Cipi Ocipango Ca Suku Catiamẽla Kokuetu?

ECI o tanga ukanda umue wasapulo, o tala o televisãu, ale ceci o yevelela asapulo vo radio, o pondola oku mola kuenda oku yevelela asapulo alua ndeci: Ungangala, uyaki, kuenda ovina vikuavo vĩvi. Citava okuti o kasi oku tala ohali omo lioku vela, ale wa sumua omo liolofa viomunu umue o sole.

Lipula ndoco:

• Anga hẽ eci oco Suku a yongola kokuange kuenda kepata liange?

• Pi ndi pondola oku sanga ekuatiso oco ndi tetulule ovitangi viange?

• Anga hẽ eteke limue voluali mu ka kala ombembua yocili?

Embimbiliya lieca etambululo lia suapo liatiamẽla kapulilo a lingiwa ndeti.

EMBIMBILIYA LI LONGISA OKUTI SUKU O KA LINGA OVINA VI KOMÕHISA PALO POSI.

• Omanu ka va ka yeva vali evalo, oku kuka, ale oku fa.—Esituluilo 21:4

• “Ocilema ci [ka] somboka ndosonge.”—Isaya 35:6

• “Ovaso olomeke a [ka] patuluka.”—Isaya 35:5

• Omanu va fa va ka pinduiwa. —Yoano 5:28, 29

• Lomue o ka popia hati, ndi vela.—Isaya 33:24

• Omunu lomunu palo posi o ka kuata okulia kua lua.—Osamo 72:16

  

KUATISIWA LOVINA EMBIMBILIYA LI LONGISA

Ku ka sime okuti, ovina wa tanga kamẽla atete elivulu lilo ka vi ka tẽlisiwa. Momo, Suku wa likuminya okuti, ndopo o ka linga apongoloko aco palo posi, kuenda Embimbiliya li lombolola ndomo a ka ci linga.

Embimbiliya li lombolola ovina vialua okuti, evi via tukuiwa ndeti vi sule. Olio li tu sapuila ovina tu sukila oku kũlĩha oco tu kuate esanju liocili, kuenda omuenyo uwa cilo. Sokolola eci catiamẽla kovina via siata oku ku nenela asakalalo. Vovina viaco citava okuti mua kongela oku sakalala lolombongo, ovitangi vepata, ekambo liuhayele, kuenda olofa viomunu umue o sole. Embimbiliya li pondola oku ku kuatisa oco o tetulule ovitangi viove, kuenda li ku lembeleka poku tambulula apulilo a kuãimo ndeci:

• Momo lie tu talela ohali?

• Tu pondola oku tetulula ndati ovitangi vietu?

• Epata lietu li pondola hẽ oku kuata esanju?

• Nye ci pita letu eci tu fa?

• Anga hẽ eteke limue tu ka li sanga vali lomanu vana tu sole okuti va fa?

• Momo lie tu ponduila oku kolela okuti Suku o ka tẽlisa ovina viosi a likuminya??

Omo okuti o kasi oku tanga elivulu lilo ci lekisa okuti, o yongola oku kũlĩha ovina Embimbiliya li longisa. Elivulu lilo li ka ku kuatisa. Ocinimbu locinimbu ci kuete epulilo li sangiwa pombuelo yemẽla, oco li ku kuatise oku kuata elomboloko lia suapo Liembimbiliya. Omanu valua va siata oku kuata esanju poku sapela Lolombangi Via Yehova catiamẽla kovina vi sangiwa Vembimbiliya. Tu lavoka okuti o kuatavo esanju. Omo liaco, Suku a ku sumũlũise osimbu amamako oku limbuka ovina Embimbiliya li pondola oku ku longisa!