ELILONGISO 8

Longisa Lalusapo

Mateo 13:34, 35

CECI O SUKILA OKU LINGA: Tukula alusapo a leluka hao a sunguluka oco o vetiye olonjeveleli kuenda oku longisa atosi a velapo.

Nõla alusapo a leluka. Kuama ongangu ya Yesu poku tukula ovina via leluka oco o lombolole ovina via tĩla kuenda ovina omanu va kũlĩha, oco o longise atosi a velapo. Ku ka tatamise olusapo poku tukula ovina ka vi sukiliwa. Alusapo ove, te a kuata elitokeko leci o longisa oco ka a ka tateke omanu oku kuata elomboloko lia suapo.

Kala ukuakukũlĩhĩsa. Kũlĩhĩsa ovina vi kasi oku pita voluali, tanga alivulu etu kuenda yevelela lutate alongisi va loñoloha. Poku ci linga, soneha alusapo wa sola. Kuenje alusapo aco a seleka vokalivulu kove.
Sokolola eci ci kuatisa omanu. Nõla alusapo atiamẽla kovopange a kũlĩhĩwa lomanu hao a vetiya onjongole yavo. Kuata utate wokuti alusapo ove ka a sumuisa umue ale oku u kutisa osõi.
Tiamisila utima ketosi lia velapo. Kuama alusapo oco o longise atosi a velapo okuti ovina ka vi kuete esilivilo havioko. Kũlĩhĩsa okuti omanu ka va patekela lika olusapo, pole va patekelavo eci va lilongisilako.