Ono Yovipama Viohongele Ekalo Lietu Tuakristão Kuenda Oku Kunda
OSEMANA 5-11 YEVAMBI LINENE
OVOKUASI A SANGIWA VONDAKA YA SUKU | ESINUMUĨLO 11–12
“Ndomo Yehova a Yongola okuti Oco a Fendeliwa”
Perspicaz-1 kem. 93 ocin. 4
Omuenyo
Oku Vumba Lutima Wosi. “Omuenyo” u lomboloka omunu wosi. Ocili okuti, ovinimbu vimue Viembimbiliya vi tu vetiya oku sanda oku sola loku vumba Suku, ‘lutima wetu wosi kuenda lomuenyo wetu wosi.’ (Esn 4:29; 11:13, 18; 6:5) Osimbu okuti Kesinumuĩlo 6:5 ku popia ndoco: “Sola Yehova Suku yove lutima wove wosi, lomuenyo wove wosi kuenda longusu yove yosi.” Yesu wa popia hati, tu sukila oku vumba lomuenyo wosi kuenda ongusu yosi kuenje wa vokiyako hati, “lolondunge viove viosi.” (Mar 12:30; Luka 10:27) Ku votuiwa epulilo liesunga lieci ovina vikuavo via tukuiwila kumosi londaka omuenyo, nda ovio via kongeliwamo. Ci sokisiwa ndoco: Omunu umue wa ponduile oku lilandisa eye muẽle (omuenyo waye) kupika komunu ukuavo noke o kala ocipiñalo loku tiamẽla kucime caye. Citava okuti pamue, ka lingila upange cime caye lutima wosi, lesanju kuenda ojongole yoku u sanjuisa kuenda ka talavaya longusu yaye yosi ale lolondunge oco a sanjuise cime caye. (Sokisa Va Efe 6:5; Va Kol 3:22.) Omo liaco, ovina evi vikuavo via tukuiwa oco vi tiamisiwile kokuavio okuti, tu vi yivaluka loku vi konomuisa kupange wetu tu lingila Suku okuti, oko tua tiamẽla kuenda Komõlaye una wa tu landa londando yomuenyo waye. Vupange “womuenyo wosi” tu lingila Suku, mua kongela omunu waco wosi, okuti ka kupiwa onepa layimue, ocimãho, uloño ale onjongole.—Sokisa Mat 5:28-30; Luka 21:34-36; Va Efe 6:6-9; Va Fil 3:19; Va Kol 3:23, 24.
Perspicaz-1 kem. 97 ocin. 7
Utala
Va Isareli va handelekiwile okuti va sukilile oku nyõla ovolata osi olosuku viesanda, loku kundula olongunji viosi via tungiwile kolonẽle vialio. (Etu 34:13; Esn 7:5, 6; 12:1-3) Ka ca tavele okuti va kuama ongangu yomanu vakuavo ndaño, oku lumba omãla vavo poku va yoka vondalu ndeci va Kanana va enda oku linga. (Esn 12:30, 31; 16:21) Ka catavele okuti va Isareli va kuata ovotala alua, pole, va sukilile lika oku kuata utala umosi oco va fendeleleko Suku yocili kuenda wa kala lika pocitumãlo ca nõliwile la Yehova. (Esn 12:2-6, 13, 14, 27; ca litepa lo Bavuluno kuna kua kala 180 kovotala a suku yukãi, Istar.) Ovo, tete va handelekiwile oku tunga utala umue wovawe, noke yoku yoka Olui Yordão (Esn 27:4-8), Yehosua wa tungila utala waco Komunda Evale. (Yeh 8:30-32) Noke yoku tepiwa kuofeka yina ya tambuiwile, ovikoti via Ruvene, via Gadi kuenda onepa yimue yocikoti ca Manase, via tunga utala umue ocipepi lo Yordão, weya oku nena ovitangi pokati kovikoti vialua toke eci kua limbukiwa okuti utala waco, ka wa kaile ondimbukiso yunanguluke pole, ya kala ondimbukiso yonjivaluko yoku kala ukuacili ku Yehova, Suku yocili.—Yeh 22:10-34.
Ovina vi Sangiwa Vembimbiliya
Perspicaz-2 kem. 208
Gerisimi, o Munda
Ndomo ci likuata lolonumbi via eciwile ku Mose, ovikoti via va Isareli via liongoluila pamosi ocipepi Lolomunda vio Gerisimi kuenda vio Evale, poku songuiwa la Yehosua noke yoku tambula ofeka yo Ai. Oko omanu va yevela oku tangiwa kuasumũluho nda va tambula, nda va pokuile ku Yehova kuenda asiñalo nda va kuata, nda ka va pokuile kokuaye. Ovikoti via Simeone, via Lewi, via Yuda, via Yisakare, via Yehosua, levi via Bejamini, via talama kovaso yo Munda Gerisimi. Va Lewi locikasia covisila, va kala vocimbota kuenda ovikoti vikuavo epandu, via kala kovaso Yomunda Evale. (Esn 11:29, 30; 27:11-13; Yeh 8:28-35) Citava okuti, ovikoti via talama kovaso Yomunda Gerisimi, via tambulula asumũlũho a tangiwila kokuavo, osimbu okuti ovikoti vikuavo via tambulula asinãlo a tangiwa ocipepi Lomunda Evale. Ndaño okuti kua eciwile ocisimĩlo cokuti asumũlũho aco a tangiwila konele Yomunda Gerisimi, omo lieposo liayo haiyo yima ciwa ovikũla, ca litepele lesenje lionepa yimue yima ciwa ovikũla Yomunda Evale, Embimbiliya ka lieci onumbi layimue ya tiamẽla kulandu waco. Ocihandeleko ca tangiwa lolukandi “kovaso yekongelo liosi lio Isareli, oku kongelamo akãi, omãla kuenda ovingendeleyi via tungile pokati kavo.” (Yeh 8:35) Owiñi walua wa ponduile oku yeva olondaka via kala oku yevala pokati kolomunda vivali. Citava okuti, ca lingiwa lekuatiso liocileñi ci yevala pocitumãlo caco.—Tala EVALE, OMUNDA.
OSEMANA 12-18 YEVAMBI LINENE
OVOKUASI A SANGIWA VONDAKA YA SUKU | ESINUMUĨLO 13–15
“Ocihandeleko ca Lekisile Okuti Yehova wa Kapako Ohukũi”
Perspicaz-1 kem. 732 ocin. 7
Onepa yekũi
Citava okuti, kua kala onepa yimue yekũi ya vokiyiwileko okuti, onepa yavali yekũi, oyo ya enda oku selekiwa unyamo lunyamo, oco yi kuatise kovina vikuavo okuti ekuatiso li tunda kovitunda li sule, ndaño va Lewi va enda oku kuatisavo lonepa yaco yekũi. Onepa yaco, ya enda oku kuatisa va Isareli valua poku enda kovipito vinene. Nda va linga ungende walua poku enda ko Yerusalãi, onepa yaco yekũi va enda oku yi tolokala lolombongo kuenda olombongo viaco, va landa lavio okulia eci va pitĩla ko Yerusalãi oco epata liosi lio Isareli, li kuatisiwe vokuenda kuohongele yi lingiwa. (Esn 12:4-7, 11, 17, 18; 14:22-27) Omo liaco, kesulilo liunyamo watatu kuenda wepandu wesambata lianyamo epanduvali, onepa yaco yekũi, ka va endele oku talavaya layo oco va lande ovina va sukila kolohongele vinene, pole, ya enda oku eciwa kovitunda, kovingendeleyi, kovimbumba kuenda kolosiwe ka vi kuete va isiavo vi sangiwa vimbo liaco.—Esn 14:28, 29; 26:12.
Perspicaz-3 kem. 476
Unyamo Wesambata
Unyamo Wesambata wa enda oku tukuiwa okuti “unyamo woku yovola [hash·shemit·táh].” (Esn 15:9; 31:10) Vokuenda kunyamo waco, osi ya enda oku puyukapo okuti ka yi limiwa. (Etu 23:11) Kua kalavo epuyuko ale oku yovola olofuka. Ca kala “eyovo ku Yehova,” oco a sivayiwe. Ndaño okuti vakuavo va enda oku ci tenda lonjila yimue ya litepa, vamue va popia okuti olofuka ka via pongolokele nda omunu wa levalisa ka sakalaisa u Heveru oco a fete ofuka, momo kunyamo waco ongunja ka yonguile cimue; pole, omunu wa levalisa wa sukilile oku sakalaisa ocingendeleyi oco o fete. (Esn 15:1-3) Alongisi vamue va popia vati, olofuka via lingawaile locimãlo coku kuatisa manji umue ohukũi, via enda oku yimuiwa, pole, olofuka via lingawaile polomĩlu via kuata ocimãho ca litepa. Ovo va popia okuti kocita catete, Hillel wa tumbikile ocihandeleko cokuti, omunu wa levalisa wa sukilile oku enda kombonge loku linga ohuminyo yoku yimula ofuka.— (O Pentateuco e as Haftorás), editado por J. Hertz, Londres, 1972, pp. 811, 812.
Perspicaz-1 kem. 836 ocin. 6
Upika
Ovihandeleko via kala pokati kapika kuenda vacime. Pokati ka va Isareli, ovihandeleko viupika u Heveru via litepele levi viupika ocingendeleyi, ale ocingendeleyi ca tungile vofeka. Omunu ka kaile u Heveru wa enda oku amamako oku kala ocipiñalo ca cime caye kuenda ca enda oku lingiwa ku isia toke komõla wulume (Ovs 25:44-46), upika u Heveru wa sukilile oku yovuiwa kunyamo wepanduvali okuti, kunyamo waye a kala kupika ale kunyamo Wonjolela, pole, ca tambele lika kunyamo watete eya. Vokuenda kuotembo a kala kupika, upika u Heveru wa sukilile oku tatiwa ndonãlavayi yimue yi fetiwa. (Etu 21:2; Ovs 25:10; Esn 15:12) U Heveru wa li landisa eye muẽle kupika kocingendeleyi ca tunga vofeka, komunu umue ukuepata liocingendeleyi ca tunga vofeka, wa sukilile oku yovuiwa votembo yosi citava oku ci linga, ci kaile eye muẽle ale umue o kuete omoko yoku u yovola. Ondando yeyovo ya kunamẽlele ketendelo lianyamo a supapo toke kunyamo weyovo ale toke Kunyamo wepanduvali wupika. (Ovs 25:47-52; Esn 15:12) Eci cime a yovola upika umue u Heveru, wa sukilile oku eca ombanjaile yimue yi lekisa okuti, wa yovuiwa. (Esn 15:13-15) Nda upika umue wa kuata ale ukãi osimbu ka lingile upika, ukãi o yovuiwa kumue laye. Omo liaco, nda upika vo wihã ukãi umue (okuti ocingendeleyi, haeye ka kuete omoko yoku yovuiwa kunyamo wepanduvali woku kala kupika), ukãi waco kumue lomãla vaye vamamako oku kala ocipiñalo ca cime caye. Pole, upika u Heveru wa sukilile oku nõla nda amamako oku kala lacime caye ale sio. Eye wa sukilile oku tombuiwa ketũi locivela cimue, oco a lekise okuti, amamako oku kala upika.—Etu 21:2-6; Esn 15:16, 17.
Ovina vi Sangiwa Vembimbiliya
Utala Wondavululi, 1/4/2006 kem. 31 kelimi Lioputu
Apulilo a Lingiwa la Vakuakutanga
Nye tu lilongisila kocihandeleko ci sangiwa Ketundilo 23:19 cokuti: “Ku ka teleke ositu yokahombo vasenjele a inaco”?
Ocihandeleko ca eciwile ku Mose okuti ca tukuiwa olonjanja vitatu Vembimbiliya, ci tu kuatisa oku limbuka olondunge via Yehova, ohenda kuenda ocikembe caye. Ci lekisavo okuti, eye o nyãle efendelo liesanda.—Etundilo 34:26; Esinumuĩlo 14:21.
Oku teleka okahombo ale ocinyama cikuavo vasenjele a inaco, ci patãla ocihandeleko ca eciwile la Yehova. Suku wa linga eliangiliyo liokuti asenjele a ina, a pangiwa locimãho coku tekula omõla kuenda oku kuatisiwa la-o oco a kule. Oku teleka okahombo vasenjele a inaco, ci lekisa “oku sepula ocihandeleko ca Suku, loku kola ku kasi pokati ka ina lomõlaye.”
Handi vali, vamue va popia okuti oku teleka okahombo vasenjele a inaco, citava okuti ca kala ocihilahila cimue cefendelo liesanda oco ombela yi loke. Nda olondaka viaco via kaile viocili, ocihandeleko caco nda ca teyuila va Isareli kovituwa vĩvi viefendelo liesanda kuenda kungangala wolofeka vina via kala ocipepi lavo. Ocihandeleko ca eciwile ku Mose, ca lekisile okuti va Isareli va sukilile oku yuvula oku kuama olonumbi violofeka viaco.—Ovisila 20:23.
Tu pondola oku limbuka ocikembe kuenda ohenda ya Yehova. Ocili okuti, Ocihandeleko ca kuata olonumbi vialua via li soka vina via lekisa okuti, ka citava oku tata lãvi ovinyama ale oku yuvula oku linga ovina ndomo via sokiyiwa. Ndeci, Ocihandeleko ca lekisile okuti ka citava oku lumba ocinyama cimue ci kasi la inaco, pole, ka ca tẽlisile oloneke epanduvali, oku ponda ocinyama caco kumosi lokamõla kaco keteke limuamue, ale oku upa onjila yimue pocanju lasala aco ale lomãla vaco.—Ovisila 22:27, 28; Esinumuĩlo 22:6, 7.
Ocili okuti, Ocihandeleko ka ca kaile ulala wolonumbi vimue via tĩla. Pokati kovina vikuavo, olonumbi viaco vi tu kuatisa oku vokiya ovisimĩlo viwa vioku sokolola kovituwa vi komohĩsa via Yehova.—Osamo 19:7-11.
OSEMANA 19-25 YEVAMBI LINENE
OVOKUASI A SANGIWA VONDAKA YA SUKU | ESINUMUĨLO 16-18
“Olonumbi Vioku Sombisa Lesunga”
Perspicaz-1 kem. 479 ocin. 5
Upeke
Oku yuvula oku lekisa esunga omo lioku kemba poku tetulula ocitangi cimue, ca kala ocindekaise cupeke kuenda Vocihandeleko mu sangiwa olonumbi vialua vi pisa ovitukiko locame, momo ovina viaco vi kapa vupeke onganji loku pengisa esunga kuenda oku u vetiya oku kala ukuacame. “Ovitukiko vi yapuisa omunu o tetulula lolondunge.” (Etu 23:8) “Ovitukiko vi tateka omunu oku lekisa olondunge.” (Esn 16:19) Ndaño okuti onganji ya sunguluka kuenda yi sokolola ciwa, citava okuti yi yapuisiwa lombanjaile yeciwa lomanu va kongeliwa vocitangi caco. Ocihandeleko ca Suku ka ci tendi lika elinga liupeke, pole, li tendavo ovisimĩlo momo citi: “Ku ka lekise ocame kohukũi okuti o velisapo ohuasi.” (Ovs 19:15) Omo liaco, poku sokolola komanu, onganji poku tetulula ovitangi ka citava oku velisapo olohuasi, omo liukuasi wavo.—Etu 23:2, 3.
Perspicaz-3 kem. 106 ocin. 7
Etendelo, Oku Tenda
Vali. Etendelo liavali li sangiwa olonjanja vialua vulandu wocihandeleko cesombiso. Oku taviwa kulandu wolombangi vivali, kueca ongusu kuvangi umue. Olombangi vivali ale vitatu, via sukiliwile oco vi imbe uvangi wocitangi cimue kovaso yolonganji. Onumbi yaco yi kuamiwavo vekongelo Liakristão. (Esn 17:6; 19:15; Mat 18:16; 2Ko 13:1; 1Ti 5:19; Hev 10:28) Suku wa eca onumbi eyi poku eca Omõlaye oco a linge Onjovoli yomanu vosi. Yesu wa popia hati: “Vocihandeleko cene muẽle mua sonehiwa ndoco: ‘Uvangi womanu vavali wocili.’ Ame ndi limbila ame muẽle uvangi kuenda Isia una wa numa o njimbilavo uvangi.”—Yoa 8:17, 18.
Perspicaz-3 kem. 486 ocin. 7
Ocitunda
Ovitunda ovio via tambuile tete esumũlũho lioku lombolola ocihandeleko ca Suku kuenda via kuata omoko ya velapo yoku tetulula ovitangi ko Isareli. Ovitunda via kuata ocikele coku kuatisa olonganji oku upisa valupale via kala kuenda via enda oku vumbila kumue lolonganji kovikele via tĩla okuti, oku kuata lika uloño woku tetulula ovitangi viopocitumãlo, hacoko lika. (Esn 17:8, 9) Nda okuti kuli ocitangi cimue coku ponda, pole, ka ca tetuluiwile, kua kisikiwile okuti akulu vovolupale va kalapo oco va imbe uvangi wokuti, ku kuamiwa onjila ya sunguluka poku tundisa eko liosonde volupale. (Esn 21:1, 2, 5) Nda okuti ulume ukuesepa wa lundila ukãi waye hati wa linga ukahokolo vuyombeki, ukãi waco wa sukilile oku ambatiwa vohondo yi kola, muna ocitunda cu lomboluila ukũlĩhĩso wa Yehova, watiamẽla kocili cukãi ka kuete eko ale yuna o kuete eko, oco va sande esombiso Liaye liesunga. (Ate 5:11-31) Omo liaco, kovina viosi vi lingiwa, esombiso lia lingiwa lovitunda ale lolonganji via nõliwa, lia sukilile oku sumbiwa; nda omunu ka pokola konumbi yaco, o pondiwa.—Ate 15:30; Esn 17:10-13.
Perspicaz-3 kem. 742 ocin. 4
Ombonge Yesunga
Vekongelo Liakristão. Ndaño ka muli umue o panga onepa kombonge, ekongelo Liakristão, citava okuti li sombisa vakuambuanja va sukila epindiso konepa yespiritu kuenda citava okuti va tundisiwa. Omo liaco, upostolo Paulu wa sapuila vana va kuete ocikele coku songola, okuti va sukila oku sombisa vana va kasi vekongelo.() Poku sonehela akongelo kuenda vamanji va kuete ovikele vioku songola, ci kaile Paulu la Petulu va pinga okuti akulu vekongelo va sukila oku lavulula ekalo liekongelo konepa yespiritu, loku kuatisa kuenda oku pengulula una eca enanga ka lia sungulukile. (; sokisa .) Vana va nyõla omunga ale va vetiya unanguluke, va sukila oku penguluiwa onjanja yatete kuenda onjanja yavali osimbu ekongelo ka lia nõlelepo onjila yi kuamiwa. () Pole vana va tamãlala koku linga ekandu va sukila oku tundisiwa vekongelo. Eci ci lomboloka epindiso ku vana vahuka okuti, ocituwa cavo cĩvi ka citava okuti camamako vekongelo. () Paulu wa pindisa alume vekongelo vana va kuete ocikele coku kala ndolonganji va liongolola oco va sombise ovitangi ndevi. () Va sukila lika oku tava okuti, ulandu umue wocili nda pali olombangi vivali ale vitatu, poku sokolola kovovangi okuti ka mu kongela ocame.—1Ti 5:19, 21.
Ovina vi Sangiwa Vembimbiliya
Perspicaz-2 kem. 87 ocin. 2
Oku Tundisiwa
Vemẽhi Liocihandeleko, oco ku nõliwe onjila yimue yatiamẽla kocitangi cimue, ca sukilile uvangi wolombangi vivali. (Esn 19:15) Olombangi viaco ovio via kuata tete ocikele coku imba ovawe komunu wa kuata eko. (Esn 17:7) Eci ca lekisile ombili va kuatela ocihandeleko ca Suku, loku yelisa ekongelo lio Isareli kuenda oku situlula uvangi wuhembi.
OSEMANA 26 YEVAMBI LINENE-1 YENYENYE
OVOKUASI A SANGIWA VONDAKA YA SUKU | ESINUMUĨLO 19-21
“Omuenyo Womunu u Kola ku Yehova”
Utala Wondavululi, 17.11 kem. 16 ocin. 4
Setukula Esunga Lia Yehova Kuenda Ohenda Yaye
4 Ovaimbo epandu ocitililo a sokiyiwile lonjila yimue okuti, ci leluka oku tililako. Yehova wa sapuila va Isareli oco okuti, koñele loñele Yolui Yordão va nõlako ovaimbo atatu. Momo lie? Oco okuti, ci leluka komondi yi tilila lonjanga pokati kovaimbo aco kuenda lonjila yimue ya leluka. (Ate. 35:11-14) Atapalo aco a kala ciwa. (Esn. 19:3) Ndomo ca lekisiwa vovihilahila via va Yudea, ovo va enda oku kapa olondimbukiso kohulo yatapalo oco vi kuatise omondi oku sanda ovaimbo ocitililo. Omo liaco, u Isareli wosi wa ponda ukuavo pole ka ci lingile ocipango, ka sukilile oku tilila kofeka yikuavo kuna a ponduile oku vetiyiwa oku fendela olosuku viesanda.
Utala Wondavululi, 17.11 kem. 17 ocin. 9
Setukula Esunga Lia Yehova Kuenda Ohenda Yaye
9 Ovaimbo ocitililo a kuata ocimãho ca velelepo coku teyuila va Isareli keko liosonde. (Esn. 19:10) Yehova wa velisapo calua omuenyo. Eye o suvuka omondi. (Olo. 6:16, 17) Omo okuti Yehova ukuesunga haiye o kola, ka ecelela okuti omunu wa ponda ocipango ka sombisiwa. Ocili okuti, omunu wa ponda ukuavo okuti ka ci lingile ocipango wa enda oku tatiwa lohenda. Pole, tete wa sukilile oku lombolola ocitangi caye kakulu. Nda akulu va limbuka okuti olofa viaco haviocipangoko, omondi yaco ya sukilile oku kala vimbo liocitililo toke eci ocitunda ci fa. Eci ci lomboloka okuti pamue, omondi yi kala vimbo liaco vokuenda kuomuenyo waye wosi. Eliangiliyo liaco lia kuatisa va Isareli oku sumbila omuenyo. Oco va sumbile Una wa eca omuenyo, va sukilile oku likolisilako oco ka va ka kape kohele omuenyo wa vakuavo.
Perspicaz-3 kem. 522
Osonde
Omunu o kuete omoko yoku sanjukila omuenyo Suku o wĩha kuenda wosi wa enda oku u tateka, wa laikele oku li lombolola ku Suku. Eci ca limbukiwa eci Suku a sapuila omondi Kaini hati: “Osonde ya manjove yi kasi oku mbilikiya oku upisa posi.” (Eft 4:10) Ndaño muẽle omunu umue wa suvukile manjaye kuenda wa kuata onjongole yoku u ponda, ale oku u lundila pamue oku imbila uvangi wuhembi watiamẽla kokuaye kuenje o kapa omuenyo womunu waco kohele, nda wa likokela eye muẽle eko liosonde.—Ovs 19:16; Esn 19:18-21; 1Yo 3:15.
Ovina vi Sangiwa Vembimbiliya
Perspicaz-3 kem. 741 ocin. 1
Ombonge, Ekanga
Ombonge ya kala pombundi yolupale. (Esn 16:18; 21:19; 22:15, 24; 25:7; Rut 4:1) Ondaka “ombundi” ya lombolokele ocitumãlo ca kala voluayela volupale, ocipepi lombundi. Olombundi ovio via kala ocitumãlo coku tangela Ocihandeleko kovaso yomanu kuenda opo va enda oku ecela olonumbi. (Neh 8:1-3) Pombundi ca lelukile oku ecelapo uvangi watiamẽla kocitangi cimue, ndeci oku landisiwa kuepia limue kuenda ovina vikuavo, momo opo omanu valua va enda oku iñilila loku tunda vokuenda kueteke. Handi vali, esapulo liesombiso li lingiwila pombundi, lia enda oku kuatisa olonganji oku kuata utate loku lekisa esunga poku sombisa kuenda onjila yi nõliwapo. Citava okuti, kua sokiyiwile ocitumãlo cimue ocipepi lombundi kuna olonganji via enda oku lingila upange wavo lonjila yimue ya kolapo. (Yov 29:7) Samuele wa enda oku linga ungende kocikanjo co Betele, co Giligali kuenda co Misipa kuenje “wa tetuluila o Isareli kovitumãlo viosi evi,” ndeci ko Rama kuna kua kala onjo yaye.—1Sa 7:16, 17.
OSEMANA 2-8 YENYENYE
OVOKUASI A SANGIWA VONDAKA YA SUKU | ESINUMUĨLO 22-23
“Ocihandeleko ca Situluile Okuti Yehova wa Kapeleko Ovinyama”
Perspicaz-2 kem. 105
Ocilemo
Kosimbu olonjanja vialua, ovinyama va enda oku talavaya lavio oco vi ambate ovilemo kuenda va Isareli va handelekiwile okuti, nda va mola ocimbulu comunu umue va suvukile ca kupuka locilemo, ka citava okuti va ci pitahãla pole, “va sukilile oku popela ocinyama caco.” (Etu 23:5) Onjongo yovina ocinyama ca enda oku ambata, ya tukuiwile okuti ocilemo, ndeci “ocilemo colomula vivali.”—2Ol 5:17.
Perspicaz-1 kem. 701 ocin. 3
Esinumuĩlo
Elivulu Liesinumuĩlo li lekisavo okuti, ovinyama via tatiwile locisola calua. Va Isareli va tambuile ocihandeleko cokuti, ka citava oku upa onjila yimue pocanju momo ya enda oku teyuila omãla vayo kovina vi kapa kohele omuenyo wavo. Ovo va ponduile lika oku ambata omãla vaco, pole, ka catavele oku ambata ina yaco. Ina yaco wa kuata elianjo lioku tata vali omãla vakuavo. (Esn 22:6, 7) Ongunja ka catavele okuti yi kutila ongombe locimbulu kokanga yimuamue poku lima, oco ka yi kakokele ovitangi ocinyama ka ci kuete ongusu yalua. (22:10) Ocimbulu ka ca tavele okuti ci kisikiwa oku ũha osimbu ci sasa olomema sanga ci kala lonjala, momo olomema via kala ocipepi locimbulu caco kuenda osimbu ci likolisilako oku talavaya, ci pesela ongusu yalua.—25:4.
Utala Wondavululi, 15/10/2003 kem. 32 ocin. 1-2 kelimi Lioputu
“Ko ka Likutili Kokanga ka ya Lisokele Lava ka va Tavele”
NDOMO o ci lete vemẽla lilo, ocimbulu kuenda ongombe via kutiwila pamosi, ka via kolelepo. Kokanga via kutiwila, ya pangiwila ovinyama vivali vi kuete utunga longusu yimuamue, yi kasi oku talisa ohali ovinyama viaco. Catiamẽla kekalo liwa liovinyama viaco, Suku wa sapuila va Isareli hati: “Ku ka kutile ongombe locimbulu kokanga yimuamue poku lima.” (Esinumuĩlo 22:10) Ocinimbu caco, ci tiamisiwilako kongombe kuenda kocimbulu.
Ocili okuti, ukuakulima ka ponduile oku kokela ovinyama viaye ovitangi. Pole, nda ka kuete olongombe vivali, ca tavele oku talavaya lovinyama a kuata. Citava okuti, eci oco ukuakulima wo kocita 19 wa lekisiwa vocindekaise, a nõlelepo oku linga. Omo lioku litepa kutunga kuenda kuongusu, ocinyama cina ka ca kuatele ongusu yalua, ca sukilile oku likolisilako calua oco camameko kuenda ocinyama cina ca kuata ongusu yalua, ca sukilile oku vokiya ongusu yayo.
Ovina vi Sangiwa Vembimbiliya
Perspicaz-1 kem. 725
Ofuka, Ukuakuleva
Ofuka yi lomboloka cimue omunu a eca kukuavo, locimãho coku feta ale oku eca ocina cikuavo. Ko Isareli yosimbu, olofuka via enda oku kisikiwa tete omo liapongoloko olombongo. Oku kala ukuakulevala ca enda oku kala ocitangi komunu umue u Isareli; omunu wa enda oku levala, wa sukilile oku kala upika wondevalisi. (Olo 22:7) Afendeli va Suku va handelekiwile okuti, va sukilile oku kala vakuakueca kuenda vakuahenda poku levalisa umue wa kuata esukila okuti, ka tiamẽlele kepata lia va Isareli, ka ca tavele oku ci linga ndomĩlu poku pinga osindike. (Etu 22:25; Esn 15:7, 8; Os 37:26; 112:5) Pole, va ponduile oku pinga osindike kocingendeleyi. (Esn 23:20) Va Yudea vakuakukonomuisa va kũlĩhĩle okuti, esokiyo liaco lia tiamisiwililevo koku levalisa olombongo ndaño ka kua kaile esukila. Ovingendeleyi via kala lika vofeka vokuenda kuotembo yimue, olonjanja vialua via enda lika oku linga olomĩlu kuenda ca sungulukile oku feta osindike, momo via ponduilevo oku levalisa vakuavo losindike.
Ocilemo
CECI OMANU VA POPIA Vamue va yeva ovinyama oco va linge lavio olomapalo, locisimĩlo coku lupoka lavio ale oku vi kuata. Vamue va kuete ocisimĩlo ndeci ca Leon Tolstoi wo ko Russia, wa soneha okuti oku ponda kuenda oku lia ovinyama “cĩvi.”
CECI EMBIMBILIYA LI POPIA Suku ecelela okuti omanu va ponda ovinyama oco va liteyuile ale oku kuata uwalo. (Etundilo) Embimbiliya li lekisavo okuti omanu va pondola oku ponda ovinyama oco va lie
Kefetikilo ku popia hati: “Ovinyama viosi vi ñuala ñuala okuti vi kasi lomuenyo, vi linge okulia kuene.” Ndaño muẽle Yesu wa kuatisa olondonge viaye oku pipa olosi veya oku lia noke.—Y.
Pole Embimbiliya li lekisa okuti Suku “o suvuka omunu o sole ungangala.” (O) Eci ci lekisa okuti, Suku ka yongola okuti omanu va tata lãvi ovinyama ale oku vi ponda ndolomapalo.
Embimbiliya li lekisa okuti Suku wa kapako omuenyo wovinyama:
Ndomo ci lekisiwa Vembimbiliya, kotembo eci ovina via lulikiwa, “Suku yu wa lulika ovinyama viovusenge ndapata ao, lovinyama viovimbo ndapata ao kuenda ovinyama viosi vi likoka posi ndapata ao. Kuenje Suku wa mola okuti ca posoka.”—.
Embimbiliya li popia eci catiamẽla ku Yehova hati: “[Eye] eca okulia kovinyama.” (O) Suku wa lulika onepa yimue yecelela okuti ovinyama vi kuata oku lia kuenda oviteyuilo. Soma Daviti wo ko Isareli vohutililo a linga wa popia ndoco: “A Yehova, ove o popela omunu locinyama.” (O) Ndeci, vokuenda Kuetande, Yehova wa teyuila omanu ecelãla, kuenda apata osi ovinyama eci a nyõla olondingaĩvi.—Efetikilo .
Eci ci lekisa okuti Yehova wa kapako oviluvo viaye ovinyama kuenda o yongola okuti omanu va vi tata lesumbilo.
‘Ukuesunga o tata ovinyama viaye viovimbo.’—Olosapo .
OSEMANA 9-15 YENYENYE
OVOKUASI A SANGIWA VONDAKA YA SUKU | ESINUMUĨLO 24-26
“Ocihandeleko ca Situluile Okuti Yehova wa Kapeleko Akãi”
Perspicaz-3 kem. 34 ocin. 8
Ukãi
Ndaño muẽle ovihandeleko via tiamẽla kuyaki, via lekisile ndomo ku lekisiwa ohenda kukãi kuenda kulume wa kuela ndopo, okuti o kala konjo vokuenda kunyamo. Eci ca enda oku eca epuluvi koweli yaco lioku talavaya lomoko yavo yoku cita omõla umue, eci ca enda oku eca elembeleko konjali yukãi nda ulume waye ka kasi laye, ale nda wa fila kuyaki.—Esn 20:7; 24:5.
Perspicaz-3 kem. 429 ocin. 3
Oku Pupulula
Ocili okuti, lia kala esokiyo limue liwa kolohukũi vo vofeka kuenda ca enda oku vetiya omanu oku kala vakuakueca, vakuahenda kuenda oku kolela kesumulũho lia Yehova okuti, vofeka ka mu kala ovisiãhi. Eci ci likuata lolondaka via Daviti wa popia hati: “Sia la mola ukuesunga okuti wa yandulukiwa, ndaño omãla vaye oku sanda okulia.” (Os 37:25) Omo lioku kuatisiwa leliangiliyo Liocihandeleko ca eciwile kokuavo, ndaño muẽle olohukũi poku linga ovopange avo, ka va kalele onjala, ci kaile ovo ale omãla vavo, ka va pingaile ombolo.
Utala Wondavululi, 1/3/2011 kem. 23 kelimi Lioputu
Wa ci Kũlĩha?
Ko Isareli, nda ulume umue o fa okuti ka citile omõla wulume, manjaye wa sukilile oku kuela lukãi waye ocimbumba loku cita omãla oco ocitumbulukila culume wa fa camameko. (Efetikilo 38:8) Onumbi yaco ya sangiwile Vocihandeleko ca eciwile ku Mose, ca kũlĩhĩwile okuti olohuela viunawa. (Esinumuĩlo 25:5, 6) Ovilinga via Boasi via lomboluiwa kelivulu lia Ruti, vi lekisa okuti onumbi yaco ya eciwilevo kapata akuavo okuti alume vana va tiamẽlele kulume wa fa, nda eye ka kuete manji ulume.—Rut 1:3, 4; 2:19, 20; 4:1-6.
Olohuela viunawa via kũlĩhĩwile calua kotembo ya Yesu, eci ci limbukiwila kolondaka via Vakuavisonehua vi sangiwa ku Marko 12:20-22. Flávio Josefo onoño yimue yo kocita catete, wa popia okuti ovituwa viaco ka via endele lika oku teyuila onduko yepata, pole, via endavo oku ecelela okuti ovipako vi kala viepata loku kuatisa ocimbumba. Kotembo yaco, ukãi ka kuatele omoko yoku piñala ovipako vimue via kala viulume waye. Omo liaco, omõla una wa citiwa kolohuela viunawa, eye wa kuata omoko yoku piñala ovipako viomunu wa fa.
Ovina vi Sangiwa Vembimbiliya
Perspicaz-1 kem. 729 ocin. 1
Oku Linyãla
Ukanda Woku Linyãla. Eci ka ci lomboloka okuti omo liovina vĩvi via lingiwile via lomboluiwa Vocihandeleko catete ca eciwile ku Mose, via vetiyile ulume u Isareli oku nyãla ukãi waye. Omo liaco, eye wa sukilile oku kuama olonumbi vimue. Wa sukilile “oku soneha ukanda woku linyãla laye, loku weca kokuaye noke u tundisa konjo yaye.” (Esn 24:1) Ndaño okuti Ovisonehua ka vieci olonumbi vikuavo viatiamẽla kovina viaco, vesokiyo liaco citava okuti mua kongelele oku kũlĩhĩsa alume va kuata omoko yaco oco va kuatise koku linalisa. Otembo ya kongelele voku pongiya ukanda woku linyãla kuenda oku tẽlisa esokiyo liaco, nda ca kuatisa ulume oku kũlĩhĩsa onjila a yonguile oku kuama. Te kula esunga liwa lioku linyãla, kuenda nda ocihandeleko ca kapiwileko lonjila ya sunguluka, nda ca kuatisa omunu oku sokolola lutate osimbu handi ka tambuile uvangi woku linyãla. Handi vali, omoko kuenda olonjongole viukãi, via endavo oku teyuiwa. Ovisonehua ka vi situlula ulandu “wukanda woku linyãla.”
OSEMANA 16-22 YENYENYE
OVOKUASI A SANGIWA VONDAKA YA SUKU | ESINUMUĨLO 27-28
“Asumulũho Osi a-a . . . a Keya Kokuove”
Utala Wondavululi, 15/12/2010 kem. 19 ocin. 18
Tambula Asumũlũho Kosoma Ya Nõliwa Lespiritu Lia Suku!
18 Voku yevelela mua kongela oku kapako eci Ondaka ya Suku yi popia kuenda oku litekula lokulia kuespiritu eye a ecaeca. (Mat. 24:45) Ci lombolokavo oku pokola ku Suku kuenda Komõlaye. Yesu wa popia hati: “Havosiko va popia lame vati, A Ñala, a Ñala, va iñila vusoma wokilu, te u o linga ocipango ca Tate o kasi kilu.” (Mat. 7:21) Oku yevelela Suku ku lomboloka oku pokola lutima wosi kesokiyo eye a tumbika vekongelo Liakristão, kakulu va nõliwa haivo “olongavelo komanu.”—Va Efe. 4:8.
Utala Wondavululi, 1/10/2001 kem. 8 ocin. 2
Anga hẽ Asumũlũho a Yehova Aka ku Wila?
2 Ondaka yo Heveru ya pongoluiwa hati, oku “yevelela,” yi sangiwa kelivulu Liesinumuĩlo 28:2, yi lomboloka oku amamako loku pokola. Omanu va Yehova, ka ci tava okuti, va pokola ño kokuaye olonjanja vimue, pole, va sukila oku amamako loku ci linga komuenyo wavo wosi. Nda va ci linga, oco lika asumulũho a Suku aka va wila. Ondaka yo Heveru ya pongoluiwa hati, ‘oku wila,’ olonjanja vimue ya siata oku kuata elomboloko ‘lioku kuata ocina cimue, ale oku ci sanga.’
Utala Wondavululi, 15/9/2010 kem. 8 ocin. 4
Sanda Asumũlũho a Yehova
4 Ocituwa cipi va Isareli va sesamẽlele oku lekisa poku pokola? Ocihandeleko ca Suku ca lekisile okuti nda ka va lekisile ‘onjolela lesanju liutima,’ epokolo liavo nda ka lia kuatele esilivilo. (Tanga Esinimuĩlo 28:45-47.) Yehova ka yongola okuti tu u pokola locikukũi ndeci ovinyama lolondele vi lingainga. (Mar 1:27; Tia. 3:3) Epokolo liocili ku Suku li lekisiwa locisola. Olio li limbukiwila kesanju li tunda koku kolela okuti olonumbi via Yehova ka vi lemi kuenda eye “eca onima kuava vo sanda.”—Va Hev 11:6; 1Yo 5:3.
Ovina vi Sangiwa Vembimbiliya
Perspicaz-2 kem. 767
Ondimbukiso Yongave
Ocihandeleko ca Yehova ca pisile oku pitahãla olondimbukiso violongave. (Esn 19:14; talavo Olo 22:28.) Ocili okuti, omunu wosi “o pitahãla ondimbukiso yongave yomunu a lisungue laye,” wa enda oku siñaliwa. (Esn 27:17) Omo okuti vakualosi oco va litekule va tambele kueci cima vovapia avo, oku pitahãla vondimbukiso yongave, ca lombolokele oku tepulula ovikulia viovepia viomunu ukuavo oco a litekule lavio. Eci ca lombolokele oku nyana, ndomo ca tendiwile kosimbu. (Yov 24:2) Pole, kua kala omanu ovimunu, va kuata eko liakandu aco, kuenda olombuale vio ko Yuda kotembo ya Oseia, via sokisiwile la vana vakuakupitahãla vondimbukiso yongave.—Hos 5:10.
OSEMANA 23-29 YENYENYE
OVOKUASI A SANGIWA VONDAKA YA SUKU | ESINUMUĨLO 29-30
“Oku Vumba Yehova ka ca Tĩlile”
Utala Wondavululi, 1/1/2010 kem. 10 ocin. 2
Yehova o tu Ĩha Elianjo Lioku Nõla
Anga hẽ, ca tĩla oku kũlĩha eci Suku a yongola kokuetu kuenda oku linga ocipango caye? Mose wa popia hati: “Ocihandeleko cilo ñasi loku ku ĩha etaili ka ca ku kãlẽlẽle, ka ci kasi kupãla.” (Ocinimbu 11) Yehova ka kisika oku linga ocina ca tĩla. Ovihandeleko viaye via sunguluka kuenda via leluka. Handi vali, citava oku vi kũlĩha ciwa. Oco tu kũlĩhe ovina Suku a yongola kokuetu, ka tu sukila oku ‘londa kilu,’ ale oku ‘yokila kesinya likuavo liokalunga.’ (Ovinimbu 12, 13) Embimbiliya li tu sapuila ciwa ndomo tu sukila oku ambata omuenyo wetu.—Mika 6:8.
Utala Wondavululi 1/1/2010 kem. 10 ocin. 1
Yehova o tu Ĩha Elianjo Lioku Nõla
UKÃI umue Ukristão, wa popia hati: “Nda kuatele usumba wokuti, ndika lueyela Yehova.” Ukãi waco, omo liovina vĩvi a enda oku linga vutila waye, wa kuatele ohele yokuti oka lueya vali. Anga hẽ, tu kasivo oku liyaka locitangi caco? Tu sukila hẽ, oku kuata ohele yokuti eteke limue tuka lueyavo? Sio. Yehova Suku wa tu ĩha ombanjaile yoku linõlela eci tu yongola oku linga. Omo liaco, tu pondola oku nõla ndomo tu ambata omuenyo wetu. Yehova o yongola okuti tu nõla onjila ya sunguluka, kuenda Ondaka yaye, Embimbiliya, yi tu sapuila ndomo tu cilinga. Kũlĩhĩsa olondaka via Mose vi sangiwa kelivulu Liesinumuĩlo kocipama 30.
Utala Wondavululi 1/1/2010 kem. 10 ocin. 4
Yehova o tu Ĩha Elianjo Lioku Nõla
Anga hẽ, Yehova wa kapako onjila yosi tu nõla komuenyo wetu? Ocili okuti wa kapako! Mose lekuatiso liespiritu sandu wa popia hati: “Nõla omuenyo.” (Ocinimbu 19) Tu pondola ndati oku nõla omuenyo? Eye wamisako hati: “Sola Yehova, Suku yove, loku pokola kondaka yaye loku likakatela laye.” (Ocinimbu 20) Nda tua sola Yehova, tuka pokola kokuaye loku likakatela kokuaye ndaño lovitangi. Poku linga ovina evi, tu lekisa okuti tua nõla omuenyo, momo eyi oyo onjila ya velapo yeca elavoko lioku kala otembo ka yi pui voluali luokaliye lua Suku luna lu laika oku iya.—2 Petulu 3:11-13; 1 Yoano 5:3.
Ovina vi Sangiwa Vembimbiliya
Perspicaz-3 kem. 149 ocin. 7
Etũi
Yehova pocakati cafendeli vaye, wa tukula va Isareli vakuesino ndu okuti, ka va ‘seviwile evamba vovatũi.’ (Yer 6:10; Ovl 7:51) Ci kasi ndu okuti va sitikile ovatũi avo locina cimue ci va tateka oku yeva. Ovatũi amue okuti ka a yikuiwile la Yehova, una eca atũi elomboloko kuenda epokolo ku vana vo sanda, pole ecelela okuti ovatũi konepa yespiritu a vana va sina, a linga ovisitatũi. (Esn 29:4; Rom 11:8) Upostolo Paulu wa tukuile otembo yimue okuti vana va litukula okuti Akristão, va laikele oku patãla ekolelo liocili okuti, ka va lekisa onjongole yoku yeva ocili condaka ya Suku, pole va laikele oku nõlapo oku ‘yeva eci ovatũi avo a sanjukila oku yevelela,’ loku yevelela olongisi vuhembi. (2Ti 4:3, 4; 1Ti 4:1) Handi vali, citavavo okuti atũi a pondola “okuyua” omo lioku yeva asapulo ãvi, ca piãla enene asapulo ungangala.—1Sa 3:11; 2Ol 21:12; Yer 19:3.
OSEMANA 30 YENYENYE–5 YENYENYE LINENE
OVOKUASI A SANGIWA VONDAKA YA SUKU | ESINUMUĨLO 31-32
“Lilongisila Kolondaka Viocisungo Cimue”
Utala Wondavululi, 06.20 kem. 10 ocin. 8-9
“Pandeka Utima Wange Kesumbilo Lionduko Yove”
8 Eci kua kambele otembo yitito oco va Isareli va iñile Vofeka Yohuminyo, Yehova wa longisa Mose ocisungo cimue. (Esn. 31:19) Noke, Mose wa longisa ocisungo caco ku va Isareli. (Tanga Esinumuĩlo 32:2, 3.) Poku sokolola kocinimbu 2 leci 3, tu limbuka okuti Yehova ka yongola okuti onduko yaye yi vundisiwa, ale yi tatiwa ndu okuti ka yi tava oku yi tukula. Eye o yongola okuti omanu vosi va kũlĩha onduko yaye! Sokolola esumũlũho va Isareli va kuata eci Mose a va longisa catiamẽla ku Yehova kuenda konduko yaye yi komõhisa! Ndeci ombela yi talaleka kuenda yi kulisa ovikũla, ovina Mose a longisa viatiamẽla ku Yehova, via pamisa va Isareli kuenda via va kavuluisa. Eyi ongangu yimue yiwa tu sukila oku kuama poku longisa omanu.
9 Eci tu kundila konjo lanjo kuenda volokololo, tu sukila oku talavaya Lembimbiliya oco tu lekise komanu onduko ya Suku, Yehova. Talavaya ciwa lalivulu etu, olovideo kuenda ocipama cimue ci sivaya Yehova vonumbi yetu yo Internet. Eci tu kasi kupange, kosikola, ale ceci tu linga ungende umue, tu sukila oku sanda apuluvi oku vangula catiamẽla ku Suku yetu ukuacisola kuenda ndomo eye a tuwa. Lombolola ovina vi komõhisa Yehova a ka lingila omanu vosi kovaso yoloneke. Poku ci linga, ove o ka kuatisa omanu oku limbuka okuti, eci ocina cimue ka va la yeva catiamẽla ku Yehova. Kuenje ove o ka kuatisa koku kemãlisa onduko ya Suku, oku situlula ovohembi lolombonde omanu va enda oku longisiwa viatiamẽla ku Yehova. Eli olio lika elongiso li pamisa kuenda li kavuluisa.—Isa. 65:13, 14.
Utala Wondavululi, 1/5/2009 kem. 14 ocin. 4
Upopi Wovindekaise Vembimbiliya—o Pondola Oku Kuata Elomboloko Liawo?
Embimbiliya li sokisavo Yehova lovina ka vi kuete omuenyo. Eye o tukuiwa hati “Handa yo Isareli”, “ndesenje” kuenda “ndociteyuilo.” (2Samuele 23:3; Osamo 18:2; Esinumuĩlo 32:4) Lipi etosi? Ndeci esenje limue linene lia pama, Yehova Suku o pondola oku kala Ono yimue ya pama haiyo ya koka kokuove.
Utala Wondavululi, 1/1/2010 kem. 19 ocin. 7
Kuama Ongangu ya Yehova eci Olongisa Omãla Vove
7 Konomuisa ocisola Yehova a lekisa poku linalisa la va Isareli. Mose wa popele olondaka vimue viwa, eci a situluila va Isareli ocisola Yehova a lekisa kokuavo, poku hati: “Ndeci ongonga yulombo yi sanyulula ocanju cayo, loku vakuilila ivuvu viayo, kuenje yi nyanyumuila avava ayo loku vi yakela, ha yi vi ambatela koñoño yayo, haico Yehova wa va songuila [vakuepata lia Yakoba].” (Esinumuĩlo 32:9, 11, 12) Oco ongonga yi longise omõla waye oku palãla “yi sanyulula ocanju cayo” loku nyanyumula avava ayo kilu liomãla vaye oco va lilongise oku palãla. Eci omõla umue wonjila a citiwa, o kala pocanju cimue okuti, pocitumãlo cimue ci teyuiwa ciwa, pole, inaco, o ‘nyanyumula avava aye’ oco a teyuile omãla vaye. Nda omõla waco o kasi kohele yoku kupuka, inaco o vata lonjanga kilu liomõla waye, kuenje, u wambatela’ vavava aye. Cimuamue haicovo okuti, Yehova ukuacisola, wa tata ciwa ofeka ya va Isareli. Eye wa ecele komanu Ocihandeleko ca Mose. (Osamo 78:5–7) Yehova va Isareli wa va tatele muẽle ciwa, kuenje, eci va pita lovitangi, eye wa va popela.
Ovina vi Sangiwa Vembimbiliya
Utala Wondavululi, 1/10/2004 kem. 11 ocin. 12
Atosi Avelapo Velivulu Liesinumuĩlo
31:12. Omãla va sukila oku tumãla lakulu kolohongele, oco va yevelele ciwa olonumbi via Yehova.
Utala Wondavululi, 15/5/2007 kem. 15-16
Ñuatisa Ndati Omãla Vange Oku Tambula Epindiso Liocili?
Usumba woku sumuisa Yehova u li kuata locisola tu u kuetele. Suku o yongola okuti afendeli vaye vo sumbila kuenda vo sola. Mose hati: “A Isareli, nye Yehova Suku yove a pinga kokuove? Ceci lika: sumba Yehova Suku yove loku endeila volonjila viaye, loku u sola kuenda oku vumba Yehova Suku yove lutima wove wosi, lomuenyo wove wosi, loku amamako oku pokola kovihandeleko loviholo via Yehova ñasi oku eca kokuove etaili, oco o kale ciwa.”—Esunumuĩlo .
Nda tua longisa omãla vetu oku sumbila Yehova, tu va kapela ociseveto cimue cepindiso ci va kuatisa oku kala vakualondunge. Osimbu vamamako oku kakatela kociseveto caco, va vokiya o njongole va kuetele Ululiki wavo, Ono yukũlĩhĩso wosi wocili. Eci ci ka va kuatisa oku kapako ovina va lilongisa okuti ka va kuata atatahãi. Va ka kuata uloño woku “tepisa pokati keci ciwa leci cĩvi.” () Ociseveto caco ci ka va kuatisavo oku amamako oku kala ambombe kuenda ka va lingi eci cĩvi.—.
Omãla Vove va ku Lavulula!
Pole, tu kuatisa ndati omãla oku sola Yehova kuenda oku u sumbila? Etambululo li kasi Vocihandeleko Yehova a ecele ku va Isareli, pocakati cuprofeto Mose. Olonjali va Isareli va vi sapuila hati: “Sola Yehova Suku yove lutima wove wosi, lomuenyo wove wosi kuenda longusu yove yosi. Olondaka evi ñasi oku ku sapuila etaili, vi kale vutima wove, kuenda vi soneha vovitima viomãla vove loku vi vangula eci o tumãla vonjo yove, leci endela vonjila, lo poku pekela kuenda poku pasuka.”—.
Ocisonehua eci ci longisa kolonjali ovolandu a kuete esilivilo. Umue pokati kovolandu aco wowu: Ene vu sukila oku eca ongangu yiwa. Oco olonjali vi longise omãla oku sola Yehova, ovio muẽle vi sukila oku sola Suku loku kapa vutima wavo olondaka viaye. Momo lie ci kuetele esilivilo? Momo ene a longisi vatete vomãla vene. Ovina va lilongisila kongangu yene, vi ka va kuatisa calua. Ka kuli ocina ca velapo komuenyo womãla okuti ongangu yolonjali yi sule.
Ovisimĩlo viove, ovituwa kuenda olonjongole viove, ka vi situluiwa lika kovina o popia pole vi situluiwavo kueci o linga. () Tunde vutila omãla va lilongisila koku lavulula ciwa olonjali viavo. Ovo va limbula ocina ca velapo kolonjali kuenda olonjanja vialua, ovina viaco ovio ovo va velisapo osimbu va kula. Ove nda o sole Yehova, omãla vove va ka ci limbuka. Ndeci, ovo va ka mõla ndomo oku tanga loku lilongisa Embimbiliya nda ovio ovina via velapo komuenyo wove. Va ka limbukavo okuti ove wa pitisa kovaso upange Wusoma. () Oku enda enda kolohongele olonjanja viosi kuenda oku panga onepa kupange woku kunda, ci ka lekisa okuti oku pitisa kovaso upange u kola wa Yehova, oco ocina ca velapo kokuove.—.
Tẽlisa Ocikele Cove
Ulandu ukuavo olonjali vi pondola oku lilongisa K wowu: Ene vu kuete ocikele coku longisa omãla. Pokati komanu va Suku kosimbu, olonjali ovio via kuatele ocikele coku pindisa omãla. Kuenda catiamẽla Kakristão kocita catete, olonjali viamamako oku kuata ocikele ca velapo coku longisa omãla. () Upostolo Paulu poku sonehela Akristão wa lekisa okuti, ca piãla enene isia wa sukilile ‘oku amamako oku pindisa omãla lovilongua via Yehova.’—.
Omo liesakalalo liekalo liomuenyo, upange kuenda ovina vikuavo, olonjali vi pondola oku setekiwa oku eca komanu vakuavo ocikele coku pindisa omãla. Pole, lomue o pondola oku tẽlisa ocikele conjali yimue ale ca ina umue vakuacisola. Lalimue eteke ku ka pembule esilivilo liocikele cove. Nda o sukila ekuatiso, ci linga lolondunge, pole lalimue eteke ku ka likaile ocikele cove ci kola.
Sokiya Otembo Yoku Longisa Omãla
Ulandu ukuavo olonjali vi pondola oku lilongisa K wowu: Oku longisa omãla ci sukila otembo kuenda oku likolisilako. Olonjali va Isareli va sukilile oku kapa “vutima” womãla ocili ca Suku. Ondaka oku kapa “vutima” yi lomboloka “oku pitulula”, “oku vangula olonjanja viosi.” Eci nda ca lingiwa vokuenda kueteke liosi, oku u pisa komẽle toke koñolosi, “vonjo yove, leci endela vonjila.” Oku longisa omãla oco va pongolole ovituwa viavo oco vi sanjuise Suku, ci sukila otembo kuenda elikolisilo.
Omo liaco, nye o sukila oku linga oco omãla vove va tambule epindiso limue liwa? Ovina vialua. Va longisa oku sola Yehova loku u sumbila. Eca ongangu yiwa konepa eyi. Tẽlisa ocikele cove coku longisa omãla kuenda sanda otembo yi sukiliwa yoku ci linga. Ove kua lipuile, kuenda o lueya osimbu o ci linga. Pole nda wa sanda oku linga ocipango ca Suku lutima wosi, citava okuti omãla va ka sanjukila alikolisilo ove kuenda va ka kuatisiwa la-o. Olosapo vi popia hati: “Pindisa omõla vonjila a sesameÞla oku endela, ndaño ceci a kuka, ka ka yapukamo.” Onumbi eyi yi tiamisiwilavo komãla vakãi.
Epindiso “ungende” umue u lingiwa vokuenda kuomuenyo wosi. Nda ove kuenda omãla vove vu sole Suku, ci kala ungende umue wotembo ka yi pui. Momo olonjanja viosi ku ka kala ovina vialua vioku lilongisa viatiamẽla ku Yehova kuenda ndomo tu linga ocipango caye.—Ukundi.