Eci Adama la Eva va tunda vocumbo Cedene, va fetika oku kuata omãla valua. Omõlavo watete okuti, Kaini wa linga ongunja kuenda omõlavo wavali okuti, Abele wa linga ungombo.

Eteke limue Kaini la Abele va eca ocilumba ku Yehova. Ove hẽ wa kũlĩha eci ci lomboloka ocilumba? Ocilumba ombanjaile yimue yilikasi. Yehova wa sanjukila ocilumba ca Abele, pole, ka sanjukilile ocilumba ca Kaini. Ovina viaco via temisa calua Kaini. Yehova wa lungula Kaini okuti onyeño yaye ya ponduile oku u kokela oku linga eci ka ca sungulukile. Pole, Kaini ka yevele kondaka yaco.

Noke Kaini wa sapuila Abele hati: “Tu ende kepia.” Osimbu va kala kepia lika liavo, Kaini wondumuhila manjaye kuenje wo ponda. Nye Yehova a linga? Yehova wa yambula Kaini poku u tuma kocitumãlo cimue ca kala ocipãla lepata liaye. Kaini lalimue eteke a laikele oku tiuka vali kepata liaye.

Nye tu pondola oku lilongisa kulandu owu? Citava okuti, tu kuata onyeño nda ovina vimue ka vi lingiwa ndomo tu yongola. Nda tu kasi lonyeño yalua kuenje manji umue o tu lungula omo a limbuka onyeño yetu, lonjanga yalua tu sukila oku linga apongoloko kuenda oku likandangiya osimbu onyeño yaco ka ya tu kokelele ovitangi.

Omo okuti, Abele wa solele Yehova kuenda wa enda oku linga ovina via sunguluka, Yehova o ko wivaluka otembo yosi. Suku o ka pindula Abele eci a ka pongolola ongongo oco yi kale ocumbo celau.

Vokuenda kuotembo omanu va fetika oku livokiya voluali. Valua pokati kavo va kala olondingaĩvi. Ovangelo vamue kilu va lingavo olondingaĩvi. Ovo va siapo ocitumãlo cavo kilu kuenje veya palo posi. Wa kũlĩha esunga lieci va lingila ovina viaco? Va ci lingila oco va lipongolole vetimba liositu kuenda oku likuela lakãi.

Noke ovangelo va fetika oku cita omãla lakãi vaco. Omãla vaco eci va kula, va pamele calua kuenda va linga ovindululu. Ovo va enda oku linga ungangala komanu. Yehova ka ecelele okuti ovina viaco vi amamako oku lingiwa. Omo liaco, wa ñolapo oku kundula omanu vaco ketande.

Pole, kua kala ulume umue wa litepele lomanu vaco. Ulume waco wa solele Yehova, onduko yaye, Noha. Eye wa kuatele ukãi lomãla vatatu okuti, Semi, Hama la Yafete kuenda omãla vaco omunu lomunu wa kuatele ukãi waye. Yehova wa sapuila Noha oco a tunge ocimbaluku cimue cinene oco eye kumue lepata liaye va puluke ketande. Ocimbaluku, ocikasia cimue ca tanda ci pondola oku telela kilu liovava. Yehova wa sapuilavo Noha oco a kape ovinyama vialua vocimbaluku okuti vi pulukavo ketande.

Lonjanga yalua, Noha wa fetika oku tunga ocimbaluku. Eye kumue lepata liaye va tunga ocimbaluku vokuenda kueci ci soka 50 kanyamo. Ovo va tunga ocimbaluku ndomo Yehova a va sapuilile. Vokuenda kuotembo yaco Noha wa lungula omanu catiamẽla ketande, pole, lomue wo yevelela.

Omo liaco, ya pitĩlapo otembo yoku iñila vocimbaluku. Tu konomuisi eci ca pita noke.