Viñami Olombangi Via Yehova wa kũlĩha? Vamue pokati kavo citava okuti va kasi vimbo liove, vakuavo va talavaya love kupange woku sanda eteku, ale akamba vove vo kosikola. Handi vali, pamue va sapelele ale love catiamẽla Kembimbiliya. Oco hẽ, Olombangi Via Yehova velie, kuenda momo lie va siatela oku sapela lomanu catiamẽla kalongiso avo?

Etu tumanu vaño. Etu tua tunda kapata osi kuenda tu kuete akalo a litepa. Vamue pokati ketu va kala vatavo a litepa, pole, vakuavo ka va tavele okuti kuli Suku. Osimbu ka tua lingile handi Olombangi Via Yehova, tua sandiliya otembo yoku konomuisa lutate alongiso Embimbiliya. (Ovilinga 17:11) Noke tua tava kovina tua lilongisa, kuenje tua nõlapo oku vumba Yehova Suku.

Tua siata oku kuatisiwa lelilongiso Liembimbiliya. Ndeci ca siata oku pita lomanu vosi, etu tu liyakavo lovitangi vialua kuenda ahonguo etu. Pole, omo lioku likolisilako oku kapako olonumbi Viembimbiliya komuenyo wetu, tua limbuka ndomo ekalo liomuenyo wetu lia pongoloka. (Osamo 128:1, 2) Eli olio esunga lieci tua siatela oku sapela la vakuetu ovina viwa tu lilongisa Vembimbiliya.

Tua kapako olonumbi via Suku. Ndomo Embimbiliya li longisa, olonumbi viaco vi tu kuatisa oku kuata ekalo liwa, oku sumbila vakuetu, oku kala vakuacili, kuenda oku kala vakuahenda. Olonumbi viaco, vi kuatisa oku kuata uhayele uwa, oku kala omanu vawa, loku kuatisa apata oku likuata omunga kuenda oku lekisa ovituwa viwa. Omo lioku kolela okuti “Suku ka kuete ocame,” tua tiamẽla kongongela ya vamanji kespiritu voluali luosi, vana ka va kuete olonepele haivo ka va litengi vopulitika. Ndaño okuti tumanu vaño, pole, tua litepa lomanu vakuavo.—Ovilinga 4:13; 10:34, 35.

• Ovina vipi Olombangi Via Yehova vi kuete ndeci ci kasi omanu vakuavo?

• Olonumbi vipi Olombangi Via Yehova via siata oku lilongisa Vembimbiliya?

Omanu valua va sima okuti Olombangi Via Yehova, onduko yetavo limue liokaliye. Cimue ci pitahãla 2.700 kanyamo konyima, afendeli va Suku yocili va tukuiwile hati, ‘olombangi’ viaye. (Isaya 43:10-12) Osimbu ka tua pitilile kunyamo wo 1931, tua enda oku tukuiwa hati, Vakuakulilongisa Embimbiliya. Momo lie cilo tu tukuiwila hati, Olombangi Via Yehova?

Onduko yaco yi situlula Suku yetu. Ndomo ca lekisiwa voviña vio kosimbu, onduko ya Suku, okuti Yehova, yi molẽha olonjanja vialua Vembimbiliya. Vambimbiliya alua, onduko yaco ya piñanyiwa lolonduko viokuti, Ñala ale Suku. Pole, Suku yocili wa lisitulula ku Mose londuko yaye okuti Yehova, poku popia hati: “Onduko yaco oyo yi linga onduko yange otembo ka yi pui.” (Etundilo 3:15) Omo lionduko yaco citava oku u tepisa pokati kolosuku vikuavo viesanda. Tu kuete esanju lialua omo lioku kunda onduko yi kola ya Suku.

Oyo yi situlula upange wetu. Omanu valua kosimbu oku fetikila ku Havele ulume watete ukuesunga, vosi va eca uvangi wekolelo va kuatela Yehova. Vokuenda kuanyamo alua, Noha, Avirahama, Sara, Mose, Daviti, kuenda vakuavo, va likongelavo ‘kelende linene liolombangi.’ (Va Heveru 11:4–12:1) Ndeci omunu umue a eca uvangi woku teyuila ukuavo kombonge okuti ka kuete eko, etu tua nõlapo oku kundila omanu ocili catiamẽla ku Suku yetu.

Tu kasi oku setukula Yesu. Eye Vembimbiliya wa tukuiwa hati, “ombangi yina yocili lesunga.” (Esituluilo 3:14) Yesu wa popia hati, wa ‘situlula onduko ya Suku’ kuenda wa ‘imbila ocili uvangi’ watiamẽla ku Suku. (Yoano 17:26; 18:37) Olondonge via Kristu vi sukilavo oku eca uvangi wonduko ya Yehova kuenda oku yi situlula. Eci oco Olombangi Via Yehova vi kasi oku likolisilako oku linga.

• Momo lie Vakuakulilongisa Embimbiliya, va nõlelapo oku litukula hati, Olombangi Via Yehova?

• Tunde otembo yipi Yehova a kuete olombangi viaye palo posi?

• Helie Ombangi ya velapo ya Yehova?

Embimbiliya lia popele okuti noke yoku fa kua Kristu, pokati Kakristão pa ka kala alongisi vesanda kuenje va ka nyõla ocili Cembimbiliya. (Ovilinga 20:29, 30) Vokuenda kuotembo oco muẽle ceya oku pita. Ovo va tenga alongiso a Yesu lovisimĩlo viatavo esanda, kuenje kua tukuluka ocisoko Cakristão vesanda. (2 Timoteo 4:3, 4) Oco hẽ, koloneke vilo, tua kũlĩha ndati okuti tu kuete elomboloko lia suapo lieci Embimbiliya li longisa?

Vokuenda kuotembo Yehova wa situlula ocili condaka yaye. Eye wa popele okuti, ‘kotembo yesulilo ukulĩhĩso u ka lua.’ (Daniele 12:4) Kunyamo wo 1870, ocimunga cimue citito comanu va sandiliya ocili condaka ya Suku, va limbuka okuti alongiso alua atavo ka va sangiwa Vovisonehua. Omo liaco, va fetika oku sandiliya elomboloko lialongiso osimbu Embimbiliya, kuenje Yehova wa va sumũlũisa lukũlĩhĩso wovisonehua.

Vakuavitima via sunguluka va lilongisa lutate Embimbiliya. Omanu vaco vakuavitima via sunguluka, okuti va pakũlu yetu, va lilongisa Embimbiliya lonjila yimue ya siata oku kuamiwa toke koloneke vilo. Ovo va enda oku sapela ovina viatiamẽla Kembimbiliya etosi letosi. Nda va sanga ocinimbu cimue Cembimbiliya okuti ka ca va lombolokele, va kũlĩhĩsa ocinimbu cikuavo ci lombolola ondaka yaco. Eci va pitila kocisimĩlo cimue okuti ci likuata lovinimbu vikuavo Viovisonehua, va soneha ulandu waco. Omo lioku ecelela oku songuiwa Lembimbiliya, va limbuka ocili catiamẽla konduko ya Suku, Kusoma, kocipango caye lomanu, longongo, kekalo liava va fa, kuenda kepinduko. Akonomuiso avo, a va yovola kalongiso alua esanda kuenda kovituwa vikuavo vĩvi.—Yoano 8:31, 32.

Kunyamo wo 1879, Vakuakulilongisa Embimbiliya va limbuka okuti otembo yoku sapula ocili cina va kũlĩha, ya pitilapo. Omo liaco, va fetika oku panga Utalala Wondavululi Wusapula Usoma wa Yehova una u kasi oku sandekiwa toke koloneke vilo. Cilo tu kasi oku sapula ocili Cembimbiliya kueci ci pitahãla 230 kolofeka kuenda kueci ci soka 600 kalimi. Ocili okuti, ukũlĩhĩso wocili wa livokiya calua okuti kosimbu ci sule!

• Noke yoku fa kua Kristu, nye ca pita locili Cembimbiliya?

• Nye ca siata oku tu kuatisa oku limbuka ocili Condaka ya Suku?

Vokuenda kuanyamo alua Olombangi Via Yehova via talavaya Lambimbiliya a litepa, loku va panga, kuenda oku va eca komanu. Pole tua limbuka esukila lioku sandeka Embimbiliya limue liokaliye li kuatisa omanu oku kuata ‘ukũlĩhiso wocili’ catiamẽla kocipango ca Suku. (1 Timoteo 2:3, 4) Omo liaco kunyamo wo 1950, tua fetika oku sandeka Embimbiliya lietu liupopi wa leluka li tukuiwa hati, Tradução do Novo Mundo. Embimbiliya eli liocili, halio lia koleliwa, kuenda lia sandekiwa ale kueci ci pitahãla 130 kalimi.

Kua sukiliwile Embimbiliya limue lia leluka oku kuata elomboloko lialio. Ocili okuti, vokuenda kuotembo alimi a pongoloka, kuenda Ambimbiliya amue a kuete upopi wa tĩla calua, ale olondaka vimue okuti ka vi popiwa vali momo ka ca lelukile oku kuata elomboloko liavio. Handi vali, kua siata oku limbukiwa ovisonehua viosimbu vi likuata levi viatete vi eca elomboloko liwa Liembimbiliya lio Heveru, Aramaiku, kuenda lio Helasi.

Kua sukiliwile Embimbiliya limue li sumbila ondaka ya Suku. Vana va pongolola Embimbiliya kalimi akuavo, va sukilile oku yuvula oku pengisa ondaka ya Suku, oco va kuame lika ovisonehua viatete. Pole, Vambimbiliya alua onduko ya Suku okuti, Yehova, ka yi sangiwamo.

Kua sukiliwile Embimbiliya limue li sumbila Usovoli walio. (2 Samuele 23:2) Ndomo ca lekisiwa kombuelo, o Tradução do Novo Mundo ya tumbulula onduko ya Yehova kuenda yi sangiwamo ci panda 7.000 kolonjanja ndeci yi sangiwa vovisonehua viosimbu. (Osamo 83:18) Anyamo alua akonomuiso, a nena onima yoku kuata Embimbiliya eli lia leluka oku litanga, halio li situlula ciwa ovisimĩlo via Suku. Ci kale okuti o kuete o Tradução do Novo Mundo ale sio, tu ku vetiya oku kuata ocituwa coku tanga Ondaka ya Yehova eteke leteke.—Yehosua 1:8; Osamo 1:2, 3.

• Momo lie tua nõlelapo okuti ku sukiliwa Embimbiliya limue liokaliye?

• Omunu una o yongola oku kũlĩha ocipango ca Suku, o sukila oku kuata ocituwa cipi?