Vocisoko cetu ka tu kuete ovitunda vi fetiwa olombongo. Pole, ndeci ca kala vekongelo liatete Liakristão, tu kuete olomitavaso via nõliwa oco vi ‘lise ekongelo lia Suku.’ (Ovilinga 20:28) Akulu vaco vekongelo okuti alume va loñoloha kespiritu, va songuila ekongelo loku lava ocunda okuti, ‘halocikukuiko, momo va kuete utima waco, hamekondako liocipululu conganyu, te lutima wombili.’ (1 Petulu 5:1-3) Upange upi va siata oku linga oco va tu kuatise?

Ovo va tu tata kuenda va tu teyuila. Akulu vekongelo va songuila kuenda va teyuila ekongelo konepa yespiritu. Omo lioku kũlĩha okuti va tambula ocikele caco ku Suku, ka va tulamela vamanji, pole, va tu kuatisa oku kuata esanju kuenda ekalo liwa kespiritu. (2 Va Korindo 1:24) Ndeci ungombo a likolisilako oku tata omeme lomeme, akulu vekongelo va likolisilakovo oku kũlĩha omunu lomunu vekongelo.—Olosapo 27:23.

Ovo va tu longisa ndomo tu linga ocipango ca Suku. Osemana losemana, akulu vekongelo va siata oku songola olohongele viekongelo locimãho coku pamisa ekolelo lietu. (Ovilinga 15:32) Ovo va likolisilako oku songuila upange woku kunda, va talavaya letu, kuenda va tu pindisa kolonjila via litepa viupange waco.

Va siata oku eca elembeleko komunu lomunu. Oco va kuatise omunu lomunu pokati ketu konepa yespiritu, akulu vekongelo va tu nyula kolonjo vietu, ale va sapela letu Vonjango Yusoma oco va tu kolise kuenda oku tu lembeleka Lovisonehua.—Tiago 5:14, 15.

Akulu vekongelo ndaño va kuete ovikele vialua, pole, va sukilavo otembo yoku talavaya kupange woku sanda eteku, kuenda oku songuila epata liavo. Vamanji ava olondingupange, va sesamẽla esumbilo lietu.—1 Va Tesalonike 5:12, 13.

• Cipi ocikele cakulu vekongelo?

• Volonepa vipi akulu vekongelo va sakalala lekalo lietu?

Embimbiliya li tukula ovimunga vivali via vamanji alume va kuete ocikele coku songuila ekongelo, okuti ‘olomitavaso kuenda oloñuatisi viekongelo.’ (Va Filipoi 1:1) Vekongelo lekongelo muli vamanji valua va kuete ocikele caco. Oco hẽ upange upi oloñuatisi viekongelo va pondola oku linga oco va tu kuatise?

Va kuatisa akulu vekongelo. Oloñuatisi viekongelo, alume vamue va loñoloha kespiritu, va koleliwa, haivo vakualondunge, vamue amalẽhe vakuavo akulu. Ovo va linga ovopange alua atiamẽla kekongelo lo Vonjango Yusoma, okuti ka mua kongelele oku longisa. Upange wavo wecelela akulu vekongelo oku tiamisila utima koku longisa kuenda koku nyula vamanji loku va kolisa.

Va linga ovopange alua vekongelo. Oloñuatisi vimue viekongelo vi kuete ocikele coku yolela omanu veya kolohongele loku va ilikila olomangu vioku tumãla. Vakuavo va talavaya lomakina yovileñi, oku eca alivulu, oku seleka olombongo viekongelo, kuenda oku eca ovikanjo vioku kunda ku vamanji vekongelo. Ovo va kuatisavo koku tata Onjango Yusoma. Akulu vekongelo va siatavo oku va pinga oco va kuatise vana va kuka. Ocikele cosi ovo va tambula, va ci tẽlisa lesanju kuenje va sumbiwa calua la vamanji vekongelo.—1 Timoteo 3:13.

Va eca ongangu yiwa yalume Akristão. Oloñuatisi viekongelo via siata oku nõliwa omo liovituwa viavo viwa. Eci va linga olonepa viavo kolohongele, va pamisa ekolelo lietu. Omo lioku pitisa kovaso upange woku kunda, va pamisavo ombili yetu. Handi vali, omo lioku pokola kolonumbi viakulu vekongelo va kuatisa koku nena esanju kuenda elitokeko vekongelo. (Va Efeso 4:16) Vokuenda kuotembo, va lingavo akulu vekongelo.

• Velie oloñuatisi viekongelo?

• Ndamupi oloñuatisi viekongelo vi kuatisa kekalo liwa liekongelo?

Ovisonehua vio Helasi olonjanja vialua vi tukula Barnaba kuenda upostolo Paulu. Ovo va kala olomitavaso olongende via enda oku nyula akongelo atete. Momo lie? Ovo va sakalalele lekalo liwa lia vamanjavo konepa yespiritu. Paulu wa lombolola okuti wa yonguile oku ‘enda, oku ka pasula vamanji’ kuenda oku kũlĩhĩsa ndomo va kasi. Eye wa linga ovongende anene locimãho coku va kolisa kespiritu. (Ovilinga 15:36) Koloneke vilo olomitavaso vi nyula akongelo vi kuetevo onjongole yaco.

Ovo veyilila oku tu kolisa. Mitavaso o nyula akongelo vimbo, o kuete 20 kakongelo ale ceci ci pitahãla etendelo eli a sukila oku nyula olonjanja vivali vunyamo. Tu pondola oku kuatisiwa lulandu wa vamanji vaco kuenda wakãi vavo nda olohueli. Ovo va likolisilako oku kũlĩha amalẽhe kuenda akulu loku tu kuama kupange woku kunda kuenda koku songola alilongiso Embimbiliya. Olomitavaso evi kumosi lakulu vekongelo, va nyulavo vamanji locimãho coku va kolisa, kuenda va tu lembeleka lolohundo va linga kolohongele viekongelo kuenda vimbo.—Ovilinga 15:35.

Ovo va kapako omanu vosi. Olomitavaso vi nyula akongelo via kapako ekalo liespiritu liomanu vosi vekongelo. Ovo va linga olohongele lakulu vekongelo kumue loloñuatisi viekongelo oco va kũlĩhĩse ekalo liavo kespiritu kuenda oku va ĩha olonumbi vi va kuatisa oku tẽlisa ciwa ovikele viavo. Va kuatisavo akundi votembo yosi oco va tẽlise ciwa upange wavo woku kunda kuenda va likolisilako oku kũlĩha vana va fetika ndopo oku likongela lomanu va Suku loku kũlĩha ndomo va kasi oku amamako kespiritu. Vamanji ava va talavaya ‘ndoloñuatisi vietu’ koku vumba Suku. (2 Va Korindo 8:23) Tu sukila oku setukula ongangu yekolelo liavo kuenda elitumbiko liavo ku Suku.—Va Heveru 13:7.

• Olomitavaso olongende, vi nyula akongelo locimãho cipi?

• Ndamupi tu kuatisiwa lapasu avo?

Eci kuiya ocilunga cimue, Olombangi Via Yehova vi linga lonjanga esokiyo lioku kuatisa vamanjavo va pita locitangi caco. Alikolisilo aco a lekisa ocisola cocili tu likuetele pokati. (Yoano 13:34, 35; 1 Yoano 3:17, 18) Volonepa vipi tu eca ekuatiso liaco?

Tu eca olombanjaile violombongo. Eci vo Yudea mua kala onjala, Akristão vatete ko Antiokea va tuma ekuatiso liolombongo ku vamanjavo kespiritu. (Ovilinga 11:27-30) Cimuamue haico koloneke vilo okuti, eci tu yeva okuti vamanjetu kolonepa vimue violuali va kasi oku liyaka luhũkui, tu va tumisa ekuatiso poku eca olombanjaile vekongelo lietu.—2 Va Korindo 8:13-15.

Tu eca ekuatiso va sukila. Akulu vekongelo va kasi pocitumãlo pa pita ocilunga caco, va sandiliya vamanji vosi vekongelo liavo loku kũlĩhĩsa ndomo va kasi. Ocisoko cimue cekuatiso, ci songuila upange woku eca okulia, ovava, uwalo, ovina vioku lisikĩlila, kuenda ovihemba. Vamanji vana va kuete uloño wumesele, va lieca olumue koku kuatisa kupange waco loku semulula olonjo via teka kuenda Olonjango Viusoma. Elitokeko li sangiwa vocisoko cetu kuenda uloño tu kuete omo lioku talavayela kumuamue, vi tu kuatisa oku angiliya ovina vi sukiliwa kuenda olonalavayi viaco. Ndaño okuti tu eca ekuatiso “ku vakuetu vakuetavo,” pole, olonjanja vimue tu pondolavo oku kuatisa omanu vakuavo.—Va Galatia 6:10.

Tu eca ekuatiso konepa yespiritu kuenda elembeleko. Omanu vana va pita locilunga va sukila elembeleko. Kapuluvi aco, tu eca elembeleko li tunda ku Yehova “Suku ukuakulembeleka pokati kovina viosi.” (2 Va Korindo 1:3, 4) Tu lekisa olohuminyo Viembimbiliya ku vana va sumua, loku va sapuila okuti ndopo Usoma wa Suku u ka malako ovilunga viosi vi nena evalo lesumuo.—Esituluilo 21:4.

• Momo lie Olombangi Via Yehova vi kuatisila lonjanga eci kuiya ocilunga cimue?

• Elembeleko lipi liespiritu tu pondola oku eca ku vana va puluka kocilunga?

Yesu osimbu ka file, wa sapela pokolika lolondonge viaye vikuãla okuti, Petulu, Tiago, Yoano, kuenda Andereu. Osimbu a kala oku va sapuila catiamẽla kondimbukiso yetukuluko liaye koloneke via sulako, wa linga epulilo limue hati: “Helie ukuenje wa kolelua haeye wa lunguka okuti cime caye wo kundika vakuanjo yaye vosi oku va iha okulia kuavo kotembo ya tukuiwa?” (Mateo 24:3, 45; Marko 13:3, 4) Yesu wa lekisa kolondonge viaye okuti, omo eye “cime” cavo, o ka nõla omanu vana va ka eca eca okulia kuespiritu vokuenda kuoloneke via sulako. Velie nda va tiamẽla kocisoko cukuenje waco?

Va lomboloka olondonge via Yesu via wavekiwa lespiritu sandu. “Ukuenje” wa siata oku eca okulia kuespiritu kafendeli va Yehova. Oco tu tambule ‘ongaso yetu kotembo ya sokiyiwa,’ tu sukila ekuatiso liavo.—Luka 12:42.

Va tata vakuanjo ya Suku. (1 Timoteo 3:15) Yesu wa eca ocikele kukuenje wa kolelua haeye wa lunguka coku tata ovopange vocisoko ca Yehova palo posi, ndeci, ovikuata, oku songuila upange woku kunda, kuenda oku tu longisa lekuatiso liakongelo vetu. Oco va tu ĩhe ovina tu sukila votembo ya tukuiwa, “ukuenje wa kolelua haeye wa lunguka,” wa siata oku sandeka okulia kuespiritu valivulu tu talavaya lavo kupange woku kunda, kuenda lekuatiso liovipama vi lomboluiwa kolohongele viekongelo, kolohongele vimbo levi viofeka.

Ocisoko cukuenje waco, ca kolelua momo ci kakatela kocili Cembimbiliya kuenda kupange wavo woku kunda olondaka viwa. Handi vali, ca lunguka, momo ci kasi oku tata lolondunge ovopange a Kristu palo posi. (Ovilinga 10: 42) Yehova o kasi oku sumũlũisa upange wavo levokiyo liomanu kuenda o kasi oku va kuatisa koku eca okulia kuespiritu.—Isaya 60:22; 65:13.

• Helie wa nõliwa la Yesu oco a tekule olondonge viaye konepa yespiritu?

• Ndamupi ocisoko Cakristão olombuavekua ca kolelua kuenda ca lunguka?

Kocita catete, ocimunga cimue citito ‘covapostolo lakulu ko Yerusalãi’ vana vatiamẽlele kosungu yakulu, va kuatele ocikele coku nõla ovina via velapo viosi vi lingiwa vakongelo Akristão olombuavekua. (Ovilinga 15:2) Eci vosi va tava oku kuama onjila yimue ya nõliwa, ci lomboloka okuti va konomuisa eci Ovisonehua vi popia kuenje va ecelela oku songuiwa lespiritu lia Suku. (Ovilinga 15:25) Eyi oyo ongangu yi kasi oku kuamiwa koloneke vilo.

Va nõliwa la Suku oco va linge ocipango caye. Vamanji olombuavekua vana vatiamẽla kocisoko Cosungu Yolombangi Via Yehova, va sumbila calua Ondaka ya Suku, kuenda va loñoloha koku songuila upange, lovina vikuavo viespiritu. Ovo osemana losemana va siata oku liongolola oco va kũlĩhĩse ovina vamanji koluali luosi va sukila. Ndeci ca kala kocita catete, ovo va eca olonumbi Viembimbiliya, ci kale vovikanda ale lekuatiso liolomitavaso vi nyula akongelo kuenda omanu vakuavo. Kuenje ci kuatisa omanu va Suku oku likuata omunga, ci kale kovisimĩlo ale kovilinga. (Ovilinga 16: 4, 5) Handi vali, va songuila upange woku pongiya okulia kuespiritu, loku vetiya vamanji oku pitisa kovaso upange woku kunda Usoma kuenda oku nõla vamanji va loñoloha oco va tambule ovikele.

Va tava oku songuiwa lespiritu lia Suku. Ndeci ca kala kocita catete, Osungu Yolombangi Via Yehova ya kolela kolonumbi via Yehova Ombiali ya Velapo Koluali luosi kuenda kolonumbi via Yesu Utue wekongelo. (1 Va Korindo 11:3; Va Efeso 5:23) Ovo ka va litendi ndu okuti ovo asongui vafendeli va Suku. Pole, kumue Lakristão vosi olombuavekua “vakuakukuama Kameme [Yesu] kuosi a enda enda.” (Esituluilo 14:4) Osungu Yolombangi Via Yehova ya siata oku sanjukila olohutililo tu linga vioku va pingilako ekuatiso.

• Kocita catete velie vatiamẽlele kosungu yakulu?

• Koloneke vilo, ndamupi Osungu Yolombangi Via Yehova yi sandiliya olonumbi via Suku?

Kelimi lio Heveru ondaka Betele, yi lomboloka “Onjo ya Suku.” (Efetikilo 28:17, 19) Eyi oyo onduko ya sunguluka oku eciwa kolonjo Violombangi Via Yehova via tumbikiwa kolonepa vialua violuali, vi songuila upange woku kunda loku kuatisa kupange waco. Osungu Yolombangi Via Yehova yi talavaya kombala Yolombangi Via Yehova yi sangiwa ko Nova York, kofeka yo Estados Unidos. Ombala yaco oyo yi songuila ovopange a lingiwa kolofiliale vi sangiwa kolofeka vialua. Ocimunga ca vana va talavaya kolonjo viaco, ca kũlĩhĩwa hati, vakuepata lio Betele. Ndeci ca siata vapata, ovo va talavaya kumuamue, va lila kumuamue okulia, kuenda va lilongisila kumuamue Embimbiliya.—Osamo 133:1.

Ocitumãlo cimue okuti vakuepata liaco va lieca olumue koku talavaya. Kolonjo viosi vio Betele, ku sangiwa alume lakãi Akristão va litumbika otembo yosi koku tẽlisa ocipango ca Suku kuenda koku linga ovopange Usoma. (Mateo 6:33) Lomue pokati kavo o tambula ofeto, pole, vosi va tambula ohondo, lokulia, kuenda ekuatiso limue liolombongo vioku landa ovina va sukila. Ovo va tambula ovikele viupange, ndeci oku talavaya voseketa, vokusinya, ale vonjango yoku lila. Vamue va talavaya koku panga alivulu, oku tata olohondo, oku sukula uwalo, oku semulula evi via nyõleha, kuenda ovina vikuavo.

Ocitumãlo cimue ci kuatisa kupange woku kunda Usoma. Ocimãho colo Betele viosi, oku kuatisa koku sandeka ocili Cembimbiliya komanu valua nda ci tẽliwa. Ombrochura yilo yeca uvangi waco. Oyo ya sonehiwa lonumbi Yosungu Yolombangi Via Yehova, kuenda ya tumiwa lekuatiso lio Internet kolo Betele vialua ku sangiwa ovimunga vi talavaya koku pongoluila alivulu kalimi akuavo, loku panga alivulu, kuenda oku a tumisa kueci ci pitahãla 110.000 kakongelo. Epata lio Betele lia siata oku kuatisa kupange waco watiamẽla koku kunda olondaka viwa.—Marko 13:10.

• Velie va talavaya ko Betele, kuenda ekuatiso lipi va tambula?

• Upange upi wonjanga u kuatisiwa la vana va talavaya ko Betele?

Epata lio Betele li talavaya voloseketa vialua vi songuila upange woku kunda vofeka ale kolofeka vikuavo. Ovo va talavaya voloseketa vi pongolola alivulu kalimi akuavo, oku upa olokopia violorevista, oku panga alivulu, oku a seleka, oku panga olokasete ale olodisku vioku yevelela, lolovideo, kuenda oku linga ovopange akuavo a sukiliwa pocitumãlo.

Ocisoko cimue Cakulu Vofiliale, ci songola upange u lingiwa. Osungu Yolombangi Via Yehova ya eca Kocisoko Cakulu Volofiliale ocikele coku songuila ovopange osi a lingiwa kofiliale. Ocisoko caco ci kuete akulu vatatu ale valua va loñoloha kespiritu. Ocisoko caco ci sapuila Osungu Yolombangi Via Yehova evokiyo liupange woku kunda u lingiwa vofeka ale kolofeka vi kasi oku songuiwa locisoko caco. Handi vali, va sapuilavo Osungu Yolombangi Via Yehova ovitangi viosi va liyaka lavio. Ulandu waco u kuatisa Osungu Yolombangi Via Yehova oku nõla olonumbi vi ka sandekiwa velivulu li ka pangiwa, vi ka lomboluiwa kolohongele viekongelo ale kolohongele vikuavo vinene. Olonumiwa Viosungu Yolombangi Via Yehova vina vi tukuiwa hati, olomitavaso vi nyula olofiliale, via siata oku tumiwa koku nyula olofiliale loku eca olonumbi vi kuatisa Ocisoko Cakulu Vofiliale oco va tẽlise ciwa ovikele viavo. (Olosapo 11:14) Vokuenda kuepasu liaco, ku sokiyiwa ohongele yimue yi likasi okuti mua kongela ohundo yimue yi lingiwa la mitavaso o nyula ofiliale, oco a kolise vamanji va sangiwa vocikanjo cofiliale yaco.

Ku eciwa ekuatiso kakongelo. Vamanji vakuavikele kofiliale, va tava kaliangiliyo oku sokiya akongelo okaliye loku nõliwa kuakulu vekongelo kuenda oloñuatisi viekongelo. Ovo va songuilavo upange wakundi votembo yosi, olomisionaliu, kuenda olomitavaso vi nyula akongelo va sangiwa vocikanjo cofiliale. Handi vali, va sokiya olohongele vimbo, levi viofeka, loku songuila upange woku tunga Olonjango Viusoma kuenda oku tuma alivulu kakongelo. Ovina viosi vi lingiwa kofiliale vi kuatisa koku tẽlisa upange woku kunda.—1 Va Korindo 14:33, 40.

• Ocisoko Cakulu Vofiliale ci kuatisa ndati Osungu Yolombangi Via Yehova?

• Ovopange api a lingiwa kofiliale?

Oco tu kunde “esapulo liwa” “kolofeka viosi, lo kapata osi, lo ku vakualimi aiñi aiñi osi, lo komanu vosi,” tua siata oku sandeka alivulu kueci ci pitahãla 750 kalimi. (Esituluilo 14:6) Upange waco wa siata oku lingiwa ndati? Tua siata oku u linga lekuatiso liocisoko casonehi vo kolofeka vialua kuenda eci ci pitahãla 3.000 komanu vakuakupongolola alivulu kalimi akuavo okuti vosi yavo Olombangi Via Yehova.

Tete ulandu waco u pongiyiwa kelimi Liongelesi. Osungu Yolombangi Via Yehova yi songuila upange Woseketa Yasonehi, yi sangiwa kombala yetu yoluali luosi. Oseketa yaco yi songuila ovikele viasonehi va talavaya kombala yetu yoluali luosi kuenda kolofiliale vikuavo. Oku kuata ovisoko vialua viasonehi, ci tu kuatisa oku lombolola ovolandu atiamẽla kovituwa viapata alua. Eli olio esunga lieci alivulu etu a siatela oku vetiya omanu vakualofeka vialua.

Ulandu waco u tumiwa komanu vakuakupongolola alivulu kalimi akuavo. Noke yoku soneha ulandu waco kuenda oku taviwa lakulu, u tumiwa vo Internet kolofeka kuli ocimunga comanu vakuakupongolola alivulu kalimi akuavo. Ovo, va pongolola ulandu waco kalimi akuavo, loku konomuisa evi ka via sonehiwile ciwa kuenda upopi waco. Ovo va likolisilako oku nõla “olondaka viocili” vi pitiya elomboloko lia suapo Liongelesi kelimi liavo.—Ukundi 12:10.

Olomputador vi kuatisa oku linga upange lonjanga. Okomputador ka yi piñainya asonehi kuenda vakuakupongolola alivulu kalimi akuavo. Pole, upange wavo u yayulako poku talavaya lolondisionaliu vi sangiwa vokomputador, olondisionaliu vielimi liavo, kuenda alivulu akuavo oku konomuisa. Olombangi Via Yehova vi talavaya locipama cimue Cokomputador ci tukuiwa hati, Sistema Eletrônico de Fotocomposição Multilíngüe (MEPS) cecelela oku yikula ulandu umuamue valimi alua loku lekisa alitalatu aco, kuenda oku upa olokopia viaco.

Momo lie tu likolisilako oku linga upange woku pongolola alivulu kalimi akuavo, ndaño muẽle kalimi ana a vanguiwa letendelo liomanu vatito? Momo ocipango ca Yehova ceci okuti, “omanu vosi va popeliwa ha veya kukũlĩhiso wocili.”—1 Timoteo 2:3, 4.

• Alivulu etu a siata oku sonehiwa ndati?

• Momo lie tu pongoluila alivulu etu kalimi akuavo?

Unyamo lunyamo, ocisoko cetu ca siata oku sandeka Ambimbiliya alua kuenda alivulu akuavo loku a eca komanu, pole, ka va pingi olombongo. Tua siata oku tunga Olonjango Viusoma, lofiliale kuenda oku vi tata. Handi vali, tua siatavo oku kuatisa omanu valua va talavaya ko Betele, lolomisionaliu, kuenda oku eca ekuatiso komanu va pita lovilunga. Pamue ove o lipula ndoco: ‘Pi kua siata oku tunda olombongo vioku linga ovina evi viosi?’

Ka tu kisika omanu oku eca onepa yekũi, ale ovilumba. Ndaño okuti kua siata oku pesiwa olombongo vialua vioku kuatisa kupange woku kunda, pole, ka tu pingi olombongo komanu. Kanyamo apita, emẽla liavali liorevista Utala Wondavululi, lia lomboluile hati, tua kolela okuti Yehova o tu kuatisa kuenda “lalimue eteke tu ka pinga ekuatiso komanu.” Ocili okuti, lalimue eteke tua pingile ekuatiso komanu!—Mateo 10:8.

Upange wetu u kuatisiwa lolombanjaile viomanu. Omanu valua omo lioku sola upange wetu woku longisa Embimbiliya, va siata oku vetiyiwa oku eca olombanjaile. Olombangi Via Yehova vi pesela otembo yavo, ongusu, olombongo, kuenda ovipako vikuavo koku linga ocipango ca Suku koluali luosi. (1 Asapulo 29:9) Vonjango Yusoma, mu sangiwa olokasia vioku kapa olombanjaile viomanu va yongola oku ci linga lutima wosi. Onepa yalua yolombongo viaco, ya siata oku eciwa lomanu vana okuti olohukũi, va kasi ndocimbumba cina Yesu a pandiya okuti wa imba vombango yonembele alusendu avali. (Luka 21:1-4) Omo liaco, omunu lomunu citava okuti o ‘seleka cimue’ coku eca “ndeci a panga kutima waye.”—1 Va Korindo 16:2; 2 Va Korindo 9:7.

Tua kolela okuti Yehova o ka amamako oku vetiya vakuavitima via sunguluka va yongola oku U ‘vumba lovipako viavo’ oco va kuatise kupange woku kunda Usoma okuti ocipango caye ci tẽlisiwa.—Olosapo 3:9.

• Nye ci tepisa ocisoko cetu latavo akuavo?

• Olombanjaile vi eciwa lomanu via siata oku lingiwa nye?

Onduko Onjango Yusoma, yi lekisa ocitumãlo va lomboluila elongiso Liembimbiliya liatiamẽla Kusoma wa Suku, una wa kala osapi yupange woku kunda wa Yesu.—Luka 8:1.

Olonjango Viusoma ovitumãlo viefendelo liocili vocikanjo. Vonjango Yusoma omo Olombangi Via Yehova via siatela oku lingila eliangiliyo liupange woku kunda. (Mateo 24:14) Olonjango Viusoma kunene kuenda keposo via litepa, pole viosi via tungiwa ciwa kuenda citava okuti mu liongoluila akongelo alua. Kanyamo a sulako ndeti tua tunga olohuluwa vialua Violonjango Viusoma, (ci lekisa okuti veteke kua tungiwa olonjango vitãlo) omo lievokiyo liakundi kuenda akongelo. Ci kasi hẽ oku tẽliwa ndati?—Mateo 19:26.

Vi tungiwa lekuatiso liolombanjaile viomanu. Volonjango Viusoma, muli okasia yikuavo yolombanjaile kua sonehiwa hati, Olombanjaile Vioku Tunga Olonjango Viusoma Koluali Luosi. Olombanjaile viaco vi tumiwa kofiliale oco olombongo viaco vi kuatise koku tunga Olonjango Viusoma viakongelo ana ka va kuete epondolo lioku ci linga.

Vi tungiwa lomanu va lieca olumue haivo va kuete ekalo lia litepa. Kolofeka vialua, kua sokiyiwa Ovimunga Via Vamanji Vakuakutunga Olonjango Viusoma. Ovimunga viaco, vi tunda kekongelo limue loku enda kekongelo likuavo oku linga upange waco vofeka yavo, ndaño muẽle kovikanjo vi kasi ocipãla. Ovo va songola upange woku tunga kuenda oku pindisa vamanji vo pocitumãlo caco. Kolofeka vikuavo, Vakuacisoko Coku Tunga Olonjango Viusoma va siata oku tambula ocikele coku songola upange woku tunga, loku semũlũla Olonjango Viusoma kocitumãlo cosi ca nõliwa. Akulu vekongelo vana va loñoloha kespiritu, va eca olonumbi kakongelo viatiamẽla koku tunga kuenje vamanji vakuoloño woku tunga, va lieca kupange waco. Povitumãlo viosi pa tungiwa Onjango Yusoma, vamanji vo pocitumãlo va lieca koku kuatisa upange waco. Espiritu lia Yehova kuenda elikolisilo liomanu vaye, ovio vi kasi oku tẽlisa upange waco.—Osamo 127:1; Va Kolosai 3:23.

• Momo lie ovitumãlo vietu viefendelo vi tukuiwila hati, Onjango Yusoma?

• Upange woku tunga Olonjango Viusoma u kasi oku tẽliwa ndati koluali luosi?

Olonjango viosi Viusoma Violombangi Via Yehova, vi ambata onduko yi kola ya Suku. Omo liaco, oku kuatisa koku yi yelisa, loku yi posuisa, kuenda oku yi tata ciwa, esumũlũho liocili, momo ci panga onepa kefendelo lietu li kola. Vosi va pondola oku kuatisa kupange waco.

Noke yohongele omanu va lieca koku yelisa Onjango Yusoma. Kesulilo liohongele vamanji alume kuenda akãi va lieca kupange woku yelisa Onjango Yusoma. Vosemana citava okuti mu yelisiwa olonjanja vialua. Ukulu umue wekongelo ale oñuatisi yekongelo, o tambula ocikele coku songuila upange waco loku kuama esokiyo liovina vi sukiliwa oku lingiwa. Nda ci sukiliwa, vamanji va pondola oku komba, oku puenya posi, oku tutumũla oneketela, oku sokiya ciwa olomangu, oku yelisa volonjo viuhayele, olonjanela, olumuilo, oku inasi ovinene, kuenda oku yelisa kosamua. Onjanja yimosi vunyamo, ku nõliwa eteke limue lioku linga eyeliso linene. Poku kongela omãla vetu kovopange aco, tu va vetiya oku sumbila ovitumãlo vietu viefendelo.—Ukundi 5:1.

Kuatisa koku semulula ovina via nyõleha. Unyamo lunyamo, ku lingiwa ekonomuiso liovina vi sukiliwa oku semuluiwa vokati Konjango Yusoma kuenda kosamua. Noke yekonomuiso liaco, otembo lotembo ku lingiwa upange woku semulula ovina via nyoleha oco Onjango Yusoma ya amameko oku kala ciwa kuenda oku tepulula epese liolombongo. (1 2 Asapulo 24:13; 34:10) Onjango Yusoma ya yela, haiyo yi tatiwa ciwa, oyo yi sesamẽla oku kala ocitumãlo coku fendela Suku yetu. Poku kuatisa kupange waco, tu lekisa ukamba tu kuete la Yehova kuenda ndomo tua kapako ocitumãlo cetu cefendelo. (Osamo 122:1) Handi vali, ceca uvangi uwa posongo.—2 Va Korindo 6:3.

• Momo lie tu sukilila oku tata ciwa ocitumãlo cetu cefendelo?

• Ovina vipi via siata oku lingiwa oco Onjango Yusoma yamameko oku yela?

O yongola hẽ, oku linga akonomuiso amue oco o vokiye ukũlĩhĩso wove watiamẽla Kembimbiliya? O yongola hẽ oku kũlĩha ciwa ocisonehua cimue, ale omunu umue, ocitumãlo cimue, ale ocina cimue ca tukuiwa Vembimbiliya? Wa kũlĩha hẽ okuti Ondaka ya Suku yi pondola oku ku kuatisa kocitangi cimue o kasi oku liyaka laco? Nda oco, kũlĩhĩsa vociseleko calivulu ci sangiwa Vonjango Yusoma.

Vociseleko calivulu mu sangiwa alivulu oku linga akonomuiso. Ove citava okuti ku kuete alivulu osi a sandekiwa Lolombangi Via Yehova kelimi liove. Pole, vociseleko calivulu ci sangiwa Vonjango Yusoma, muli alivulu a sandekiwa ndopo. Mulivo Ambimbiliya a sandekiwa kalimi akuavo, olondisionaliu, kuenda alivulu akuavo. Osimbu ohongele ka ya fetikile ale noke yohongele, citava okuti o konomuisa vociseleko calivulu. Nda muli okomputador, citava okuti mua kapiwa ocipama ci tukuiwa hati, Biblioteca da Torre de Vigia. Vocipama caco mu sangiwa ulala walivulu etu kuenda ci leluisa oku sandiliya ulandu wosi o yongola oku konomuisa, ondaka yimue, ale ocisonehua Cembimbiliya.

Ociseleko calivulu ci kuatisa olondonge Viosikola Yupange Wakristão. Nda ove wa lisonehisa kosikola yaco, o pondola oku kuatisiwa lociseleko calivulu ci sangiwa Vonjango Yusoma poku pongiya ocipama wa tambula. Mitavaso yosikola eye o kuete ocikele coku tata ociseleko caco. Eye o kũlĩhĩsa nda mua kapiwa alivulu a sandekiwa ndopo loku va tata ciwa. Eye ale ulongisi wove Wembimbiliya o ka ku lekisa ndomo o pondola oku sanga ulandu o yongola oku konomuisa. Pole, vociseleko calivulu ci kasi Vonjango Yusoma ka citava okuti mu ambatiwa alivulu. Omo liaco, tu yongola okuti alivulu aco a tatiwa ciwa, kuenda ka citava okuti mu sonehiwa.

Embimbiliya li lombolola okuti oco tu sange “ukũlĩhiso wa Suku” tu sukila oku likolisilako oku u sandiliya ‘ndukuasi wa selekiwa.’ (Olosapo 2:1-5) Ociseleko calivulu Vonjango Yusoma ci ku kuatisa oku fetika oku sandiliya ukũlĩhĩso waco.

• Ovina vipi vioku linga akonomuiso vi sangiwa vociseleko calivulu Vonjango Yusoma?

• Helie o ku kuatisa oku linga akonomuiso vociseleko calivulu?

Yesu wa sapuila olondonge viaye hati: “Ocinyi cene ci taimile ndoco kovaso omanu okuti va mola ovilinga viene viwa kuenje va sivaya Isiene o kasi kilu.” (Mateo 5:16) Omo liaco, tu talavaya ciwa lovoloño okaliye oluali, oku kongelamo o Internet. Vonumbi yetu yo Internet, www.pr2711.com, mu sangiwa ovolandu atiamẽla kalongiso kuenda kupange Wolombangi Via Yehova. Ocipama caco ci lombolola nye?

Atambululo Embimbiliya kapulilo a siata oku lingiwa lomanu. O pondola oku sanga atambululo kapulilo amue avelapo omanu va siata oku linga. Otratadu losapi hati, Ohali Yosi Ndopo yi Pua? kuenda Omanu va fa va pondola oku kuata vali omuenyo? vina via sandekiwa vo Internet kueci ci soka 600 kalimi, yi tambulula apulilo amue epandu. O pondolavo oku sangamo Embimbiliya Tradução do Novo Mundo lia sandekiwa kueci soka 130 kalimi, kuenda alivulu alua oku lilongisa Embimbiliya, oku kongelamo elivulu Embimbiliya li Longisa Nye? kuenda ovipama viokaliye Viutala Wondavululi lo Despertai! Valua pokati kalivulu aco citava okuti a tangiwa vo komputador ale oku yevelela ulandu waco. O pondola oku upa olokopia vimue viovipama viaco oco o sapele ulandu waco lomanu va yongola oku yevelela kelimi liavo! Kua sandekiwavo alivulu a pongoluiwa volovideo kalimi ovindekaise. Handi vali, o pondolavo tapa oku tangiwa kuolondalama Viembimbiliya, olondalama, kuenda ovisungo vioku yevelela kowola yove yepuyuko.

Ulandu wocili watiamẽla Kolombangi Via Yehova. Mu sangiwavo ovolandu okaliye kuenda olovideo vi lekisa upange wetu u kasi oku lingiwa koluali luosi, ovitangi via siata oku lipita Lolombangi Via Yehova, kuenda alikolisilo etu oku eca ekuatiso. O pondolavo oku sanga asapulo atiamẽla kolohongele viofeka vi ka lingiwa kovaso yoloneke kuenda oku pulisa olonumbi kofiliale yetu.

Lekuatiso liovina evi, tu kasi oku sandeka ocili condaka ya Suku kolonepa viosi violuali. Omanu vo kovifuka viosi, oku kongelamo ocifuka co Antártida, va kasi oku kuatisiwa locipama caco. Tu likutilila okuti ‘ondaka ya Yehova yi endelela’ toke kolonepa viosi violuali loku eca ulamba Kokuaye.—2 Va Tesalonike 3:1.

• Onumbi yetu yo Internet www.pr2711.com, yi kasi oku kuatisa ndati omanu valua oku lilongisa ocili Cembimbiliya?

• Ovina vipi o yongola oku konomuisa vonumbi yetu yo Internet?