Momo Lie Omanu ka va Lekisila Vali Esumbilo Kokuavo Muẽle?

ESUNGA LIECI CI KUETELE ESILIVILO OKU LI SUMBILA OVE MUẼLE

Omanu va li sumbila ovo muẽle, va tẽla oku liyaka lovitangi vio komuenyo lekolelo. Ovo ka va liwekapo lonjanga.

Akonomuiso a lekisa okuti omanu vana va kuete ovisimĩlo ka via sungulukile viatiamẽla kokuavo muẽle, ci leluka ovo oku sakalala, oku sumua calua kuenda oku lia calua ale oku yuvula oku lia. Komanu vaco, ca leluka oku nyua calua ovinyua vi koluisa kuenda oku fenya olodroga.
Omanu vana va li sumbila ovo muẽle, va yuvula oku lisokisa lomanu vakuavo kuenje ocituwa caco ci va kuatisa oku kuata ukamba umue wa pama hawo uwa lomanu vakuavo. Pole, vana okuti ka va li sumbililile ovo muẽle, va siata oku pisa kuenje ocituwa caco ci pondola oku nyõla ukamba va kuete lomanu vakuavo.
Omanu vana va li sumbila ovo muẽle eci va liyaka lovitangi, ka va ecelela okuti ovitangi viaco vi va yula; ovo ka va ecelelavo okuti ovina vĩvi vi va tateka oku tẽlisa ovimãho viavo. Pole omanu vana okuti ka va li sumbililile ovo muẽle, ovitangi vitito va vi lingisa okuti vi kala vinene. Ocituwa caco ci va lingisa okuti va liwekapo lonjanga.

CECI O PONDOLA OKU LINGA

Kuata akamba vawa. Linga ukamba lomanu vana va kuete esumbilo, va ku kapako kuenda va pondola oku ku pamisa.

“Ekamba liocili li lekisa ocisola otembo yosi, kuenda olio li linga manjove kotembo yohali.”—Olosapo 17:17.

Kuatisa omanu vakuavo. Nda ove o lekisa ohenda kuenda o lingila ovina viwa vakuene oku kongelamo vana okuti ka va kuete epondolo lioku ku tiuwila ovina wa va lingila, o ka kuata esanju li tunda koku eca. Ove o ka kuata esanju liocili ndaño omanu vakuavo ka va muile ovina viwa wa linga.

“Esanju li tunda koku eca olio lia velapo, li tunda koku tambula li sule.” —Ovilinga 20:35.

Kuatisa omãla vove oku li sumbila ovo muẽle. Onjila yimue yoku ci linga oku va ecelela okuti ovo muẽle va potolola ovitangi viavo, nda va tẽla oku ci linga. Oku ci linga ci ka kuatisa omãla oku kũlĩha ndomo va pondola oku liyaka lovitangi ale oku vi yula. Oku va longisa lonjila eyi, ci ka va kuatisa oku li sumbila ovo muẽle, okuti ocina cimue ci kuete esilivilo komuenyo.

“Pindisa omõla vonjila a sesamẽla oku endela; ndaño ceci a kuka, ka ka yapukamo.”—Olosapo 22:6, etosi.

Ombangi yimue ya Yehova yi kasi oku songola elilongiso Liembimbiliya kukãi umue vocitumãlo coku yuvila okafe.

OLOMBANGI VIA YEHOVA VIA SIATA OKU LEKISA NDATI ESUMBILO?

Olohongele kuenda esokiyo lioku longisa Embimbiliya Violombangi Via Yehova, via siata oku kuatisa omanu oku mioñolola omuenyo wavo loku li sumbila ovo muẽle.

OLOHONGELE VIETU VOKUENDA KUOLOSEMANA

Kolohongele vietu vio kesulilo liosemana, tua siata oku sanjukila olohundo via siata oku lingiwa okuti via kunamẽla Vembimbiliya kuenda olonjanja vimue mu kongela olonumbi vi kuatisa omanu oku li sumbila ovo muẽle. Oku iñila kolohongele vietu ocali kuenda omanu vosi va pondola oku endako. Ndeci, kolohongele vietu ove o ka lilongisa . . .

esunga lieci ove o kuetele esilivilo kovaso a Suku
ndomo o kuata ocimãho cimue komuenyo
ndomo o kuata ukamba wa pama hawo wocili

O pondolavo oku kũlĩha akamba vocili vana va li sakalaisa love kuenda va lekisa okuti va ‘ku kapako.’ —1 Va Korindo 12:25, 26.

Oco o kũlĩhe ovina vikuavo viatiamẽla kolohongele vietu, sandiliya vo jw.org ovideo losapi Nye ci Lingiwa Vonjango Yusoma?

ELILONGISO LIETU LIEMBIMBILIYA

Etu tua siata oku eca elilongiso Liembimbiliya ocali velivulu Sanjukili Omuenyo Otembo ka yi Pui! Velivulu liaco, mu sangiwa ovisonehua Viembimbiliya vi kuete esilivilo, alomboluilo awa, a pulilo awa, olovideo vi vetiya kuenda oviluvialuvia via posoka. Elilongiso lietu Liembimbiliya, li kuatisa omanu oku tumbulula esumbilo liavo muẽle kuenda oku mioñolola omuenyo wavo.

Oco o kũlĩhe ndomo o kuatisiwa lelilongiso Liembimbiliya Lolombangi Via Yehova, sandiliya vo jw.org ovideo losapi Momo Lie Ndi Lilongisila Embimbiliya?