola ku Yesu kuenda ku Yehova. Eye wa likala Cime caye kovaso owiñi olonjanja vitatu hati, ko kũlĩhĩle. (Luka 22:54-62) Vepuluvi likuavo, Petulu wa lekisile etombo Kakristão Vakualofeka, momo ka va tendele Ndakristão va Yudea va seviwa evamba. Noke, upostolo Paulu wa konomuisa lutate ocitangi caco, kuenje, wa limbuka okuti, pokati Kakristão ka citava okuti, pa kala vamue va livelisapo. Ocili okuti, Petulu wa lekisa ocituwa cimue ka ca sungulukile. Osimbu ocitangi caco ka ca tepele ukamba wa vamanji, Paulu wa lungula Petulu. (Va Gal. 2:11-14) Anga hẽ Petulu wa lekisa epela omo lielungulo a tambula kuenda wa liwekapo oku linga olupesi lu tuala komuenyo ko pui? Sio, ka ci lingile. Eye wa tava kelungulo lia Paulu kuenje wa amamako oku yoloka.

Oku Konomuisa Lutate Ovina vi Sangiwa Vembimbiliya

(Va Galatia 2:20) Nda valeliwa kuti kumue la Kristu. Hameko vali ñasi lomuenyo, Kristu eye o kasi lomuenyo vokuange. Omuenyo ñasi lawo cilo vetimba ndu u kuetele omo nda kolela Komõla a Suku, una wa ndi sola kuenje wa lieca olumue mekonda liange.

utala wondavululi, 15/9/2014 kem. 14 ocin. 20-21

Vumba Suku Lekolelo Ndaño “Lohali Yalua”

20 Nye ci popiwa catiamela kalambalalo akuavo? Tu pondola oku yula ndati ovisimĩlo vi tu sumuisa? Onjila yimue yoku ci linga, oku sokolola eliangiliyo liocisembi ca Yesu. Eci oco ca kuatisa upostolo Paulu otembo a enda oku sima okuti, ukuahali. Momo, wa kũlĩhĩle okuti, Kristu ka filile omanu va lipua, pole, wa fila omanu vakuakandu. Eye wa soneha ndoco: “Nda kolela Omõla a Suku u wa [ndi] sola haeye wa liecela oku mopela.” (Va Gal. 2:20) Omo liaco, Paulu wa tava kocisembi, kuenda wa kũlĩhĩle okuti, ci pondola oku u kuatisa.

21 O pondolavo oku kuatisiwa nda wa tava okuti, ocisembi ombanjaile yimue ya eciwa la Yehova. Pole, ka ci lomboloka okuti, esumuo liaco li pua vonjanja yimosi. Vamanji vamue, citava okuti, va amamako loku pandikisa lesumuo liaco, toke kesulilo lioluali lulo. Pole, ivaluka okuti, vamanji vana va amamako loku pandikisa, va ka tambula onima. Kesulilo lieteke leteke, tu sukila oku ivaluka okuti, otembo yoku iya Kusoma wa Suku yi kasi ocipepi. Eci otembo yaco yi pitĩla, voluali luosi mu ka kala ombembua, kuenda omanu vosi va ka li pua. Omo liaco, tu sukila oku nõlapo oku iñila Vusoma wa Suku, ndaño lohali yalua.

(Va Galatia 3:1) Ene a va Galatia waveke! Helie wo yapuisi, anga Yesu Kristu wa lekisiwa kovaso ene poku valeliwa kuti?

perspicaz-volume 2 kem. 170

Ukanda ku va Galatia

Olondaka via Paulu viokuti “Ene a va Galatia waveke,” ka ci lekisa okuti eye wa kala oku sokolola lika kocimunga cimue comanu vatiamẽla kekova limue lia va galatia va kala konano yofeka yo Galatia. (Va Gal. 3:1) Pole, Paulu wa kala oku lungula omanu vamue vakongelo omo lioku yapuisiwa la umue u Yudea wa kala pokati kavo, okuti va Yudea va kala oku seteka oku lombolola esunga liavo pocakati celongiso lia Mose okuti, oku tendiwa ‘ndukuesunga vekolelo’ lekuatiso liocisila cokaliye, hacoko. (2:15–3:14; 4:9, 10) Omo liolonepele, akongelo o ko Galatia (1:2) Paulu a sonehela va likongelela va Yudea kuenda vana okuti ka va kaile va Yudea, okuti vana ka va kaile va Yudea va kuatele ukũlĩhĩso woku seviwa evamba la vana ka va seviwile evamba kuenda valua pokati kavo va tiamẽlele kepata lia va Seltika. (Ovil. 13:14, 43; 16:1; Va Gal. 5:2) Eci va kongeliwa va tukuiwa okuti, Akristão va Galatia momo va kala vofeka yimue yi tukuiwa Galatia. Olondaka viosi viukanda waco, via lekisa okuti Paulu wa kala oku sonẽhela vana a kũlĩhĩle ciwa konepa yonano yolupale luo Roma, okuti ka sonẽhelele omanu ka kulĩhĩle vo vocikanjo cikuavo kuna eye ka la nyula.

Oku Tangiwa Kuembimbiliya

(Va Galatia 2:11-21) Kuenje eci Kefa eya ko Antiokea, ndo vetela evelo omo wa sesamẽlele oku pisiwa. 12 Momo osimbu alume vamue va tunda ku Tiago ka veyile handi, eye wa enda oku lia lavakualofeka; pole, eci alume vaco veya, wa liwekapo oku ci linga kuenda wa litepa lavo omo liusumba a kuatela vana va seviwa evamba. 13 Va Yudea vakuavo va likongela kokuaye kelimbi liaco, ndaño Barnaba wa yapuisiwavo lelimbi liavo. 14 Eci nda limbuka okuti ka va kasi oku endela vocili colondaka viwa, nda sapuila Kefa kovaso avo siti: “Nda ove u Yudea o lingainga ndeci ci lingainga vakualofeka kuenje ku lingainga ndeci va Yudea, o vetiya ndati vakualofeka oco va linge ovina va Yudea va lingainga?” 15 Etu tu va Yudea koku citiwa, hatuvakuakanduko nda vakualofeka, 16 kuenje tua limbuka okuti omunu o tendiwa ndukuesunga hamekondako lioku kuama ocihandeleko, te loku kolela Yesu Kristu. Omo liaco, tua kolela Kristu Yesu okuti tu tendiwa ndavakuesunga omo liekolelo tu kuetele Kristu, hamekondako lioku kuama ocihandeleko, momo lomue o tendiwa ndukuesunga omo lioku kuama ocihandeleko. 17 Nda cilo tu vakuakandu osimbu tu sanda oku tendiwa ndavakuesunga omo lia Kristu, anga Kristu wa linga upika wekandu? Hacoko! 18 Nda ovina nda nyõla ndi vi tunga vali, ndi molẽhisa okuti ndukuesino. 19 Momo mekonda liocihandeleko nda fa kocihandeleko, okuti muila omuenyo ku Suku. 20 Nda valeliwa kuti kumue la Kristu. Hameko vali ñasi lomuenyo, Kristu eye o kasi lomuenyo vokuange. Omuenyo ñasi lawo cilo vetimba ndu u kuetele omo nda kolela Komõla a Suku, una wa ndi sola kuenje wa lieca olumue mekonda liange. 21 Omo liaco, si likali ohenda ya piãla ya Suku, momo nda esunga li tunda kocihandeleko, Kristu wa fa ño olivova.

    Alivulu Wumbundu (1993-2025)
    Tunda
    Iñila
    • Umbundu
    • Tumisa o link
    • Ceci o yongola
    • Copyright © 2025 Watch Tower Bible and Tract Society of Pennsylvania
    • Alungulo Onumbi
    • Onumbi Yoku Liteyuila
    • Ndomo o Liteyuila
    • JW.ORG
    • Iñila
    Tumisa o link