Omanu valua va liwekapo oku endaenda konembele, momo ka va sangele ekuatiso ale elembeleko va sukila konepa yespiritu. Oco hẽ, momo lie o sukilila oku endaenda kolohongele viekongelo via sokiyiwa Lolombangi Via Yehova? Nye o ka sangako?

Esanju lioku kala pokati komanu vakuacisola haivo va kapako vakuavo. Kocita catete, Akristão va sokiyiwile vakongelo kuenda va enda oku linga olohongele vioku fendela Suku, loku lilongisa Ovisonehua, kuenda oku li kolisa pokati. (VaHeveru 10:24, 25) Omo liocisola ca kala pokati kavo, va li kuatelele ukamba wocili la vamanjavo kespiritu. (2VaTesalonike 1:3; 3Yoano 14) Koloneke vilo tua siatavo oku kuama ongangu yavo kuenda tu kuetevo esanju limuamue.

Oku kuatisiwa ndomo ku kapiwako olonumbi Viembimbiliya. Alume, lakãi, kuenda omãla va siata oku liongolola ndeci ca kala kosimbu. Alongisi vana va loñoloha kespiritu, va tanga Embimbiliya oco va tu kuatise oku kũlĩha ndomo tu kapako olonumbi vialio komuenyo wetu. (Esinumuĩlo 31:12; Nehemiya 8:8) Vosi va kasi pohongele yaco, va pondola oku eca atambululo konepa yi lingiwa lapulilo, loku imba ovisungo kuenje tu situlula elavoko lietu.—VaHeveru 10:23.

Esumũlũho lioku pamisa ekolelo liove ku Suku. Upostolo Paulu poku sonehela ekongelo limue lia kala koloneke viaye, wa popia hati: “Ndi livela oku u moli . . . [loku] sanga evelo lioku likolisa pokati, okuti ekolelo liene li ñuatisa ame, kuenda ekolelo liange liu kuatisi ene.” (VaRoma 1:11, 12) Oku sapela la vamanji kolohongele viekongelo ci pamisa ekolelo lietu kuenda onjongole yetu yoku amamako oku lekisa ovituwa Viakristão vocili.

Omo liaco, tava kelaleko lioku enda kolohongele vietu viekongelo oco o ka limbuke ove muẽle ovina viaco. Nda wa ci linga o ka tambuiwa ciwa. Kolohongele viaco, omunu iñila lelianjo, kuenda ka ku pingiwa olombongo.

• Olohongele vietu viekongelo vi lingiwa loku kuama ongangu yipi?

• Ndamupi tu kuatisiwa poku endaenda kolohongele viekongelo?

Ndaño loku pita vovisenge ale lombela, tua siata oku enda kolohongele viekongelo olonjanja viosi. Momo lie Olombangi Via Yehova via siatela oku likolisilako oku liongolola la vamanjavo ndaño lovitangi va liyaka lavio kuenda ekavo noke yoku tunda kupange?

Ci kuete esilivilo kekalo lietu. Paulu poku popia catiamẽla ku vana tu kala lavo vekongelo, wa sonehele hati: “Tu sokololi ndomo tu tela oku livetiya pokati.” (Va Heveru 10:24) Ondaka eyi yi lomboloka “oku sokolola eci catiamẽla koku kapako vakuetu,” loku va kũlĩha ciwa. Omo liaco, olondaka evi viupostolo, vi tu vetiya oku sakalala lekalo lia vakuetu. Nda tua likolisilako oku kũlĩha apata akuavo Akristão, tu ka limbuka okuti valua pokati kavo va siata oku yula ovitangi ndevi tu kasi oku liyaka lavio kuenda va pondola oku tu kuatisa ndomo tu yulavo ovitangi vietu.

Ci pamisa ukamba wetu. Kolohongele vietu, vamanji ka tu va tendi lika ndomanu tua kũlĩha, pole, tu va tenda ndakamba vetu. Tua siatavo oku pesela otembo koku linga lavo olomapalo. Ukamba waco wa siata oku tu kuatisa ndati? Ukamba waco u tu longisa oku kapako vakuetu kuenda u pamisa ocisola cetu. Eci vamanjetu va liyaka lovitangi, tu va kuatisa momo tu li kuetele ukamba wocili. (Olosapo 17:17) Poku kuata ukamba la vamanji vosi vekongelo, tu lekisa okuti tu ‘likuetele pamosi ohenda.’—1 Va Korindo 12:25, 26.

Tu ku vetiya oku kuata ukamba la vana va kasi oku linga ocipango ca Suku. Akamba vaco o va sanga lika pokati Kolombangi Via Yehova. Ku ka ecelele okuti ocina cimue ci ku tateka oku kuata ukamba letu.

• Momo lie ci kuetele esilivilo kokuetu oku liongolola la vakuetu kolohongele?

• Otembo yipi o yongola oku endaenda letu kolohongele?

Akristão vatete kolohongele viavo va enda oku imba ovisungo, loku linga olohutililo, oku tanga Ovisonehua kuenda oku vi lombolola, pole, ka mua kongelele ovihilahila. (1 Va Korindo 14:​26) Kũlĩhĩsa ovina vimue tua siatavo oku linga kolohongele vietu.

Olonumbi viaco viopiwa Vembimbiliya kuenda vi kuete esilivilo. Kesulilo liosemana, akongelo va siata oku liongolola oco va yevelele ohundo Yembimbiliya yi lingiwa vokuenda kuakukutu 30. Ohundo yaco yi lekisa ndomo Ovisonehua Viembimbiliya vi tiamisiwila komuenyo wetu kuenda koloneke vilo. Vosi yetu tu vetiyiwa oku kuama olonumbi viaco Vembimbiliya lietu. Noke yohundo, ku lingiwa Elilongiso “Liutala Wondavululi” vokuenda kuowola, okuti vosi vekongelo va pondola oku eca atambululo kapulilo a lingiwa opiwa vocipama Cutala Wondavululi welilongiso. Elilongiso liaco li tu kuatisa oku kapako olonumbi Viembimbiliya komuenyo wetu. Elilongiso liocipama caco li lingiwa kueci ci pitahãla 110.000 kakongelo voluali luosi.

Tu kuatisiwa oco tu mioñolole uloño wetu woku longisa. Vokati kosemana tua siatavo oku liongolola oco tu lilongise olonepa vitatu viohongele losapi hati: Ekalo Lietu Tuakristão Kuenda Oku Kunda. Ovina vi konomuisiwa kohongele yaco viupiwa vulandu wetu Wovipama Viohongele Ekalo Lietu Tuakristão Kuenda Oku Kunda, tua siata oku tambula olosãi viosi. Tete tu konomuisa, Ovokuasi a Sangiwa Vondaka ya Suku, yina yi tu kuatisa oku kũlĩha ciwa ocinimbu cimue Cembimbiliya vamanji va tanga ale konjo. Vali tu konomuisa ndomo tu Kapako Olonumbi Evi Kupange Woku Kunda. Oyo yi lingiwa lovindekaise vina vi tu longisa ndomo tu vangula lomanu catiamẽla Kembimbiliya. Noke usongui wolonepa eca olonumbi vimue vi tu kuatisa oku mioñolola oku tanga kuetu kuenda oku kala alongisi vawa. (1 Timoteo 4:13) ) Onepa ya sulako yi tukuiwa hati, Ekalo Liakristão, yi tu kuatisa ndomo tu kapako olonumbi Viembimbiliya eteke leteke. Vonepa yaco mua kongela apulilo kuenda atambululo a vokiya elomboloko lietu Kembimbiliya.

Nda wa enda kolohongele vietu, o ka komõha elongiso Liembimbiliya o ka tambula.​—⁠Isaya 54:⁠13.

• Nye o lavoka oku yevelela kolohongele Violombangi Via Yehova?

• Pokati kolohongele vietu vi lingiwa vokuenda kuosemana, yipi o yongola okuti o kalako?

Ndomo o ci lete vociluvialuvia eci, wa limbuka ndomo Olombangi Via Yehova vi wala ciwa kolohongele viavo? Momo lie tua siatela oku wala ciwa kuenda oku liposuisa?

Oco tu lekise esumbilo ku Suku yetu. Ocili okuti Suku ka vanji keposo lioketimba. (1 Samuele 16:7) Pole, eci tu liongolola oco tu u fendele, onjongole yetu oku lekisa esumbilo kokuaye kuenda ku vamanji. Nda tu kasi kovaso yonganji yimue kombonge, tu lekisa esumbilo kokuaye poku wala ciwa. Cimuamue haico okuti, oku liposuisa ciwa eci tu kasi kolohongele vietu, ku lekisa esumbilo tu kuetele Yehova Suku “Onganji yoluali luosi,” kuenda ocitumãlo coku u fendela.—Efetikilo 18:25.

Oco tu lekise olonumbi tu kasi oku kuama. Embimbiliya li vetiya Akristão vana va “vumba Suku” oco va ‘liposuise luwalo wa sunguluka, loku liuvika.’ (1 Timoteo 2:9, 10) Oku liposuisa “luwalo wa sunguluka,” ci lomboloka oku yuvula oku wala uwalo wa tõla kuenda una u vetiya oloñeyi, ale uwalo u lekisa etimba. Oku “liuvika,” ku tu kuatisa oku yuvula oku nõla uwalo umue ka wa sungulukile una ka u lekisa esumbilo kokuetu. Pole, olonumbi evi vi ecelela omunu oku nõla uwalo a sole. Oku wala ciwa loku liposuisa kuetu, ku ‘imbila uvangi ondaka ya Suku Upopeli wetu,’ kuenda ku “sivaya Suku.” (Tito 2:10; 1 Petulu 2:12) Poku wala ciwa eci tu enda kolohongele vietu, tu kuatisa omanu oku kuata ovisimĩlo viwa viatiamẽla kefendelo lietu ku Yehova.

Ku ka ecelele okuti uwalo wove u ku tateka oku endaenda Vonjango Yusoma. Oku wala uwalo wa sunguluka ka ci lomboloka una wa tĩla ale woku limolehisa, pole, tu sukila lika oku yelisa uwalo waco kuenda oku liposuisa ciwa.

• Oku wala ciwa ku kuete esilivilo lie poku fendela Suku?

• Olonumbi vipi vi tu kuatisa oku nõla uwalo wa sunguluka loku liposuisa ciwa?

Nda o kasi oku lilongisa Embimbiliya Lolombangi Via Yehova, seteka oku pongiya ocipama u ka lilongisa. Cimuamue haico o sukila oku linga osimbu kua endele kohongele yekongelo oco upe esilivilo kovipama viaco. Nda tua kuata ocituwa coku pongiya ovipama vi ka lingiwa kolohongele, tu ka kuata onima yiwa.

Nõla owola kuenda ocitumãlo coku lilongisa. Owola yipi yu ku ecelela oku lilongisa? Anga hẽ komẽle osimbu kua endele kupange, ale kuteke osimbu omãla va pekela? Ndaño okuti ku tẽla oku lilongisa vokuenda kuolowola vialua, nõla otembo o pondola oku ci linga kuenda ku ka ecelele okuti cimue ci ku tateka. Sandiliya ocitumãlo cimue cohã, kuenda yika o radiu, o televisãu kuenda o telefone yo peka. Oku fetika elilongiso lohutililo ci ku kuatisa oku yuvula oku sokolola ovina wa linga vokuenda kueteke oco o tiamisile lika utima Kondaka ya Suku.—Va Filipoi 4:6, 7.

Taya ocipama o lilongisa, kuenda lipongiya oco wece atambululo. Kuata elomboloko liulandu wosi wocipama. Sokolola osapi yocipama, kuenda kũlĩhĩsa ndomo otulosapi tuaco tu li kuata losapi yocipama, loku konomuisa oviluvialuvia, kuenda pitulula apulilo a situlula etosi liavelapo liocipama caco. Noke tanga ocinimbu locinimbu kuenda sandiliya atambululo atiamẽla kapulilo a sangiwa vocipama. Tanga ovisonehua Viembimbiliya via tukuiwa vocipama, kuenda sokolola ndomo vi tiamisiwila kulandu waco. (Ovilinga 17:11) Eci o sanga etambululo liepulilo liaco, taya olondaka viaco oco okuti vokuenda kuohongele wivaluka etambululo o yongola oku eca. Kohongele, nda o yongola oku eca etambululo liove, o pondola oku votola eka kuenda citava okuti o ci linga volondaka viove muẽle.

Poku konomuisa ovipama viosi vi lomboluiwa kolohongele osemana losemana, o ka vokiya ovisimĩlo viokaliye “vovikuata” viove viukũlĩhĩso Wembimbiliya.—Mateo 13:51, 52.

• Ocituwa cipi o sukila oku kuata oco o pongiye ovipama violohongele?

• O pondola ndati oku lipongiya ciwa oco wece etambululo kolohongele viekongelo?

Tunde kosimbu, Yehova wa siata oku vetiya apata oco va sande otembo yoku kala pamosi, okuti va pamisa ekalo liavo kespiritu kuenda ukamba wavo. (Esinumuĩlo 6:​6, 7) Eli olio esunga lieci Olombangi Via Yehova vi sandela otembo yoku linga efendelo liepata osemana losemana, oco va sapele lesanju ovina viespiritu vi likuata lekalo liavo. Ndaño o kasi lika liove, citava okuti o peselavo otembo yoku kũlĩhĩsa ondaka ya Suku poku linga elilongiso liove Liembimbiliya.

Epuluvi lioku pamisa ukamba la Yehova. Embimbiliya li popia hati: “Ameli ku Suku kuenje eye amela kokuene.” (Tiago 4:⁠8) Poku lilongisa ovina viatiamẽla kovituwa via Yehova kuenda kovilinga viaye ndomo via sonehiwa Vembimbiliya, tu U kũlĩha ciwa. Onjila ya leluka yoku fetika efendelo liove liepata, oku sokiya otembo yoku tanga Embimbiliya lolukandi kumosi lepata, ale oku kuama esokiyo li lingiwa osemana losemana Kohongele Ekalo Lietu Tuakristão Kuenda Oku Kunda. Omunu lomunu vepata citava okuti o tambula ocipama cimue a ka pongiya kuenje kowola yefendelo liepata vosi va lombolola ovina va lilongisa Vovisonehua.

Epuluvi lioku pamisa ukamba lepata. Alume lakãi, kuenda olonjali lomãla, va pondola oku pamisa ukamba wavo poku lilongisa Embimbiliya kumosi lepata. Epuluvi liaco, li sukila oku kala liesanju, lombembua, okuti vosi va lavoka eteke liaco lonjolela vokuenda kuosemana. Loku kapako anyamo vomãla vavo, olonjali citava okuti vi nõla atosi va yongola oku lilongisa kefendelo liepata. Handi vali, va pondola oku kuama ovipama vimue Viutala Wondavululi kuenda o Despertai! ale vievi visangiwa vonumbi yetu yo jw.org. Sapeli eci catiamẽla kovitangi omãla va liyaka lavio kosikola kuenda ndomo va pondola oku pandikisa lavio. Ocina cikuavo oku tala ocipama cimue vo jw broadcasting (co tv.jw.org) noke sapeli eci wa lilongisi. Handi vali, citava okuti vu pongiya ovisungo vi ka imbiwa kohongele kuenda oku sokiya vimue vio kulia, loku nyua noke yefendelo liepata.

Otembo vu pesela osemana losemana kefendelo liene ku Yehova, yi ka kuatisa omunu lomunu vepata oku sanjukila Ondaka ya Suku, kuenje Yehova o ka sumũlũisa alikolisilo ene.​—⁠Osamo 1:​1-3.

• Momo lie tu sokiyila otembo yoku linga efendelo liepata?

• Nye olonjali vi sukila oku linga oco epuluvi liaco li kale liesanju ku vosi vepata?

Momo lie omanu ava va sanjukila? Ovo, va kasi kolohongele vietu vinene. Ndeci afendeli va Suku kosimbu va vetiyiwile oku linga olohongele vinene olonjanja vitatu vunyamo, etu tua siatavo oku linga olohongele vinene. (Esinumuĩlo 16:16) Unyamo lunyamo tu kuete olohongele vitatu vinene ndeci: ohongele yilikasi yeteke limosi, ohongele yimbo yoloneke vivali, kuenda ohongele yofeka yoloneke vitatu. Tua siata oku kuatisiwa ndati leliangiliyo liaco?

Olohongele viaco vi pamisa ukamba wetu la vamanji. Ndeci va Isareli va enda oku sanjukila oku sivaya Yehova “pokati kakongelo,” etu tu sanjukilavo oku fendela Yehova kumosi la vamanji kolohongele vietu vi likasi. (Osamo 26:12; 111:1) Olohongele viaco vi tu ĩha epuluvi lioku kala la vamanji va tunda kakongelo akuavo ale kolofeka vikuavo kuenda vi pamisa ukamba wetu. Kowola yepuyuko tu lia onanya kumosi la vamanji pocitumãlo cohongele loku sapela kuenda oku li kolisa pokati konepa yespiritu. (Ovilinga 2:42) Kapuluvi aco, tu limbuka ocisola ci tokekisa ukamba wetu la ‘vamanji’ koluali luosi.—1Petulu 2:17.

Vi tu kuatisa oku amamako kespiritu. Va Isareli noke yoku kuata ‘elomboloko liolondaka’ Viovisonehua via lomboluiwa kokuavo, va kolisiwa calua. (Nehemiya 8:8, 12) Etu tu sanjukilavo olonumbi Viembimbiliya tu tambula kolohongele vietu vinene. Ulandu wosi u lomboluiwa kolohongele viaco, wopiwa kocinimbu cimue Covisonehua. Olohundo, olosimbosiu, kuenda ovindekaise, vi tu longisa ndomo tu linga ocipango ca Suku. Poku yevelela ovolandu a vamanji va kasi oku pandikisa lovitangi omo lioku kala Akristão koloneke vilo viohali, tu pamisiwavo calua. Olondalama vi lekisiwa kolohongele viofeka luwalo wo kosimbu, vi tu ivaluisa ovolandu Embimbiliya kuenda vi tu longisa ovina vialua. Kolohongele viosi vinene, ku papatisiwa lika vana va yongola oku lekisa elitumbiko liavo ku Suku.

• Momo lie olohongele vinene epuluvi limue liesanju?

• O pondola ndati oku kuatisiwa poku enda kohongele yimue yinene?

Yesu osimbu ka file, wa popia hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” (Mateo 24:14) Upange owu woku kunda olondaka viwa nda wa tẽlisiwa ndati? Poku kuama ongangu Yesu a sia eci a kala palo posi.—Luka 8:1.

Tu likolisilako oku sandiliya omanu kolonjo viavo. Yesu wa pindisa olondonge viaye oco vi kunde olondaka viwa konjo lanjo. (Mateo 10:11-13; Ovilinga 5:42; 20:20) Olondonge viatete via kuatele ocikanjo va handelekiwile oku kundila. (Mateo 10:5, 6; 2 Va Korindo 10:13) Cimuamue haico koloneke vilo okuti, upange wetu woku kunda wa sokiyiwa ciwa, kuenda ekongelo lekongelo li kuete ocikanjo va kundila. Eci ci tu kuatisa oku tẽlisa ocikele tua tambula ku Yesu coku ‘kundila omanu loku imba uvangi.’—Ovilinga 10:42.

Tu likolisilako oku sanda omanu kovitumãlo viosi va sangiwa. Yesu wa tu silavo ongangu yiwa eci a kundila omanu povitumãlo viowiñi, konele yokalunga, kuenda vovaimbo. (Marko 4:1; Yoano 4:5-15) Etu tua siatavo oku sapela lomanu kovitumãlo viosi va sangiwa ndeci, volokololo, kovitumãlo violomĩlu, violomapalo, ale votelefone. Tua siatavo oku eca uvangi ku vana tu lisungue lavo, kakamba vetu vo kupange, vo kosikola, kuenda ku vangandietu nda epuluvi li ecelela. Alikolisilo aco, a siata oku ecelela okuti olohuluwa vialua viomanu voluali luosi, vi yeva ‘olondaka viwa vieyovo.’—Osamo 96:2.

Anga hẽ wa kũlĩha omanu vamue o yongola oku kundila olondaka viwa Viusoma wa Suku kuenda oku va lomboluila eci olondaka viaco vi lomboloka komuenyo wavo wo kovaso? Kundila omanu vosi esapulo lielavoko. Likolisilako oku ci linga!

• Vipi ‘olondaka viwa’ vi sukiliwa oku kundiwa?

• Olombangi Via Yehova vi setukula ndati ongangu ya Yesu yoku kunda?

Ondaka “ukundi wotembo yosi” yi tiamisiwila ku vana va siata oku fetika oku talavaya vovikanjo viokaliye kuenje va yuluila vakuavo onjila. Yesu wa kalavo ukundi wotembo yosi, momo wa tumiwa palo posi oco a linge upange woku kunda weca omuenyo haiwo u yulula onjila yepopelo. (Mateo 20:28) Koloneke vilo, oloñame viaye vi kasi oku kuama ongangu yaye poku pesila otembo yalua koku longisa omanu oco va “linge olondonge.” (Mateo 28:19, 20) Vamanji valua va siata oku linga upange waco poku kala akundi votembo yosi.

Ukundi wotembo yosi o lomboloka omunu eca uvangi otembo yosi. Olombangi viosi Via Yehova, akundi volondaka viwa viusoma. Vamue va leluisa omuenyo wavo oco va kale akundi vavelapo okuti osãi losãi va pesela eci ci soka 70 kolowola kupange woku kunda. Oco va tẽlise upange waco, va siata oku tepulula otembo yavo yupange woku sanda eteku okuti va talavaya lika komẽle ale kekumbi. Vakuavo va litumbika kupange wakundi va likasi vovikanjo vina vi kuete esukila liakundi Vusoma. Ovo osãi losãi va pesela 130 kolowola kupange woku kunda. Akundi vaco va sanjukila ekalo liomuenyo wavo, kuenda va kolela okuti Yehova o va ĩha ovina va sukila. (Mateo 6:31-33; 1 Timoteo 6:6-8) Pole, vana ka va pondola oku kala akundi votembo yosi, va talavaya ndakundi vasokamo okuti osãi losãi va pesela 30 ale 50 kolowola.

Ukundi wotembo yosi o vetiyiwa locisola a kuetele Suku kuenda omanu. Koloneke vilo, tua kũlĩha okuti omanu va sukila oku lilongisa ovina viatiamẽla ku Suku kuenda kocipango caye, ndeci Yesu a linga. (Marko 6:34) Etu tu kuete ukũlĩhĩso u pondola oku va kuatisa cilo, loku va ĩha elavoko lia velapo. Akundi votembo yosi omo liocisola va kuetele omanu, va pesela otembo kuenda ongusu yavo oco va va kuatise konepa yespiritu. (Mateo 22:39; 1 Va Tesalonike 2:8) Oku ci linga ca siata oku pamisa ekolelo liavo, loku kuata ukamba la Suku kuenda esanju lialua.—Ovilinga 20:35.

• Ukundi wotembo yosi o lomboloka nye?

• Nye ca siata oku vetiya vamanji vamue oku litumbika kupange wakundi votembo yosi?

Olombangi via Yehova tunde kosimbu, via siata oku pindisiwa kosikola yakristão. Epindiso liaco lilikasi, lia siata oku eciwa kakundi va litumbika kupange Wusoma wotembo yosi, oco va ‘tẽlise upange wavo u kola.’—2 Timoteo 4:5.

Osikola Yakundi Votembo Yosi. ukundi wotembo yosi kesulilo liunyamo watete, ukundi wotembo yosi, o lalekiwa oco a pindisiwe kosikola vokuenda kuoloneke epandu. Ocimãho cosikola yaco, oku kuatisa ukundi wotembo yosi oku pamisa ukamba waye la Yehova, loku mioñoloha kupange woku kunda kuenda oku amamako oku lekisa ombili.

Osikola Yakundi Vusoma. Osikola yaco, ya siata oku lingiwa vokuenda kuolosãi vivali. Oyo ya sokiyiwila oku pindisa akundi votembo yosi va loñoloha va lekisa onjongole yoku siapo ocitumãlo cavo, oco va ende kuna ka kuli akundi valua. Omo lioku kuama ongangu Yukundi wa velapo wa kala palo posi okuti, Yesu Kristu, ci kasi ndu okuti omunu lomunu pokati kavo, o kasi oku popia hati: “Ame ulo, va nume ño.” (Isaya 6:8; Yoano 7:29) Oku ilukila kocitumãlo cikuavo, pamue mua kongela oku ambata omuenyo wa leluka. Ovituwa, lekalo liocitumãlo caco kuenda okulia, citava okuti via litepa calua loku wa tunda. Pamue o sukila oku lilongisa elimi likuavo. Osikola yaco yi kuatisa vamanji alume, lakãi ka va kuelele, kuenda vana va kuele, okuti va kuete eci ci soka 23 toke 65 kanyamo, oco va kuate ovituwa vi pamisa ekolelo loku mioñolola uloño wavo koku tẽlisa ciwa upange wa Yehova vocisoko caye.

Osikola yo Gileada yo Torre de Vigia. Kelimi lio Heveru ondaka “Gileada,” yi lomboloka oku eca “Uvangi Walua.” Tunde eci osikola yaco ya fetika kunyamo wo 1943 toke cilo, ci pitahãla 8.000 ya vamanji va pindisiwa kosikola yaco, va tumiwa kupange wumisionaliu oco va ece uvangi toke “kasulilo o kilu lieve,” kuenje va siata oku kuata onima yiwa. (Ovilinga 13:47) Kofeka yo Peru eci kua tumiwa olomisionaliu viatete, ka kua kalele ekongelo, pole cilo kuli eci ci pitahãla 1.000 kakongelo. Kofeka yo Japãu eci olomisionaliu via fetika oku kundilako, etendelo Liolombangi Via Yehova ka lia tẽlele ekũi. Pole, cilo kuli eci ci pitahãla 200.000 Kolombangi Via Yehova. Epindiso lia siata oku eciwa vokuenda kuolosãi vitãlo, mua kongela elilongiso lia longa liondaka ya Suku. Akundi valikasi, olomisionaliu, vamanji va panga onepa kepata liombetele ale vamanji vakuakunyula akongelo, va pondola oku lalekiwa oco va ende kosikola yaco oku ka tambula epindiso locimãho coku kuatisa kupange u kasi oku lingiwa voluali luosi.

• Osikola Yakundi Votembo Yosi yi kuete ocimãho cipi?

• Helie o pondola oku pindisiwa Kosikola Yakundi Vusoma?