Avirahama wa kala la Lote ocimumba caye kofeka yo Kanana. Vokuenda kuotembo Avirahama kuenda Lote va kuata ovinyama vialua okuti ka via suile kocitumãlo va kala. Avirahama wa sapuila Lote hati: ‘Ka citava okuti tu kala vali pocitumãlo cimuamue. Nõla onepa yimue o yongola oku enda kuenje ame ngenda konele yikuavo.’ Ku tava hẽ okuti Avirahama wa lekisa ocisola cocili?

Lote wa mola ocitumãlo cimue ca posoka calua ocipepi lolupale lumue lu tukuiwa hati, Sodoma. Kocitumãlo caco kua kala ovava alua kuenda owangu. Omo liaco, Lote wa ilukila kocitumãlo caco eye kumue lepata liaye.

Vo Sodoma kuenda vo Gomora okuti olupale lu lisungue, omanu va kalamo va kuatele ovituwa vĩvi. Omo okuti, evĩho liavo lia luile, Yehova wa ñolapo oku nyõla alupale aco. Pole, Yehova wa yonguile oku popela Lote kumue lepata liaye kuenje wa tuma ovangelo vavali loku popia hati: ‘Yayuliko! Tundi volupale luaco! Momo Yehova o yongola oku lu nyõla.’

Lote ka tundile lonjanga, pole, wamamako oku cilua. Omo liaco, ovangelo va kuata peka lia Lote, va kuatavo peka liukãi waye lomãla vaye vavali vakãi kuenje va va tundisila posamua yolupale, yu va popia vati: ‘Lupuki! Popeli omuenyo wene kuenda ko ka vanji konyima. Nda wa vanji konyima, vu fa!’

Eci va pitĩla volupale lu tukuiwa hati, Soyara, Yehova wa nena ombela yofuofuo kuenda ondalu ko Sodoma lo Gomora. Alupale aco avali a nyõliwa osi. Eci ukãi wa Lote a lekisa esino ku Yehova poku vanja konyima, eye wa linga ongunji yomongua! Pole, omãla vavali va Lote, va popeliwa omo lioku pokola ku Yehova. Citava okuti, ovo va sumuile calua omo okuti, ukãi wa Lote ka pokuile. Pole, va kuatavo esanju omo lioku pokola kolonumbi via Yehova.

Avirahama kumue lomõlaye Isake va solele Yehova kuenda va kolelele kolohuminyo viosi via Yehova. Pole, eci Isake a tẽlisa 25 kanyamo, Yehova wa pinga ku Avirahama oco a linge ocina cimue okuti ca tĩlile calua. Nye Yehova o pinga oku linga?

Suku wa sapuila Avirahama hati: ‘Ambata omõlove wongunga u weca ndocilumba komunda yimue kofeka yo Moriya.’ Avirahama ka kũlĩhĩle esunga lieci Yehova o pingila oku linga ovina viaco. Pole, lopo wa pokola ku Yehova.

Eci kua ca omẽle, Avirahama wambata Isake kuenda apika vavali kuenje va enda kofeka yo Moriya. Noke yoloneke vitatu vioku linga ungende, va muila omunda ocipãla. Avirahama wa sapuila apika vaye oco va talamele osimbu eye la Isake va ka eca ocilumba. Avirahama wa eca olohũi ku Isake oco a viambate, pole, Avirahama wambata omoko. Isake wa pulisa isiaye hati: ‘Ocinyama tu ka eca ndocilumba ci kasi pi?’ Avirahama wa tambulula hati: ‘Amõlange, Yehova o ka eca ocinyama caco.’

Eci va pĩtila komunda ovo va tunga utala. Noke Avirahama wa kuta Isake kovoko lo kovolu kuenje wo kapa kilu liutala.

Noke Avirahama wa kuata omoko. Kuenje vepuluvi liaco, ungelo wa Yehova wo vilikiya oku upisa kilu loku popia hati: ‘A Avirahama! Ku ka lemẽhe kakuenje! Kaliye nda kũlĩha okuti ove o kuetele Suku ekolelo, momo kua likalele oku eca omõlove.’ Noke Avirahama wa mola omeme yimue okuti olombinga viayo via saka vuti. Avirahama wa kuata omeme kuenje wa yeca ndocilumba pomangu yomõlaye Isake.

Oku upisa keteke liaco, Yehova wa fetika oku tukula Avirahama okuti, ekamba liange. Momo lie? Momo ndaño okuti Avirahama ka kuatele elomboloko liepingilo lia Yehova, pole, eye wa linga ovina Yehova o pinga.

Yehova wa pitulula ohuminyo a lingile ku Avirahama hati: ‘Hu sumũlũisa kuenda ndi luisa omãla vove ale ocitumbulukila cove.’ Eci ci lomboloka okuti Yehova wa laikele oku sumũlũisa omanu vosi vawa vonduko yepata lia Avirahama.