Oku Kala Ondonge Ci Kuete Esilivilo Lie?

Osimbu Yesu a kala konjo yusongui umue wa va Fariseo, wa longisa ovolandu alua a kuete esilivilo. Noke Yesu wamisako lungende waye toke ko Yerusalãi kuenje owiñi walua u kuama. Momo lie? Anga hẽ va yongola muẽle oku kala olondonge viaye okuti, ka va kũlĩhĩsa vali eci ca kongelamo?

Vokuenda kungende, Yesu o vangula cimue ci sumuisa valua, eci a popia hati: “Nda umue iya kokuange kuenje ka suvuka isiaye, inaye, ukãi waye, omãla vaye, vamanjaye alume lakãi pamue omuenyo waye, ka pondola oku linga ondonge yange.” (Luka 14:26) Oco hẽ, nye Yesu a yongola oku popia lolondaka evi?

Yesu ka kasi oku popia okuti vosi va yongola oku kala olondonge viaye te va suvuka vangandiavo. Pole, va sukila oku sola vali Yesu okuti, vangandiavo ci sule. Va sukila oku yuvula ocituwa culume wa tukuiwa volusapo luatiamẽla kondalelo okuti, wa likala elaleko limue lia velapo omo ndopo a kuela. (Luka 14:20) Embimbiliya li popia okuti, Yakoba kukululu ya va Yudea wa ‘suvukile’ Lea kuenda wa solele Rahele, ci lomboloka okuti wa solele vali manjaye Rahele okuti Lea ci sule.—Efetikilo 29:31.

Handi vali, Yesu wa popia okuti ondonge yi sukila oku suvuka “omuenyo waye.” Eci ci lomboloka okuti ondonge yocili yi sukila oku sola calua Yesu okuti, omuenyo waye muẽle u sule kuenda nda ci sukiliwa o pesela omuenyo waye. Ocili okuti oku kala ondonge ya Kristu ocikele cimue cinene. Ci sukila oku sokolola ciwa kocikele caco, loku ci tenda okuti ci kuete esilivilo linene.

Voku kala ondonge, mua kongela oku talisiwa ohali loku lambalaliwa, momo Yesu o popia hati: “Wosi ka tikula uti waye wekangiso oco a ñuame, ka pondola oku linga ondonge yange.” (Luka 14:27) Ondonge yocili ya Yesu, te yi nõlapo oku suvukiwa ndeci eye a suvukiwile. Yesu wa popiavo okuti o laika oku fila peka liovanyãli vaye.

Omo liaco, owiñi u kasi oku linga ungende laye, u sesamẽla oku kũlĩhĩsa lutate eci ca kongeliwa voku kala ondonge ya Kristu. Eye o lombolola ondaka yaco poku ta olusapo lumue hati: “Helie pokati kene okuti o yongola oku tunga osapalalo ka tumãla tete oku kũlĩhĩsa epese liaco, nda o kuete eci ci tẽla coku yi malusula? [Nda hacoko,] eye o sovola ociseveto, pole ka tẽla oku yi malusula.” (Luka 14:28, 29) Kuenje vana vo kuama toke ko Yerusalãi, osimbu ka va lingile olondonge via Yesu, va sukila oku sokolola lutate eci ca kongela vocikele caco. Yesu o lombolola ondaka yaco poku ta olusapo lukuavo.

Eye o popia hati: “Osoma yipi okuti yi kuete 10.000 kasualali yi li malehela oku yaka losoma yikuavo yi kuete 20.000, pole, ka tumãla tete oco a kũlĩhĩse nda hẽ o tẽla oku yi yula? Nda ka ci tẽla, osimbu unyali a kasi ocipãla, eye o tuma olomunga oku livondela loku linga ombembua.” Yesu o tukula etosi lia velapo poku popia hati: “Haico lene, wosi ka si ovikuata viaye, ka pondola oku linga ondonge yange.”—Luka 14:31-33.

Yesu ka kasi oku vangula lika lowiñi u kasi oku u kuama vonjila. Vosi va kasi oku lilongisa catiamẽla ku Kristu, va sukila oku tava kovina viosi eye a popia. Eci ci lomboloka okuti vana va yongola oku kala olondonge via Yesu, va sukila oku yuvula oku tiamisila utima kovokuasi avo kuenda komuenyo wavo. Va sukilavo oku sokolola kuenda oku likutilila catiamẽla kocikele caco.

Noke Yesu o vangula ondaka yimue a tukula Vohundo yo Komunda eci a sapuila olondonge viaye hati, ene “vumongua woluali.” (Mateo 5:13) Citava okuti Yesu wa yonguile oku popia okuti, ndeci omongua u kuatisa okulia oco ka ku ka vole, ekalo liolondonge viaye li pondolavo oku kuatisa omanu vakuavo okuti, va teyuiwa kovituwa vĩvi kuenda konepa yespiritu. Osimbu upange waye woku kunda u panda kesulilo o popia hati: “Ocili okuti omongua uwa. Pole, nda omongua wa sava, vu u savulula la nye?” (Luka 14:34) Olonjeveleli viaye via kũlĩha okuti omungua wo kocitumãlo cavo olonjanja vimue wa enda oku sava, loku tengiwa lovina vikuavo vio posi, noke yoku sava ka u silivila vali.

Omo liaco, Yesu o lekisa okuti ndaño omanu vana okuti olondonge viaye tunde osimbu, va sukila oku amamako oku endela vonjila va nõlapo. Nda va liwekapo, ka va kuata esilivilo, va linga ndomongua wa sava. Kuenje omanu va pondola oku va sepula. Handi vali, citava okuti ka va taviwa la Suku kuenda va sepuisa onduko yaye. Yesu o lekisa ndomo ku yuvuiwa ocituwa caco poku popia hati: “U o kuete ovatũi, a yevelele.”—Luka 14:35.