Ono Yovipama Viohongele Ekalo Lietu Tuakristão Kuenda Oku Kunda
OSEMANA 1-7 YELOMBO
OVOKUASI A SANGIWA VONDAKA YA SUKU | ATENDELO 7–8
“Ceci tu Lilongisila Kocilombo ca va Isareli”
Perspicaz-1 kem. 540 ocin. 3
Ekongelo
Ko Isareli, vana va kuatele ovikele olonjanja viosi va kala asongui vomanu. (Esera 10:14) Kuenje ‘asongui apata’ va eca ovilumba eci ombalaka ya tungiwa. (Ate. 7:1-11)
Perspicaz-3 kem. 467 ocin. 1
Ruvene
Kocilombo co Isareli, epata lia Ruvene lia ñuala ocitumbulukila ca Simeone, leci ca Gadi, okuti va kala konele yo Sul yotavernakulu. Oku tepiwa kuapata oco atatu okuti asonguiwa la Ruvene, kua kuamele apata atatu a Yuda, a Isakare kuenda a Sevulono. (Ate. 2:10-16; 10:14-20)
Utala Wundavululi, 1/8/2004 kem. 30 ocin. 1
Atosi Avelapo Velivulu Liatendelo
8:25, 26. Oco ku sokiyiwe ciwa ovopange a va Lewi, loku kapako utunga womunu lomunu, alume vana okuti va kukile, va enda oku upiwa ocikele cupange wekisika. Pole, ca tavaile okuti nda va yongola, vakuatisako vakuavo va Lewi amalẽhe. Utunga ka u tateka omunu oku kala ukundi Wusoma. Pole, konumbi eyi tu lilongisilako etosi limue li kuete esilivilo. Nda okuti omo lioku kuka Ukristão ka tẽla vali oku linga ovopange amue, eye ci tava okuti o linga upange una wa li soka longusu yaye.
Ovina vi Sangiwa Vembimbiliya
Perspicaz-3 kem. 328
Onuñulu, Omunu wa Citiwa Tete
Omo okuti olonuñulu viaco vialume via kala ovitumbulukila apata a va Isareli, ovo va laikele oku kala asongui apata alua, loku sokisiwa ndofeka yosi. Yehova wa va tendele ndofeka yosi ‘ndonuñulu’ yaye omo liocisila a lingile la Avirahama. (Ate. 7:1, 2, 10-47)
OSEMANA 8-14 YELOMBO
OVOKUASI A SANGIWA VONDAKA YA SUKU | ATENDELO 9–10
“Ndomo Yehova a Songuila Afendeli Vaye”
Perspicaz-1 kem. 39 ocin. 3
Ocilombo
Ndomo ocilombo caco ca sanjavalele oku tunda kocitumãlo cikuavo toke kocitumãlo cikuavo (ci soka 40 kovilombo, via pituluiwa la Mose kelivulu Lietundilo 33) handi vali, ca komohisile oku mola ndomo via sokiyiwile. Eci elende li sikĩlila kombalaka, ocilombo camamako kocitumãlo ci kasi. Eci elende li endela konele yikuavo ocilombo ci endelavo konele yaco. “Va tunda londaka ya Yehova kuenje londaka ya Yehova va talama.” (Ate. 9:15-23) Olombeta vivali viopalata via teliwa, via enda oku sapula ondaka ya Yehova kocilombo.—Ate. 10:2, 5, 6.
Utala Wondavululi, 15/4/2011 kem. 4-5
Ove hẽ o Tẽla Oku Limbuka Uvangi Wolonumbi Via Suku?
Tu lekisa ndati okuti tua sanjukila olonumbi via Suku? Upostolo Paulu wa popia hati: “Pokoli kasongui vene loku linga eci va tuma.” (Va Hev. 13:17) Olonjanja vimue ka ca lelukile oku ci linga. Kulĩhĩsa ndeci okuti, ove o kasi pokati ka va Isareli koloneke via Mose. Noke yoku linga ungende vokuenda kuotembo yimue, ongunji yelende ya talama. Oloneke vi ñami yi talamapo? Eteke limosi? Osemana? Ale olosãi vialua? Ove pamue o lipula ndoco: ‘Anga ndi kutulula apunda osi nda ambata?’ Tete, citava okuti o kutulula lika ovina vi kuete esilivilo. Noke yoloneke vimue, omo lionyeño yoku sandiliya ovina o yongola, o fetika oku kutulula apunda osi. Pole, noke yoku kutulula ovina viosi, o lete okuti ongunji yelende yi kasi oku enda, kuenje ove o fetika vali oku kuta apunda! Ocili okuti, nda ka ca lelukile oku ci linga! Pole, tuli elende lia yeluka, va Isareli va sukilile ‘oku tunda.’—Ate. 9:17-22.
Nye tu sukila oku linga eci tu tambula onumbi yimue ya Suku? Anga hẽ tu likolisilako oku yi pokola? Ale tu amamako lovituwa vietu viosimbu? Anga hẽ tua kũlĩha olonumbi viokaliye viatiamẽla koku songola alilongiso Embimbiliya, oku kundila omanu vo kolofeka vikuavo, oku lingainga efendelo liepata, oku pokola kolonumbi viocisoko ci tukuiwa hati, Comissão de Ligação com Hospitais, kuenda oku lekisa ovituwa viwa kolohongele viofeka? Tu pondolavo oku lekisa epokolo lietu kolonumbi via Suku poku tava kalungulo. Eci tu liyaka locitangi coku nõla onjila yimue komuenyo wetu, ka tu ka koleli kolondunge vietu muẽle, pole tu sukila oku kolela ku Yehova loku kuama olonumbi viocisoko caye. Ndeci omõla a sandiliya ekuatiso kolonjali viaye eci ku iya ehunguhungu limue, haico tu sukilavo oku sandiliya eteyuilo kocisoko ca Yehova eci tu liyaka lovitangi violuali lulo.
Ovina vi Sangiwa Vembimbiliya
Perspicaz-1 kem. 253
Oku Liongolola
Esilivilo Lioku Liongolola. Esilivilo lioku liongolola, okupa esilivilo kovina viespiritu Yehova a enda oku pongiya, okuti ca enda oku lingiwa kotembo yo Paskoa. Pole, nda omunu umue wa yela, ale ka kasi vungende kuenje wa likala oku pongiya ocilumba co Paskoa, omunu waco o pondiwa. (Ate. 9:9-14) Ndaño koloneke vilo ka ku lingiwa ocipito co Paskoa, pole Paulu wa sapuila Akristão oco ka va ka liwekepo oku lingolola poku popaia hati: “Tu likapiko pokati ndomo tu livetiya locisola kuenda ovilinga viwa, ka tu ka liwekipo oku liongolola kolohongele vietu ndeci vamue va lingainga, pole, tu lipamisi pokati, ca piãla enene eci tu limbuka okuti eteke li kasi ocipepi.”—Va Hev. 10:24, 25; tala CONGREGAÇÃO.
OSEMANA 15-21 YELOMBO
OVOKUASI A SANGIWA VONDAKA YA SUKU | ATENDELO 11–12
“Momo Lie tu Yuvuila Ocituwa Coku Lisiõsiõla?”
Utala Wondavululi, 1/7/2001 kem. 9 ocin. 20
Koka Lingi Vakuakuyeva Lika Loku Ivala
20 Onepa yalua Yakristão lalimue eteke ya wilile vukahonga. Pole, tu sukila oku kala lutate oco ka tuka eceleli okuti, tu kuata ocituwa coku lisiõsiõla, kuna ku tuala koku pisiwa la Yehova. Upostolo Paulu o tu lungula hati: “Ka tu ka nyiki Ñala [Yehova] ndeci vamue pokati kavo va linga, kuenje va nyõliwa lolonyoha. Ka tuka lisiõsiõli ndeci vamue pokati kavo va linga, yu unyõli wa va nyõla.” (1 Va Korindo 10:9, 10) Va Isareli va lisiõsuila Mose la Arone, kuenda va lisiõsuilavo Suku haivo va sepula o mana Suku a va ihile. (Atendelo 16:41; 21:5) Anga hẽ oku lisiõsiõla kua va Isareli kua sumuisa vali Yehova okuti ukahonga wavo ci sule? Ulandu Wembimbiliya u lekisa okuti valua va lisiõsiõla veya oku pondiwa lolonyoha. (Atendelo 21:6) Noke, kueya oku pondiwa ci soka 14.700 komanu va kala loku lisiõsiõla. (Atendelo 16:49) Omo liaco, ka tuka kapi epandi lia Yehova voseteko omo lioku sepula aliangiliyo aye.
Utala Wondavululi, 1/8/2006 kem. 8 ocin. 7
‘Yuvula Oku Lisiõsiõla’
7 Ovitima via va Isareli via pongolokele calua. Momo eci va yovuiwa kupika woko Egito leci va yoka Okalunga Kakusuka, va eca olopandu ku Yehova. Kuenje va imba ocisungo coku U sivaya. (Etundilo 15:1-21) Pole, eci va fetika oku liyaka lovitangi vekalasoko, leci va kuatela usumba omanu voko Kanana, olopandu viavo via pongoloka esumuo. Ovo ka va ecele olopandu ku Suku omo lioku yovuiwa kupika. Pole, va fetika oku u siñala omo lioku kuatela usumba ovina viesanda. Oku lisiõsiõla kuavo kua kala ocindekaise cekambo lioku sanjukila eliangiliyo lia Yehova. Omo liaco, Yehova wa popia hati: “Oku lisiõsiõla kuomanu ava va tatama ku liweka eteke lipi? Nda yeva oku lisiõsiõla kua va Isareli ndomo va [ndi] lisiõsuĩla.”—Atendelo 14:27; 21:5.
Perspicaz-1 kem. 100 ocin. 4
Oku Lihoyisa
Oku Lisiõsiõla. Oku lisiõsiõla ku sumuisa. Eci va Isareli va tunda Kegito va lisiõsuila Yehova omo lioku nõla Mose la Arone oku va songuila. (Etu. 16:2, 7) Noke omo lioku lisiõsiõla kualua ca sumuisa Mose kuenje cokokela oku pinga olofa. (Ate. 11:13-15) Oku lisiõsiõla ku pondola oku koka olofa komunu o lisiõsiõla. Ovina va lisiõsiõla Mose, Yehova wa vi tenda ndu okuti omanu va kala oku sinĩla omoko Yaye yoku songola. (Ate. 14:26-30) Valua va fa omo lioku lisiõsiõla.
Ovina vi Sangiwa Vembimbiliya
Perspicaz-2 kem. 748
Omana
Elomboluilo. Omana ‘ya setahãlele ovasa a yela’ kuenda ya “kuatele” evala liombendeliu okuti oku yela kuaco kua kala ndomota yondongo. Okupepa kuaco kua lisoka “kuakende owiki,” ale kua soka ndokupepa “kuakende a yokiwa lulela.” Noke yoku suliwa vovine, va yi teleka va linga akende.—Etu. 16:23, 31; Ate. 11:7, 8.
OSEMANA 22-28 YELOMBO
OVOKUASI A SANGIWA VONDAKA YA SUKU | ATENDELO 13–14
“Ndomo Ekolelo li tu Lingisa Vakuotõi”
Utala Wondavululi, 1/10/2006 kem. 16 ocin. 5-6
Va Kuata Utõi Omo Liekolelo Kuenda Oku Sumbila Suku
5 Alume vamue vavali okuti, Yehosua la Kalembe, va kuatele ekolelo lioku iñila vofeka Yohuminyo. Ovo va sapuila va Isareli hati: “[Ku va Kanana] oko ku tunda okulia kuetu. Ombindikiyo yavo ya va tunda, kuenje Yehova o kasi letu. Ko ka va yokokeli.” (Atendelo 14:9) Anga hẽ Yehosua la Kalembe va kala lesunga lioku kuata ekolelo? Va kala lesunga. Momo ovo kuenda vakuavo va Isareli, va mola ndomo Yehova a sepula olonoño vioko Egito lolosuku viavo poku va tumisa Ekũi Liafengi. Noke va mola ndomo Yehova a yambula Fareo kuenda olohoka viaye Vokalunga Kakusuka. (Osamo 136:15) Omo liaco, olondavululi ekũi kuenda vakuavo va Isareli, ka va kuatele esunga lioku kuata usumba. Yehova poku lekisa onyeño yaye kokuavo, wa popia hati: “Ndaño ndukuakuvaĩha olondimbukiso via lua haimo oku liñala kuavo ku sulila eteke li pi?”—Atendelo 14:11.
6 Yehova poku situlula ocitangi comanu vana vakuosumba, wa lekisa okuti, va kambele ekolelo. Ocili okuti, ekolelo lutõi vi kuete esilivilo. Upostolo Yoano poku sonehela Akristão catiamẽla kuyaki wavo wespiritu, wa popia hati: “Eyulo li yula oluali, . . . ekolelo lietu.” (1 Yoano 5:4) Koloneke vilo, ekolelo ndeli lia Yehosua la Kalembe, lia siata oku vetiya Olombangi vialua via Yehova oku kunda olondaka viwa viusoma. Pokati kavo pa sangiwa amalẽhe lakulu ava va pama lava va hongua omo liovitangi. Pole, omanu vaco vakuekolelo, lomue o tẽla oku va tateka kupange wa Yehova.—Va Roma 8:31.
Ovina vi Sangiwa Vembimbiliya
Perspicaz-1 kem. 644
Ofeka Suku a Eca ku va Isareli
Ofeka Suku a ecele ku va Isareli ya posokele calua. Eci Mose a tuma olondavululi oku ka kũlĩhĩsa Ofeka Yohuminyo loku tala apako a kasimo, ovo va nena apako akuyu, o roma kuenda ovisiakata viayuva anene, okuti alume vavali va ci yenja! Ndaño okuti va kala lusumba omo liekambo liekolelo, lopo va popia hati ofeka “yi tumõha asenjele lowiki.”—Ate. 13:23, 27.
OSEMANA 29 YELOMBO–4 YA KUPUPU
OVOKUASI A SANGIWA VONDAKA YA SUKU | ATENDELO 15–16
“Lunguka Lepela Kuenda Oku Likolela Ove Muẽle”
Utala Wondavululi, 15/9/2011 kem. 27 ocin. 12
Ove hẽ wa Kũlĩhĩwa la Yehova?
12 Osimbu va Isareli va kala oku enda Kofeka Yohuminyo, Kora wa simĩle okuti onjila Yehova a kuama poku va songuila, ka ya sungulukile. Kuenje, wa vetiya eci ci soka 250 kalume vana va kuata ovikele vofeka, oku likongela kokuaye oco va linge usuanji. Kora kumue lalume vaco, va simĩle okuti, va kuete ukamba la Yehova. Omo liaco, va sapuila Mose vati: “Wa lipamisi enene, omo owiñi ulo wosi omunu omunu o kola, kuenje Yehova o kasi pokati kavo.” (Ate. 16:1-3) Olondaka evi, vi lekisa okuti va likolelele ovo muẽle, kuenda va lekisa epela! Omo liaco, Mose wa va sapuila hati: “Yehova o [ka] lekisa ava va tiamẽla kokuaye.” (Tanga Atendelo 16:5.) Eteke likuavo kekumbi, Kora kumue lalume va likongelele laye koku linga usuanji, va fa.—Ate. 16:31-35.
Utala Wondavululi, 15/9/2011 kem.27 ocin. 11
Ove hẽ wa Kũlĩhĩwa la Yehova?
11 Mose la Kora va litepele calua koku lekisa esumbilo keliangiliyo lia Yehova, lo kolonumbi viaye. Ovina va linga, ovio via lekisa ndomo Yehova a va tendele. Kora wa kala u Lewi, ukuepata lia Kohata, kuenda wa kuatele asumũlũho alua. Wa kuatele esumũlũho lioku mola oku yovuiwa kua va Isareli Vokalunga ka Kusuka, kuenda wa kuatisile kesombiso lia Yehova eci a yambula va Isareli vakuesino Komunda Sinai. Wa kuatisilevo oku ambata ocikasia covisila. (Etu. 32:26-29; Ate. 3:30, 31) Vokuenda kuanyamo alua, wa lekisa epokolo ku Yehova kuenda wa sumbiwile la va Isareli omo liepokolo liaye.
Ovina vi Sangiwa Vembimbiliya
Utala Wondavululi, 1/9/1998 kem. 19 ocin. 1-2
Pitisa Kovaso Ovina vi Kuete Vali Esilivilo!
Yehova wa kapako ovina viaco. Embimbiliya li lombolola okuti “Yehova wa popia la Mose hati, ‘Omunu waco ipaiwa.’” (Ate. 15:35) Momo lie Yehova a temelele leci ulume a linga?
Omanu va kuatele oloneke epandu vioko ongolola olohui, loku pongiya okulia va sukilile, uwalo kuenda ocitumãlo coku kala. Eteke liesambata lia kalele lika lioku sokolola kovina viespiritu. Ndaño okuti ca sungulukile oku ongolola olohui, ka ca sungukile oku ci linga keteke lia sokiyiwila oku fendela Yehova.—Va Fil. 1:10.
OSEMANA 5–11 YA KUPUPU
OVOKUASI A SANGIWA VONDAKA YA SUKU | ATENDELO 17–19
“Ame . . . Ndicipiñalo Cove”
Utala Wondavululi, 15/9/2011 kem. 13 ocin. 9
O Kasi Hẽ Oku Ecelela Okuti Yehova o Kala Onepa Yove?
9 Sokolola va Lewi, vana ka va kuatele ocipiñalo cimue vofeka. Poku linga upange woku kuatisa kefendelo liocili, va kolelele okuti Yehova o va kuatisa, momo wa va sapuila hati: ‘Ndinepa yavo.’ (Ate. 18:20) Ndaño ka tu kasi oku linga upange ndowu ovitunda la va Lewi va enda oku linga vonembele, tu pondola oku kuama ongangu yavo yoku kolela okuti Yehova o tu ĩha ovina tu sukila. Omo liaco, osimbu esulilo ka lieyile, tu sukila oku vokiya ekolelo lietu ku Suku una wa siata oku tu ĩha ovina viosi tu sukila.—Esit. 13:17.
Utala Wondavululi, 15/9/2011 kem. 7 ocin. 4
Yehova Eye Onepa Yange
4 Upange woku kala ocitunda wa kuata elomboloko lie ku va Lewi? Yehova wa va sapuila hati, o kala ndonepa yavo, momo ka va tambuile ocipiñalo vofeka. Omo liaco, va sukilile oku kolela kupange u kola va kala oku linga. Upange woku kala ‘ocitunda ca Yehova,’ owo wa kala ocipiñalo cavo. (Yeh. 18:7) Ulandu u sangiwa kelivulu Liatendelo 18:20, u lekisa okuti lacimue ca va kambelele. (Tanga Atendelo 18:19, 21, 24.) Va Lewi, va enda oku tambula ‘olonepa viosi viekũi viovilumba via va Isareli, ndonima yupange wavo.’ Konepa yaco yekũi, va enda oku vokiyako ovinyama vioku fuka. Va Lewi poku lekisa olopandu, va enda oku lumbavo onepa ‘ya velapo’ yekũi yovina va enda oku tambula, oco va kuatise kupange wutunda. (Ate. 18:25-29) Ovitunda via endavo oku eca “ovilumba viosi vi kola” vina va Isareli va enda oku nena ku Suku vocitumãlo caye cefendelo. Omo liaco, vana va enda oku linga upange wovitunda, va kuatele esunga lioku kolela okuti, Yehova o va kuatisa.
Ovina vi Sangiwa Vembimbiliya
Despertai!, 8/6/2002 kem. 14 ocin. 2
Omongua u Kuete Esilivilo
Omongua ocina cimue ci kala otembo yalua. Eli olio esunga lieci Embimbiliya li tukuila ocisila cimue ci kala otembo yalua ‘ndocisila comongua’ okuti olonepa viaco vivali via enda oku liwa lomongua oco ku tumbikiwe ocisila cimue. (Ate. 18:19) Ocihandeleko ca eciwile ku Mose ca kisikile okuti omongua u kapiwa kocilumba ceciwa kutala, oco ci lekise okuti capua etondelo, ale evĩho.
OSEMANA 12-18 YA KUPUPU
OVOKUASI A SANGIWA VONDAKA YA SUKU | ATENDELO 20–21
“Amamako Oku Lekisa Umbombe Eci o Lambalaliwa”
Utala Wondavululi, 19.02 kem 12 ocin. 19
Sandi Umbombe Loku Sanjuisa Yehova
19 Nda tua lekisa umbombe tu ka yuvula oku lueya. Sokolola vali ulandu wa Mose. Vokuenda kuanyamo alua wa lekisa umbombe loku sanjuisa Yehova. Noke lia 40 kanyamo kesulilo liungende wavo vekalasoko, Mose ka telẽle vali oku lekisa umbombe. Citava okuti mukãi waye Miriama una wo kuatisa oku popela omuenyo waye Kegito otembo yaco wa fa ale, loku kendiwa ko Kadesi. Yimue vali onjanja va Isareli va kala oku liyeya okuti ka va kaile oku tatiwa ciwa. Kuenje ovo va enda oku ‘hoyela Mose’ catiamẽla kekambo liovava. Ndaño lovikomo vialua Yehova a linga vocakati ca Mose, lanyamo alua Mose a songuila va Isareli, lopo ovo va liyeya. Ovo ka va liyeyele lika omo liekambo liovava, pole va liyeyelavo Mose ndu okuti eye o kuete eko omo liekambo liovava.—Ate. 20:1-5, 9-11.
Utala Wondavululi, 19.02 kem. 13 ocin. 20-21
Sandi Umbombe Loku Sanjuisa Yehova
20 Mose wa kuata onyeño yalua kuenje wa liwekapo oku lekisa umbombe. Eye ka lekisile ekolelo poku veta kewe ndomo Yehova o handeleka kuenje lonyeño yalua wa sapuila omanu okuti eye muẽle wa ponduile oku linga ocikomo cimue. Noke wa veta vewe olonjanja vitatu kuenje mua tunda ovava alua. Pole, epela kuenda onyeño vio kokela oku linga ekandu. (Osa. 106:32, 33) Omo okuti vokatembo kamue Mose wa liwekapo oku lekisa umbombe, ka iñilile Vofeka Yohuminyo.—Ate. 20:12.
21 Kulandu owu tu lilongisilako ovina vialua. Tete, tu sukila oku likolisilako oku pamisa ocituwa cetu cumbombe. Nda tua liwekapo oku lekisa umbombe tu fetika oku lekisa epela kuenje tu linga ovina ka via sungulukile. Vali, eci tu kuata esakalalo lialua ci tĩla oku lekisa umbombe, ndaño ceci vakuetu va tu sakalaisa.
Utala Wondavululi, 1/9/2009 kem. 19 ocin. 5 kelimi Lioputu
Onganji Yimue Ukuotoi yi Teyuila Ocili
Tete, Suku ka tumile Mose oku vangula lowiñi, ndaño oku va sapuila okuti vakuesino. Cavali, Mose la Arone ka va ecele esivayo ku Suku. Eye wa popia hati: ‘Ene ka wa . . . ñolisila.’ (Ocinimbu 12) Poku popia okuti: “Tu tundisa ovava,” Mose wa ci vangula ndu okuti, eye kumue la Arone ovo va linga ocikomo coku eca ovava okuti Hasukuko. Tatu, ca lekisa okuti esombiso liaco lia likuatele lasombiso akuavo Suku a lingile. Eye ka ecelele okuti ocitumbukila ca vakuesino ci iñila vo Kanana, eci oco a lingavo la Mose kuenda Arone. (Ate. 14:22, 23) Kuãla, Mose la Arone va kala a songui a va Isareli. Wosi wa kundikiwa calua, o kisikiwa calua la Suku.—Luka 12:48.
Ovina vi Sangiwa Vembimbiliya
Utala Wondavululi, 15/6/2014 kem. 24 ocin. 12
O Tenda hẽ Ahonguo Omanu Ndomo Yehova a Siata Oku ci Linga?
12 Citava okuti Yehova nda wa kangisila Arone pocitumãlo caco, omo liovina ka via sungulukile a linga via tukuiwa ndeti. Pole, Yehova wa limbuka okuti, Arone ka kalele omunu umue ũvi, ale wa linga ekandu limue linene. Ocili okuti, ovituwa vĩvi viomanu ovio vio vetiya oku linga ovina ka via sungulukile. Pole, eci a lunguiwa, wa limbuka ekandu a linga, kuenje, wa tava kelungulo lia Yehova. (Etu. 32:26; Ate. 12:11; 20:23-27) Yehova wa tiamisilile utima kekolelo Arone a kuata, kuenda kocituwa caye coku likekembela. Eli olio esunga lieci okuti, noke lioku pita anyamo alua, Yehova wa ivaluka Arone kumue lepata liaye, omo liekolelo va lekisa lioku kala afendeli vaye.—Osa. 115:10-12; 135:19, 20.
OSEMANA 19-25 YA KUPUPU
OVOKUASI A SANGIWA VONDAKA YA SUKU | ATENDELO 22-24
“Yehova o Lingisa Okuti Esiñalo Limue li Linga Esumũlũho”
Testemunho Cabal, kem. 53 ocin. 5
Oku Kunda ‘Olondaka Viwa Viatiamẽla ku Yesu’
5 Ndeci ca pita kocita catete, koloneke vilo, oku lambalaliwa kuafendeli va Suku ka ku pondola oku tateka upange woku kunda. Oku kisika Akristão oku enda kovitumãlo vikuavo ale oku tumiwa vokayike ca siata lika oku kuatisa oku sandeka esapulo Liusoma komanu va sangiwa kovitumãlo viaco. Ndeci, vokuenda Kuyaki Wavali wa Pita Voluali Luosi, Olombangi Via Yehova va eca uvangi uwa eci va kala kocila coku kangisiwa ko Nasista. Ulume umue u Yudeu wa kũlĩhĩle Olombangi Via Yehova kocila caco wa popia hati: “Utõi Olombangi Via Yehova via lekisa kocila caco, wa eca uvangi wokuti ekolelo liavo lia kunamelele Kovisonehua kuenje ame nda fetikavo oku lekisa ekolelo liaco.”
Perspicaz-2 kem. 717
Uveke
Uveke Woku Ñualilapo Yehova. Uprofeto Baliame wa yonguile oku sapula eci ca laikele oku pita la va Isareli locimaho coku tambula olombongo ku Balaka Soma ya va Moavi, pole, Yehova wa tateka elinga liaco. Upostolo Petulu wa popia eci catiamẽla ku Baliame okuti, “Ocinyama coku ambata ovilemo okuti ka ci popi, ca vangula londaka yomunu kuenda ca nyõla ungende wuprofeto.”—2 Pet. 2:15, 16; Ate. 22:26-31.
Ovina vi Sangiwa Vembimbiliya
Utala Wondavululi, 1/8/2004 kem. 32 ocin. 2
Atosi Avelapo Velivulu Liatendelo
22:20-22—Momo lie onyeño ya Yehova ya wengukilile Baliame? Yehova wa sapuilile uprofeto Baliame hati, ku ka siñale va Isareli. (Atendelo 22:12) Pole Baliame wa enda lalume va Balaka oco a ka siñale va Isareli. Baliame wa yonguile oku sanjuisa soma ya va Moavi oco o wĩhe ofeto. (2 Petulu 2:15, 16; Yuda 11) Eci Baliame a limbuka okuti Yehova wo silĩha oco a sumũlũise va Isareli, lopo wa sandiliya onjila yoku sanjuisa soma. Eye wa eca ocisimĩlo coku vetiya akãi vakuakufendela Baale oco va vetiyile alume va Isareli kukahonga. (Atendelo 31:15, 16) Kuenje onyeño ya Yehova ya wengukilile Baliame omo liocipululu caye coku sanda ofeto
OSEMANA 26 YA KUPUPU–2 YA KUPEMBA
OVOKUASI A SANGIWA VONDAKA YA SUKU | ATENDELO 25-26
“Oku Tuwa Kuomunu Umue ku Pondola hẽ Oku Vetiya Vakuavo?”
Kali Vocisola, kem. 97 ocin. 1-2
‘Tili Evĩho Liukahonga!’
ULUME ukuakupipa enda pocitumãlo a siata oku pipila. Eye wa kũlĩha ombisi a yongola oku kuata kuenda onũlo ombisi yaco yi sole. Eci a pitĩla pocitumãlo caco, imba onjolo vovava. Noke yokatembo kamue, ombimba yi tũla, kuenje onãla onjolo momo wa kũlĩha okuti kua fa ombisi.
2 Kunyamo wo 1473, O.Y., ulume umue o tukuiwa hati, Baliame wa kapelele va Isareli onũlo. Eye wa yonguile oku yapuisa afendeli va Suku va kala vanyala a Moavi, ocipepi Lofeka Yohuminyo. Baliame wa li tendele nduprofeto wa Yehova, pole wa yonguile oku siñala va Isareli. Yehova wa tateka esiñalo lia Baliame kuenje lia pongoloka esumũlũho ku va Isareli. Omo liocipululu caye, Baliame wa soka oku vetiyila owiñi kekandu oco Suku a va siñale. Onũlo Baliame a va kapela, omãla vakãi va Moavi.—Atendelo 22:1-7; 31:15, 16; Esituluilo 2:14.
Kali Vocisola, kem. 98 ocin. 4
‘Tili Evĩho Liukahonga!’
4 Nye ca vetiya omanu oku kupukila kekandu liaco? Valua pokati kavo va kuata ovisimĩlo vĩvi kuenje va ñualelapo Yehova, Suku una wa va yovola Kegito, wa va tekula vekalasoko kuenda wa va songuila kofeka yohuminyo. (Va Heveru 3:12) Catiamẽla kulandu owu, upostolo Paulu wa soneha hati: ‘Ka tu ka lingi evĩho liukahonga ndeci vamue pokati kavo va linga, kuenje eteke liongongo kua fa eci ci soka 23.000 komanu.’—1 Va Korindo 10:8.
Ovina vi Sangiwa Vembimbiliya
Perspicaz-3 kem. 694 ocin. 1-2
Ongave
Ulandu u lekisa okuti ocela ca imbiwa ca tunda ku Yehova okuti ya ponduile oku kuatisa apata oku yuvula oku li kuatela ukuse pokati. (Olosap. 16:33) Lonjila eyi, Suku wa ponduilevo oku songuila ovina okuti vi likuata lesokiyo liepata lepata loku tẽlisiwa kuocitumasuku ca sapuiwile ku Yakoba eci kala ocipepi lolofa viaye ndomo ci sangiwa Kefetikilo 49:1-33.
Noke lioku imbiwa kuocela epata lepata lia laikele oku kũlĩha apa pa sulila ongave yofeka yavo. Pole, va sukilile oku ci linga ndoco: “Oco wu piñala ofeka loku ta oviela epata epata. Ava va lova vu va iha ocipiñalo cinene, ava ka va luile vu va iha ocipiñalo ci sule; oku ocela ci kuatela omunu oco ci linga caye. Ndomo mu kasi apata olosekulu viene haimo wu piñala.”—Ate. 33:54.