Ono Yovipama Viohongele Ekalo Lietu Tuakristão Kuenda Oku Kunda
OSEMANA 1-7 YEVAMBI LINENE
OVOKUASI A SANGIWA VONDAKA YA SUKU | VA KOLOSAI 1-4
“Luli Omunu Wosimbu Puãi Wali Omunu Wokaliye”
(Va Kolosai 3:5-9) Omo liaco, ipayi ovimatamata vietimba liene okuti vio kilu lieve, ndeci evĩho liukahonga, eliño, oloñeyi viukahonga, oloñeyi vĩvi kuenda ocipululu, okuti efendelo lioviteka. 6 Omo liovina evi, onyeño ya Suku iya kuava va vi linga. 7 Kosimbu ene muẽle wa kalivo lovituwa viaco komuenyo wene. 8 Pole, cilo vu sukila oku vimbapo viosi ndeci: onyeño, ekaka, evĩho, olondaka vioku pembula kuenda vomela wene ka mu ka tunde ombangulo yi kutisa osõi. 9 Ko ka likembi omunu lukuavo. Luli omunu wosimbu lovilinga vialio,
utala wondavululi 15/3/2011 kem. 10 ocin. 12-13
Tambula Espiritu Lia Suku, Lioluali Halioko
12 Espiritu lipi li vetiya ekalo liange? (Tanga Va Kolosai 3:8-10, 13.) Espiritu lioluali, li vetiya ovilinga vietimba. (Va Gal. 5:19-21) Eci tu liyaka lovitangi vimue ndeci, oku sepuiwa la vamanji, oku sumuisiwa, ale ceci va tu lueyela, tu pita loseteko yoku limbuka espiritu tu kasi lalio. Pole, nda tu kasi ciwa komuenyo ka tu limbuka oseteko yaco. Handi vali, eci tu kasi vonjo yetu pokolika, tu eca uvangi nda tu kasi oku vetiyiwa lespiritu sandu ale lioluali. Oku konomuisa ekalo lietu ci pondola oku tu kuatisa. Omo liaco, lipula ndoco: ‘Anga hẽ vokuenda kuolosãi epandu via pita, olombangulo viange kuenda ovituwa viange via eca uvangi wokuti Ndukristão wocili, ale sio?’
13 Espiritu lia Suku li pondolavo oku tu kuatisa ‘oku lula omunu wale lovilinga viaye vĩvi,’ kuenda oku ‘wala omunu wokaliye.’ Eci ci tu kuatisa oku kala vakuacisola kuenda vakuahenda. Tu ka kuata ocituwa coku liecela pokati lutima wosi, ndaño ceci tu kuata esunga lioku liyeya. Ka tu ka ecelela okuti eci va tu linga ovina vĩvi tu kuata “ocikumbiti lonyeño lekaka kuenda onjuela lusokui locipombo.” Pole, tu ka likolisilako oku ‘liombokela pokati kuenda oku lilinga ohenda.’—Va Efe. 4:31, 32.
(Va Kolosai 3:10-14) puãi wali omunu wokaliye, okuti omo liukũlĩhĩso wa suapo omunu waco o kasi oku pongoluiwa lesetahãlo lia Una wo lulika, 11 ka kuli u Helasi ale u Yudea, u wa seviwa evamba lu ka seviwile, ukuafeka yikuavo, u Skutia, upika, ale omunu wa yovoka; puãi Kristu eye ovina viosi kuenda o kasi la vosi. 12 Omo okuti wa nõliwi la Suku kuenje vu kola, haene wa soliwi, wali ohenda locikembe, lumbombe, loku omboka kuenda epandi. 13 Amamiko oku likapako omunu lukuavo, oku liecela pokati lutima wosi, nda umue o kuetele ondaka ukuavo. Ndeci Yehova o weceli lutima wosi, cimuamue haico vu linga. 14 Pole, kovina evi viosi, ca velapo wali ocisola, momo ci tokeka omanu vomunga yimuamue.
utala wondavululi 15/9/2013 kem. 17 ocin. 18-19
Anga hẽ wa Pongoluiwi?
18 Oco ondaka ya Suku yi tu kuatise oku linga apongoloko, tu sukila oku tanga Embimbiliya oloneke viosi. Kuli omanu valua va siata oku tanga Embimbiliya olonjanja vimue, kuenje, va kuete elomboloko liovina va tanga. Citava okuti wa sangele ale omanu vaco kupange woku kunda. Vamue pokati kavo va pondola oku tukula ovinimbu vimue Viembimbiliya va patekela. Pole, ukũlĩhĩso waco ka u pongolola ovisimĩlo viavo, kuenda ekalo liomuenyo wavo. Momo lie? Momo Ondaka ya Suku yi kuatisa lika omunu nda wa ecelela okuti, ‘yi veta kutima’ waye, oco a linge apongoloko. (Va Gal. 6:6) Omo liaco, tu sukila oku pita otembo loku sokolola ovina tu kasi oku lilongisa. Tu sukilavo oku li pula ndoco: ‘Ndi tava hẽ okuti, ovina ndi kasi oku lilongisa vi tunda ku Yehova, kuenda vi kasi ndu okuti o vangula lame? Sia limbukile hẽ okuti, ovina ndi lilongisa viocili? Nda kapako hẽ ovina nda lilongisa kuenda si vi tendi okuti omanu vakuavo ovo lika va sukila oku vi lilongisa? Ndi sima hẽ okuti Yehova o kasi oku vangula lame?’ Nda tua sokolola lutate kapulilo a lingiwa ndeti, ci tu kuatisa oku kuata ukamba la Yehova. Nda tua ci linga, ocisola tu kuetele Yehova ci livokiya. Eci ovina tua lilongisa vi veta kutima wetu, ci tu vetiya oku linga apongoloko komuenyo wetu.—Olosap. 4:23; Luka 6:45.
19 Oku tanga Embimbiliya oloneke viosi, loku sokolola ovina tua tanga, ci tu kuatisa oku amamako oku kapako ovina tua lilongisa kosimbu. Embimbiliya li tu vetiya hati: “Luli omunu wale lovilinga viaye vĩvi, kuenje wali omunu wokaliye. Omunu waco wokaliye o kasi loku tumbuluiwa.” (Va Kol. 3:9, 10) Nda tu amamako oku kuata elomboloko liovina tua lilongisa Vembimbiliya, ci tu kuatisa oku kuata ukũlĩhĩso wa Yehova Suku. Nda tua ci linga, tu wala omunu wokaliye, kuenda ci tu teyuila kayonjo a Satana.
Oku Konomuisa Lutate Ovina vi Sangiwa Vembimbiliya
(Va Kolosai 1:13, 14) Eye wa tu popela kuviali wowelema kuenda wa tu sondoluila kuviali Womõlaye a sole, 14 okuti vokuaye tu kuete eyovo omo liocisembi kuenda ongecelo yakandu etu.
perspicaz-volume 3 kem. 412 ocin. 2-4
Usoma wa Suku
“Kuviali Womõlaye a Sole.” Noke lioku pita oloneke ekũi tunde eci Yesu a enda kilu kopendekoste yunyamo 33 K. K., olondonge viaye via kuata uvangi wokuti eye “wa kemalisua kondio ya Suku” eci a eca kokuavo espiritu sandu. (Ovil. 1:8, 9; 2:1-4, 29-33) ‘Ocisila cokaliye’ ca viala kokuavo kuenje va linga ‘ofeka yi kola’ okuti o Isareli Yespiritu.—Va Hev. 12:22-24; 1 Pet. 2:9, 10; Va Gal. 6:16.
Kristu wa tumãla kondio ya Isiaye kuenda wa kala utue wekongelo liaco. (Va Efe. 5:23; Va Hev. 1:3; Va Fil. 2:9-11) Ovisonehua vi lekisa okuti oku upisa Kopendekoste 33 K. K., kua tumbikiwa usoma umue wespiritu kolondonge viaye. Upostolo Paulu poku sonehela Akristão vokocita catete vo ko Kolosai, wa tukula Yesu ndu o kuete usoma umue poku popia hati: “Eye [Suku] wa tu popela kuviali wowelema kuenda wa tu sondoluila kuviali Womõlaye a sole —Va Kol. 1:13; sokisa lelivulu Liovil. 17:6, 7.
Oku upisa Kopendekoste 33 K. K., usoma wa Kristu wespiritu, wa viala va Isareli yespiritu okuti, Akristão vana va citiwa lespiritu lia Suku oco va kale omãla vespiritu va Suku. (Yoa. 3:3, 5, 6) Eci Akristão vaco va citiwa lespiritu va ka tambula onima yavo kilu, ka va ka kala vali vemẽhi liusoma wa Kristu palo posi, pole, va ka kala olosoma kilu kumue la Kristu.—Esit. 5:9, 10.
(Va Kolosai 2:8) Lunguki okuti lomue o vu yapuisi lolondunge violuali kuenda ovisila viomanu, levi viatiamẽla koviholo violuali okuti ka via tundile ku Kristu;
utala wondavululi 15/8/2008 kem. 28 ocin. 9
Atosi Avelapo Vukanda wa Va Galatia, wa Va Efeso, wa Va Filipoi, Kuenda wa Va Kolosai
2:8—‘Ovina vipi viatiamẽla koluali’ Paulu a lungula? Eye wa lungula ovina violuali lua Satana via siata oku yapula omanu. (1 Yoano 2:16) Vovina viaco, mua kongela ovilongua viesanda, ovokuasi, kuenda atavo esanda oluali lulo.
Oku Tangiwa Kuembimbiliya
(Va Kolosai 1:1-20) Ame Paulu, upostolo wa Kristu Yesu omo liocipango ca Suku kuenda Timoteo manjetu, 2 ndi sonehela olosandu kuenda vamanji vakuekolelo kekongelo lio ko Kolosai va kasi vomunga kumue la Kristu: Ohenda ya piãla kuenda ombembua ya Suku Isietu yi kale lene. 3 Olonjanja viosi tu pandula Suku Isia ya Ñala yetu Yesu Kristu eci tu vu likutililiko, 4 tunde eci tua yeva ekolelo vu kuetele Kristu Yesu kuenda ocisola cene kolosandu viosi, 5 omo lielavoko lioku tambula eci co selekiwili kilu. Ndopo wa yevi elavoko liaco omo liesapulo liocili liolondaka viwa, 6 lina lieya kokuene. Ndeci olondaka viwa vi kasi oku ima apako, loku kula voluali luosi, cimuamue haico ci kasi oku lingiwa pokati kene, tunde keteke wa yevi ocili kuenda wa kũlĩhi ohenda ya piãla ya Suku. 7 Eci oco wa lilongisi ku Epafra haeye ukuenje wa soliwa letu kuenda ondingupange ya Kristu ya koleliwa oku tu kuatisa. 8 Eye wa tu sapuilavo ocisola vu tu kueteli ci tunda kekuatiso liespiritu lia Suku. 9 Eli olio esunga lieci okuti tunde eci tua ci yeva, ka tua la liwekapo oku vu likutililiko, loku pinga okuti vu yukisua lukũlĩhĩso wa suapo wocipango caye lolondunge viosi kuenda elomboloko li eciwa lespiritu, 10 okuti wendaendi ndeci ca sesamẽla ku Yehova loku u sanjuisa calua kuenda vu imi apako kupange wosi uwa, loku vokiya ukũlĩhĩso wa suapo wa Suku; 11 Kuenje vu kolisiwi lunene wosi lulamba waye wa piãla okuti vu pandikisi lesanju, 12osimbu vu eca olopandu ku Isia una wo angiliyili ocipiñalo colosandu vina vi kasi vocinyi. 13 Eye wa tu popela kuviali wowelema kuenda wa tu sondoluila kuviali Womõlaye a sole, 14 okuti vokuaye tu kuete eyovo omo liocisembi kuenda ongecelo yakandu etu. 15 Eye esetahãlo lia Suku una ka muiwa lovaso, haeye uveli woviluvo viosi; 16 momo ovina viosi via lulikiwa mekonda liaye, ci kale vio kilu, ci kale vio posi, ovina vi muiwa levi ka vi muiwa, ci kale ovialo, ci kale ovonene, pamue olombiali. Ovina viosi via lulikiwa mekonda liaye kuenda viatiamẽla kokuaye. 17 Pokati kovina viosi, Yesu eye wa lulikiwa tete kuenda ovina viosi vikuavo via lulikiwa mekonda liaye, 18 kuenda eye utue wetimba, okuti ekongelo. Eye efetikilo liovina viosi, haeye uveli wava va fa, omo liaco, eye, eye omunu watete kovina viosi; 19 momo Suku o sole okuti ovina viosi vi tẽlisiwa vokuaye, 20 kuenje mekonda lia Kristu, inalisa kokuaye ovina viosi vikuavo poku linga ombembua omo liosonde a pesela kuti wekangiso, ci kale ovina vio posi, ci kale vio kilu.
OSEMANA 8-14 YEVAMBI LINENE
OVOKUASI A SANGIWA VONDAKA YA SUKU | 1 VA TESALONIKE 1-5
“Amamiko Oku Likolisa Pokati Loku Lipamisa”
(1 Va Tesalonike 5:11-13) Omo liaco, amamiko oku likolisa pokati loku lipamisa, ndeci vu kasi ale oku ci linga. 12 Kaliye a vamanji, tu vu pingi okuti sumbili vana va talavaya calua pokati kene haivo vo songuili vu Ñala kuenda vo lunguli; 13 lekisi ocisola calua kokuavo loku va kapako omo liupange wavo. Kali lombembua pokati kene.
utala wondavululi 15/6/2011 kem. 26 ocin. 12
‘Sumbili Ava Va Linga Upange Pokati Kene’
12 Oku ‘songuila’ ekongelo ka ci lomboloka lika oku longisa. Ondaka yaco ya tukuiwavo kelivulu lia 1 Timoteo 3:4. Paulu wa lombolola okuti, ukulu wekongelo o sukila oku ‘songuila ciwa onjo yaye, loku pokuisa omãla kuenda oku va longisa esumbilo.’ Ondaka oku ‘songola’ ndomo ya tukuiwa palo, ka yi lomboloka lika oku longisa omãla vaye, pole, mua kongelavo oku tata epata kuenda oku ‘pokuisa omãla vaye loku va longisa esumbilo.’ Ocili okuti, akulu vekongelo va songola loku kuatisa vamanji vosi oku pokola ku Yehova.—1 Tim. 3:5.
utala wondavululi 15/6/2011 kem. 28 ocin. 19
‘Sumbili Ava Va Linga Upange Pokati Kene’
19 Nda wa tambula ombanjaile yimue ya posoka, nye o linga? Anga nda wa lekisa olopandu kombanjaile yaco poku yi tata ciwa? “Olongavelo komanu” ovio Yehova a eca kokuove vonduko ya Yesu Kristu. Onjila yimue yoku lekisa olopandu kalume vaco, oku yevelela lutate olohundo vi lingiwa lakulu vekongelo kuenda poku likolisilako oku kapako ovina va lombolola. O sukila oku eca atambululo kolohongele. O pondolavo oku eca olopandu viove poku kuatisa kupange woku kunda u songuiwa lakulu vekongelo. Nda ove wa kuatisiwa lelungulo wa tambula kukulu umue wekongelo, momo lie ku ecela olopandu kokuaye? Handi vali, momo lie ku ecela olopandu kapata akulu vekongelo? Ivaluka okuti, oco ukulu wekongelo a linge upange vekongelo, epata liaye olio lia eca otembo yina va sesamẽlele oku kala laye.
(1 Va Tesalonike 5:14) Handi vali, a vamanji tu vu vetiyi oco vu lunguli vana va sina, loku lembeleka vana va sumua, oku kuatisa vana va hongua kuenda oku pandikisa la vosi.
utala wondavululi 10.2017 kem. 10 ocin. 13
“Tu Soli . . . Lovilinga Kuenda Locili”
13 Kuatisa vana va hongua. Embimbiliya li tu handeleka okuti, tu sukila “oku kuatisa vana va hongua.” (1 Va Tesa. 5:14) Vamanji valua okuti va honguele, noke va pamisa vali ekolelo liavo. Pole, vakuavo va sukila okuti tu lekisa epandi kokuavo loku va kuatisa locisola. Tu va kuatisa ndati? Tu ci linga poku va lembeleka Lembimbiliya, oku va laleka oco tu kundile kumosi, ale oku va yevelela lutate. Handi vali, tu yuvuli oku sima okuti vamanjetu “va pama” ale “va hongua.” Tu sukilavo oku ivaluka okuti, vosi yetu tua siata oku linga ovina vi lekisa okuti tua pama ale tua hongua. Ndaño muẽle upostolo Paulu wa kũlĩhĩle okuti wa honguele. (2 Va Kor. 12:9, 10) Omo liaco, vosi yetu tu sukila ekuatiso kuenda elembeleko lia vakuetu.
utala wondavululi 15/2/2015 kem. 9 ocin. 16
Setukuli Umbombe Kuenda Ohenda ya Yesu
16 Olondaka vietu viohenda. Olondaka viaco, vi tu vetiya oku “[Kolisa] ava va leñela.” (1 Va Tesa. 5:14) Nye tu pondola oku popia oco tu va kolise? Tu pondola oku va sapuila okuti, tua va kapako. Tu sukila oku va pandiya, loku va kuatisa oku limbuka ovituwa viavo viwa, kuenda ovoloño avo. Tu va ivaluisavo okuti Yehova wa va kuatisa oku sanga ocili, kuenda wa va kapako. (Yoa. 6:44) Tu pondola oku va sapuila okuti Yehova wa kapako afendeli vaye “vakuavitima via teka,” ale vana “va kasi lovitima via samba.” (Osa. 34:18) Olondaka vietu viohenda vi pondola oku kavuluisa vana va sukila elembeleko.—Olosap. 16:24.
Oku Konomuisa Lutate Ovina vi Sangiwa Vembimbiliya
(1 Va Tesalonike 4:3-6) Omo liaco, ocipango ca Suku ceci okuti vu kola kuenda vu yuvula evĩho liukahonga. 4Omunu lomunu a kũlĩhe ndomo a tata etimba liaye loku kola kuenda esumbilo, 5 halokulivelako oloñeyi viukahonga ndeci ca siata pokati ka vakualofeka, vana okuti ka va kũlĩhĩle Suku. 6 Catiamẽla kondaka eyi, ko ka lingi cimue cĩvi manjene, momo Yehova o ka nyõla ovina evi viosi, ndeci tua ci popele ale tete, loku u lunguli calua.
perspicaz-volume 2 kem. 154-155
Ukahonga
Ukahonga ekandu limue okuti omunu o u linga, o pondola oku tundisiwa vekongelo Liakristão. (1 Va Kor. 5:9-13; Va Hev. 12:15, 16) Upostolo o lombolola okuti Ukristão o linga ukahonga, o luyela etimba liaye muẽle, loku talavaya lovimatamata viaye viuyali lonjila yimue ka ya sungulukile. O hongua konepa yespiritu, o vihĩsa ekongelo lia Suku kuenda ci leluka kokuaye oku kuata ovoveyi a koka olofa. (1 Va Kor. 6:18, 19) Eye o lingila eci cĩvi vamanjaye (1 Va Tes. 4:3-7) poku (1) vihĩhisa ekongelo loku li kutisa osõi kumue loku popiwa lavĩ (Va Hev. 12:15, 16) (2) poku tateka omunu wa linga laye evĩho liukahonga oku kuata utima wa yela kuenda nda okuti omunu waco ka kuelele, ka ka kuata vali olohuela viwa, (3) poku vihĩsa ovituwa viwa viepata liaye kuenda (4) poku sumuisa olonjali viaye, ohueli yaye ale omunu o laika oku kuela la una wa linga laye evĩho liukahonga. Eye ka patãla omanu, te Suku una o ko sombisa omo liekandu alinga.—1 Va Tes. 4:8.
(1 Va Tesalonike 4:15-17) Eci oco tuo sapuili omo liondaka ya Yehova okuti, etu tu kasi lomuenyo okuti tu popeliwa ketukuluko lia Ñala, ka tu livangela oku pinduiwa kovaso ya vana va pekela tete kolofa; 16 momo Ñala o loka kilu loku vilikiya lolukandi londaka yungelo unene, lolumbeta lua Suku kuenje vana va fila vu Kristu ovo va ka pinduiwa tete. 17 Noke etu tu kasi lomuenyo, haetu tu ka popeliwa, tu ambatiwa kumue lavo valende oku lisanga la Ñala vilu; kuenje tu kala la Ñala otembo yosi.
utala wondavululi 15/7/2015 kem. 14 ocin. 14-15
“Eyovo Liene li Kasi Ocipepi”!
14 Nye ci ka pita eci Goge ya Magoge a ka fetika oku ñualelapo afendeli va Suku? Embimbiliya li lekisa okuti, Mõlomunu o ka “tuma ovangelo ha vongolola ava vaye va nõliwa tunde kolofela vikuãla, tunde kesulilo liokilu lieve, kuenje tunde kesulilo lilu.” (Marko 13:27; Mat. 24:31) Upange woku ongolola ka u tiamisiwila kotembo eci Akristão olombuavekua va nõliwa tete. Ka u lombolokavo ondimbukiso ya sulako olombuavekua vi kasi handi palo posi vi ka tambula. (Mat. 13:37, 38) Oku kapiwa ondimbukiso ya sulako ku ka lingiwa eci ohali ya piãla ka ya fetikile handi. (Esit. 7:1-4) Upange waco woku ongolola u lomboloka nye? U lomboloka otembo eci olombuavekua via siala handi palo posi vi ka tambula onima yavo, kuenje vi enda kilu. (1 Va Tes. 4:15-17; Esit 14:1) Ovina viaco vi ka lingiwa noke eci Goge ya Magoge a ka fetika oku ñualelapo afendeli va Yehova. (Esek. 38:11) Noke, ndomo Yesu a ci popele, “vakuesunga va [ka] taima ndekumbi Vusoma wa Isiavo.”—Mat. 13:43.
15 Anga hẽ ci lomboloka okuti olombuavekua vi ka “ambatiwa utiku”? Akristão valua vesanda va tava kelongiso liokuti, va ka enda kilu letimba liavo liositu. Va siatavo oku sima okuti eci Yesu a keya oco a viale ongongo, va ko mola lovaso avo. Pole, Embimbiliya li lekisa okuti, oku tukuluka kua Yesu ka ku muiwa lovaso omanu poku popia ndoco: “Ondimbukiso ya [Mõlomunu] yi tukuluka kilu,” kuenje, Yesu o keyilila “valende o kilu.” (Mat. 24:30) Embimbiliya li popiavo okuti, “ositu losonde oku piñala usoma wa Suku ka ci tava.” Omo liaco, omanu vana va lavoka oku enda kilu tete va ka sukila oku “pongoluiwa ocisalukila, ndoku pakula kuiso, poku sika kuolumbeta lua sulako.” (Tanga 1 Va Korindo 15:50-53.) Ka tua siatele oku tukula ondaka “oku ambatiwa utiku” oco tu lombolole ulandu waco, momo yi tiamisiwila kelongiso Liakristão vesanda. Pole, olombuavekua vakuekolelo via siala handi palo posi, vi ka ongoluiwa pamosi ocipikipiki.
Oku Tangiwa Kuembimbiliya
(1 Va Tesalonike 3:1-13) Eci tua limbuka okuti ka tu tẽla oku iya kokuene, tua nõlapo oku kala ño ko Atenai; 2kuenje tua tuma Timoteo manjetu haeye ondingupange ya Suku yolondaka viwa via Kristu, oco a vu kolise loku pamisa ekolelo liene, 3 okuti lomue o luluma omo liohali yaco. Momo ene muẽle wa kũlĩhi okuti ka tu tẽla oku yuvula ohali yaco. 4 Momo eci tua kala lene, tua enda oku vu sapuili okuti tu laika oku tala ohali kuenda eci oco ca pita ndomo wa ci kũlĩhi. 5 Kuenje eci nda limbuka okuti si tẽla oku iya kokuene, nda tuma Timoteo oco a kũlĩhĩse ekolelo liene, sanga vu yapuisiwa Luyonji kuenda upange wetu u linga ño wolivova. 6 Kaliye Timoteo wa tunda kokuene oku iya kokuetu, yu wa tu nenela esapulo liwa liatiamẽla kekolelo liene kuenda ocisola cene, okuti vu kasi oku amamako oku tu ivaluka, haene vu tu kuetele ongeva ndeci etu. 7 A vamanji, eli olio esunga lieci okuti kovitangi vietu viosi, lohali, tu lembelekiwa mekonda liene kuenda ekolelo vu lekisa. 8 Omo okuti wa talami ngõ vu Ñala, letuvo tua kolapo. 9 Olopandu vipi tu eca ku Suku catiamẽla kokuene omo liesanju lialua tu kuete kovaso a Suku yetu mekonda liene? 10 Utanya luteke tu likutilila lutima wosi oco tu vu moli, okuti tu vokiya kueci ca kamba oco ekolelo liene li pame. 11 Kaliye Suku yetu haeye Isia kuenda Ñala yetu Yesu va yulule onjila oco tu iye kokuene. 12 Ñala a ecelele okuti ocisola vu likuetele pokati ci livokiya, ndeci ocisola tu vu kueteli, 13 okuti toke kesulilo eye o pamisa ovitima viene via pua eko koku kola kovaso a Suku yetu haeye Isia, ketukuluko lia Ñala yetu Yesu lolosandu viaye viosi.
OSEMANA 15-21 YEVAMBI LINENE
OVOKUASI A SANGIWA VONDAKA YA SUKU | 2 VA TESALONIKE 1-3
“Omunu Ukuevĩho o Situluiwa”
(2 Va Tesalonike 2:6-8) Ene wa kũlĩhi eci ci kasi oku tateka, okuti eye o situluiwa votembo yaye muẽle. 7 Ocili, elumbu liomunu waco ukuevĩho li kasi ale oku talavaya, toke eci una o kasi oku li tateka ka kalako vali. 8 Kuenje omunu ukuevĩho o situluiwa, una Ñala Yesu a ka ponda lespiritu liomela waye kuenda u wimula loku molẽha kuetukuluko liaye.
perspicaz-volume 1 kem. 704
Oku Vumba Suku
Kuli elumbu likuavo okuti ka liatiamẽlele “kelumbu li kola” lia Yehova. ‘Elumbu liomunu ukuevĩho.’ Lia kala elumbu limue Kakristão vocili momo koloneke viupostolo Paulu, ‘omunu ukuevĩho’ handi ka situluiwile. Ndaño noke liomunu waco oku situluiwa, handi wa ponduile oku amamako oku kala elumbu komanu vamue momo nda wa linga evĩho liaye poku likembisa kuenda vonduko yoku vumba Suku. Pole, nda ca kala unanguluke catiamẽla koku vumba Suku locili. Paulu wa popia okuti elumbu liomunu ukuevĩho’ lia kala ale oku situluiwa koloneke viaye, momo vekongelo Liakristão mua kala ovisimĩlo ka via sungulukile, ka vi likuata locihandeleko okuti nda via koka ocisoko cunanguluke. Noke, lia laikele oku kunduiwa la Yesu Kristu koku molẽha kuetukuluko liaye. Ulume u onanguluke okuti wa vetiyiwa la Satana, nda wa lambalala ‘wosi o litukula “suku” ale ocina cimue ci vumbiwa (ko Helasi: sé·ba·sma). Omo liaco, ulume waco unyali wa Suku wa tumiwa la Satana, wa laikele oku yapuisa valua lo koka enyõleho ku vana va kuama ovituwa viaye. Ovilinga ‘viomunu ukuevĩho’ via laikele oku mõleha poku likembisa oku vumba Suku.—2 Va Tesa. 2:3-12; sokisa lelivulu lia Mat. 7:15, 21-23.
(2 Va Tesalonike 2:9-12) Pole, oku molẽha kuomunu ukuevĩho kuiya omo liovilinga via Satana kumue lovopange osi a komõhisa, lolondimbukiso viesanda, lovikomo, 10 kuenda elimbi liosi lievĩho ku vana va nyõleha, ndefetuluinyo omo ka va tava oku sola ocili cina ci pondola oku va popela. 11 Eli olio esunga lieci Suku a ecelelela elimbi oco va kembiwe okuti va tava kuhembi waco, 12 kuenda vosi yavo va pisiwa omo ka va tava kocili, pole, va sanjukila ño evĩho.
perspicaz-volume 2 kem. 804 ocin. 6
Uhembi
Yehova Suku “ecelelela elimbi” komanu vana va nõlapo uhembi, “oco va kembiwe okuti va tava kuhembi waco” okuti kolondaka viwa viatiamẽla ku Yesu Kristu hakoko. (2 Va Tes. 2:9-12) Onumbi eyi ya lomboluiwa kovina via pita la soma Ahava wo ko Isareli. Ovaprofeto vesanda va sapuila Ahava okuti o ka yula uyaki la va Ramoti Gileada, osimbu okuti Mikaya uprofeto wa Yehova wo sapuila okuti va ka yuliwa. Ndomo ca situluiwa vocinjonde cimue ku Mikaya, Yehova wa ecelela okuti espiritu limue li linga “espiritu liuhembi” vomẽla wovaprofeto va Ahava. Espiritu liaco, lia talavaya lunene walio muẽle kuenje va limbika ocili, okuti va popia ovina ovo muẽle va yonguile oku popia kuenda evi Ahava a yonguile oku yeva kokuavo. Ndaño okuti Ahava wa lunguiwa, wa nõlapo oku yapuisiwa lovohembi kuenje wa pondiwa.—1 Olos. 22:1-38; 2 Asa. 18.
Oku Konomuisa Lutate Ovina vi Sangiwa Vembimbiliya
(2 Va Tesalonike 1:7, 8) Pole, ene vu tala ohali, Suku o ko wĩhi ekavuluko kumue letu eci Ñala Yesu a situluiwa tunde kilu lovangelo vaye va pama, 8 londalu yulienge, osimbu a nena efetuluinyo ku vana ka va kũlĩhĩle Suku, la vana ka va pokola kolondaka viwa via Ñala yetu Yesu.
perpicaz-volume 1 kem. 149 ocin. 8
Ondalu
Petulu wa soneha okuti “ilu li kasiko ndeti kuenda ongongo, ya pongiyiwila ondalu.” Ndomo ca lekisiwa vovisonehua vikuavo, ondalu ya tukuiwa yocindekaise yina yi lomboloka enyõleho. Ndeci Etande liokoloneke via Noha ka lia nyõlele ilu kuenda osi, pole, lia nyõla lika omanu vavĩ, cimuamue haco okuti etukuluko lia Yesu Kristu lovangelo vakuonene li ka kala londalu yulienge, okuti kuiyilila lika enyolẽho lioluali kuenda manu vavĩ va panga onepa ko kualio.—2 Pet. 3:5-7, 10-13; 2 Va Tes. 1:6-10; sokisa lelivulu lia Isa. 66:15, 16, 22, 24.
(2 Va Tesalonike 2:2) ovitima viene ka vi ka tatamisue lonjanga ale oku yokokisua lesapulo li molẽha ndu okuti lia tunda ku Suku, pamue esapulo lia vanguiwa, ale ukanda u molẽha ndu wa tunda kokuetu okuti eteke lia Yehova li kasi palo.
perspicaz-volume 2 kem. 402-403 ocin. 4
Oku vetiyiwa
“Esapulo li molẽha ndu okuti lia tunda ku Suku”—Liocili kuenda Liuhembi. Kelimi lio Helasi ondaka pneuʹma (espiritu) ya siata oku tukuiwa lonjila yimue yi likasi kovisonehua vimue viovapostolo. Ndeci, kukanda 2 Va Tesalonike 2:2 Paulu o sapuila vamanjaye voko Tesalonikke oco ovitima viavo ka vi ka tatamisue lonjanga ci kale “lesapulo li molẽha ndu okuti lia tunda ku Suku” [lit., “espiritu”], pamue esapulo lia vanguiwa, ale ukanda u molẽha ndu wa tunda kokuetu, okuti eteke lia Yehova li kasi palo.” Ocili okuti Paulu o tukula ondaka pneuʹma (espiritu) oku ci sokisa lolonjila vioku sapela ndeci, “esapulo lia vanguiwa,” ale “ukanda.” Omo liaco, catiamẽla kocisonehua eci, elivulu Comentário Sobre as Escrituras Sagradas, de Lange (p. 126), li popia hati: “Lekuatiso liaco, Upostolo o tukula ocisimĩlo cespiritu catiamẽla kolondaka viuprofeto.” Upange wa lingiwa la Vincent losapi hati: Estudos de Palavras do Novo Testamento, lia popia hati: “Vespiritu. Lekuatiso liovitumasuku viomanu via enda oku tukuiwa kolohongele Viakristão, via enda oku molẽha ndu okuti via tunda ku Suku.” (1957, Vol. IV, p. 63) Omo liaco, osimbu okuti ovisonehua vimue vonepa eyi vi tukula ondaka pneuʹma kuenda volonepa vikuavo “espiritu,” ovisonehua vikuavo vi tukula “ondaka yovaprofeto” (BJ; CT); “esituluilo liovina vi keya” (CBC; MH; PIB); “ocitumasuku” (LR; Ne); “esapulo liespiritu” (AT); “oku vetiyiwa” (D’Ostervald; Segond [francês]); “esapulo li molẽha ndu okuti lia tunda ku Suku” (NM).
Oku Tangiwa Kuembimbiliya
(2 Va Tesalonike 1:1-12) Ame ndi Paulu, la Siluano kumue la Timoteo, tu sonehela ekongelo lia va Tesalonike li kasi vomunga kumue la Suku Isietu kuenda Ñala Yesu Kristu: 2 Ohenda ya piãla lombembua yi tunda ku Suku Isia kuenda ku Ñala Yesu Kristu yi kale lene. 3 A vamanji, olonjanja viosi tu vetiyiwa oku pandula Suku omo liene. Eci ca sunguluka, momo ekolelo liene kuenda ocisola vu likueteli pokati vi kasi oku livokiya calua. 4 Omo liaco, tu vu pandiyi pokati kakongelo a Suku omo liepandi liene, lekolelo kalambalalo osi kuenda oloseteko vu kasi oku pita lavio. 5 Owu uvangi wokuti oku tetulula kua Suku kuesunga, momo vu tendiwa okuti vu sesamẽla oku tambula Usoma wa Suku, una vu kasi oku talisiwila ohali. 6 Oku tetulula kua Suku kuesunga, momo eye o fetuluinya ohali kuava vo kokeli ohali. 7 Pole, ene vu tala ohali, Suku o ko wĩhi ekavuluko kumue letu eci Ñala Yesu a situluiwa tunde kilu lovangelo vaye va pama, 8 londalu yulienge, osimbu a nena efetuluinyo ku vana ka va kũlĩhĩle Suku, la vana ka va pokola kolondaka viwa via Ñala yetu Yesu. 9 Ovo va ka tambula eyambulo lienyõleho ka li pui, okuti ka va kala vali kovaso a Ñala kuenda kovaso yulamba waye wa piãla, 10 eci eye a muisua ulamba kumue lolosandu viaye kuenje keteke liaco vosi vana va lekisa ekolelo kokuaye va ko komõha, momo wa koleli kuvangi tuo wĩhi. 11 Omo liaco, olonjanja viosi tu vu likutililako ku Suku, okuti Suku yetu o vu tendi okuti vu sesamẽla oku kovongiwa kuenda o tẽlisa cosi ciwa cu sanjuisa leci wa lingi omo liekolelo liene. 12 Eci ci lingiwila oco onduko ya Ñala yetu Yesu yi muisue ulamba kokuene, lene vu muila ulamba kokuaye, ndeci ci kasi ohenda ya piãla ya Suku yetu kuenda ya Ñala Yesu Kristu.
OSEMANA 22-28 YEVAMBI LINENE
OVOKUASI A SANGIWA VONDAKA YA SUKU | 1 TIMOTEO 1–3
“Likolisilako Oku Linga Upange Uwa”
(1 Timoteo 3:1) Ondaka eyi ya koleliwa: Nda ulume umue o sanda ocikele coku kala mitavaso, o yongola upange uwa.
utala wondavululi 08.2016 kem. 16 ocin. 3
O Tẽla hẽ Oku Limbuka Esilivilo Lioku Amamako Oku Pamisa Ekolelo Liove?
3 Tanga 1 Timoteo 3:1. Upostolo Paulu wa vetiya vamanji va kala oku “sanda” ocikele coku kala olomitavaso. Omunu o yongola oku sandiliya ocina cimue ci kasi ocipãla, o sukila oku likolisilako kuenda oku olõla eka liaye oco a kuate ocina caco. Kaliye sokolola eci catiamẽla kumanji umue o yongola oku kala oñuatisi yekongelo. Eye o limbuka okuti o sukila oku likolisilako oku mioñolola ovituwa viaye. Eci a fetika oku talavaya ndoñuatisi yekongelo o sukila oku amamako oku talavaya calua oco a linge ukulu wekongelo.
(1 Timoteo 3:13) Momo alume vana va vumba lonjila yimue ya sunguluka, va kasi oku sandiliya oluhimo luwa, kuenda va pondola oku vangula lutõi catiamẽla kekolelo liavo vu Kristu Yesu.
upange wetu wusoma 2/1979 kem. 3 ocin. 7
Vana va “Sandiliya Oluhimo Luwa”
7 Ca leluka oku limbuka esunga lieci Paulu a popela okuti alume vaco va “sandiliya oluhimo luwa.” Ka ci lomboloka oku lingila upange onembele yimue ndeci vamue va sima. Pole, oloñuatisi viekongelo okuti “va vumba lonjila yimue ya sunguluka,” va kũlĩha okuti va ka tambula asumũlũho a Yehova kuenda a Yesu kuenje va sumbiwa lavamanji loku tambula ekuatiso liavo. “Va pondola oku vangula lutõi catiamẽla kekolelo liavo vu Kristu Yesu.” Omo okuti va likuete omunga koku tẽlisa ocikele cavo, va soliwe calua omo liupange uwa va linga; va kolapo vekolelo kuenda ka va kuete usumba woku vangula catiamẽla kekolelo liaco.
Oku Konomuisa Lutate Ovina vi Sangiwa Vembimbiliya
(1 Timoteo 1:4) ndaño oku yevelela asapulo esanda kuenda oku konomuisa ovikoti via vakukululu. Ovina viaco ka vi kuete esilivilo, pole, vi koka lika atatahãi, ka vi nena lacimue ci tunda ku Suku kuenda kekolelo.
perspicaz-volume 2 kem. 196-197
Ulala Wovikoti Via Vakukululu
Ka ca kuatele elomboloko poku lilongisa kuenda oku vangula catiamẽla kovina viaco, capiãla enene kotembo Paulu a sonehẽla Timoteo. Ka ca kuatele vali esilivilo oku soneha ovikoti via vakukululu oco ku kũlĩhĩwe kepata omunu a tiamẽla, momo Suku ka tavaile vali etepiso pokati ka va Yudea Lavakualofeka vekongelo Liakristão. (Va Gal. 3:28) Ulala wovikoti via vakukululu wa lekisile ale ocitumbulukila Kristu a citiwa okuti, kocikoti ca Daviti. Handi vali, nda ka pa pitile otembo yalua tunde eci Paulu a soneha onumbi eyi oco o Yerusalãi yi nyõliwe kumue lulala wovikoti via va Yudea. Suku wa ecelela okuti vi nyõliwa. Omo liaco, Paulu ka yonguile okuti Timoteo kumue lavamanji vakongelo va yapuisiwa poku pesela otembo koku konomuisa ovikoti via vakukululu okuti ka ca kuatele esilivilo koku pamisa ekolelo liavo. Ulala wovikoti via vakukululu wa lomboluiwa Vembimbiliya una u lekisa okuti Kristu eye Mesiya, owo lika u kuete esilivilo Kakristão. Ovikoti vikuavo via vakukululu via lekisiwa Vembimbiliya, vi eca uvangi wocili u lekisa okuti olio elivulu limue liulandu wasapulo a suapo.
(1 Timoteo 1:17) Kaliye ku Soma yonahũlũlua, okuti ka fi, ka muiwa lovaso, haeye lika Suku, ku kale esumbilo kuenda ulamba oloneke vi enda ño-o hũ ka vi pui. Amene.
kuata ukamba kem. 12 ocin. 15
“Tala, u Eye Suku Yetu”
15 Onduko yimue ya kapiwila lika Yehova yeyi okuti “Soma yonahũlũlua.” (1 Timoteo 1:17; Esituluilo 15:3) Eci hẽ ci lomboloka nye? Kokuetu oku kuata elomboloko liaco ca tĩla, momo ovisimĩlo vietu ka via lipuile, pole Yehova ukuatembo ka yi pui, cikale konyima cikale kovaso. Osamo 90:2 yi popia hati: “Tunde ka ku ci toke ka ku ci, ove muẽle Suku.” Omo liaco, Yehova ka kuete efetikilo, eye o kasi tunde konahũlũlua. Ca sunguluka oku tukuiwa okuti “Ukuasimbu,” momo wa kala ale otembo eci handi omunu ale ocina cimue Voluali ka ca lulikiwile! (Daniele 7:9, 13, 22) Helie o pondola oku patãla catiamẽla kocikele caye coku kala Ñala Ukuonene Wavelapo?
Oku Tangiwa Kuembimbiliya
(1 Timoteo 2:1-15) Catete ndi pinga okuti vu likutililako omanu vosi oku va lombelako kuenda oku va lingilako apingilo, loku va panduilako, 2 ci lingilivo olosoma kuenda ku vosi va kasi komangu ya velapo, oco tu kale lomuenyo umue wonjuka haiwo wombembua, loku sumbila Suku lutima wosi. 3 Ovina viaco viwa kuenda via sunguluka kovaso a Suku Upopeli wetu, 4 una o yongola okuti omanu vosi va kuata ukũlĩhĩso wa suapo wocili oco va popeliwe. 5 Momo kuli Suku umosi lika kuenda mitakati umosi pokati ka Suku lomanu, okuti omunu waco Kristu Yesu, 6 una wa lieca ndocisembi coku yovola vosi—kuenje eci ci imbiwa uvangi kotembo yaco. 7 Oco ku eciwe uvangi waco, nda nõliwila oku kala ukundi kuenda upostolo—ñasi oku vangula ocili, si kasi oku kemba—nda nõliwilavo oku kala ulongisi wa vakualofeka catiamẽla kekolelo kuenda kocili. 8 Kuenje ndi yongola okuti kovitumãlo viosi alume va amamako oku kola kuenda oku tulika ovaka avo poku likutilila, okuti ka va ci lingi lonyeño pamue lolonamalãla. 9 Cimuamue haico, ndi yongola okuti akãi va wala loku liposuisa ciwa, lesunguluko kuenda olondunge, haloku vindiwako esinga lonjila yimue ka ya sungulukile, pamue ulu, ale olomota viondongo, pamue uwalo wa tĩla calua, 10 ndeci ca sesamẽla akãi va popia okuti va vumba Suku, omo liovilinga viwa. 11 Ukãi a lekise epokolo loku ũha osimbu a longisiwa vekongelo. 12 Si ecelela okuti ukãi o longisa, pamue o viala ulume, pole, amameko oku ũha. 13 Momo Adama eye wa lulikiwa tete, noke Eva. 14 Handi vali, Adama ka kembiwile, ukãi eye wa kembiwa kuenje wa linga ukuekandu. 15 Pole, eye o popeliwa omo a cita omãla, puãi eye te wamamako vekolelo, vocisola kuenda oku kola loku kuata olondunge.
OSEMANA 29 YEVAMBI LINENE-4 YENYENYE
OVOKUASI A SANGIWA VONDAKA YA SUKU | 1 TIMOTEO 4–6
“Oku Sumbila Suku Kuenda Ovokuasi”
(1 Timoteo 6:6-8) Ocili, koku vumba Suku ku tunda onganyu yalua, nda tua sanjukila eci tu kuete. 7 Momo ka tua nenele lacimue voluali kuenda ka tu ambata lacimue. 8 Omo liaco, nda tu kuete oku lia leci tu wala, tu sanjuka lovina viaco.
Utala wondavululi 1/6/2003 kem. 9 ocin. 1-2 kelimi Lioputu
Lilongisa Elumbu Lioku Sanjukila Eci tu Kuete
Ocina cimue ca kuatisa Paulu oku kuata esanju komuenyo, oku sanjukila ovina a kuatele. Nye ci lomboloka oku sanjukila eci tu kuete? Vupopi wa leluka, ci lomboloka oku sanjukila ovina tu kuete ndaño okuti vitito. Catiamẽla kondaka yaco, Paulu wa sapuila ekamba liaye Timoteo hati: “Ocili, koku vumba Suku ku tunda onganyu yalua, nda tua sanjukila eci tu kuete. Momo ka tua nenele lacimue voluali kuenda ka tu ambata lacimue. Omo liaco, nda tu kuete oku lia leci tu wala, tu sanjuka lovina viaco.”—1 Timoteo 6:6-8.
Limbuka okuti Paulu wa sokisa oku sanjukila ovina tu kuete loku vumba Suku. Wa limbuka okuti, esanju liocili li tunda koku vumba Suku yetu, ci lomboloka okuti tu sukila oku pitisa kovaaso upange tu lingila Suku okuti ovokuasi havoko. O “ku lia leci tu wala” via kala lika ovina eye a sukilile oco amameko oku vumba Suku. Omo liaco, ku Paulu elumbu lioku sanjukila ovina a kuatele lia kala oku kolela ku Yehova ci kale poku liyaka lovitangi ale sio.
(1 Timoteo 6:9) Puãi vana va yongola oku kala olohuasi, va wila veyonjo lo vonjanjo kuenda voloñeyi vĩvi vi tuala omanu kenyõleho.
o despertai 6/2007 kem. 6 ocin. 2
Ovitangi vi Yilila Poku Nõlapo Oku Kuata Ovokuasi
Ocili okuti omanu valua, ka va fi omo lioku sanda ovokuasi. Pole, ci pondola oku kapa kohele omuenyo wavo osimbu va sakalala poku tẽlisa ocimãho cavo. Handi vali, ekalo liomuenyo li pongoloka nda asakalalo kupange ale ekambo liolombongo li pondola oku kokela omunu usumba, ekambo liotulo, evalo liutue ka li piti ale apute vomẽla okuti, ovitangi viuhayele vi pondola oku tu kokela olofa. Ndaño okuti omunu o ci limbuka kuenda o kuata onjongole yoku pongolola asakalalo aye, citava okuti ka ci tẽliwa vali. Citava okuti ka koleliwa vali lohueli yaye, omãla ka va lekisa vali ovituwa viwa kuenda uhayele wavo u nyõleha. Pamue omunu waco o pondola oku pongolola ekalo liomuenyo waye, pole, o ka sukila alikolisilo alua. Ocili okuti omanu vaco, va litoma lohali yalua.—1 Timoteo 6:10.
(1 Timoteo 6:10) Momo ocisola coku sola olombongo oco olumbombo luovina viosi vĩvi kuenje poku sandiliya ocisola caco, vamue va yapuisiwa vekolelo kuenda va litoma lohali yalua.
o despertai 11/08 kem. 6 ocin. 4-6
Olonumbi Epandu vi tu Kuatisa Oku Kuata Esanju Liocili
Ndomo tua kũlĩhĩsa vocipama catete, omanu vana va litumbika koku sanda ovokuasi ndu okuti owo ocina cavelapo oco va kuate ekalo liwa, va kasi oku likokela ovitangi. Oku kuata ekalo liaco liomuenyo, ka li nena lika esumuo pole li nenavo ovitangi vialua. Ndeci, poku sanda ovokuasi omunu ka kuata vali ukamba uwa lepata kuenda akamba. Handi vali, oku kala otembo yalua kupange kuenda oku kuata asakalalo, ku pumbisa otulo omanu valua. Elivulu Liukundi 5:12 li popia hati: “Otulo tuondingupange tu sõsa, ndaño wa lia citito ndaño wa lia ca lua; puãi ekuto liohuasi liu pumbisa otulo.”
Olombongo vi pondolavo oku yapuisa. Yesu Kristu wa popia eci catiamẽla ‘koku yapuisiwa lukuasi.’ (Marko 4:19) Volondaka vikuavo, ovokuasi a likuminya esanju, pole, ka a ci tẽlisa. Ovokuasi a vetiya lika onjongole yoku kuata vali ovina vikuavo. Elivulu Liukundi 5:10 li popia hati: “U o sole olombongo kekuta olombongo.”
Oku sola olombongo ci koka lika ovitangi okuti oku vi tetulula hacoko, kuenje ci nena esumuo, asakalalo kuenda ungangala. (Olosapo 28:20) Ovina vi nena esanju ocituwa coku kala ukuacali, ukuakuecela, oku kuata ovituwa viwa, ocisola kuenda ukamba uwa la Yehova.
Oku Konomuisa Lutate Ovina vi Sangiwa Vembimbiliya
(1 Timoteo 4:2) omo liombambe yomanu va vangula uhembi, ovitima viavo vi kakuiwa ndocivela ca sanya.
kali vocisola, kem. 23-24 oci. 17
O Pondola Oku Kala Ndati Lutima wa Sunguluka?
17 Upostolo Petulu wa soneha ndoco: “Kali lutima wa sunguluka.” (1 Petulu 3:16) Oku kuata utima wa sunguluka kovaso a Yehova Suku, esumũlũho limue linene. Momo u tu kuatisa oku yuvula ovituwa vĩvi tua siata oku mola voluali lulo. Paulu wa lekisa okuti omanu vamue “ovitima viavo via momẽla, huti ño, via kakuiwa locivela ca sanya.” (1 Timoteo 4:2) Eka liomunu nda lia siata oku kuata ocivela ca sanya, li tindila. Omanu valua ka va yevi vali osõi, lusumba kuenda ka va yokoka noke yoku linga ocina cimue ka ca sungulukile, momo utima wavo wa momẽla ndovaka a tindila. “Tua sumũlũha calua,” momo ka tu kuete utima wa siva.
(1 Timoteo 4:13) Toke eci njiya, amamako oku litumbika koku tangela omanu, koku lungula kuenda koku longisa.
perspicaz-volume 2 kem. 688 ocin. 5, 6
Oku Tangela Omanu
Vekongelo Liakristão. Kocita catete, omanu havosiko va kuatele oviña Viembimbiliya kuenje ca kuatele esilivilo oku tangela omanu. Upostolo Paulu wa vetiya oku tangela omanu vakongelo Akristão kuenda wa tuma okuti ovikanda viaye vi pitĩla kakongelo akuavo oco vi tangiwevo. (Va Kol. 4:16; 1 Va Tes. 5:27) Paulu wa vetiya umãlehe Ukristão Timoteo oku “amamako oku litumbika koku tangela omanu, koku lungula kuenda koku longisa.”—1 Tim. 4:13.
Oku tangela omanu ku sukila oku lingiwa ciwa. (Hav. 2:2) Omo okuti voku tangela omanu mua kongela oku longisa vakuetu, omunu o tanga o sukila oku sokolola lutate ovina a kasi oku tanga kuenda oku kuata elomboloko liovina usonehi a yonguile oku popia, oku tanga lutate oco ka ka pitiye kolonjeveleli ovina via penga. Ndomo ca lekisiwa kelivulu Liesituluilo 1:3, una o tanga lolukandi kuenda vana va yeva olondaka viocitumasuku va sumũlũha.
Oku Tangiwa Kuembimbiliya
(1 Timoteo 4:1-16) Ondaka yi tunda ku Suku yi popia okuti kovaso yoloneke vamue va ka yapuisiwa vekolelo, loku yevelela asapulo esanda a molẽha ndu okuti a tunda ku Suku kuenda alongiso olondele,2 mo liombambe yomanu va vangula uhembi, ovitima viavo vi kakuiwa ndocivela ca sanya. 3 Ovo va lemela oku kuela loku handeleka omanu oku yuvula oku lia ovina Suku a lulika vina vi liwa lolopandu la vana va kuete ekolelo kuenda va kũlĩha ciwa ocili. 4 Momo oviluvo viosi via Suku viwa kuenda lacimue ci nyehuiwa nda ci tambuiwa lolopandu, 5 momo ovina viaco vi kolisiwa omo liondaka ya Suku kuenda ohutililo. 6 Poku eca elungulo liaco ku vamanji, o linga oñuatisi yiwa ya Kristu Yesu wa tekuiwa lolondaka viekolelo kuenda elongiso liwa lina ove wa kuama. 7 Pole, yuvula asapulo esanda, hao a vanguiwa lakãi va kuka. Handi vali, lipindisa ove muẽle kuenda kuata ocimãho coku sumbila Suku. 8 Oku pokuisa etimba ku kuete esilivilo litito, pole, oku sumbila Suku ku silivila kovina viosi, momo ci tu kuatisa komuenyo wa cilo kuenda komuenyo wo kovaso. 9 Ondaka eyi ya koleliwa kuenda yi sesamẽla oku taviwa. 10 Eli olio esunga lieci tu talavayela calua loku likolisilako, momo tua kapa elavoko lietu ku Suku o kasi lomuenyo, una okuti Upopeli womanu vosi, ca piãla enene vakuekolelo. 11 Amamako oku eca olonumbi evi loku vi longisa. 12 Lomue ka ka ku lavise omo wumalẽhe. Puãi lekisa ongangu yiwa ku vakuekolelo, koku vangula, kovituwa, kocisola, kekolelo kuenda koku pua eko. 13 Toke eci njiya, amamako oku litumbika koku tangela omanu, koku lungula kuenda koku longisa. 14 Ku ka sepule ongavelo o kuete, yina ya ku ĩhiwa locitumasuku, eci ocisoko cakulu vekongelo ca ku kapa ovaka. 15 Sokolola kovina evi; litumbika kokuavio, okuti omanu vosi va limbuka oku amako kuove. 16 Lilava ove muẽle, lavavo oku longisa kuove. Pandikisa lovina evi, momo poku ci linga o lipopela ove muẽle kuenda vana va ku yeva.