Tu Sole Calua Isietu Yehova

1-2. Momo lie Yehova a tavela okuti tu panga onepa kepata liaye kuenda wa ci linga ndati?

YEHOVA wa tu laleka oco tu pange onepa kepata liafendeli vaye. Eli elaleko limue li sanjuisa calua! Epata lietu, omanu vamue va litumbika ku Suku kuenda va lekisa ekolelo kocilumba cocisembi Comõlaye. Tua tiamẽla kepata limue lia sanjuka. Tua sanjuka omo okuti cilo tu kuete ocimãho komuenyo kuenda elavoko liomuenyo ko pui cikale kilu, ale palo posi.

² Yehova wa tava okuti tu panga onepa kepata liaye omo okuti eye o tu sole calua. Pole, oco a ci linge ca sukila ondando yinene. (Yoa. 3:16) Tua ‘landiwa londando yimue.’ (1 Va Kor. 6:20) Pocakati cocisembi, Yehova wa ecelela okuti tu kuata ukamba wa pama laye. Tu kuete esumũlũho lioku tukula Omunu wa velapo voluali okuti Isietu. Ndomo tua lilongisa vocipama ca pita, Yehova Isia umue wa koleliwa.

3. Apululilo api tu sukila oku linga? (Talavo okakasia losapi hati: “Anga hẽ Yehova wa Ñulĩha Ciwa?”)

³ Pamue tu lipula ndeci ca linga usonehi umue Wembimbiliya hati: “Niula nye ku Yehova oku panduila oviali viaye viosi ñasi lavio?” (Osa. 116:12) Etambululo lieli, lalimue eteke tu ka tẽla oku tiula ku Isietu wo kilu ovina viosi a tu lingila. Pole, ndaño ndoco, ocisola tu u kuetele ci tu vetiya oku u solavo. Upostolo Yoano wa soneha hati: “Etu tu sole, momo eye wa tu sola tete.” (1 Yoa. 4:19) Volonjila vipi tu lekisa ku Isietu wo kilu okuti tu u sole?

AMẼLA KU YEHOVA

4. Ndomo ca tangiwa kukanda wa Tiago 4:8, momo lie tu sukilila oku likolisilako oco tu amẽla ku Yehova?

⁴ Yehova o yongola okuti tu amẽla kokuaye kuenda tu sapela laye. (Tanga Tiago 4:8.) Eye o tu vetiya oku ‘pandikisa lolohutililo’ kuenda olonjanja viosi eye o yevelela olohutililo vietu. (Va Rom. 12:12) Eye lalimue eteke a kava oku tu yevelela. Handi vali, tu pondola oku u yevelela poku tanga Ondaka yaye Embimbiliya kuenda alivulu akuavo, ana a tu kuatisa oku kuata elomboloko liovina tu tanga Vembimbiliya. Tu pondolavo oku yevelela Yehova poku luluvala lutate kolonepa viosi kolohongele. Pokati komãla la isia nda pali ocituwa coku sapela va pamisa ukamba wavo, cimuamue haico okuti, oku kuata ocituwa coku sapela la Yehova ci tu kuatisavo oku pamisa ukamba tu kuete laye.

5. Tu mioñolola ndati ocituwa cetu coku linga olohutililo oco vi taviwe la Yehova?

⁵ Sokolola ndomo olohutililo viove ku Yehova vi kasi. Yehova o yongola okuti tu u situluila vohutililo ovina viosi vi kasi vutima wetu. (Osa. 62:8) Tu sukila oku lipula ndoco: ‘Olohutililo viange vi lingiwa hẽ lutima wosi, olondaka viaco anga hẽ vioku patekela, ale vi kasi ndukanda umue wa pongiyiwa ciwa?’ Ocili okuti tu sole Yehova kuenda tu yongola oku amamako oku kuata ukamba umue wa pama laye. Pole, oco tu ci linge, tu sukila oku kuata ocituwa coku sapela laye olonjanja viosi. Kolela kokuaye. U sapuila ovina vi ku kokela esanju kuenda ovina vi ku sumuisa. Kolela okuti ove o pondola oku pinga ekuatiso kokuaye.

6. Nye tu sukila oku linga oco tu pamise ukamba wetu la Isietu wo kilu?

⁶ Oco ukamba tu kuete la Isietu wo kilu u pame, tu sukila oku kuata ocituwa coku lekisa olopandu. Etu tu tava kolondaka viukualosamo wa soneha hati: “A Yehova Suku yange, ovikomo wa linga, lovisimilo wa tu simila, via lua cimue. Lomue wa lisoka love. Nda nda sokele oku vi sapula loku vi vangula, nda ka ca tavele oku vi tenda, omo via lua enene.” (Osa. 40:5) Ka tu sukila lika oku kuata ocituwa caco, pole, tu sukilavo oku lekisa olopandu vietu ku Yehova kolondaka kuenda kovilinga. Eci ci lekisa okuti tua litepa lomanu vakuavo vo koloneke vilo. Tu kasi voluali lumue okuti omanu ka va lekisa olopandu kovina viosi Yehova a siata oku va lingila. Ocili okuti, ocina cimue ci lekisa okuti tu kasi “koloneke via sulako” ceci okuti omanu va linga vakualutukãi. (2 Tim. 3:1, 2) Lalimue eteke ka tu yongola oku kuama ocituwa caco!

7. Yehova o yongola okuti tu linga nye kuenda momo lie?

⁷ Olonjali ka vi yongola okuti omãla vavo va li hoyisa, pole, va yongola okuti va kala akamba. Cimuamue haico okuti, Yehova o yongola okuti afendeli vaye vosi va kala akamba. Handi vali, ocisola tu likuetele, ondimbukiso yokuti Tuakristão vocili. (Yoa. 13:35) Tu tava kolondaka viukualosamo viokuti: “Ciwa cimue, ca posoka muẽle, nda ava vasitue va tunga pamosi lombembua!” (Osa. 133:1) Eci tu lekisa ocisola ku vamanji, tu eca uvangi ku Yehova okuti tu u sole. (1 Yoa. 4:20) Ci sanjuisa calua oku panga onepa kepata limue lia vamanji va ‘likuetele ocisola pokati haivo va linga vakuahenda.’!—Va Efe. 4:32.

LEKISA OCISOLA COVE POKU KALA UKUEPOKOLO

8. Ndomo ca tangiwa ku 1 Yoano 5:3, lipi esunga lia velapo lioku pokola ku Yehova?

⁸ Yehova o yongola okuti omãla va pokola ku vaisia vavo kuenda eye o yongolavo okuti tu pokola kokuaye. (Va Efe. 6:1) Eye o sesamẽla epokolo lietu, momo eye Ululiki wetu, o tu ĩha ovina tu sukila oco tuamameko lomuenyo kuenda kolondunge eye wa velapo vaisia vosi. Pole, esunga lia velapo lieci tu pokuila ku Yehova lieli okuti, tu u sole. (Tanga 1 Yoano 5:3.) Ndaño okuti kuli asunga alua lieci tu sukilila oku pokola ku Yehova, eye ka tu kisika oku ci linga. Yehova wa tu ĩha ombanjaile yelianjo, omo liaco, o sanjuka eci tu nõla oku u pokola omo liocisola tu u kuetele.

9-10. Momo lie ci kuetele esilivilo oku kũlĩha olonumbi via Suku loku vi pokola?

⁹ Olonjali vi yongola okuti omãla vavo va kolapo. Eli olio esunga lieci va siatela oku tumbika olonumbi, oco vi kuatise omãla vavo. Eci omãla va pokola kolonumbi viaco, va lekisa okuti va kolela kolonjali viavo kuenda va va sumbila. Ci kuete esilivilo lialua etu oku kũlĩha olonumbi via Isietu wo kilu loku vi kapako komuenyo wetu. Poku ci linga, tu lekisa okuti tu sole Yehova loku u sumbila kuenda ci tu kuatisa etu muẽle. (Isa. 48:17, 18) Pole, vana ka va kapeleko Yehova kuenda olonumbi viaye va li kokela ovo muẽle ovitangi.—Va Gal. 6:7, 8.

¹⁰ Eci tu ambata omuenyo umue u sanjuisa Yehova, tu li teyuila kovitangi, kesumuo liovutima kuenda kovina vi pondola oku nyõla ukamba wetu laye. Yehova wa kũlĩha ciwa ovina vi pondola oku tu kuatisa. Manji umue o tukuiwa Aurora o kasi ko Estados Unidos wa popia hati: “Nda kũlĩha okuti oku pokola ku Yehova olonjanja viosi ci nena ekalo liwa.” Vosi yetu tua kũlĩha okuti olondaka evi viocili. Ove wa kuatisiwa ndati poku pokola kolonumbi viocisola via Yehova?

11. Ohutililo yi tu kuatisa oku linga nye?

¹¹ Ohutililo yi tu kuatisa oku kala vakuepokolo, ndaño pamue ka ci leluka oku ci linga. Pamue tu liyaka locitangi coku lekisa epokolo ku Yehova, pole, tu sukila oku likolisilako omo liekambo lietu lioku li pua. Ukualosamo wa pinga ku Suku hati: “Ñolise lutima wombili.” (Osa. 51:12) Manji Denise okuti ukundi wotembo yosi wa popia hati: “Nda ca ndi tĩlila oku pokola kocihandeleko cimue ca Yehova, ame ndi likutilila oku pinga ongusu oco ndilinge eci ca sunguluka.” Tu pondola oku kolela okuti Yehova ololonjanja viosi o ka tambulula ohutililo ya soka ndeyi.—Luka 11:9-13.

KUATISA OMANU VAKUAVO OKU SOLA ISIETU

12. Ndomo ca tangiwa kukanda ku Va Efeso 5:1, nye tu sukila oku linga?

¹² Tanga Va Efeso 5:1. Omo okuti ‘tumãla va soliwe’ va Yehova tu sukila oku likolisilako oku u setukula. Tu setukula ovituwa viaye poku kala vakuacisola, vakuahenda kuenda vakuakuecela vakuetu. Vana ka va kũlĩhĩle Suku eci va mola ovituwa viaco viwa, ci tava okuti va vetiyavo oku lilongisa catiamẽla kokuaye. (1 Pet. 2:12) Olonjali Akristão, va kuete esunga liwa lioku setukula Yehova konjila ndomo va tata omãla vavo. Nda va ci linga, omãla vavo va ka nõlavo oku kala akamba va Isietu ukuacisola.

13. Momo lie tu sukilila oku lekisa utoi?

¹³ Omõla umue utito o sanjukila isiaye kuenda o sole calua oku vangula catiamẽla ku Isiaye. Cimuamue haico okuti, tua sanjukila Isietu wokilu, Yehova kuenda tu yongola okuti omanu vakuavo vo kũlĩhavo. Vosi yetu vokati ketu, tu liyeva nda Daviti, wa soneha hati: “Utima wange u litambelela Yehova.” (Osa. 34:2) Anga tu kuete osõi yoku vangula catiamẽla ku Yehova? Tu lekisa ndati utõi? Tu lekisa utõi eci tu sokolola kesanju Yehova a pondola oku kuata kuenda eci tu limbuka asumũlũho vakuetu va ka kuata omo lioku lilongisa catiamẽla kokuaye. Yehova o ka tu ĩhavo utõi. Eye wa kuatisa vamanji vokocita catete oku kala vakuotõi kuenda eye o pondolavo oku tu kuatisa.—1 Va Tes. 2:2.

14. Momo lie ci kuetele esilivilo oku longisa omanu oco va linge olondonge?

¹⁴ Yehova ka kuete ocame kuenda eye o sanjuka eci a mola okuti tu sole omanu vakuavo, ndaño okuti vakuapata a litepa. (Ovil. 10:34, 35) Onjila yimue yiwa yoku lekisa ocisola komanu vakuavo oku va kundila olondaka viwa. (Mat. 28:19, 20) Onima yipi yi pondola oku yililako? Vana va tu yevelela va pondola oku kuata ekalo liwa komuenyo cilo kuenda oku lavoka oku kuata omuenyo ka u pui Voluali Luokaliye.—1 Tim. 4:16.

SOLA ISIETU KUENDA KUATA ESANJU

15-16. Asunga api tu kuete oku sanjuka?

¹⁵ Omo okuti Yehova, Isia umue ukuacisola, eye o yongola okuti epata liaye li kuata esanju. (Isa. 65:14) Kuli asunga alua a lekisa okuti tu pondola oku kuata esanju cilo, ndaño okuti pamue tu liyaka lovitangi. Ndeci, tua kolela okuti, Isietu wo kilu, o tu sole calua. Etu tu kuete ukũlĩhĩso wa suapo Wondaka ya Suku, Embimbiliya. (Yer. 15:16) Tua tiamẽla kepata limuamue liomanu vana va sole Yehova lolonumbi viaye kuenda va solevo omanu vakuavo. —Osa. 106:4, 5.

¹⁶ Tu pondola oku amamako lesanju omo tua kũlĩha okuti kovaso yoloneke ekalo liomuenyo li ka kala ciwa. Tua kũlĩha okuti ndopo Yehova o ka kundula olondingaĩvi viosi kuenda vemẽhi Liusoma waye, ongongo yi ka pongoluiwa oco yi kale Ocumbo Celau. Handi vali, tu kuetevo elavoko li komõhisa liokuti vana va fa va ka pinduiwa kuenda tu ka kala vali lavo kumosi. (Yoa. 5:28, 29) Esanjukuolio tu ka kuata! Ca velapo vali ceci okuti, ndopo vosi cikale kilu kuenda palo posi va ka eca ku Isietu ukuacisola esivayo, ulamba kuenda esumbilo eye a sesamẽla.