Isake wa kuata 40 kanyamo eci a kuela Rebeka. Isake wa solele calua Rebeka. Noke yotembo yimue veya oku kuata omãla vavali valume okuti, olonjamba.

Ukulu waco onduko yaye Esau kuenda umalẽhe waco Yakoba. Esau wa solele calua oku kala vusenge kuenda wa kala ukuakuyeva ovinyama. Pole, Yakoba wa solale lika oku kala konjo.

Koloneke viaco omõla uveli eye wa kuatele omoko yoku tambula onepa yalua yusenge kuenda olombongo eci isiaye a fa. Ocina caco ci tukuiwa hati, ocipiñalo. Vepata lia Isake, vocipiñalo mua kongelelevo oku kuata onepa yimue kolohuminyo Yehova a lingile ku Avirahama. Esau ka kapeleko olohuminyo viaco, pole, Yakoba wa vi tendele ndocina cimue ci kuete esilivilo lia velapo.

Eteke limue eci Esau a endele koku yeva, wa tiuka lekavo lialua konjo. Eye wa yeva elemba liwa liokulia Yakoba a kala oku teleka kuenje wa popia laye hati: ‘Njevite onjala yalua! Nyĩheko kamue kakunde wa teleka!’ Yakoba wa tambulula hati: ‘Ndu ku ĩha, pole, tete likuminya okuti o nyĩha ocipiñalo cove.’ Esau wa tambulula hati: ‘Unuñulu waco ka u kuete esilivilo kokuange! Tambula unuñulu waco, ame ndi yongola oku lia.’ Ove hẽ o sima okuti Esau wa lekisa olondunge poku ci linga? Sio, ka lekisile. Esau wa eca ocina cimue ca kuata esilivilo lia velapo omo lielonga limosi liokulia.

Eci Isake a kuka ya pitĩlapo otembo yoku sumũlũisa omõlaye uveli. Pole, Rebeka wa kuatisa Yakoba omõlaye umalẽhe oco a tambule esumũlũho. Eci Esau a ci limbuka, wa kuata onyeño yalua kuenje wa lipañela oku ponda manjaye. Isake kuenda Rebeka va yonguile oku teyuila Yakoba kuenje vo sapuila vati: ‘Kuende, tilila ku kota lia ina yove, Lavane, toke eci onyeño ya huvove yi tulumuha.’ Yakoba wa pokola kelungulo liolonjali viaye kuenje wa enda oco a popele omuenyo waye.

Yehova wa likuminyile ku Yakoba okuti wa laikele oku u teyuila ndeci a teyuila Avirahama la Isake. Yakoba wa kala kocitumãlo cimue ci tukuiwa hati, Harane okuti, oko a kuelela kuenda wa kuata epata lialua haeye wa kala lovokuasi alua.

Noke Yehova wa sapuila Yakoba hati: ‘Tiukila kofeka wa citiwila.’ Kuenje Yakoba kumue lepata liaye va fetika oku linga ungende woku tiukila. Osimbu va kala oku linga ungende waco, omanu vamue veya ku Yakoba kuenje vo sapuila vati: ‘Huvove Esau o kasi oku iya kokuove leci ci soka 400 kalume!’ Yakoba wa kala lusumba, momo wa simile okuti Esau u linga cimue cĩvi kumue lepata liaye. Omo liaco, wa likutilila ku Yehova hati: ‘Njovole peka lia huvange.’ Keteke lia kuamamo Yakoba wa tuma ku Esau olombanjaile vialua ndeci: Olomeme, olohombo, olongombe, olongamelo kuenda ovimbulu.

Kuteke waco osimbu Yakoba a kala lika liaye wa mola ungelo umue! Ungelo waco wa fetika oku liyaka laye. Wa liyaka laye toke komẽle. Ndaño okuti Yakoba wa kavele, pole, ka yonguile oku liwekapo. Ungelo wo sapuila hati: ‘Linga ngende.’ Pole, Yakoba hati: “Siu ku eci toke eci o ndi sumũlũisa.”

Noke ungelo wa sumũlũisa Yakoba. Kuenje Yakoba wa limbuka okuti, Yehova ka ecelele okuti Esau u linga cĩvi.

Komẽle yaco, osimbu Yakoba a kala ocipãla, wa mola Esau leci ci soka 400 kalume. Yakoba wa pita kovaso yepata liaye kuenje wa petamẽla huvaye olonjanja epanduvali. Esau wa lupuka toke ku Yakoba, va li lama loku likuata kapepe. Kuenje kavali kavo va fetika oku lila kuenda oku lisunguluisa. Nye Yehova a yeva vutima omo lionjila Yakoba a kuama poku tetulula ocitangi eci?

Noke Esau kuenda Yakoba, omunu lomunu wa tiukila konjo yaye. Yakoba wa kuata eci ci soka 12 komãla. Olonduko viavo vievi: Ruvene, Simeone, Lewi, Yuda, Dani, Nafitali, Gadi, Asiyere, Isakare, Sevulono, Yosefe kuenda Benjamini. Umue pokati komãla vaco, Yosefe okuti, wa nõliwile la Yehova oco a teyuile afendeli Vaye. Ca lingiwa ndati? Tu ci konomuisi.