Ono Yovipama Viohongele Ekalo Lietu Tuakristão Kuenda Oku Kunda
OSEMANA 5-11 YENYENYE
OVOKUASI A SANGIWA VONDAKA YA SUKU | 2 TIMOTEO 1-4
“Suku ka tu Ĩhile Utima Wusumba”
(2 Timoteo 1:7) Ongusu ya pama ya Suku ka ya tu ĩhile utima wusumba, pole, ya tu ĩha utima wunene, wocisola kuenda wolondunge.
utala wondavululi 15/5/2009 kem. 15 ocin. 9
Ene Amalẽhe, Lekisi Oku Kula Kuene Kespiritu
9 Oco Paulu a kuatise Timoteo, wo sapuila hati: “Suku ka tu ihile utima wusumba, te wunene, kuenda wocisola loku lipokuisa.” (2 Tim. 1:7) Voku ‘pokuisa utima,’ mua kongela oku kuata uloño woku sokolola kuenda olondunge viocili. Mua kongelavo oku pandikisa kovitangi viosi tu liyaka lavio okuti ka tu lingi ovina ndomo tu yongola. Amalẽhe vamue okuti ka va kulile kespiritu, va siata oku kuata usumba woku liyaka lovitangi kuenje va lupukila koku pekela calua, oku pita otembo yalua loku tala o Televisãu, oku sipa eliamba, uholua, oku tiamisila utima kovipito, kuenda oku linga ukahonga. Akristão va vetiyiwa “oku imbapo oku tomba Suku lovipango violuali, loku kala lesuluviko lesunga kuenda ovimuenyo vi kemalisa Suku voluali lulo.”—Tito 2:12.
(2 Timoteo 1:8) Ku ka kuate osõi yoku imbila uvangi Ñala yetu kuenda ame ndimandekua mekonda liaye, pole, tala ohali omo liolondaka viwa poku kolela kunene wa Suku.
utala wondavululi 1/3/2003 kem. 22 ocin. 7
‘Kuati Utõi kuenda Pandikisi!’
7 Upostolo Paulu wa sonehela Timoteo poku u sapuila hati: “Suku ka tu ihile utima wusumba, te wunene, . . . [kuenda] ku ka kuate osõi eci wimbila Ñala yetu uvangi.” (2 Timoteo 1:7, 8; Marko 8:38) Eci tu tanga olondaka evi, tu sukila oku li pula etu muẽle ndoco: ‘Anga hẽ nda siata oku kuata osõi letavo liange? Ndi kuete hẽ utõi? Kupange kuna ndi talavaya (ale kosikola ndi tangela), nda siata hẽ oku sapuilako vakuetu okuti Ndimbangi ya Yehova? Nda siata hẽ oku limbika etavo liange? Ndi kuete hẽ osõi yoku lekisa ovituwa vialitepa pokati ka vakuetu? Nda siata hẽ oku lekisa esanju omo liukamba wange la Yehova?’ Nda manji umue o kuete ovisimĩlo ka via sungulukile viatiamẽla kupange woku kunda olondaka viwa viusoma ale pamue o kuete ohele yoku lekisa ovituwa vina via litepa levi viomanu, eye o sukila oku ivaluka elungulo Yehova a eca ku Yehosua eci o sapuila hati: “Kolisiko. Kuati utõi.” Lalimue eteke ka tuka ivaliko okuti, ovisimĩlo via vakuetu kupange ale kosikola havioko vi kuete esilivilo pole, tu sukila oku ivaluka ndomo Yehova la Yesu va tenda ovina.—Va Galatia 1:10.
Oku Konomuisa Lutate Ovina vi Sangiwa Vembimbiliya
(2 Timoteo 2:3, 4)Pandikisa kohali ndesualali liwa lia Kristu Yesu. 4 Lalimue esualali li sakalala lomĩlu yoku sanga onganyu, oco li sanjuise u wo sonehisa kusualali.
utala wondavululi 07.2017 kem. 10 ocin. 13
Sandiliya Ovokuasi Ocili
13 Timoteo wa kala ulume umue ukuekolelo. Noke lioku nõliwa “ndesualali liwa lia Kristu Yesu,” Paulu wo sapuila hati: “Lalimue esualali li sakalala lomĩlu yoku sanga onganyu, oco li sanjuise u wo sonehisa kusualali.” (2 Tim. 2:3, 4) Olondonge via Yesu koloneke vilo, oku kongelamo ci pitahãla ohuluwa ya va va kasi kupange wa kundi votembo yosi, va siata oku li kolisilako oku kapako elungulo lia Paulu. Ovo va tamalãla kasapulo uhembi oluali lulo lueyuka ocipululu. Va kapako onumbi yokuti: “Ukuakulevala o linga upika wu u levalisa.” (Olosap. 22:7) Satana o yongola okuti, tu pesela otembo yetu longusu yetu yosi poku li tumbika kolomĩlu violuali luaye. Vamue va siata oku levala olombongo vialua oco va lande onjo yimue, ekãlu, oku feta kosikola, ale poku kuela. Nda ka tua kuatele utate, tu kala lolofuka vokuenda kuanyamo alua. Omo liaco, tu lekisa olondunge nda tu leluisa omuenyo wetu, loku yuvula olofuka kuenda oku pesela olombongo vialua. Nda tua ci linga, tu vumba ciwa Suku okuti, ka tu kala apika volomĩlu voluali lulo.—1 Tim. 6:10.
(2 Timoteo 2:23) Yuvula olondaka viuveke levi vioku lipatãla, omo wa kũlĩha okuti vi koka uyaki.
utala wondavululi 15/7/2014 kem. 14 ocin. 10
Afendeli va Yehova va “Litepe Levĩho”
10 Koloneke vilo, afendeli va Yehova ka va siatele oku liyaka calua locitangi cunanguluke vekongelo. Pole, nda tua fetika oku tiamisila utima wetu kalongiso ka a sangiwa Vembimbiliya, tu sukila oku kuata utõi woku a yuvula lonjanga. Ka ca sungulukile oku pesila otembo yetu koku vangula lolonanguluke ndeci: Oku sapela laye, oku tambulula ovikanda viaye vo Internet, ale lonjila yikuavo yoku sapela. Ndaño poku sapela lomunu waco tu ci linga lonjongole yoku u kuatisa, pole, oku sapela laye ci lekisa okuti, ka tu kasi oku pokola kolonumbi Viembimbiliya tua konomuisa. Omo okuti tuafendeli va Yehova, tu sukila oku yuvula ukamba lolonanguluke.
Oku Tangiwa Kuembimbiliya
(2 Timoteo 1:1-18) Ame ndi Paulu, upostolo wa Kristu Yesu omo liocipango ca Suku kuenda liohuminyo yomuenyo yi kasi vu Kristu Yesu, 2 ndi sonehela Timoteo omõla wa soliwa: Ohenda ya piãla, ocali, lombembua yi tunda ku Suku Isia kuenda ku Kristu Yesu Ñala yetu yi kale love. 3 Ndi pandula Suku, una ñasi oku lingila upange u kola lutima wa yela, ndeci vakukululu yange va linga, okuti sia la liwekapo oku ku kongela vapingilo ange uteke lutanya. 4 Eci ndi ivaluka asuelẽla ove, ñuata ongeva yoku ku mola, oco ndi kuate esanju lialua. 5 Momo ndi ivaluka ekolelo liove okuti haliombambeko, ekolelo lina nyokulu yove Loisi kuenda ina yove Eunike va kuata kuenje nda kolela okuti halio o kuetevo. 6 Omo liaco, ndu ku vetiya oco amameko oku kuata ombili poku talavaya longavelo ya Suku, yina wa tambula eci nda ku kapa ovaka. 7 Ongusu ya pama ya Suku ka ya tu ĩhile utima wusumba, pole, ya tu ĩha utima wunene, wocisola kuenda wolondunge. 8 Ku ka kuate osõi yoku imbila uvangi Ñala yetu kuenda ame ndimandekua mekonda liaye, pole, tala ohali omo liolondaka viwa poku kolela kunene wa Suku. 9 Eye wa tu popela, loku tu kovonga oco tu linge olosandu, hamekondako liovilinga vietu, te omo liocipango caye kuenda ohenda ya piãla. Eci ca tu ĩhiwa tunde osimbu vu Kristu Yesu, 10 cilo puãi ca molẽha ciwa mekonda lietukuluko Liupopeli wetu, okuti Kristu Yesu una wa imula oku fa kuenje wa nena kutanya omuenyo kuenda eci ka ci fi omo liolondaka viwa, 11 vina nda nõliwila oku kala ukundi, upostolo kuenda ulongisi. 12 Omo liovina evi, oco ndi talisiwila ohali, pole, si kuete osõi. Momo ame nda kũlĩha Una nda kolela kuenda nda kolela okuti eye o tẽla oku teyuila ovina viosi ndo kundika toke keteke lia sokiyiwa. 13 Kakatela kolondaka viocili vina wa yeva kokuange lekolelo kuenda ocisola ci tunda voku kala vomunga kumue la Kristu Yesu. 14 Lava eci ca ku kundikiwa omo liespiritu sandu, lina li kasi vokuetu. 15 Ove wa kũlĩha okuti, alume vosi vofeka yo Asia va ndi yanduluka, oku kongelamo Fungelo, la Hermogene. 16 Ñala a lekise ohenda ku vakuanjo ya Onesiforo, momo wa ndi lembeleka kuenda ka kuatele osõi omo ndi kasi vokayike. 17 Puãi eci eye a kala ko Roma, wa ndi sandiliya calua toke eci a ndi sanga. 18 Ñala a ecelele okuti eye o sanga ohenda ku Yehova keteke lia sokiyiwa. Kuenje ove wa kũlĩha ciwa upange wosi eye a linga ko Efeso.
OSEMANA 12-18 YENYENYE
OVOKUASI A SANGIWA VONDAKA YA SUKU | TITO 1–FILEMONE
“Oku Nõla Akulu Vekongelo”
(Tito 1:5-9) Nda ku sia ko Kurete oco o pengulule ovina via penga, loku nõla akulu vekongelo volupale lolupale ndomo nda ku handeleka: 6 nda okuti ulume umue wa pua eko, ulume wukãi umosi, nda o kuete omãla vakuetavo, haivo ka va vanguiwa okuti va linga ovina viumbondo, ale va sina. 7 Momo ca sesamẽla okuti kalei ka Suku o kala mitavaso ya pua eko, ka kala ukuakulituna, ukuakutema lonjanga, ukuakukolua, ongangala, okuti ka liveli onganyu yevĩho, 8 ukuakuyekisa akombe, ukuakusola eci ciwa, ukualondunge, ukuesunga, ukuacili, ukuakulikandangiya, 9 haeye o kakatela kondaka yocili luloño woku longisa, loku vetiya poku longisa eci ca sunguluka kuenda o lemẽla vana va patãla elongiso liocili.
utala wondavululi 15/11/2014 kem. 28-29 kelimi Lioputu
Apulilo a Lingiwa la Vakuakutanga
Ndaño okuti Ovisonehua ka vi lombolola olonjila viosi vi enda oku kuamiwa poku eca ovikele kosimbu, pole, tu pondola oku kũlĩha ndomo ca enda oku lingiwa. Paulo la Barnaba eci va kala oku tiukila konjo noke liungende wavo watete wumisionaliu, “va nõla akulu vakongelo osi, va linga ohutililo loku likandangiya okulia kuenda va va kundika ku Yehova una ovo va tava.” (Ovilinga 14:23) Noke liayamo alua, Paulu wa sonehẽla Tito ekamba liaye liungende hati: “Nda ku sia ko Kurete oco o pengulule ovina via penga, loku nõla akulu vekongelo volupale lolupale ndomo nda ku handeleka.” (Tito 1:5) Citava okuti Timoteo, una wa enda oku linga ovongende alua lupostolo Paulo, wa kuatelevo ocikele caco. (1 Tim. 5:22) Ovovangi aco, a lekisa okuti ovikele viaco via enda oku eciwa lavamanji va nyula akongelo, okuti ovapostolo kuenda akulu vekongelo ko Yerusalãi havoko.
Lekuatiso lionumbi yaco, Osungu Yolombangi Via Yehova ya linga epongoloko konjila ndomo ku ñoliwa akulu vekongelo kuenda oloñuatisi viekongelo. Oku upisa keteke 1 yosãi Yenyenye Linene wo 2014, ovikele vi ka eciwa ndoco: manji o nyula akongelo o konomuisa lutate ovikanda vioku nõla oloñuatisi vekongelo kueda akulu vekongelo. Vokuenda kuosemana a nyula akongelo, eye o sanda oku kulĩha vamanji va laika oku tambula ovikele, poku talavaya lavo kupange woku kunda eci ci ecelela. Noke lioku konomuisa ovikanda kumue locimunga cakulu vekongelo, manji o nyula akongelo o kuete ocikele coku ñola akulu vekongelo kuenda oloñuatisi vekongelo vocikanjo eye a nyula. Poku ci linga, tu ka kuama ongangu ndomo ya enda oku lingiwa kocita catete.
Helie o kuete ocikele coku linga upange waco? Tunde kosimbu, “ukuenje wa kolelua haeye wa lunguka,” o kuete ocikele ca velapo coku ĩha okulia vakuanjo yaye. (Mateo 24:45-47) Voku ci linga, mua kongela oku konomuisa Ovisonehua lekuatiso liespiritu sandu, oco va kuate elomboloko lia suapo liolonumbi Viembimbiliya vi lekisa ndomo ocisoko ca Yehova voluali luosi lia sokiyiwa. Noke, eye o tu kuatisa oku kapako olonumbi viaco. Ukuenje wa kolelua haeye wa lunguka o nõlavo vamanji vosi va nyula akongelo kuenda vana va panga onepa Kocimunga Cakulu vo Betele. Kuenje, akulu ko Betele va eca ekuatiso oco olonumbi viaco vi kapiweko. Akulu vekongelo va kuete ocikele coku konomuisa lutate nda vamanji va nõliwa va kuete ovituwa vi li kuata lolonumbi Viembimbiliya oco va tambule ocikele vekongelo. Vamanji va nyula akongelo va kuetevo ocikele cinene coku kulihĩsa lutate kuenda lohutililo nda vamanji va yilikiwa lakulu vekongelo va sesamẽla oku tambula ocikele coku kala akulu vekongelo ale oloñuatisi viekongelo.
Oku Konomuisa Lutate Ovina vi Sangiwa Vembimbiliya
(Tito 1:12) Umue pokati kavo, okuti uprofeto wavo muẽle, wa popia hati: “Va Kurete olohembi lika, ovinyama via tema, haivo ovisiãi via sapa.”
utala wondavululi 15/5/1989 kem. 31 ocin. 5 kelimi Lioputu
Apulilo a Lingiwa la Vakuakutanga
Eye ka kaile oku tava ketepiso liakova via lingiwa ku va Kurete. Tu pondola oku kolela kovina viaco momo, Paulo wa kulihĩle okuti ko Kurete kua kala Akristão vawa va taviwa la Suku haivo eye a waveka lespiritu sandu liaye. (Ovil. 2:5, 11, 33) Kua kala Akristão valua va sumbile Suku oco va sokiye akongelo “kolupale lo lupale”. Ndaño akritão vaco ka va lipuile, tu pondola oku kolela okuti ka va kaile olohuembi ale ovisapanu kuenda ovisiãi, momo, nda va kuatele ovituwa viaco, nda ka va taviwile la Yehova. (Va Filipoi 3:18, 19; Esituluilo 21:8) Ndeci ca siata koloneke vilo kolofeka viosi, citava okuti vo Kurete, mua kalavo omanu vakuacili va sumũile omo liovituwa vĩvi via kala pokati kavo kuenda va kuatele onjongole yoku tava kolondaka viwa.—Esekiele 9:4; sokisa lelivulu Liovilinga 13:48.
(Filemone 15, 16) Pamue eli olio esunga lieci eye a litepela kokuove okatembo kamue, okuti o tiuka vali kokuove oloneke ka vi pui, 16 ka kala vali ndupika, pole, upika ci sule, o linga manjove wa soliwa, ca piãla kokuange, puãi ca velapo kokuove omo o linga manjove vetimba kuenda kupange wa Ñala.
utala wondavululi 15/10/2008 kem. 31 ocin. 4
Atosi a velapo vukanda ku Tito, ku Filemone kuenda ku va Heveru
15, 16—Momo lie Paulu ka pingilile ku Filemone oco a ece elianjo ku Onesimo? Paulu wa yonguile oku amamako locikele caye coku ‘kunda usoma wa Suku, kuenda oku longisa ovina viatiamẽla ku Ñala Yesu Kristu.’ Eye wa nõlelepo oku yuvula oku litenga vovina violuali, ndeci ovitangi viatiamẽla kapika.—Ovilinga 28:31.
Oku Tangiwa Kuembimbiliya:
(Tito 3:1-15) Amamako oku va ivaluisa okuti va sumbila loku pokola kolombiali kuenda kolonguluvulu, loku liangiliyila oku linga upange wosi uwa, 2 ka va ka popie umue lãvi, ka va ka kale vakuavama, pole va sunguluke, loku lekisa umbombe lomanu vosi. 3 Momo letuvo kosimbu tua kala aveke, vakuesino, tua enda oku yapuisiwa, tua kala apika voloñeyi vialua kuenda vayele, tua lingaile evĩho, loku kuata onya, tua suvukiwile loku lisuvuka pokati. 4 Pole, eci ohenda Yupopeli wetu Suku kuenda ocisola a kuetele omanu ca situluiwa, 5 (hamomoko liovilinga viesunga tua linga, puãi omo liohenda yaye), wa tu yovola omo lioku tu yelisa kuna ku tu tuala komuenyo kuenda wa tu lingisa omanu vokaliye mekonda liespiritu sandu. 6 Eye wa tu ĩha ocali espiritu liaco vonduko ya Yesu Kristu Upopeli wetu, 7 okuti noke yoku tendiwa ndavakuesunga omo liohenda yaye ya piãla, tu linga vakapiñala omo lielavoko liomuenyo ko pui. 8 Olondaka evi via koleliwa kuenda ndi yongola okuti o kũlĩhĩsa ciwa ovina evi, oco okuti vana va tava ku Suku va tiamisila utima wavo kovopange avo awa. Ovina evi viwa kuenda vi kuatisa omanu. 9 Pole, yuvula olombangulo viuveke, loku konomuisa ovikoti, oku lihoyisa kuenda oku liyakela Ocihandeleko, momo ovio ka vi kuatisa, havio ka vi kuete esilivilo. 10 Omunu wosi o sandula elongiso liesanda, noke yoku lunguiwa onjanja yatete leyi yavali, litepa laye, 11 momo wa kũlĩha okuti omunu waco wa yapuka vonjila kuenda o kasi oku linga ekandu kuenje o lipisa eye muẽle. 12 Eci ndi tuma Artema, ale Tukiko kokuove, yayulako oku iya kokuange ko Nikopoli, momo oko nda sokiya oku kala otembo yombambi. 13 Likolisilako oku kuatisa Sena, una wa kũlĩha ciwa Ocihandeleko kuenda Apolosi okuti ka va kambela cimue kungende wavo. 14 Vamanjetu va lilongisevo oku linga upange uwa oco va kuatise eci ku kala esukila, okuti ka va kala ndava ka va imi apako. 15 Vosi va kasi lame va ku tumisa ovilamo. Lamisapo vosi va tu sole vekolelo. Ohenda ya piãla yi kale lene vosi.
OSEMANA 19-25 YENYENYE
OVOKUASI A SANGIWA VONDAKA YA SUKU | VA HEVERU 1-3
‘O Sole Esunga, Haye wa Suvuka Evĩho’
(Va Heveru 1:8) Oku tukula eci catiamẽla Komõla eye wa popia hati: “Suku eye ocalo cove oloneke vi enda ño-o hũ ka vi pui kuenda epangati Liusoma wove, epangati liesunga.
utala wondavululi 15/2/2014 kem. 3 ocin. 8
Sivayi Kristu Osoma ya Velapo!
8 Kunyamo wo 1914, Yehova wa vialeka Yesu komangu Yusoma kilu. Omo okuti “epangati liuviali wa Yesu olio epangati liesunga,” ci tu vetiya oku tava okuti, uviali waco u ka amamako otembo ka yi pui. Eye o kuete omoko yoku viala, momo ‘Yehova eye wo kapa komangu yaco.’ Omo liaco, uviali wa Yesu u ka kala ‘otembo ka yi pui.’ Ove hẽ ku sanjukila oku vumba Yehova vemẽhi Liusoma a nõla?
(Va Heveru 1:9) Ove o sole esunga, haive wa suvuka evĩho. Oco Suku, okuti Suku yove a ku wavekela lulela wesanju lialua okuti, vakuene ci sule.”
utala wondavululi 15/2/2014 kem. 3 ocin. 7
Sivayi Kristu Osoma ya Velapo!
7 Tanga Osamo 45:6, 7. Omo okuti Yesu wa solele calua ovina via sunguluka, kuenda wa suvuka ovina vi eca etombo ku Isiaye, Yehova wo waveka komangu Yusoma. Yesu wa wavekiwa ‘lulela wonjolela,’ okuti, wa velapo olosoma vina via wavekiwile ko Yuda okuti, via tunda kepata lia Daviti. Momo lie? Momo Yehova eye wa waveka Yesu. Handi vali, Yehova wa waveka Yesu oco a linge Osoma, kuenda Ocitunda Cavelapo. (Osa. 2:2; Va Hev. 5:5, 6) Esunga likuavo lieli liokuti, uviali wa Yesu u kasi kilu, pole, ka u kasi palo posi.
Oku Konomuisa Lutate Ovina vi Sangiwa Vembimbiliya
(Va Heveru 1:3) Eye esetahãlo liulamba wa Suku, haeye ocindekaise ca suapo cekalo Liaye kuenda o tata ovina viosi londaka yunene waye. Kuenje noke yoku yelisa akandu etu, wa tumãla kondio ya Suku kilu.
perspicaz volume-2 kem. 382 ocin. 1
Esetahãlo
Anga hẽ Yesu olonjanja viosi wa likolisilako oku lekisa ovituwa via Isiaye?
Omõla uveli wa Suku,okuti noke wa linga Yesu, esetahãlo lia Suku. (2 Va Kor. 4:4) Omo okuti Omõla aco wa kala una Suku a popele hati: “Tu luliki omunu ukuesetahãlo lietu,” esetahãlo liaco Liomõla la isiaye, okuti Ululiki, lia kala tunde eci omõla a lulikiwa. (Efet. 1:26; Yoa. 1:1-3; Va Kol. 1:15, 16) Eci a kala palo posi, ndomunu wa lipua, eye wa enda oku setukula ovituwa via Isiaye lonjila ya velapo okuti omanu vakuavo ci sule, poku popia hati: “Wosi o mola ame, o molavo Isia.” (Yoa. 14:9; 5:17, 19, 30, 36; 8:28, 38, 42) Esetahãlo liaco, lia pamisiwa vali calua eci Yesu a pinduiwa vetimba liespiritu, kuenda eci eye a tambula ku IsiayeYehova “Unene wosi wokilu lowu woposi.” (1 Pet. 3:18; Mat. 28:18) Omo okuti Suku wa ‘kemainyisa Yesu komangu yimue ya velapo’ omõla a Suku wa situlula ulamba wa Isiaye komangu yavelapo okuti yina a sia kilu osimbu keyile palo posi ci Sule. (Va Fil. 2:9; Va Hev. 2:9) Cilo eye “ocindekaise ca suapo cekalo lia [Suku].”—Va Hev. 1:2-4.
(Va Heveru 1:10-12) Kuenda vali hati: “A Ñala, tunde kefetikilo wa seveta oluali kuenda ilu ovopange ovaka ove. 11 Ovio vi nyõleha, ove puãi o kala otembo yosi; kuenda viosi vi kuka ndeci uwalo, 12 kuenje o vi muña ndocikutu, ale nduwalo kuenda ovio vi ka pongoluiwa. Pole, ove ku pongoloka, anyamo ove ka a pui.”
perspicaz volume-1 kem. 491 ocin. 2
Ilu
Olondaka vi sangiwa kelivulu Liosamo 102:25, 26 yi tiamisiwila ku Yehova, pole, upostolo Paulo o tukula olondaka viaco poku vi tiamisila ku Yesu Kristu. Eci ca sunguluka momo Omõla uveli wa Suku wa kala oñuatisi yaye eci a lulika oluali. Paulu o lekisa etepiso li kasi koku lulikiwa Kuomõla kuenda kuoluali luna okuti nda ca kala ocipango ca Suku nda wa “vi muña ndocikutu” okuti ka yi tendi vali.—Va Hev. 1:1, 2, 8, 10-12; sokisa lukanda 1 Pet. 2:3 petosi.
Oku Tangiwa Kuembimbiliya
(Va Heveru 1:1-14) Suku kosimbu vonduko yovaprofeto wa enda oku vangula la vakukululu yetu olonjanja vialua kuenda volonjila via litepa. 2 Koloneke vilo via sulako, o vangula letu vonduko Yomõlaye, una eye a nõla kapiñala kovina viosi, haeye una okuti vonduko yaye wa panga oluali. 3 Eye esetahãlo liulamba wa Suku, haeye ocindekaise ca suapo cekalo Liaye kuenda o tata ovina viosi londaka yunene waye. Kuenje noke yoku yelisa akandu etu, wa tumãla kondio ya Suku kilu. 4 Kuenje eye wa velapo ovangelo kuenda onduko a piñala ya velapo, okuti olonduko viavo vi sule. 5 Ndeci, helie pokati kovangelo Suku a sapuila hati: “Ove vumõlange; etaili nda linga isiove”? Kuenda vali hati: “Ame muẽle ndinga isiaye kuenda eye o linga omõlange”? 6 Puãi eci a nena vali voluali Nuñulu yaye, eye wa popia hati: “Ovangelo vosi va Suku vo kekamẽle.” 7 Handi vali, wa tukula eci catiamẽla kovangelo hati: “Eye wa lulika ovangelo vaye ndoviluvo viespiritu kuenda olondingupange viaye ndulienge wondalu.” 8 Oku tukula eci catiamẽla Komõla eye wa popia hati: “Suku eye ocalo cove oloneke vi enda ño-o hũ ka vi pui kuenda epangati Liusoma wove, epangati liesunga. 9 Ove o sole esunga, haive wa suvuka evĩho. Oco Suku, okuti Suku yove a ku wavekela lulela wesanju lialua okuti, vakuene ci sule.” 10 Kuenda vali hati: “A Ñala, tunde kefetikilo wa seveta oluali kuenda ilu ovopange ovaka ove. 11 Ovio vi nyõleha, ove puãi o kala otembo yosi; kuenda viosi vi kuka ndeci uwalo, 12 kuenje o vi muña ndocikutu, ale nduwalo kuenda ovio vi ka pongoluiwa. Pole, ove ku pongoloka, anyamo ove ka a pui.” 13 Helie pokati kovangelo eye a sapuila hati: “Tumãla kondio yange, toke eci ñapa ovanyãli vove ndociliatelo colomãhi viove”? 14 Havosiko hẽ oviluvo viespiritu koku linga upange u kola, haivo va tumiwa oku kuatisa vana va piñala eyovo?
OSEMANA 26 YENYENYE–1 YENYENYE LINENE
OVOKUASI A SANGIWA VONDAKA YA SUKU | VA HEVERU 4-6
“Likolisilako Oco Iñile Vepuyuko Lia Suku”
(Va Heveru 4:1) Omo okuti kua kamba ohuminyo yoku iñila vepuyuko liaye, tu lunguki sanga omo liusumba umue pokati kene o tendiwa okuti ka sesamẽla epuyuko liaco.
(Va Heveru 4:4) Momo Vocisonehua cimue mu tukula eteke liepanduvali hati: “Suku wa puyuka kupange waye wosi keteke liepanduvali,”
utala wondavululi 15/7/2011 kem. 24-25 ocin. 3-5
Epuyuko Lia Suku li Lomboloka Nye?
3 Kuli asunga avali a lekisa okuti, kocita catete N.Y.Y. eteke liepanduvali lia kala oku amamako. Catete, kũlĩhĩsa olondaka Yesu a sapuila ovanyãli vana vo pisa omo lioku sakula keteke Liesambata. Ovo va tendele elinga liaco ndupange. Ñala wa va sapuila hati: “Toke cilo Tate o [kasi oku] linga upange, lamevo ndinga upange.” (Yoano 5:16, 17) Nye Yesu a yonguile oku popia? Eye wa pisiwa okuti wa linga upange keteke Liesambata. Omo liaco, etambululo liaye liokuti: “Tate o [kasi oku] linga upange,” lia pisa elundi liaco. Yesu wa kala oku sapuila ovanyãli vaye hati: ‘Tate kuenda ame tu kasi oku linga upange umuamue. Omo okuti, Tate o kasi oku talavaya vokuenda kuolohuluwa vianyamo alua vateke aye Esambata, ca sunguluka kokuange oku linga upange veteke Liesambata.’ Yesu wa lekisa okuti toke kotembo yaye, catiamẽla kongongo, eteke Liesambata liepuyuko lia Suku, lia kala oku amamako.
4 Uvangi wavali, wa lekisiwa kolondaka viupostolo Paulu. Poku tukula olondaka vi sangiwa kelivulu Liefetikilo 2:2, wa soneha hati: “Etu tua tava tu iñila vepuyuko liaco.” (Va Hev. 4:3, 4, 6, 9) Ocili okuti, kotembo ya Paulu, eteke liepanduvali lia kala oku amamako. Oco hẽ, eteke liaco nda lia sulila otembo yipi?
5 Oco tu sange etambululo kepulilo eli, tu sukila oku ivaluka ocimãho ceteke liepanduvali. Elivulu Liefetikilo 2:3, li tu sapuila ndoco: “Suku yu wa sumũluisa eteke liepanduvali hã ha li kolisa.” Eteke liaco lia ‘kolisiwa,’ kuenda lia nõliwa la Yehova oco a tẽlise ocipango caye. Ocipango caco ceci okuti, vongongo mu tunga omanu vakuepokolo okuti va yi tata, kuenda oku viala oviluvo viosi vi kasimo. (Efet. 1:28) Eli olio esunga lieci Yehova Suku kuenda Yesu Kristu “Cime cesambata,” va kasilili oku “linga upange toke cilo.” (Mat. 12:8) Eteke lia Suku liepuyuko li ka amamako toke eci ocipango caye ci tẽlisiwa. Olio li ka pua kesulilo Liohulukãi Yanyamo wuviali wa Kristu.
(Va Heveru 4:6) Omo okuti kua kamba vamue oco va iñile vepuyuko kuenda vana va yeva tete olondaka viwa ka va iñilile omo liesino,
utala wondavululi 15/7/2011 kem. 25 ocin. 6
Epuyuko Lia Suku Li Lomboloka Nye?
6 Ndaño okuti ocipango ca Suku ca lomboluiwa ciwa ku Adama la Heva, ovo ka va kuatisile koku ci tẽlisa. Pole, havoko lika va lekisa esino. Momo tunde kotembo yaco toke cilo, voluali mua siata oku kala omanu valua vakuesino. Ndaño muẽle va Isareli omanu vana va nõliwile la Suku, ka va lekisilevo epokolo. Kocita catete, Paulu wa lungulavo Akristão okuti, vamue pokati kavo va ka lekisavo esino nda va Isareli kosimbu. Eye wa soneha hati: “Oco, tu likapeli oku iñila vepuyuko liaco, okuti lomue o konyoha loku sina ndovo.” (Va Hev. 4:11) Paulu wa sokisa esino, loku pumba epuyuko lia Suku. Eci ci lomboloka nye kokuetu? Nda tua sinila ocipango ca Suku, ka tu pumbi hẽ oku iñila vepuyuko Liaye? Etambululo liepulilo eli, li kuete esilivilo kokuetu, kuenda vocipama cilo tu konomuisa ovina vialua viatiamẽla kondaka eyi. Pole, tete tu kũlĩhĩsa ongangu yĩvi ya va Isareli kuenda esunga lieci ka va iñilile vepuyuko lia Suku.
(Va Heveru 4:9-11) Kuenje handi kua kamba esambata liepuyuko komanu va Suku. 10 Momo ulume wa iñila vepuyuko lia Suku, wa puyukavo kupange waye, ndeci Suku a puyuka kupange waye. 11 Tu likolisiliko oku iñila vepuyuko liaco, okuti lomue o kuama ongangu yaco yesino.
utala wondavululi 15/7/2011 kem. 28 ocin. 16-17
Epuyuko Lia Suku li Lomboloka Nye?
16 Koloneke vilo pokati ketu Tuakristão, lomue o tava okuti oco tu popeliwe tu sukila oku pokola Kocihandeleko ca Mose. Olondaka Paulu a sapuila va Efeso vi eca uvangi waco. Eye wa popia hati: “Wa popelui ocali omo wa kaili lekolelo. Ka wa ci lingili ene muele puãi ca tunda ocali ku Suku. Ka ceyilile ovilinga sanga umue o lipanda.” (Va Efe. 2:8, 9) Ndamupi Akristão va pondola oku iñila vepuyuko lia Suku? Ivaluka okuti, Yehova wa nõla eteke liaye liepuyuko oco a tẽlise ocipango caye catiamẽla kongongo kuenda komanu vakuepokolo. Tu pondola lika oku iñila vepuyuko lia Yehova poku pokola kocipango caye ndomo ca situluiwa kokuetu locisoko caye.
17 Nda tua sinila alungulo Embimbiliya a siata oku eciwa locisoko cukuenje wa kolelua haeye wa lunguka, kuenje tu nõlapo oku li songuila etu muẽle, tu sepula ocipango ca Suku. Ocituwa caco ci nyõla ukamba wetu la Yehova. Vocipama ci kuãimo tu ka konomuisa ovitangi vimue vi tu ĩha epuluvi lioku lekisa epokolo lietu ku Suku. Onjila yosi tu nõla poku liyaka lovitangi viaco, oyo yi lekisa nda tu ka iñila vepuyuko lia Suku ale sio.
Oku Konomuisa Lutate Ovina vi Sangiwa Vembimbiliya
(Va Heveru 4:12) Momo ondaka ya Suku yi kasi lomuenyo kuenda yi kuete unene, oyo ya tua calua okuti osipata ya tua olonele vivali yi sule, yi tepisa eci omunu a tuwa kilu leci a tuwa vokati kuenda asokoluilo lupuma, haiyo yi tẽla oku limbuka ovisimĩlo lolonjongole viutima.
utala wondavululi 09. 2016 kem. 13
Apulilo a Lingiwa Lavakuakutanga
Ndomo ca lekisiwa kukanda ku va Heveru 4:12, “ondaka ya Suku yi kasi lomuenyo kuenda yi kuete unene” yi lomboloka nye?
▪ Ovinimbu vikuavo vi lekisa okuti upostolo Paulu wa kala oku tukula esapulo lia Suku liatiamẽla kocipango caye. Kesapulo liaco, mua kongela ovina via sonehiwa Vembimbiliya.
Olonjanja vialua alivulu etu a tukula ukanda ku va Heveru 4:12 oco vi lekise okuti Embimbiliya yi kuete unene woku pongolola omuenyo womanu. Ca sunguluka oku kuata elomboloko liaco. Pole, ci kuete esilivilo oku konomuisa olondaka vi sangiwa vovinimbu vikuavo Paulu a popoiia osimbu ka tukuile olondaka viaco. Paulu wa kala oku vetiya Akristão va Heveru oku kuatisa koku tẽlisa ocipango ca Suku. Vialua pokati kovipango viaco via sonehiwa vovisonehua vi kola. Paulu wa tukula ongangu ya va Isareli va yovuiwa Kegito. Ovo nda va iñila “kofeka yi tumõha asenjele lowiki.” Vofeka yaco ovo va laikele oku kuata epuyuko liocili.—Etu. 3:8; Esin. 12:9, 10.
Eci ca pangele onepa kocipango ca Suku. Pole, va Isareli va lekisa esinokuenda ka va kuatele ekolelo, omo liaco, valua pokati kavo ka va iñilile vepuyuko liaco. (Ate. 14:30; Yeh. 14:6-10) Pole, Paulu wa popia okuti handi kua kala “ohuminyo yoku iñila vepuyuko lia [Suku].” (Va Hev. 3:16-19; 4:1) Paulu oco a lekise okuti ohuminyo yaco yi sangiwa Vovisonehua, wa tukula olonepa vielivulu Liefetikilo 2:2 kuenda Liosamo 95:11.
Tu sanjuka poku kũlĩha okuti handi kuli “ohuminyo yoku iñila vepuyuko lia [Suku].” Tua kolela kohuminyo Yembimbiliya okuti ci tẽliwa oku iñila vepuyuko liaco. Etu tua tẽlisa ale ovina vi sukiliwa oco tu ci linge okuti ka tu kuama lika Ovihandeleko via Mose vioku linga ovina viwa, pole, poku lekisa ekolelo ku Suku loku kuatisa koku tẽlisa ocipango caye. Handi vali, omanu valua voluali luosi, va kasi oku lilongisa Embimbiliya loku limbuka ovina Suku a situlula catiamẽla kocipango caye. Valua va vetiyiwa oku linga apongoloko komuenyo wavo, oku lekisa ekolelo kuenda oku papatisiwa. Ovina evi viosi, vi eca uvangi wokuiti, “ondaka ya Suku yi kasi lomuenyo kuenda yi kuete unene.” Ovina Suku a situlula Vembimbiliya catiamẽla kocipango caye, via pongolola omuenyo wetu kuenda u ka amamako oku lekisa unene wayo.
(Va Heveru 6:17, 18) Cimuamue haico okuti, eci Suku a sokiya oku lekisa ku vakapiñala vaye okuti ocipango caye ka ci pongoloka, wa ci likuminya loku lisinga, 18 omo liovina vivali ka vi pongoloka vina okuti ka citava okuti Suku o kemba, etu tua tilila vocitililo tu pamisiwa lelembeleko oco tu kakatele kelavoko lia tu kapiwila kovaso.
perspicaz volume-2 kem. 24 ocin. 5
Elavoko
Elavoko liomuenyo ko pui kuenda epinduko lia vana ‘va tiamẽla kekovongo lio kilu’ (Va Hev. 3:1) yi kuete ono yasuapo kuenda ocina cimue tu pondola oku kolela. Lia kunamẽla kovina vivali vina okuti Suku una ka kembi, ndeci ohuminyo yaye kuenda elavoko li kasi vu Kristu okuti cilo o kasi kilu. Omo liaco, elavoko liaco li kasi “donjundo ya pama” vomuenyo wetu kuenda tua kolela okuti tu iñila vokati kongumbo, [ndeci ocitunda ca enda oku iñila Vohondo yi Kola Keteke Lioku Tuvika Akandu], muna Yesu a tu pitila kovaso ndusongui, haeye wa linga ocitunda cinene otembo ka yi pui ndeci Melikisedeke.”—Va Hev. 6:17-20.
Oku Tangiwa Kuembimbiliya
(Va Heveru 5:1-14) Momo ocitunda cinene cosi ci tunda pokati komanu, ca nõliwila oku va lingila upange wa Suku, okuti ceca ovilumba vioku lumbila akandu. 2 Eye o tẽla oku kuatela ocikembe vakuanumbi kuenda vakuakulueya, momo eye muẽle wa liyakavo lehonguo, 3 omo liaco, eye o sesamẽlavo oku eca ovilumba vioku lumbila akandu aye muẽle ndeci a lumbila akandu omanu. 4 Lomue o likapa esumbilo liaco eye muẽle, pole, o li tambula lika eci a nõliwa la Suku, ndeci Arone a nõliwilevo. 5 Kristu layevo ka lisivayele eye muẽle omo lioku kala ocitunda cinene, puãi wa sivayiwa la Una wa popia eci catiamẽla kokuaye hati: “Ove vumõlange; etaili nda linga Isiove.” 6 Ndeci eye a popiavo konepa yikuavo hati, “Ove vucitunda otembo ka yi pui ndeci Melikisedeke.” 7 Eci Kristu a kala palo posi wa linga alombelo lapingilo ku Una o tẽla oku u popela kolofa, loku lila kuenda asuelẽla kuenje olohutililo viaye via yeviwa omo wa sumbila Suku. 8 Ndaño wa kala omõla, wa lilongisa epokolo omo liohali a talisiwa. 9 Kuenje noke yoku kanguiwa, wa linga usongui weyovo ka li pui lia vosi va pokola kokuaye, 10 momo eye wa nõliwa la Suku oco a linge ocitunda cinene ndeci Melikisedeke. 11 Tu kuete ovina vialua vioku vangula catiamẽla kokuaye, pole, ca tĩla oku vi lombolola omo wa lingi ovisitatũi koku yeva kuene. 12 Ndaño okuti cilo wa lingi alongisi, pole, vu sukila okuti umue u longisi vali ovina viefetikilo violondaka vi kola via Suku kuenda handi vu sukila asenjele, hakuliako kua kõla. 13 Momo wosi o li tekula lasenjele ka kũlĩhĩle ondaka yesunga, omo eye omõla. 14 Okulia kua kõla kuakulu, okuti omo lioku pindisa olondunge viavo va tẽla oku tepisa pokati keci ciwa leci cĩvi.