Ono Yovipama Viohongele Ekalo Lietu Tuakristão Kuenda Oku Kunda
OSEMANA 3-9 YA SUSU
OVOKUASI A SANGIWA VONDAKA YA SUKU | OLONGANJI 15-16
“Oku Pakuiwa—ku Koka Esumuo!”
Utala Wondavululi, 15/4/2012 kem. 9 ocin. 4
Oku li Pakula Pokati Ondimbukiso Yotembo!
4 Catete, tu konomuisi usuanji wa lingiwa la Delila una wa soliwile Longanji Samisone. Samisone wa liyaka la va Filisiti, momo wa yonguile oku teyuila omanu va Suku. Omo okuti Delila ka lekisile ocisola cocili ku Samisone, olombuale vitãlo via va Filisiti vio likuminya oku eca kokuaye olosiekele viopalata oco va limbuke esunga lieci Samisone a kuatela ongusu yalua, momo va yonguile oku u ponda. Eci Delila a tambula ombanjaile yaco, volonjanja vitatu, wa seteka oku limbuka esunga lieci Samisone a kuatela ongusu yalua, pole, ka limbukile esunga liaco. Delila wo yonja ‘eteke leteke loku u sakalaisa lolondaka viaye, oco o lomboluile elumbu liaco.’ Samisone ‘wa livela oku fa,’ momo Delila wo sakalaisa calua. Kuenje, wo sapuila hati, vutue waye ka mua la pita omoko yomuto, momo nda wa tetiwa esinga, ka kuata vali ongusu. Eci Delila a ci limbuka, wa puta esinga lia Samisone osimbu a kala oku pekela kolongolo viaye. Kuenje, wa tuma oku vilikiya ovanyãli vaye, oco vo linge eci va yongola. (Olong. 16:4, 5, 15-21) Delila wa linga usuanji umue u nena esumuo! Omo liocipululu a kuata, wa pakula ulume una wo solele calua.
Utala Wondavululi, 1/3/2005 kem. 11 ocin. 4
Atosi Avelapo Velivulu Liolonganji
14:16, 17; 16:16. Oku kisika ukuene loku lila oco a ku lingile ocina cimue, ci nyõla ukamba.—Olosapo 19:13; 21:19.
Utala Wondavululi, 15/4/2012 kem. 11-12 ocin. 15-16
Oku li Pakula Pokati Ondimbukiso Yotembo!
15 Omanu vana va kuele, va pondola ndati oku amamako oku kala vakuacili lolohueli viavo? Ondaka ya Suku yi popia hati: “Sanjukila ukãi wove [ale ulume wove] wombutulua,” kuenda “sanjukila omuenyo kumosi lukãi wove [ale ulume wove] una o sole.” (Olosap. 5:18; Uku. 9:9) Osimbu olohueli vi kasi oku kuka, vi sukila “oku lingila kumosi ovina” vi pamisa olohuela viavo ndeci, kovopange, ale kovitalukilo. Vi pondola oku ci linga poku likuatela ocisola pokati, poku sanda otembo yoku kala pamosi, kuenda oku kuata ukamba. Olohueli vi sukilavo oku likolisilako oku teyuila olohuela viavo, kuenda ukamba wavo la Yehova. Oco vi tẽlise ovina viaco, vi sukila oku lilongisila kumosi Embimbiliya, oku kundila kumosi olondaka viwa, kuenda oku lingila kumuamue olohutililo, oco vi tambule esumũlũho li tunda ku Yehova.
AMAMAKO OKU KOLELA YEHOVA
16 Kuli vamanji vamue va linga akandu anene, kuenje, va ‘pisiwa oco va pamise ekolelo liavo.’ (Tito 1:13) Vakuavo va siata oku tundisiwa vekongelo omo liovituwa viavo vĩvi. Vana va tambula ‘epindiso liaco,’ va pondola oku pamisa ekalo liavo kespiritu. (Va Hev. 12:11) Nye tu sukila oku linga nda umue ngandietu ale ekamba lietu wa tundisiwa vekongelo? Ocitangi caco, ci kapa ekolelo lietu voseteko oco tu lekise nda tua kolela Yehova, ale omunu waco. Yehova wa siata oku tu lavulula nda tua siata oku pokola kolonumbi viaye vioku yuvula vana va tundisiwa vekongelo.—Tanga 1 Va Korindo 5:11-13.
Ovina vi Sangiwa Vembimbiliya
Utala Wondavululi, 15/3/2005 kem. 27 ocin. 6 kelimi Lioputu
Samisone wa Yula Lekuatiso Lia Yehova!
Samisone wa nõlelepo oku tẽlisa ocimãho caye coku liyaka la va Filisiti ovanyãli va Suku. Eli olio esunga lieci a pitila uteke konjo yocipuepue cimue ko Gasa. Samisone ka kuatele ovisimĩlo viupuepue, pole wa sukilile ocitumãlo coku sikĩla volupale luovanyãli. Eye wa sia onjo yocipuepue vokati kuteke. Wa tukũla olombundi violupale kuenda ovikuli vivali kuenje wa vi ambata komunda ocipepi lo Hevirone ci soka ocinala 60 kolokilometulu. Eye wa ci linga lekuatiso liongusu ya pama ya Suku.—Olonganji 16:1-3.
OSEMANA 10-16 YA SUSU
OVOKUASI A SANGIWA VONDAKA YA SUKU | OLONGANJI 17-19
“Oku Sinĩla Ocihandeleko ca Suku ci Nena Ovitangi”
Perspicaz-2 kem. 823 ocin. 11
Mika
1. Ulume umue wo ko Efarimi. Eye ka sumbilile ocihandeleko cecelãla Covihandeleko ekũi (Etu 20:15), Mika wopa ku inaye ci soka 1.100 kolopalata. Eci a litavela loku vi tiuwiya, inaye wo sapuila hati: “Ndi ka eca olopalata viange ku Yehova. Ame ndi yongola okuti, ove muẽle o talavaya lavio oco ku lingiwe ociñumañuma ca songiwa kuenda ociñumañuma cutale. Omo liaco, olopalata evi vi kala viove.” Eye wa tikula eci ci soka 200 kolopalata kuenje wa vi eca kukuakutela opatala, “eye wa linga ociñumañuma ca songiwa kuenda ociñumañuma cutale” kuenje ovio via kapiwa vonjo ya Mika. Mika, “wa kuatele onjo yimue yolosuku” kuenda eye wa tunga evendalia limue kuenda oviteka vio vonjo kuenje wa tumbika umue pokati komãla vaye oco o vumbe ndocitunda. Ndaño okuti esokiyo liaco nda liaca esivayo ku Yehova, pole, lia vihĩle calua momo lia pisa ocihandeleko coku yuvula oviteka (Etu 20:4-6), kuenje ka lekisile esumbilo kotavernakulu ya Yehova kuenda kovitunda. (Olg 17:1-6; Esn 12:1-14) Noke, Mika wa yekisa Yonatão ukuacitumbulukila ca Gerisiomo, omõla a Mose konjo yaye, poku pinga kumalẽhe waco oco a kaile ocitunda caye. (Olg 18:4, 30) Omo liesanju Mika a kuata, wa popia hati: “Kaliye nda limbuka okuti Yehova o ka ndi sumũlũisa.” (Olg 17:7-13) Pole, Yonatão ka kaile ukuacikoti ca Arone kuenda ka loñolohele oco a linge upange wutunda kuenje eci ca vokiya kakulueya a Mika.—Ate 3:10.
Perspicaz-2 kem. 823 ocin. 13
Mika
Noke yoloneke vimue, Mika kuenda ocimunga cimue calume, va landula va Dani. Eci a va sanga vo pula ocimãho caye, Mika wa popia hati: “Ene wopi olosuku viange nda panga kuenda wambativo ocitunda. Nye nda siala laco?” Kuenje omãla va Dani va lungula Mika loku u sapuila hati, nda eye wamamako oku va kuama vo katukila. Poku mola okuti va Dani va pamele calua, okuti alume vaye ci sule, Mika wa ñualapo kuenje wa tiukila konjo yaye. (Olg 18:22-26) Noke va Dani va kundula kuenda va yoka olupale luo Laisi londalu kuenje va tungilamo o Dani. Yonatão kumue lomãla vaye, va linga ovitunda viovikoti via va Dani kuenje “va tumbika ociñumañuma ca songiwa cina Mika a tunga kuenda ca kalako oloneke viosi osimbu onjo ya Suku yocili [otavernakulu] ya kala ko Silo.”—Olg 18:27-31.
Ovina vi Sangiwa Vembimbiliya
Utala Wondavululi, 15/12/2015 kem. 11 ocin. 6
Embimbiliya Limue Lupopi wa Leluka Oku Kuata Elomboloko
6 Koloneke vilo, kuli ovovangi akuavo a lekisa okuti onduko Yehova yi sukila oku tukuiwa. O Tradução do Novo Mundo mua lingiwa apongoloko amue kupopi waco okuti ya sandekiwa kunyamo wo 2013, onduko ya Suku yi mõleha eci ci soka 7.216 kolonjanja. Oku yi sokisa leyi ya pita, onduko ya Suku ya vokiyiwamo olonjanja epandu. Olonjanja vitãlo via vokiyiwako, omo via sangiwa Vociña cimue ca sandekiwa ndopo ci tukuiwa hati Okalunga ka ka Kuete Akimba. Olonjanja viaco vitãlo kua sangiwa onduko ya Suku, kelivulu 1 Samuele 2:25; 6:3; 10:26; 23:14, 16. Onjanja yepandu yi sangiwa kelivulu Liolonganji 19:18, ya vokiyiwamo omo liakonomuiso a lingiwa vovisonehua via koleliwa viosimbu Viembimbiliya.
OSEMANA 17-23 YA SUSU
OVOKUASI A SANGIWA VONDAKA YA SUKU | OLONGANJI 20–21
“Oku Amamako Oku kũlĩhĩsa Yehova”
Utala Wondavululi, 15/9/2011 kem. 32 ocin. 3
O Pondola hẽ Oku Kala Nda Finehase Poku Liyaka Lovitangi?
Eci alume vo vimbo lio Givea vana vatiamẽlele kepata lia Benjamini, va ponda ukãi wulume umue u Lewi noke yoku lipekela laye, apata osi o ko Isareli a linga uyaki lepata lia Benjamini. (Olong. 20:1-11) Osimbu ka va endele kuyaki waco, va likutilila ku Yehova oco a va kuatise, pole va yuliwa olonjanja vivali. (Olong. 20:14-25) Anga hẽ va simĩle okuti olohutililo viavo ka via taviwile? Yehova wa sanjukilile hẽ ocituwa va Isareli va lekisa omo liekandu lia lingiwa?
Utala Wondavululi, 1/3/2005 kem. 11 ocin. 7
Atosi Avelapo Velivulu Liolonganji
20:17-48—Ocili okuti, epata lia va Benjamini lia sesamẽlele eyambulo. Oco hẽ, momo lie Yehova a ecelela okuti va yula va Isareli olonjanja vivali kuyaki? Yehova poku ecelela va Isareli oku lunduiwa, wa cilingila oku seteka ovitima viavo nda va kuete onjongole yoku tundisa evĩho pokati kavo.
Utala Wondavululi, 15/9/2011 kem. 32 ocin. 5
O Pondola hẽ Oku Kala Nda Finehase Poku Liyaka Lovitangi?
Ovolandu tua konomuisa ndeti a tu longisa nye? Ndaño olonjanja vimue akulu vekongelo va siata oku likolisilako oku tetulula ovitangi vekongelo kuenda va likutilila ku Suku oco a va kuatise, citava okuti ovitangi viaco, vi amamako. Nda akulu vekongelo va pita lovitangi viaco, va sukila oku ivaluka olondaka via Yesu wa popia hati: “Pingi kuenje cu wĩhiwi, [sandiliyi] kuenda vu sanga, totoli, kuenje vo yikuluili.” (Luka 11:9) Ndaño okuti olonjanja vimue olohutililo ka vi tambuluiwa lonjanga, akulu vekongelo va sukila oku ivaluka okuti, Yehova o ka vi tambulula votembo a sokiya.
Ovina vi Sangiwa Vembimbiliya
Utala Wondavululi, 1/5/2014 kem. 11 ocin. 4-6
Wa ci Kũlĩha?
Kosimbu va enda oku yaka ndati lapipili?
Epipili olio ocimalẽho Daviti a yaka laco eci a ponda Goliata. Daviti wa lilongisa oku yaka locimalẽho caco votembo yaye yumalẽhe eci a kala ungombo.—1 Samuele 17:40-50.
Kosimbu, va Egito kuenda va a Suria va endavo oku yaka lapipili. Epipili lia kala okacipa ale o kananga kamue ka vindiwa ka kasi ndocipete kuenje ka kutiwila kovikolo vivali. Pokacipete kaco ale pokacipa, opo pa kapiwa ewe lia songiwa li kuete oku upisa 5 toke 7.5 kolocentimetulu kuenda ocilemo ci soka 250 grama. Noke yoku ñualisa epipili liaco kutue waye, itulapo ukolo umue kuenje ewe lienda longusu yalua loku suñama apa lia ilikiwila.
Kolofeka vioku Tundilo, kua siata oku lembuluiwa ovawe alua apipili va enda oku liyaka lao kosimbu. Asualali vana va loñolohele koku yaka, va enda oku nyuña ovawe aco longusu yimue yenda 160 ale 240 kolokilometulu vowola. Olonoño ka vi tava okuti kua kala epipili liohonji, pole, va lombolola okuti epipili lia kala ocimalẽho cimue ci ponda.—Olonganji 20:16.
OSEMANA 24-30 YA SUSU
OVOKUASI A SANGIWA VONDAKA YA SUKU | RUTI 1-2
“Oku Sanda Ocisola Cocili”
Utala Wondavululi, 02.2016 kem. 10 ocin. 5
Setukula Akamba va Yehova
5 Epata lia Ruti lia kala ko Moavi. Eye nda wa tiukila kokuavo kuenda citava okuti ovo nda vo tata. Eye wa kũlĩhĩle omanu vo ko Moavi, elimi va vangula kuenda ovituwa viavo. Naomi ka ponduile oku lombolola cimue ku Ruti catiamẽla kekalo lio ko Beteleme. Handi vali, Naomi wa kuata usumba wokuti, Ruti ka ka sanga ulume oco o kuele ale onjo yoku kala. Omo liaco, Naomi wo sapuila oco a tiukile ko Moavi. Ndomo tua ci konomuisa, Arape “wa tiukila ku vangandiaye kuenda kolosuku viaye.” (Ruti 1:9-15) Pole, Ruti ka tavele oku tiukila ku vangandiaye kuenda kolosuku viaye.
Utala Wondavululi, 02.2016 kem. 10 ocin. 6
Setukula Akamba va Yehova
6 Citava okuti Ruti wa lilongisile eci catiamẽla ku Yehova la veyaye ale la Naomi. Eye wa lilongisa okuti Yehova wa litepa lolosuku vio ko Moavi. Eye wa solele Yehova kuenda wa kũlĩhĩle okuti o sukila oku u sola kuenda oku u fendela. Ruti wa nõla onjila ya sunguluka. Eye wa sapuila Naomi hati: “Omanu vove va linga omanu vange, Suku yene o lingavo Suku yange.” (Ruti 1:16) Utima wetu u vetiyiwa eci tu sokolola ocisola Ruti a kuatela Naomi. Pole, ci komohĩsa vali enene, ocisola Ruti a kuatela Yehova. Ocituwa caco ca komohĩsavo Boasi, okuti noke wa sapuila Ruti hati, ‘weya oku vunda vavava a Yehova.’ (Tanga Ruti 2:12.) Olondaka Boasi a tukula citava okuti vi tu ivaluisa ndomo okamõla konjila ka sandiliya eteyuilo vemẽhi viavava olonjali viaye. (Osamo 36:7; 91:1-4) Cimuamue haico Yehova a linga poku teyuila Ruti kuenda oku u sumũlũisa omo liekolelo liaye. Ruti lalimue eteke a livelele omo lionjila a nõla.
Ovina vi Sangiwa Vembimbiliya
Utala Wondavululi, 1/5/2005 kem. 30 ocin. 1
Atosi Avelapo Velivulu Lia Ruti
1:13, 21—Anga hẽ Yehova eye wa nenele ovitangi ku Naomi? Sio haeyeko. Naomi ka kapele ekandu Yehova omo liovitangi a kala oku liyaka lavio. Pole, wa simĩle okuti Yehova wo yanduluka. Omo liaco, wa sumuile calua. Momo kotembo yaco, omunu wosi wa cita omãla, va enda loku u tenda okuti Yehova wo sumũlũisa. Pole, una ka kuete omõla va enda loku u tenda okuti, wa siñaliwa. Naomi ka kuatele olonekulu kuenda wa fisile omãla vaye vavali valume. Omo liaco, wa simĩle okuti Yehova wo sepula.
OSEMANA 31 YA SUSU–6 YA KAYOVO
OVOKUASI A SANGIWA VONDAKA YA SUKU | RUTI 3-4
“Kuata Kuenda Amamako Oku Lekisa Ocituwa ca Sunguluka”
Utala Wondavululi, 1/10/2012 kem. 22 ocin. 5 kelimi Lioputu
“Ukãi Umue Uwa”
Onjila ndomo Boasi a vangula kuenda olondaka viaye viwa, via lembeleka calua Ruti. Eye hati: “Yehova a ku sumũlũise, amõlange. Ocisola calua ka ci pongoloka wa lekisa kesulilo ca velapo okuti, eci wa lekisa kefetikilo ci sule. Momo kua sandiliyile ulume umalẽhe, ci kaile ohukũi ale ohuasi.” (Ruti 3:10) Ondaka yokuti “wa lekisa kefetikilo ci sule,” yi tiamisiwila kocisola cocili Ruti a lekisa poku kuama Naomi eci va tiukila ko Isareli kuenda oku u tata. Ondaka yokuti “wa lekisa kesulilo,” yi lomboloka ombanjaile yimue. Boasi wa limbuka okuti ukãi umue umalẽhe wa soka nda Ruti, ca lelukile kokuaye oku sanda ulume pokati kalume amalẽhe cikaile ohuasi ale ohukũi. Ocili okuti, eye ka sandele lika oku linga eci ciwa ku Naomi, pole, wa ci lingavo kulume wa Naomi una wa fa poku amamako londuko yepata vofeya yaye. Ka ca lelukile oku limbuka esunga lieci Boasi a komohẽla calua omo liocisola cukãi waco.
Utala Wondavululi, 1/10/2012 kem. 23 ocin. 1 kelimi Lioputu
“Ukãi Umue Uwa”
Citava okuti, Ruti wa sola calua oku yeva Boasi oku u sapuila hati, eye wa kũlĩhĩwile okuti “ukãi umue uwa”! Ocili okuti, eye wa kũlĩhĩwile locituwa caco omo lionjongole yaye yoku kũlĩha Yehova kuenda oku u vumba. Eye wa lekisa ohenda yalua ku Naomi loku kapako omanu vaye kuenda oku tava lutima wosi ovituwa vina eye ka kũlĩhĩle. Nda tua setukula ekolelo lia Ruti, tu ka likolisilako oku sumbila omanu kuenda ovituwa viavo. Nda tua ci linga, tu ka kũlĩhĩwavo ndomanu vawa.
Utala Wondavululi, 1/10/2012 kem. 24 ocin. 3 kelimi Lioputu
“Ukãi Umue Uwa”
Boasi wa kuela Ruti. Omo liaco, ulandu u popia ndoco: “Yehova wa ecelela okuti, o mina kuenje o cita omõla umue ulume.” Akãi vo vo Beteleme va sumũluisa loku pandiya Ruti. Ovo va sapuila Naomi okuti Ruti “wa velapo okuti, omãla epanduvali valume va sule.” Ulandu u lekisa okuti, omõla a Ruti weya oku linga kukululu ya Soma Daviti. (Ruti 4:11-22) Noke, Daviti wa linga kukululu ya Yesu Kristu.—Mateo 1:1.
Ovina vi Sangiwa Vembimbiliya
Utala Wondavululi, 1/3/2005 kem. 32 ocin. 3
Atosi Avelapo Velivulu Lia Ruti
4:6—Ulume oku kuela nawa yaye o sengisa ndati ocipiñalo caye muẽle? Kosimbu kua kala ocihandeleko cokuti, nda umue wa linga ohukũi kuenje wa landisa epia liaye, ngadiaye o landa epia liaco oco a liyovole. Pole, epia liaco li landiwa londando yanyamo a kamba kunyamo wonjolela. Noke kunyamo waco wonjolela eye o tiula epia liaco. (Ovisila 25:25-27) Pole, omunu poku ci linga, o pesela calua momo o tepulula kukuasi waye. Catiamẽla kondaka eyi, umue pokati komãla va Ruti vana a cita la nawa yaye, nda eye lika wa kuata omoko yoku piñala epia liaco. Pole, ka citava okuti li piñaliwa la umue pokati komãla vana vulume waco a cita lukãi ukuavo.
OSEMANA 7-13 YA KAYOVO
OVOKUASI A SANGIWA VONDAKA YA SUKU | 1 SAMUELE 1-2
“Situluila Yehova Ovisimĩlo Viove Poku Likutilila”
Setukuli Ekolelo, kem. 55 ocin. 12
Wa Situluila Utima Waye ku Suku Vohutililo
12 Hana wa sia ongangu yiwa kafendeli vosi va Yehova Suku, yoku linga olohutililo. Yehova o pañinya locisola afendeli vaye vosi oku u situluila ovitima viavo, loku u sapuila asakalalo avo, ndeci omõla a linga poku sapuila isiaye ukuacisola ovitangi a kuete. (Tanga Osamo 62:8; 1 Va Tesalonike 5:17.) Upostolo Petulu wa vetiyiwa oku soneha olondaka vielembeleko viatiamẽla koku likutilila ku Yehova, poku popia hati: ‘Ovitangi viene viosi vi eci kokuaye momo eye o vu lava.’—1 Pet. 5:7.
Utala Wondavululi, 15/3/2007 kem. 16 ocin. 4 kelimi Lioputu
Ndomo Hana a Sanga Ombembua
Nye tua lilongisila kulandu wosi owu? Poku likutilila ku Yehova catiamẽla kasakalalo etu, tu pondola oku u situluila cosi ci kasi vutima wetu. Nda ka tu kuete vali eci tu linga oco tu potolole ocitangi cetu, tu sukila oku eca ocitangi caco kokuaye. Ka kuli onjila yikuavo yi kuamiwa.—Olosapo 3:5, 6.
Ovina vi Sangiwa Vembimbiliya
Utala Wondavululi, 1/6/2005 kem. 29 ocin. 5
Atosi Avelapo Velivulu Liatete Lia Samuele
2:10—Momo lie Hana a likutililila hati, Yehova “eca olohõlo kosoma yaye”, osimbu okuti kotembo yaco ko Isareli ka kua kaile osoma? Hana wa linga ohutililo yaco omo okuti, Ocihandeleko ca Mose ca lekisile okuti va Isareli va ka kuata osoma. (Esinumuĩlo 17:14-18) Eci Yakoba a kala oku panda kolofa, wa popele hati: “Ombueti yonanelo [okuti uviali], ka yi tundi ku Yuda.” (Efetikilo 49:10) Handi vali, catiamẽla ku Sarai kukululu ya va Isareli, Yehova wa popelevo hati: “Olosoma viapata vomanu vi tunda kokuaye.” (Efetikilo 17:16) Omo liaco, Hana wa kala oku likutilila catiamẽla kosoma ya laikele oku iya.
OSEMANA 14-20 YA KAYOVO
OVOKUASI A SANGIWA VONDAKA YA SUKU | 1 SAMUELE 3-5
“Yehova wa tu Kapako”
Utala Wondavululi, 09.2018 kem. 21 ocin. 3
Ukuonene Wosi wa Kapako Omanu
3 Samuele wa fetika “oku vumba Yehova” votavernakulu eci eye a kala omõla. (1 Sam. 3:1) Vuteke umue, osimbu a enda oku pekela, kua molẽha ocina cimue ci komõhisa calua. (Tanga 1 Samuele 3:2-10.) Samuele wa yeva okuti umue wa kala oku u vilikiya. Eye wa sima okuti, Ocitunda Cinene Eli. Kuenje lonjanga yalua wa votoka, wa lupukila ku Eli, hati: “Ame ulo momo wa ñovonga.” Pole Eli wo sapuila hati: “Sia ku kovongele.” Eci ovina viaco via pita olonjanja vivali, Eli wa limbuka okuti Suku eye wa kovonga Samuele. Eli wa sapuila Samuele ovina a laikele oku popia onjanja yikuavo, kuenje Samuele wa pokola. Momo lie Yehova ka sapuilile Samuele kefetikilo okuti eye wa kala oku u vilikiya? Embimbiliya ka li ci lombolola. Pole, citava okuti Yehova wa ci lingila omo okuti wa kapeleko ekalo lia Samuele.
Utala Wondavululi, 09.2018 kem. 21 ocin. 4
Ukuonene Wosi wa Kapako Omanu
4 Tanga 1 Samuele 3:11-18. Ocihandeleko ca Yehova ci popia okuti omãla va sukila oku sumbila akulu, ca piãla enene vana va kuete ocikele. (Etu 22:28; Ovs 19:32) Omo liaco, ca tĩla oku sokolola okuti umalẽhe umue nda Samuele o pasuka omẽle enda ku Eli kuenje lutõi walua u sapuila esombiso linene li tunda ku Suku. Embimbiliya li tu sapuila okuti, Samuele “wa kala lohele yoku lomboluila Eli ocinjoinjoi.” Kuenje Suku wa situluila Eli okuti Eye wa kala oku vilikiya Samuele. Omo liaco, Eli wa pinga ku Samuele oco ka ko limbike lacimue co sapuila Suku. Samuele yu “wo sapuila cosi.”
Ovina vi Sangiwa Vembimbiliya
Utala Wondavululi, 1/6/2005 kem. 29 ocin. 6
Atosi Avelapo Velivulu Liatete Lia Samuele
3:3—Anga hẽ Samuele wa pekelele Vohondo yi Kola? Sio ka pekelele vohondo yaco. Eye wa kala u Lewi haeye ukuepata lia va Kohata vana ka va kale ovitunda. (1 Asapulo 6:33-38) Omo liaco, ka kuatele omoko ‘yoku mola ovina vi kola.’ (Atendelo 4:17-20) Samuele wa kuatele lika omoko yoku kala kocitali cotavernakulu. Kocitali caco oko eye a kala oku pekela. Eli wa pekelelevo kocitali caco. Ondaka yokuti, “mua kala ocikasia ci kola ca Suku,” yi lomboloka onepa yocitali cotavernakulu.
OSEMANA 21-27 YA KAYOVO
OVOKUASI A SANGIWA VONDAKA YA SUKU | 1 SAMUELE 6-8
“Soma Yove Helie?”
Perspicaz-2 kem. 406 ocin. 1
Usoma wa Suku
Ku Pingiwa Osoma Yimue Yomunu. Ci panda 400 kanyamo noke yoku tunda Kegito, kuenda ci pitahãla 800 kanyamo tunde eci Suku a linga ocisila la Avirahama, va Isareli va pinga osoma yomunu oco yi va songuile, ndeci olofeka vikuavo via kuatelevo olosoma viomanu. Epingilo liavo lia lekisa okuti ka va yonguile vali oku vialiwa la Yehova. (1Sa 8:4-8) Ocili okuti, omanu va lavokaile okuti Suku o tumbika usoma umue, ndomo a ci likuminyile ku Avirahama kuenda ku Yakoba, ndomo ca tukuiwa ale. Va kuetele ono yikuavo yelavoko liaco kocitumasuku ca Yakoba, osimbu a kala oku panda kolofa, catiamẽla ku Yuda (Eft 49:8-10), volondaka via Yehova ku va Isareli noke lioku tunda Kegito (Etu 19:3-6), poku linga ocisila Locihandeleko (Esn 17:14, 15), kuendavo konepa yimue yesapulo Suku a vetiya uprofeto Baliame oku tukula (Ate 24:2-7, 17). Hana ukuekolelo ina ya Samuel, wa situlula elavoko liaco vohutililo. (1Sa 2:7-10) Pole, Yehova ka situluile “elumbu liaye li kola” lia tiamẽla Kusoma kuenda ka tukuile handi otembo eye a laikele oku tumbika Usoma, ale ndomo wa laikele oku kala loku sokiyiwa, nda u kala palo posi ale kilu. Omo liaco, va Isarel va lekisa epela velivala liaco, poku pinga osoma yimue yomunu.
Utala Wondavululi, 1/4/2011 kem. 29 ocin. 1
Wa Pandikisa Ndaño Lesumuo
Kũlĩhĩsa ndomo Yehova a tambulula Samuele eci a likutilila catiamẽla kocitangi caco. Eye wa popia hati: “Yeva cosi omanu va popia love momo haveko va ku yanduluka, ame muẽle va njanduluka okuti si lingi vali Soma yavo.” Ku Samuele ca kala elembeleko, pole ku Suku Tõlo, ca kala etombo limue linene! Yehova wa tuma uprofeto oku sapuila va Isareli onima va laikele oku tambula yi tunda koku vialiwa lomunu. Eci Samuele a va sapuila olondaka viosi, ovo vo lipilikila vati: “Oco hacoko. Tu yongola muẽle osoma yi tu viala.” Samuele wa amamako oku pokola ku Suku yaye, kuenje wa vialeka osoma yina Yehova a nõla.—1 Samuele 8:7-19.
Utala Wondavululi, 15/1/2010 kem. 30 ocin. 9
Uviali wa Yehova wa Kemãlisiwa!
9 Olondaka via Yehova vieya oku tẽlisiwa muẽle. Oku vialiwa losoma yimue yomunu ceya oku nena ovitangi vialua ku va Isareli, ca piãla enene eci osoma yaco ka ya kolelele Suku. Eci ca pita la va Isareli ci lekisa okuti, vokuenda kuanyamo olombiali vina ka via kũlĩhĩle Yehova, ka via siatele oku kuata onima yiwa kuviali wavo. Vakuapulitika va siata oku pinga ku Suku oco a va kuatise oku nena ombembua loku kolapo. Oco hẽ Suku o sumũlũisa ndati vana ka va yongola oku pokola kuviali waye?—Osa. 2:10-12.
Ovina vi Sangiwa Vembimbiliya
Utala Wondavululi, 1/4/2002 kem. 22 ocin. 13
Momo Lie tu Sukilila Oku Papatisiwa?
13 Omunu wosi o yongola oku papatisiwa oco a linge Ombangi ya Yehova, o sukila tete oku siapo ovituwa viaye viosi viosimbu. Omunu o kuete oku pongoloka eye muẽle lutima waye wosi oco a kuame Yesu Kristu. Eye o ci linga poku siapo ovituwa vina viosimbu haivio ka via sungulukile okuti, o linga lika eci ca sunguluka ku Suku. Ovisonehua vio Heveru kuenda vio Helasi, vi lombolola okuti, oku pongoloka, ci lomboloka oku ñualapo. Eci ci lomboloka okuti, omunu o liwekapo oku linga eci cĩvi, kuenda o pongolokela ku Suku. (1 Olosoma 8:33, 34) Epongoloko liaco li sukila oku kala lovilinga vi lekisa oku ‘likekembela.’ (Ovilinga 26:20) Eci ci lomboloka okuti, tu siapo etavo liesanda, kuenda tu fetika oku pokola kolonumbi vi taviwa la Yehova Suku poku lieca kupange Waye. (Esinumuĩlo 30:2, 8-10; 1 Samuele 7:3) Oku pongoloka kuaco kuecelela okuti, omunu o kuata ovisimĩlo via sunguluka, lovimãho viwa, kuenda o kuama lika omuenyo umue wa sunguluka. (Esekiele 18:31) Tu sukila ‘oku siapo’ ovituwa vĩvi oco tu kuame viokaliye.—Ovilinga 3:19; Va Efeso 4:20-24; Va Kolosai 3:5-14.
OSEMANA 28 YA KAYOVO–6 YELOMBO
OVOKUASI A SANGIWA VONDAKA YA SUKU | 1 SAMUELE 9-11
“Saulu Kefetikilo wa Kala Embombe Kuenda Ukuesuluviko”
Utala Wondavululi, 08.2020 kem. 10 ocin. 11
Lekisa Umbombe Kuenda Esuluviko Poku Endaenda la Suku Yove
11 Sokolola eci ca pita la Soma Saulu. Kefetikilo wa lekisa esuluviko. Eye wa limbukile okuti ka tẽla oku linga ovina viosi kuenda wa kuata ohele yoku tava ovikele vikuavo. (1 Sam. 9:21; 10:20-22) Pole, vokuenda kuotembo Saulu wa lekisa epela. Eye wa lekisa ocituwa caco noke yoku kala osoma. Onjanja yimue, eye ka lekisile epandi kuenda ka yonguile oku talamẽla uprofeto Samuele. Eye ka lekisile esuluviko loku kolela Yehova una wa ponduile oku teyuila omanu kuenje Saulu wa eca ocilumba ku Yehova, cina okuti ka kuatele omoko yoku ci linga. Nye ceyililako? Saulu ka kuatele vali ekuatiso lia Yehova kuenda ka taviwile vali oco a kale osoma. (1 Sam. 13:8-14) Omo liaco, eli elungulo kokuetu kuenda lalimue eteke ka tu yongola oku lekisa epela ndeci Saulu a linga.
Utala Wondavululi, 15/3/2014 kem. 7 ocin. 8
Ndomo tu Amamako Locituwa Coku Lieca Olumue
8 Ulandu wa Soma Saulu una wa kala ko Isareli, u tu longisa okuti, oku pitisa kovaso olonjongole vietu, ci pondola oku nyõla ocituwa cetu coku lieca olumue. Eci Saulu a fetika oku viala, wa simĩle okuti wa kala omunu umue wa liketisa, haiye embombe. (1 Sam. 9:21) Eliketiso liaco, lio kuatisa oku yuvula oku nyõla va Isareli vamue va popele ovina ka via sungulukile viatiamẽla kusoma waye, ndaño wa simĩle okuti, omanu vaco va kala oku teyuila uviali Suku a ecele kokuavo. (1 Sam. 10:27) Soma Saulu wa tava oku songuiwa lespiritu lia Suku poku songuila va Isareli oco va yule va Amoni. Noke, umbombe Saulu a lekisa wo vetiya oku limbuka okuti, Yehova eye wo kuatisa oku yula.—1 Sam. 11:6, 11-13.
Utala Wondavululi, 15/12/1995 kem. 10 ocin. 1 kelimi Lioputu
Va Amoni—Va Kala Omanu Vamue va Fetuluinya Umbombe Lungangala
Va Amoni va fetuluinya vali ohenda ya Yehova lungangala. Yehova wa kapeleko elinga liaco lĩvi. “Eci Saulu a yeva olondaka [via Nahase] wa kuata onyeño yalua noke espiritu lia Suku lio wila.” Poku songuiwa lespiritu lia Suku, Saulu wongolola eci ci soka 330.000 kasualali kuenje va ponda toke eci “ka kua sialele omanu vavali pamosi.”—1 Samuele 11:6, 11.
Ovina vi Sangiwa Vembimbiliya
Utala Wondavululi, 15/3/2005 kem. 30 ocin. 8
Atosi Avelapo Velivulu Liatete Lia Samuele
9:9—Olondaka vioku popia hati: ‘U va tukola palo vati Uprofeto, kosimbu va enda loku u tukola hati, ukuavinjoinjoi, vi lomboloka nye?’ Olondaka evi vi lomboloka okuti: Eci ovaprofeto va kala oku livokiya koloneke via Samuele kuenda koloneke violonganji ko Isareli, ondaka “ukuavinjoinjoi,” ya piñaliwa londaka “uprofeto.” Kuenje Samuele eye wa kala uprofeto wa tete pokati kavo.—Ovilinga 3:24.